ཕྱི་ཚེས་༣ཉིན་རྒྱ་ནག་རྒྱལ་ཡོངས་འཐུས་མིའི་ཚོགས་ཆེན་དང་རྒྱལ་ཡོངས་སྲིད་གྲོས་ཀྱི་ཚོགས་ཆེན་གཉིས་འཚོགས་མགོ་བརྩམས་ཡོད་པ་དང་།ཉིན་༡༢རིང་གི་ཚོགས་ཆེན་དེ་གཉིས་ནི། ད་ཆར་རྒྱ་ནག་ནང་ཛ་དྲག་གི་ངོ་བོར་འཕེལ་བཞིན་པའི་མེ་ཏོག་སྤྲུའི་གསར་བརྗེ་ལས་འགུལ་དང་དུས་མཉམ་འཁེལ་བཞིན་ཡོད་སྟབས། རྒྱ་གཞུང་གིས་དོགས་ཟོན་ཆེན་པོས་དྲག་ཆས་ཉེན་རྟོག་པ་དང་སྐོར་སྲུང་དམག་མི་མང་པོ་པེ་ཅིན་གྲོང་ཁྱེར་ཡོངས་སུ་འགྲེམས་འཇོག་བྱས་ཏེ།གནམ་བདེ་སྒོ་མོ་ཆེའི་ཐང་ཆེན་དང་། མི་དམངས་འཐུས་མིའི་ཚོགས་ཁང་གི་ཉེ་འཁོར་གཞུང་ལམ་ཡོད་ཚད་ལ་བཀག་སྡོམ་ཤུགས་ཆེན་བྱེད་ཀྱི་ཡོད་འདུག
གཞུང་གིས་སྤྲད་པའི་འགྲོ་སྐྱོད་ལག་འཁྱེར་མེད་ཚེ་ས་ཁུལ་དེ་དག་ནང་མི་སེར་དཀྱུས་མ་གཅིག་ཀྱང་གཏོང་གི་མེད་པ་མ་ཟད།གྲོང་ཁྱེར་གྱི་མི་ ༧༣༩༠༠༠ལྷག་ལ་འཕྲལ་སེལ་ཉེན་སྲུང་བའི་ལས་ཀ་སྤྲད་དེ།པེ་ཅིན་གྲོང་ཁྱེར་གྱི་སྤྱི་ཚོགས་ཧྲིལ་པོར་ལྟ་སྲུང་བཀག་སྡོམ་བྱས་ཡོད་འདུག རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར།རྒྱ་ནག་མི་དམངས་འཐུས་མི་ཚོགས་ཀྱི་མགྲིན་ཚབ་པ་ལིས་ཀྲོ་ཞིན་གྱིས། ད་ལོར་རྒྱ་གཞུང་གིས་དམག་དོན་འགྲོ་གྲོན་ཐད་ཨ་སྒོར་དུང་ཕྱུར་༩༡༥ལྷག་བཏང་ཡོད་སྐོར་བརྗོད་ཡོད་འདུག
གསར་འགོད་པ། ཚེ་རིང་རྒྱལ།
