ཕྱི་ཚེས་ ༡༢ ཉིན་གོ་ལའི་གནས་བབ་ཉམས་ཞིབ་ཚོགས་པའི་ཚོགས་གཙོ་ལེ་སི་ཁྲིར་བྷོ་རོན་ Lester Brown ལགས་ཀྱིས་༼ གྲུ་ཟུར་གྱི་འཇིག་རྟེན། ཇི་ལྟར་ཁོར་ཡུག་དང་དཔལ་འབྱོར་ཉམས་ཉེས་སྔོན་འགོག་བྱ་ཐབས། ༽ཞེས་པའི་ཉམས་ཞིབ་ཀྱི་དེབ་ཅིག་དཔར་འགྲེམ་བྱས་ཏེ། དུས་རབས་ཉེར་གཅིག་པའི་འཛམ་གླིང་གི་ཉེན་ཁ་ནི་རྡུལ་མཚོན་དམག་འཁྲུག་མ་ཡིན་པར་བཟའ་ཆས་མཛད་སྟོང་གི་འཇིགས་པ་རེད་ཅེས་བརྗོད་འདུག
ཁོང་གི་དེབ་དེའི་ནང་། འཛམ་གླིང་དངུལ་ཁང་ཁག་དང་འབྱོར་ཕྱུག་ལྡན་པའི་བཟོ་ཚོང་སྡེ་ཁག་དག་གི་དཔལ་འབྱོར་རིག་པ་བ་རྣམས་ཀྱིས། ཕྱི་ལོ་ ༢༠༡༡ ལོར་འཛམ་གླིང་གི་ཆ་སྙོམས་དཔལ་འབྱོར་འཕེལ་ཚད་བརྒྱ་ཆ་ ༣ འཕར་སྣོན་འབྱུང་རྒྱུ་ཡིན་པའི་ཚོད་དཔག་བྱེད་བཞིན་ཡོད། ཡིན་ནའང་། ཁོ་ཚོས་དེ་ལྟའི་དཔལ་འབྱོར་འཕེལ་རྒྱས་ཀྱི་མྱུར་ཚད་ལ་རམ་འདེགས་བྱ་ནུས་པའི་ཆུའི་ཐོན་ཁུངས་འདང་ངེས་ཤིག་ཡོད་མེད་དང་། དེང་སྐབས་འཛམ་གླིང་གི་བཟའ་འབྲུ་མཛད་སྤྱོད་ཚད་སྔར་ལས་ལྡབ་འགྱུར་གྱིས་འཕར་བཞིན་པ་འདིས། འཛམ་གླིང་གི་དཔལ་འབྱོར་འཕེལ་རྒྱས་ཐད་ཤུགས་རྐྱེན་ཅི་ཙམ་ཐེབས་མིན། མ་འོངས་པར་ཕོན་ཆེ་བའི་བཟའ་འབྲུའི་འབྱུང་ཁུངས་དེ་ལྟ་བུ་ཞིག་གང་ཞིག་ནས་མཁོ་འདོན་བྱ་དགོས་མིན་སོགས་ལ་དབྱེ་ཞིབ་རྩ་བ་ནས་བྱས་མེད། དེ་ནི་ཁོ་ཚོས་ད་ལྟའི་འཛམ་གླིང་རང་བཞིན་གྱི་བཟའ་ཆས་མཛད་སྤྱོད་ཀྱི་འགྱུར་ལྡོག་གནས་བབ་མ་མཐོང་བས་ཡིན་པ་གསལ་བཤད་བྱས་ཡོད་པ་རེད། ཅེས་བཀོད་འདུག
འཛམ་གླིང་ཁོར་ཡུག་ཉམས་ཞིབ་པ་ལེ་སི་ཁྲིར་བྷོ་རོན་ལགས་ཀྱིས། འདས་པའི་ལོ་བཅུའི་རིང་ལ། མིའི་རིགས་ཀྱིས་འཛམ་གླིང་གི་དཔལ་འབྱོར་འཕེལ་རྒྱས་ཀྱི་འབྱུང་རྩར་གྱུར་བའི་རང་བྱུང་ཁོར་ཡུག་གི་མཐུན་རྐྱེན་ལ་གནོད་སྐྱོན་བཟོས་ཏེ། ཤིང་ནགས་དང་། རྩྭ་ཐང་། ས་འོག་གི་རྒྱུགས་ཆུ། ས་ཞིང་བཅས་གནས་བབས་ལ་འགྱུར་ལྡོག་ཆེན་པོ་ཐེབས་སུ་བཅུག་ཡོད་པ་དང་། དེ་ལ་བརྟེན་ནས་འཛམ་གླིང་གི་ས་ཕྱོགས་གང་སར་ཆུ་ལོག་དང་། ཐན་པ་སོགས་ཀྱི་རང་བྱུང་གནོད་སྐྱོན་སྣ་ཚོགས་འབྱུང་བཞིན་པས་རྐྱེན་གྱིས། ཕྱི་ལོ་ ༢༠༠༧ ནས་ ༢༠༠༨ ལོར་འཛམ་གླིང་གང་སར་འབྲས། གྲོ་ཕྱེ། མ་རྨོས་ལོ་ཏོག སྲན་མ་བཅས་ཀྱི་རིན་གོང་འཕར་ཚད་གྱིས་འཛམ་གླིང་ལོ་རྒྱུས་ཟིན་ཐོ་ལས་བརྒལ་ཡོད། ལྷག་པར་དུ་རྒྱ་ནག་དང་རྒྱ་གར། ཧིན་རྡུ་ཉི་ཞི་ཡ་བཅས་སུ་བཟའ་ཆས་ཀྱི་རིན་གོང་འཕར་བཞིན་པ་དེས། མ་འོངས་པའི་འཛམ་གླིང་གི་དཔལ་འབྱོར་དང་ཆབ་སྲིད་བདེ་འཇགས་ཀྱི་ཐད་ཤུགས་རྐྱེན་ངན་པ་ཐེབས་སྲིད་པ་བརྗོད་ཡོད།
ཡང་དེབ་དེའི་ནང་དེང་སྐབས་བཟའ་ཆས་ཀྱི་རིན་གོང་ལྡབ་འགྱུར་གྱིས་འཕར་བཞིན་པའི་རྒྱུ་རྐྱེན་གཙོ་བོ་གསུམ་བགྲང་ཡོད་པ་དག་ནི། གཅིག འཛམ་གླིང་གི་མི་འབོར་ལོ་རེ་བཞིན་ས་ཡ་ ༨༠ རེ་འཕར་བཞིན་ཡོད་པ། གཉིས། ཤ་དང་འོ་མ། སྒོ་ང་སོགས་ཀྱི་བཅུད་ལྡན་ཟས་རིགས་སྤྱོད་མཁན་གྱི་འབྱོར་ལྡན་པ་ཇེ་མང་དུ་ཕྱིན་ཞིང་། རྒྱ་གར་གྱི་མི་གཅིག་གིས་ལོ་རེར་ཟས་རིགས་སྤྱི་རྒྱ་ ༡༨༢ དང་། ཨ་རིའི་མི་གཅིག་གིས་ལོ་རེར་སྤྱི་རྒྱ་ ༧༢༧ བཅས་ཀྱི་ཧེ་བག་ཆེན་པོ་ཤོར་བ། གསུམ། འབྲུ་རིགས་ཀྱིས་རླངས་འཁོར་སོགས་ཀྱི་སྣུམ་རིགས་བཟོ་བའི་ཚད་ལོ་རེ་ནས་ལོ་རེར་ཇེ་མཐོར་སོང་སྟེ། ཕྱི་ལོ་ ༢༠༠༧ ནས་ ༢༠༠༨ བར་ལྕགས་ཟོ་ས་ཡ་ ༢༠ ནས་ ༥༠ ལ་འཕར་ཡོད་པ་བཅས་བཀོད་འདུག
གསར་འགོད་པ། ཚེ་རིང་རྒྱལ།
གསར་འགོད་པ་ཚོ་ཁྱེད་རང་ཚོ་སེམས་ཤུགས་མ་ཆག སྔོན་མ་རྡི་སྦིས་དགེ་བཤེས་ཚང་གིས། ཚེ་ཏུན་ཞབས་དྲུང་ཚང་ལ། ཁྱོས་ཡར་གི་དེ་མི་འགྲིག མར་གི་དེ་མི་འགྲིག་ལབ་ནས། ད་ཁྱེད་རང་གིས་བྲིས་པའི་དག་ཡིག་དེའི་ཁ་ཡིག་བྲིས་ཡོད་ནོ་ནོར་བསྡད་ཡོད་ཀི་ཞེས་གསུངས་པ་འདྲ་པོ་རེད། ཤུ་རེ་བྱོས་དང་། ཡར་རྒྱས་འགྲོ་ནི་རེད། ངོ་མ། ཆང་འཐུང་ནས་ཀླད་རྡིབ་བྱུང་ཡོད་ནི་ཡིན་ན། དེ་མི་ཧྲ་ཡ།
གྲོགས་ཚེ་རིང་རྒྱལ་ལགས།
ཕྲན་ཆུང་ངས་ཐེངས་མང་བཤད་པ་ཡིན་ཅི་ཞིག་བྲིས་རུང་ཁ་བྱང་འཆུག་གི་མ་འཇུག་ཟེར་གྱིན་ཡོད། ཡང་ནས་ཡང་དུ་བཤད་ན་ཡང་ནས་ཡང་དུ་འཆུག་གི་འཇུག་གི
དོན་ཁོ་ལ་ཡང་བཤད་པ་ཡིན། ཁྱེད་གཉིས་ཀྱིས་ཆང་འཐུང་བ་མང་དྲགས་པ་མ་རེད།
མ་གཞི་དེབ་ཀྱི་ནང་དོན་སྙིང་བསྡུས་ཡག་པོ་བྲིས་འདུག འོན་ཀྱང་མཛད་སྟོང་ཡིན་ནམ་འཛད་སྟོང་ཡིན། ད་དུང་ ཧིན་རྡུ་ཉི་ཞི་ཡ་ཟེར་བ་ལས་ཨིན་ཌོ་ནི་ཤི་ཡ་ཟེར་ན་ལེགས་པ་མི་འདུག་གམ།
འཛད་སྟོངས་ཞེས་འབྲི་དགོས། འཛད་ནི་ཉུང་དུ་འགྲོ་བའི་དོན་དང་། སྟོངས་ནི་ཤུལ་མེད་དུ་གྱུར་པའི་དོན་ཡིན།
དུས་བབ་གསར་འགོད་པ་རྣམས་ལ་གུས་པ་སྤྲོ་སེམས་དང་ལྡན་པའི་ངང་ཐུགས་རྗེ་ཆེ་ཞུ་བ་ཡིན།
ང་ཚོ་བོད་རིགས་མང་པོ་རྒྱལ་གཞན་སྐད་ཡིག་གི་ཆུ་ཚད་ཞན་པ་དང་མེད་པ་སོགས་ཀྱིས་སྤྱི་ཚོགས་ཀྱི་ཤེས་བྱ་སྣ་མང་ལ་བལྟ་བའི་མཐོང་ནུས་ཉམས་ནས་དེ་འབྲེལ་མཐོང་རྟོགས་ཀྱི་རྒྱ་ཁྱོན་ཡང་ཆུང་བས། ༼ དུས་བབ ༽ཀྱི་ལམ་ནས་རང་རིགས་དེ་དག་ལ་ཁྱེད་ཅག་གིས་སྤྱི་ཚོགས་ཤེས་བྱའི་རྨོང་མུན་སེལ་བ་ཅི་སྟེ་སྤྲོ་བས་མི་བསྟོད།
དཔྱོད་ཡངས་ལེ་སི་ཁྲིར་བྷོ་རོན་ལགས་ལ་བཀྲ་ཤིས་བདེ་ལེགས་ཞུ་བཞིན་ཡོད་དོ།།
དངོས་ནས་ཕུགས་རྒྱང་རིང་པའི་གཏམ་བཤད་ཁ་ཚ་དགོས་གཏུགས་མ་ཞིག་རེད།