ཀརྨ་བླ་བྲང་གི་དོན་རྐྱེན་སྐོར་ལ་སྤྱི་འཐུས་ཀྱི་གསལ་བཤད།

ཉེ་ཆར་རྒྱལ་པ་ཀརྨ་པའི་བླ་བྲང་དང་འབྲེལ་ཏེ་དངུལ་གྱི་གནད་དོན་ཞིག་བྱུང་བ་ནི། ལས་བྱེད་པ་དག་གིས་ཡུལ་ཁྲིམས་མ་ཤེས་པས་ལན་པ་ཞིག་ལས་ཁོང་སྐུ་སྒེར་ལ་ཉེས་པ་གང་ཡང་མེད་པའི་ཡིད་ཆེས་གཙང་མ་ཡོད། ཅེས་བོད་མི་མང་སྤྱི་འཐུས་ཚོགས་གཙོས་གསུངས་ཡོད།

དེ་རིང་ཕྱི་དྲོའི་ཆུ་ཚོད་ ༣ སྟེང་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་བསྐྱངས་ཏེ། བོད་ཀྱི་གསར་འགོད་པ་རྣམས་ལ་ཐེངས་འདིའི་དཔལ་རྒྱལ་པ་ཀརྨ་པའི་བླ་བྲང་དུ་བྱུང་བའི་གནད་དོན་སྐོར་ནས་གསལ་བཤད་ཅིག་གནང་ཡོད། སྐབས་དེར་བོད་མི་མང་སྤྱི་འཐུས་ཚོགས་གཙོ་མཆོག་གིས། ད་ལྟ་རྒྱལ་པ་ཀརྨ་པའི་བླ་བྲང་དང་འབྲེལ་ཏེ་དངུལ་གྱི་གནས་ཚུལ་ཞིག་བྱུང་བའི་སྐོར་ལ་བོད་མིའི་སྤྱི་ཚོགས་ནང་དུ་སྐད་ཆ་འདྲ་མིན་སྣ་ཚོགས་ཤིག་ཡོང་གི་འདུག་ལ། ལྷག་པར་དུ་བོད་ནང་དུ་ད་ལྟའི་ཆར་གནས་ཚུལ་གང་འདྲ་ཞིག་ཁྱབ་ཀྱིན་ཡོད་མེད་ཤེས་ཀྱི་མེད་སྟབས། བོད་ནང་དུ་གནས་ཚུལ་གསལ་བོ་ཞིག་འཁྱོལ་ཐུབ་པ་བྱ་རྒྱུ་གལ་ཆེན་པོ་རེད། ཅེས་དང་། ཁ་སང་ཚེས་ ༢༨ ཉིན་སྤྱི་འཐུས་རྒྱུན་ལས་འཛོམས་ཏེ་གནས་ཚུལ་འདིའི་ཐད་གྲོས་བསྡུར་བྱས་པ་དང་། ཕྱི་དྲོའི་ཆུ་ཚོད་ ༣ དང་ཕྱེད་ཀའི་སྟེང་ཚོགས་གཙོས་སྣེ་ཁྲིད་པའི་རྒྱུན་ལས་ཁག་ཅིག་མར་བཅར་བ་ཡིན། ང་ཚོ་རིན་པོ་ཆེར་མཇལ་སྐབས་རིན་པོ་ཆེ་ཐུགས་ལྷོད་ལྷོད་ངང་བཞུགས་འདུག་ལ། ཁོང་གིས་ཐུགས་འཚབ་ཆེན་པོ་དེ་ཙམ་གནང་གི་མི་འདུག དེའི་སྟེང་ནས་ང་ཚོས་གསལ་བོ་ཞིག་ཤེས་ཐུབ་པ་ནི་རྒྱལ་པ་ཀརྨ་པ་ཁོང་རང་ལ་ཐེངས་འདིའི་གནད་དོན་ཐད། ཉེས་པ་གང་ཡང་མེད་པ་གསལ་བོ་ཆགས་ཡོད། གཞན་ང་ཚོ་མར་བཅར་སྐབས་བོད་མི་མང་སྤྱི་འཐུས་རྒྱུན་ལས་ཀྱི་ངོས་ནས་སེམས་འཚབ་ཡོད་པ་དང་། ཐེངས་འདིའི་གནད་དོན་དང་འབྲེལ་ཏེ་ཁོང་སྐུ་སྒེར་ལ་མཚན་སྨོད་མི་ཡོང་བའི་ཆེད་དུ་མཐུན་འགྱུར་ག་རེ་ཞུ་དགོས་ཀྱི་ཡོད་ཀྱང་ཞུ་རྒྱུ་དང་། གཙོ་བོ་གདུང་སེམས་མཉམ་སྐྱེད་ཞུ་རྒྱུའི་ཆེད་དུ་བཅར་བ་ཡིན་ཞེས་ཞུས་ཡོད། ཅེས་དང་།  

སྐབས་དེར་༧རྒྱལ་པ་ཀརྨ་པ་མཆོག་གིས་གནས་ཚུལ་འདིའི་རིགས་ངས་ནམ་རྒྱུན་དེ་ཙམ་ཤེས་ཀྱི་མེད་ལ། དུས་རྒྱུན་ཐེ་ཇུས་ཀྱང་བྱེད་ཀྱི་མེད་ཅེས་བཀའ་གནང་གི་འདུག་སྟབས། ང་ཚོས་ཡིད་ཆེས་བྱས་པ་ལྟར་༧རྒྱལ་པ་ཀརྨ་པ་སྐུ་སྒེར་གྱི་ངོས་ནས་གནས་ཚུལ་འདི་དང་ཐད་ཀར་འབྲེལ་བ་མེད་པ་གསལ་བོ་ཆགས་ཡོད་ཟེར།

ཚོགས་གཙོ་མཆོག་གིས་མུ་མཐུད་དུ་གསུངས་དོན། ཐེངས་འདིའི་དངུལ་དེ་དག་གི་ཡོང་ཁུངས་ནི་ང་ཚོས་ཚིག་ཐག་བཅད་དེ། བླ་མར་སྐྱབས་རྟེན་དང་བསྔོ་རྟེན། འབུལ་བ་ཕུལ་བ་བཅས་ཀྱི་སྟེང་ནས་ཡོང་བ་ཞིག་ཏུ་ངོས་འཛིན་བྱེད་ཐུབ་ཀྱི་ཡོད་མོད། ད་ལྟའི་ཆར་རྒྱ་གར་གྱི་གསར་འགྱུར་བརྒྱུད་ལམ་ཁག་ཅིག་ནང་༧རྒྱལ་པ་ཀརྨ་པ་ཁོང་རྒྱ་ནག་གི་སོ་པ་རེད་ཟེར་བ་དང་། དངུལ་དེ་དག་ནག་ཚོང་ངམ་ཁྲིམས་འགལ་གྱི་ཚོང་བརྒྱབ་སྟེ་རག་པ་རེད་ཟེར་བ་ལྟ་བུ་ཡོང་གི་འདུག་པས། དེའི་རིགས་བདེན་པ་མིན་པ་ང་ཚོས་གསལ་བོ་བྱས་ཏེ་བཤད་ཐུབ་ཀྱི་ཡོད་ལ། གནད་དོན་དེ་གཞིས་བྱེས་བོད་མི་ཡོངས་ཀྱིས་གསལ་བོར་མཁྱེན་དགོས། ༧རྒྱལ་པ་ཀརྨ་པ་ཁོང་སྒེར་ལ་མཚོན་ན་དགུང་ལོ་ཆུང་ཆུང་སྐབས་ནས་ཁོང་གི་སྐུ་སྲོག་འབེན་དུ་བཙུགས་ཏེ་ཚུར་སྐྱབས་བཅོལ་དུ་ཕེབས་པ་དང་། ད་ལྟ་རྒྱ་གར་ནང་དུ་བཞུགས་རིང་རྒྱུད་སྟོད་དགོན་པ་རང་དུ་རྒྱ་གར་སྐོར་སྲུང་བ་སོགས་ཀྱི་སྟངས་འཛིན་འོག་བཞུགས་ཡོད་པ་ལས། ཁོང་གི་ཐུགས་འདོད་གཞིར་བཟུང་གིས་ག་ས་གང་དུ་ཕེབས་རྒྱུའི་རང་དབང་མེད་པ་ང་ཚོས་ཤེས་གསལ་ལྟར་ཡིན་ལ། ཁོང་གི་མཛད་འཆར་གང་ཞིག་ཡིན་རུང་། རྒྱ་གར་གཞུང་གིས་སྟངས་འཛིན་གྱི་འོག་ནས་འགྲོ་བཞིན་ཡོད། དེ་དག་ཐམས་ཅད་རྒྱ་གར་སྐོར་སྲུང་བས་མཁྱེན་བསྡད་པའི་གནས་ཚུལ་ཞིག་ལས་མ་མཁྱེན་པ་གང་ཡང་མེད།

སྤྱིར་བཏང་༧རྒྱལ་པ་ཀརྨ་པ་སྐུ་ཕྲེང་རིམ་བྱོན་གྱི་མཛད་རྗེས་ལ་བརྟེན་ནས་འཛམ་གླིང་གི་ཕྱོགས་གང་སར་དད་ལྡན་གྱི་སྐྱེས་བུ་དང་། རྗེས་མཇུག་མང་བོ་ཡོད་སྟབས་སེང་གྷ་པོར་དང་ཐེ་ལན་ཌི། ནུབ་ཕྱོགས་རྒྱལ་ཁབ་ཁག བོད་ནང་སོགས་དེ་དག་ཡོངས་ཀྱིས་དད་པ་བྱེད་ཡུལ་དང་ང་ཚོའི་སྤྱི་ཚོགས་ནང་བོད་བརྒྱུད་ནང་བསྟན་གྱི་བླ་ཆེན་ཞིག་དང་། མི་མང་གིས་དད་གུས་དང་ཡིད་ཆེས་བྱེད་ས་ཞིག་རེད། ཁོང་སྐུ་སྒེར་ལ་མཚོན་ནའང་ད་ལྟའི་ཆར་བསླབ་པ་སློབ་གཉེར་གནང་རྒྱུ་དང་ནང་ཆོས་དར་སྤེལ་གཏོང་རྒྱུ། འཛམ་གླིང་ཞི་བདེ་དང་ཁོར་ཡུག་སྲུང་སྐྱོབ་བཅས་ཀྱི་ཐད་དུ་ཕྱག་ལས་མང་བོ་གནང་སྟེ་བོད་བསྟན་པ་ཆབ་སྲིད་ཀྱི་ཐོག་ཏུ་ཞབས་འདེགས་གནང་མཁན་ཞིག་ལས། དོགས་གཞི་བྱེད་ས་ཞིག་ཆགས་ཀྱི་མེད་ལ། དེ་འདྲ་བྱེད་དགོས་པའི་གཞི་རྩ་གང་ཡང་མེད། ཅེས་གསུངས་སོང་།

མཇུག་མཐར་ཁོང་གིས་ཐེངས་འདིའི་དངུལ་གྱི་གནད་དོན་དང་འབྲེལ་ཏེ་གསལ་འགྲེལ་གནང་དོན། དཔལ་འབྱོར་ཉར་ཚགས་བྱེད་སྟངས་ཐད། མང་ཚོགས་ཚོས་འབུལ་བ་ཕུལ་བའི་དངུལ་དངོས་ཐོག་ཀརྨ་པ་མཆོག་གིས་ནམ་རྒྱུན་གཟིགས་ཞིབ་གནང་གི་མེད་ལ། ཁ་སང་ཁོང་གིས་དེ་ཚོའི་ཐོག་ཏུ་ཐེ་ཇུས་གནང་གི་མེད་ཅེས་བཀའ་གནང་བ་ལྟར། དཔལ་འབྱོར་གྱི་གནས་སྟངས་ག་རེ་ཡིན་ནའང་གཤམ་འོག་གི་ལས་བྱེད་དག་གིས་བྱེད་ཀྱི་ཡོད། འོན་ཀྱང་ལས་བྱེད་པ་དག་གིས་ཡུལ་མིའི་ཁྲིམས་ཀྱི་འགྲོ་སྟངས་མ་ཤེས་པའི་དབང་གིས་ཐེངས་འདིར་དཔལ་འབྱོར་ཉར་ཚགས་བྱེད་སྟངས་ཐད་འཐུས་ཤོར་དུ་ཕྱིན་ཡོད་ལ། དེ་ནི་ཡུལ་ཁྲིམས་དང་མ་མཐུན་པའི་གནས་སྟངས་ཤིག་ཀྱང་ཆགས་ཡོད། དེའི་ཐད་དུ་རྒྱ་གར་གཞུང་གིས་ཁྲིམས་ཐོག་ནས་ཞིབ་འཇུག་གནང་སྟེ་དེ་ལ་གྲུབ་འབྲས་གང་འདྲ་ཞིག་བྱུང་ཡང་། དེ་ང་ཚོས་བརྩི་སྲུང་བྱེད་དགོས། ཡིན་ནའང་། དེ་དང་འབྲེལ་ཏེ་ཁོང་ལ་མཚན་སྨོད་མང་བོ་ཞུ་བཞིན་པ་ནི་གཏན་ནས་གཞི་རྩ་མེད་པ་ཞིག་ཆགས་ཡོད། ཅེས་གསུངས།

ཡང་ཁོང་གིས་ད་ལྟའི་ཆར་བཙན་བྱོལ་བོད་གཞུང་འཛིན་སྐྱོང་བཀའ་ཤག་གིས་ག་རེ་གནང་དགོས་ཀྱི་ཡོད་མེད་ཐད་གསུངས་དོན། ད་ལྟ་གནང་བཞིན་པ་རེད་ལ། སྤྱི་འཐུས་ལྷན་ཚོགས་ཀྱི་ངོས་ནས་གནས་ཚུལ་འདི་གསལ་བོ་མ་ཆགས་བར་དུ་དྲང་པོ་དང་བདེན་པ་གང་ཡིན་པ་དེར་རྒྱབ་སྐྱོར་ཞུ་རྒྱུ་དང་། གནས་ཚུལ་གསལ་བོ་མ་ཆགས་བར་ག་རེ་གནང་དགོས་ཀྱི་ཡོད་ནའང་དེ་བཞིན་ཞུ་རྩིས་ཡོད་ཟེར།

ཐེངས་འདིའི་གསར་འགོད་གསལ་བསྒྲགས་སྐབས་ད་དུང་སྤྱི་ཚོགས་ནང་༧རྒྱལ་པ་ཀརྨ་པ་ཁོང་འཛིན་བཟུང་བྱས་པ་རེད་ཟེར་བ་དང་ཁོང་གི་སྤུན་མཆེད་འཛིན་བཟུང་བྱས་པ་རེད་ཟེར་བ་ལྟ་བུའི་གནས་ཚུལ་འདྲ་མིན་ཡོང་གི་འདུག་མོད། དེ་དག་གཅིག་ཀྱང་བདེན་པ་མིན་པར་ཁོང་རྒྱུད་སྟོད་གྲྭ་ཚང་དུ་ཐུགས་ལྷོད་ལྷོད་བྱས་ཏེ་བཞུགས་ཡོད། ཡིན་ནའང་། ཁོང་གི་དངུལ་གཉེར་དང་རྒྱ་གར་ཡུལ་མི་གཉིས་འཇུ་བཟུང་བྱས་པ་དངོས་ཡོད་གནས་ཚུལ་རེད་ཟེར།

གསར་འགོད་པ། ཨ་རིག་འགྱུར་མེད།