སུ་ཇཱ་བོད་ཁྱིམ་གྱི་འཛིན་རིམ་བཅུ་བའི་སློབ་མ་ཚེ་ལོ་རྒྱལ་དང་ཚེ་རིང་རྡོ་རྗེ་གཉིས་ཟླ་འདིའི་ཚེས་ ༣༠ ཉིན་ལྡི་ལི་ནས་ལམ་ལ་ཆས་ཏེ། བོད་སྐད་ཡིག་སྲུང་སྐྱོབ་དང་གོང་སྤེལ་གཏོང་རྒྱུར་སྐུལ་སློང་ཆེད་ལྕགས་རྟ་སྐོར་སྐྱོད་ཀྱི་ལས་འགུལ་ཞིག་སྤེལ་གྱིན་ཡོད་པ་ལྟར་ཁ་སང་ཅན་ངྷི་གྷར་དུ་འབྱོར་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་ཚེ་ལོ་རྒྱལ་ལགས་སུ་སྐད་ཆ་དྲིས་སྐབས། ངེད་གཉིས་ཀྱིས་ལྕགས་རྟའི་སྐོར་སྐྱོད་ཀྱི་ལས་འགུལ་མགོ་བརྩམས་པ་ནས་ད་བར་བོད་མི་ཡོད་སའི་ས་ཆ་གང་དུ་འབྱོར་ཡང་། བོད་པ་ཚོས་རྒྱབ་སྐྱོར་རོགས་རམ་ཡག་པོ་གནང་གནང་སོང་ལ། འདས་པའི་བདུན་ཕྲག་གཉིས་རིང་གི་སྐོར་སྐྱོད་སྐབས། རྒྱ་གར་གྱི་ཚགས་ཤོག་གསར་ཁང་དྲུག་དང་བརྙན་འཕྲིན་ཁང་གཅིག་བཅས་ཀྱིས་གསར་འགྱུར་སྤེལ་གཏོང་བྱས་སོང་ཟེར།
ཡང་ཁོང་གིས་ངེད་ད་བར་རྡེ་ར་རྡུན་དང་སེ་ལ་ཀོའུ། སྤོན་ཌ་སོགས་སུ་ཕྱིན་སྐབས་བོད་མིའི་གཞིས་ཆགས་ཁག་གི་མང་ཚོགས་ལ་བོད་ཡིག་གི་གལ་ཆེན་རང་བཞིན་དང་། ད་ལྟའི་བོད་ཡིག་གི་ཛ་དྲག་གནས་བབ་སྐོར་ལ་སྐད་ཆ་བཤད་པ་ཡིན། སྤོན་ཌ་སམ་བྷོ་ཊ་ཉིན་སློབ་ཏུ་སྐད་ཆ་བཤད་སྐབས། སློབ་ཕྲུག་ཚོས་ཧ་ཅང་དོ་སྣང་ཆེན་པོ་བྱས་སོང་བ་མ་ཟད། ནམ་རྒྱུན་གནད་ཡོད་མི་སྣ་ཚོས་སྐད་ཆ་བཤད་སྐབས། སློབ་ཕྲུག་ཚོས་དོ་སྣང་དེ་ཙམ་བྱེད་ཀྱི་མེད་མོད་ཐེངས་འདིར་ཚང་མས་ཧ་ཅང་དགའ་བོ་བྱེད་ཀྱི་འདུག་ཟེར་བ་བཞིན་དེ་རུ་ཉིན་གཉིས་ལ་བསྡད་དེ་སློབ་ཕྲུག་ཚོ་དང་ད་ལྟའི་བོད་ཕྱི་ནང་གི་སྐད་ཡིག་གནས་བབ་དང་། བོད་སྐད་ཡིག་གི་ཉམ་ཆག་སྐོར་ལ་བགྲོ་གླེང་དང་གཏམ་བཤད་བྱས་པ་ཡིན་ཟེར།
ཁོང་གཉིས་ཀྱིས་ལྕགས་རྟ་སྐོར་སྐྱོད་ཀྱི་ལས་འགུལ་འདི་མུ་མཐུད་སྤེལ་རྒྱུ་ཡིན་པ་དང་། སང་ཉིན་ནས་བཟུང་པན་ཇབ་མངའ་སྡེའི་ནང་སྐོར་སྐྱོད་བྱ་འཆར་ཡོད་འདུག་ལ། རིམ་གྱིས་ཧི་མ་ཅལ་མངའ་སྡེའི་ནང་འཛུལ་ཏེ་སྦིར་དང་མུ་ན་ལི་ཕྱོགས་སུ་སྐོར་སྐྱོད་ཀྱིས་ཟླ་ ༣ ཚེས་ ༡༠ ཉིན་བཞུགས་སྒར་ངྷ་རམ་ས་ལ་རུ་མཇུག་བསྒྲིལ་རྒྱུ་ཡིན་འདུག
གསར་འགོད་པ། ཨ་རིག་འགྱུར་མེད།
སྐད་ཡིག་ལ་སེམས་ཁུར་བྱས་པར་རྗེས་སུ་ཡི་རང་ཡོད།།
ཁྱེད་གཉིས་ལ་ འཚམས་དྲིན་བཀྲིས་བདེ་ལེགས་གྲང་མེད་ཞུ་།