རྒྱལ་བསྟན་ཆ་ཚང་ཞིག་བོད་ཡིག་ནང་བསྒྱུར་རོགས།

འཛམ་གླིང་ནང་པའི་ཡུལ་གྲུ་ཁག་གི་རྒྱལ་བའི་གསུང་རབ་ཁག་ཅིག་བོད་ཡིག་ནང་ཡོད་མ་རེད། དེ་ཚོའི་གྲས་བོད་ཡིག་ནང་བསྒྱུར་ཐུབ་ན་བོད་ཀྱི་རྒྱལ་བསྟན་ལ་ཁ་སྐོང་ཆ་ཚང་ཞིག་བྱ་ཐུབ་སོང་བ་རེད། དེ་ནི་རླབས་ཆེན་གྱི་བྱ་བ་ཞིག་དང་གལ་ཆེན་ཞིག་ཀྱང་ཆགས་ཡོད། ཅེས་༧གོང་ས་མཆོག་གིས་གསུངས།

ཉིན་འདི་འགར་༧གོང་ས་མཆོག་གིས་གནས་མཆོག་ཝ་ར་ཎ་སིར་ཆོས་ཕྱོགས་ཀྱི་མཛད་འཕྲིན་སྐྱོང་གི་ཡོ་པ་ལྟར། ཕྱི་ཚེས་ ༡༡ ཉིན་༧གོང་ས་མཆོག་གིས་ཝ་ཎ་བོད་ཀྱི་གཙུག་ལག་སློབ་གཉེར་ཁང་དུ་བཀའ་བསྟན་དབྱིན་ཡིག་དང་ཧིན་དུ་སོགས་ཕྱི་སྐད་ཐོག་བསྒྱུར་ཡོད་པའི་དཔེ་དེབ་ཁག་ཅིག་དབུ་འབྱེད་གནང་ཡོད་པ་དང་། ཕྱི་དྲོའི་ཆུ་ཚོད་ ༢ སྟེང་ཝ་ཎ་མཐོ་སློབ་ཀྱི་ངེས་སྟོན་པ་དང་དགའ་ལྡན་ཁྲི་པ། ཤར་བྱང་ཆོས་རྗེ། བཀའ་ཁྲི་ཟམ་གདོང་རིན་པོ་ཆེ། བཀའ་བསྟན་བསྒྱུར་མཁན་ལོ་ཙཱ་བ། དེ་བཞིན་གདན་ས་ཁག་གི་བླ་སྤྲུལ་དང་ཕྱི་རྒྱལ་བ། རྒྱ་གར་གནད་ཡོད་མི་སྣ་དང་མང་ཚོགས་ ༧༠༠༠ ལྷག་འདུ་འཛོམས་ཐོག ༧གོང་ས་མཆོག་གིས་བཀའ་བསྟན་ཡིག་རིགས་གཞན་དུ་བསྒྱུར་རྒྱུའི་ལས་གཞིའི་ཐད་བཀའ་གནང་དོན། དེ་རིང་སྔ་དྲོ་བཀའ་བསྟན་བསྒྱུར་རྒྱུའི་ལས་གཞིའི་ཐོག་ངོས་ཀྱིས་མཁས་དབང་ཚོར་ཐུག་རྒྱུུའི་གོ་སྐབས་བྱུང་། ཁྱེད་ཚོས་བོད་སྐད་ནང་ཡོད་པའི་བཀའ་བསྟན་རྣམས་ཕར་བསྒྱུར་རྒྱུའི་འདུན་པ་བསྐྱེད་དེ་འབད་བརྩོན་གནང་བར་ཐུགས་རྗེ་ཆེ། འཛམ་གླིང་ནང་པའི་ཡུལ་གྲུ་ཁག་གི་རྒྱལ་བའི་གསུང་རབ་ཁག་ཅིག་བོད་ཡིག་ནང་ཡོད་པ་མ་རེད། དེ་ཚོའི་གྲས་བོད་ཡིག་ནང་ཚུར་བསྒྱུར་ཐུབ་ན་བོད་ཀྱི་རྒྱལ་བསྟན་ལ་ཁ་སྐོང་ཆ་ཚང་ཞིག་བྱ་ཐུབ་པ་བྱུང་བ་རེད་ལ། དེ་ནི་རླབས་ཆེན་གྱི་བྱ་བ་ཞིག་དང་གལ་ཆེན་ཞིག་ཀྱང་ཆོགས་ཡོདྲ། ཅེས་བཀའ་གནང་འདུག  

ཁོང་གིས་མུ་མཐུད་དུ་གསུངས་དོན། འདས་པའི་ལོ་བཅུ་ཕྲག་འགའི་རིང་ངོས་ཀྱིས་ནང་པའི་ཡུལ་གྲུ་ཁག་གི་དགེ་སློང་དང་མཁས་དབང་ཚོར་ཐུག་སྐབས། དཔལ་ན་ལཎྜའི་ཆོས་རྒྱུད་འཛིན་པའི་བོད་ཀྱི་ནང་ཆོས་དེ་ཐུན་མོང་མ་ཡིན་པ་ཞིག་ཆགས་ཡོད་འདུག་ལ། བསྟན་འགྱུར་ནང་ཡོད་པའི་ཕྱོགས་གླང་དང་། ཆོས་གྲགས། མཁན་ཆེན་ཞི་བ་འཚོའི་ཚད་མའི་གཞུང་དང་། སློབ་དཔོན་ཀ་མ་ལ་ཤིའི་ཚད་མའི་འགྲེལ་བ་དེ་ཚོ་བོད་ཡིག་ནང་ཞིབ་ཚགས་པོ་ཞིག་ཡོད་པ་རེད། ཚད་མ་རྣམ་འགྲེལ་གྱི་གཞུང་དེའང་བོད་ཡིག་དུ་བསྒྱུར་ཡོད་པ་རེད། རྒྱ་སྐད་ནང་དེ་ཚོའི་གྲས་ཕལ་ཆེར་ཡོད་པ་མ་རེད། ངོས་ཀྱིས་རྒྱ་རིགས་ཆོས་གྲོགས་ཤིག་ལ་སྐད་ཆ་དྲིས་སྐབས། སློབ་དཔོན་ཕྱོགས་གླང་གི་རིགས་དགུ་རྒྱ་སྐད་ནང་བསྒྱུར་ཡོད་ཚུལ་བཤད་ཀྱི་འདུག་ཀྱང་། ཚད་མ་ཀུན་བཏུས་དང་ཆོས་གྲགས་ཀྱི་གཞུང་དེ་དག་ཡོད་ཚོད་མི་འདུག

ཉེ་ཆར་རྒྱ་ནག་ཆོས་གྲོགས་ཚོའི་ནང་ཚད་མར་དོ་སྣང་གསར་པ་ཞིག་ཡོང་གི་འདུག རྒྱ་ནག་རི་བོ་རྩེ་ལྔའི་དགོན་པ་ཞིག་གིས་བོད་ཀྱི་བླ་མ་ཁག་ཅིག་ལ་འབྲེལ་བ་བྱས་ཏེ། ཚད་མའི་གཞུང་བསླབ་རོགས་ཞེས་ཞུས་འདུག རྒྱ་རིགས་ཆོས་གྲོགས་ཚོས་གཞི་ནས་ཚད་མའི་གཞུང་ལ་དོ་སྣང་གསར་པ་ཞིག་ཡོང་བཞིན་འདུག 

བོད་ཀྱི་ཚད་མའི་གཞུང་རྣམས་པཱ་ལིིའི་ཆོས་རྒྱུད་འཛིན་མཁན་ཡུལ་གྲུ་དག་ལས་ཅུང་རྒྱ་ཆེ་བ་ཡོད། ལེགས་སྦྱར་གྱི་ཆོས་བརྒྱུད་གཅིག་པུ་དེ་རྒྱ་ནག་ཆགས་ཡོད་ཀྱང་ཚད་མའི་གཞུང་དེ་ཙམ་བསྒྱུར་ཐུབ་ཡོད་པ་མ་རེད། དེར་བརྟེན། ནང་པའི་ཡུལ་གྲུ་ཁག་ཏུ་སངས་རྒྱས་པའི་ཚད་མའི་གཞུང་འཕེལ་རྒྱས་གཏོང་རྒྱུར་བོད་པས་ཞབས་འདེགས་བསྒྲུབ་ཐུབ་ཀྱི་ཡོད། ས་པཎ་གྱིས་ཚད་མ་རིག་གཏེར་དེ་བོད་པ་རང་གིས་བརྩམས་པ་ཞིག་ཆགས་ཡོད་ལ། ཆ་པ་ཆོས་སེང་ཡབ་སྲས་ཀྱི་ཚད་མ་དང་རྟགས་གསལ་འགྲོ་ལུགས་ཀྱང་བོད་དུ་བྱུང་སྟེ་ཡར་རྒྱས་ཕྱིན་པ་ཞིག་རེད། བོད་པས་རྒྱ་གར་མཁས་པའི་ཚད་མའི་གཞུང་མང་པོ་བོད་བསྒྱུར་གནང་ཡོད་པར་མ་ཟད། བོད་པ་རང་གིས་ཀྱང་ཚད་མའི་བསྟན་བཅོས་དུ་མ་ཞིག་བརྩམས་ཡོད། ཐལ་དང་ཕྱིར་ཞེས་པ་དེ་དག་ཆ་པ་ཆོས་སེང་སྐབས་ཤུགས་ཆེན་དར་བ་ཞིག་རེད། བོད་པས་ཚད་མའི་རིགས་ལམ་འགྲོ་སྟངས་ཐོག་ཤུགས་ཆེན་པོ་དོ་སྣང་བྱས་འདུག དཔེར་ན། ཐལ་ཕྱིར་ཞེས་པ་དེ་དག་བོད་སྐད་ནང་ལོ་བརྒྱ་ཕྲག་གོང་གོམས་འདྲིས་སུ་སོང་ཡོད་ཀྱང་རྒྱ་སྐད་ནང་ད་ལྟའང་ཡོད་པ་མ་རེད་ལ་དབྱིན་སྐད་ནང་དུའང་མེད། བོད་སྐད་ནང་གོམས་ཡོད་པའི་རིགས་ལམ་གཏན་འབེབས་དང་བརྡར་ཤ་གཅོད་རྒྱུའི་རིགས་སློབ་ཚན་གཞན་དག་ལ་སྦྱོར་དགོས་ཀྱི་འདུག་ཅེས་ཤེས་རིག་ཚོགས་ཆེན་ཐོག་སྐད་ཆ་བྱུང་ཡོད། ང་ཚོས་དེ་ལག་ལེན་བསྟར་ཐུབ་པ་ཡིན་ན། འཛམ་གླིང་སྟེང་ཤེས་ཡོན་སློབ་སྦྱོང་བྱ་རྒྱུར་རིག་པས་བདར་ཤ་གཅོད་རྒྱུར་ཕན་ཐོགས་ཡོང་གི་རེད། ཅེས་བཀའ་གནང་ཡོད།

༧གོང་ས་མཆོག་གི་མཐོ་སློབ་དེའི་གནས་སྟངས་དང་འབྲེལ་ནས་གསུངས་དོན། སྔོན་ནས་བཀའ་མོལ་ཐེངས་མང་བྱུང་བ་ལྟར། སློབ་གཉེར་ཁང་འདི་ཕུགས་རེ་ཡོད་པ་ཞིག་ཡིན་དུས་ང་ཚོས་འབད་བརྩོན་བྱས་ན་མདུན་ལམ་ཆེན་པོ་ཡོད་པ་རེད། ད་བར་ལམ་ཁ་འདིའི་ཐོག་འགྲོ་ཐུབ་པ་ནི་སྤོབས་པ་སྐྱེ་འོས་པ་ཞིག་རེད། ད་ལྟ་ལས་ཀ་མང་པོ་མགོ་བཙུགས་ཏེ་བསམ་པ་བཞིན་ལག་ལེན་དུ་འཁྱོལ་ཐུབ་པ་ཞིག་དང་། ད་དུང་ཡང་དེ་ལས་མང་བའི་འབྲེལ་བ་ཆེ་རུ་འགྲོ་བ་རེད་ལ། ལས་འཆར་གསར་པ་དང་བསམ་བློ་གསར་པ་སོགས་ཀྱང་ཡོང་གི་རེད། འགྲོ་བ་མི་ཞིག་ཡིན་པའི་ཆ་ནས། ང་ཚོའི་བྱ་བ་འདི་དག་གཞན་ཕན་ཆགས་ཡོད་དུས་ཚང་མས་ལྷག་བསམ་དང་སེམས་ཤུགས་བསྐྱེད་དེ་དཀའ་ངལ་ལ་གདོང་ལེན་ཐུབ་དགོས་པ་རེད། འདི་ནི་བོད་ཀྱི་མིང་ཡོད་པའི་སློབ་གཉེར་ཁང་ཞིག་ཆགས་ཡོད་སྟབས། ང་ཚོས་བོད་ཡིག་དང་འབྲེལ་བའི་སློབ་སྦྱོང་སོགས་བྱེད་ཀྱི་ཡོད། མི་རིགས་ཤིག་གི་ངོས་ནས་བཤད་ནའང་དེང་ཕྱིན་ལོ་རྒྱུས་སྟེང་འགོད་རྒྱུུའི་སློབ་གཉེར་ཁང་ཞིག་ཆགས་ཀྱི་ཡོད། སྔར་ཆོས་རྒྱལ་ཚོའི་སྐབས་མཐུན་རྐྱེན་འཛོམས་པོ་མེད་ནའང་བྱ་བ་རླབས་ཆེན་ཞིག་བསྒྲུབས་ཐུབ་ཡོད། ད་ལྟ་ང་ཚོར་ཕྱིའི་མཐུན་རྐྱེན་བཟང་པོ་འཛོམས་ཡོད་སྟབས་འཛམ་གླིང་ཤར་ནུབ་གང་དུ་འགྲོ་དགོས་ཀྱང་ལས་སླ་པོ་ཆགས་ཡོད། དེ་ལྟ་བུའི་ཆ་རྐྱེན་ཞིག་ཡོད་སྐབས་སྔོན་དང་མི་འདྲ་བ་ཞིག་བྱ་དགོས་པ་རེད། ང་ཚོ་རླབས་ཆེན་གྱི་མེས་པོ་ཚོའི་རྗེས་ཟིན་ཐུབ་མཁན་ཞིག་མ་བྱུང་ན། མི་རིགས་ཀྱི་མཚན་ཤས་དང་ཞབས་འདྲེན་ཆགས་ཀྱི་རེད། དེའི་སྟབས་ཀྱིས་སློབ་ཕྲུག་ཚོས་གསར་གཏོད་དགོས་བསམ་པའི་ཀུན་སློང་ཐོག་སློབ་སྦྱོང་ལ་ཧུར་ཐག་དགོས་པར་མ་ཟད། དགེ་རྒན་ཚོས་ཀྱང་འཕྲལ་སེལ་གྱི་ཕོགས་རག་རྒྱུ་ཙམ་མིན་པར་འགན་འཁུར་དང་དུ་ལེན་དགོས། ཞེས་བཀའ་གནང་ཡོད།

གསར་འགོད་པ། དཔལ་ལྡན།