ངའི་བོད་དོན། གྲྭ་གཞོན་ཞིག་གི་འོས་འགན།

                                                                                             རིགས་སློབ། གོང་དཀར་ངག་རྣམ། 

གནད་དོན་ཞིག་གི་སྐོར་གླེང་དུས་ཐོག་མར་དེ་དང་རང་ཉིད་བར་གྱི་གལ་ཆེའི་འབྲེལ་བ་ཅི་ཞིག་ཡོད་མེད་དང་། དེའི་སྐོར་ཞིབ་པར་འབྲི་བའི་ཚེ་ནའང་གཙོ་བོ་རང་སྟེང་གི་འོས་འགན་དང་ནུས་པ་གང་འདྲ་ཞིག་ཡོད་མེད་དེ་གླེང་མོལ་དེར་མཚོན་ན་སྲོག་ལྟ་བུར་གྱུར་ཡོད་པས་དེར་བསམ་གཞིག་བྱ་དགོས་སྙམ། བོད་དོན་ཤོད་པའི་སྐབས་སུའང་ལྟ་ཚུལ་འདི་འདྲ་ཞིག་བཟུང་ན། ད་གཟོད་ཁྱེད་ཀྱིས་བོད་དོན་སྐོར་ཐུང་ཐུང་ཞིག་ལས་མ་གླེང་ནའང་། དེ་ལ་དོན་སྙིང་ཡོད་ལ་གླེང་རིན་ཡང་ཡོད། དེ་བས་ངའི་བོད་དོན་ནི་བོད་ཀྱི་གྲྭ་གཞོན་སློབ་གཉེར་བ་ཞིག་གི་ངོ་བོའི་ཐོག་ནས་སྨྲ་དགོས་ཀྱི་ཡོད། རང་སྟེང་གི་འགུལ་སྐྱོད་གསར་པ་ཞིག་དང་སེམས་ཚོར་ཞིག་སྨྲ་དགོས་ནའང་ངོ་བོ་འདི་ལས་མི་བརྒལ་བའི་དྲན་ཤེས་བསྟེན་དགོས། གང་ཡིན་ཟེར་ན། རྩོམ་ཡིག་དང་རང་ཉིད་བར་རྒྱང་ཐག་རིང་པོ་ཞིག་གིས་ཆོད་བཞིན་དུ་ཉ་ཉོག་ལུང་པ་གང་བཤད་པ་དེས་གང་ལའང་ཕན་གྱི་མེད་པའི་མྱོང་ཚོར་བྱུང་། དེ་ལས་ད་ལྟ་སྐྱོད་བཞིན་པའི་འགྲོ་ལམ་དེ་དང་དེའི་ཐོག་ནས་བྱུང་བའི་དྲན་སྣང་རྣམས་སྲོང་པོར་སྨྲས་ན། རྩོམ་ཡིག་གི་གལ་ཆེའི་ཐོབ་ཐང་ཐོག་ནས་བལྟས་ནའང་ཐལ་ཆ་གང་ཡང་མེད་སྙམ།

 འདིའི་ཐད་ལ་ཁ་སྔོན་ཕྱི་ཟླ་བཅུ་གཉིས་པའི་ནང་མཁས་དབང་ཟམ་གདོང་རིན་པོ་ཆེས་འདི་ཕྱོགས་སུ་རང་ངོས་ནས་བོད་ཀྱི་སྐད་ཡིག་གི་སྤྱོད་སྒོའི་ཐོག་བསམ་གཞིགས་དང་། དོ་འཁུར། ཐ་ན་སྦྱོང་སྤྱོད་ཀྱི་སྤོབས་སེམས་ཙམ་ཡང་མེད་པར་རང་དགར་རྒྱ་མིས་བོད་ཀྱི་སྐད་ཡིག་གཏོར་བཅོམ་བྱས་པར་ངོ་རྒོལ་བྱེད་པར་བཟང་སྤྱོད་ཀྱི་ཐོབ་ཐང་མེད་པར་གསུངས་པ་ལྟ་བུ་རེད། ངས་འདི་ལ་བདེན་ཆ་ཞིག་ཡོད་པའི་ངོས་འཛིན་གཏིང་གཟབ་བྱེད་ཀྱི་ཡོད། ང་ཚོས་ག་དུས་ཀྱང་ལས་འགན་དང་འོས་འགན་གྱི་དབྱེ་བ་འབྱེད་དགོས་ཤིང་། ལྷག་པར་ལས་འགན་ལས་འོས་འགན་གལ་ཆེ་བའི་ལྟ་ཚུལ་ཞིག་ཤོད་དགོས་ཀྱི་ཡོད་སྙམ། སྤྱི་ཚོགས་ཀྱི་གལ་འགངས་ཅན་གྱི་གནད་དོན་འགའ་ཤས་རང་ཉིད་ཀྱི་གཡོལ་དུ་མེད་པའི་ལས་འགན་ཞིག་ཏུ་བརྩི་དགོས་ཀྱང་། ད་ལྟ་སྐབས་སུ་མ་བབ་པའམ་གལ་ཏེ་དེ་ལ་ཞུགས་ནའང་སྒྲུབ་ཕྱོགས་ཀྱི་བྱ་བ་གཞན་ཞིག་ལ་མངོན་མེད་ཀྱི་དོ་ཕོག་འགྲོ་བཞིན་ཡོད། དཔེར་ན། སློབ་ཕྲུག་ཅིག་ལ་མཚོན་ན་ཁོའི་འོས་འགན་དང་ནུས་པ་འདོན་ས་གཙོ་བོ་ནི་སློབ་སྦྱོང་ཡིན་དགོས་པ་ལས། སློབ་སྦྱོང་གི་དུས་ཡུན་ནང་ཆབ་སྲིད་ཀྱི་དོན་གནད་ག་གེ་མོར་འཛུལ་ཏེ་བཟང་ངན་གྱི་ནུས་པ་འཐོན་ཐབས་བྱེད་པ་ནི་ཤེས་ཡོན་དང་བསམ་བློའི་ཁ་ཕྱོགས་སམ་བརྒྱུད་རིམ་ཡག་པོ་ཞིག་ག་ལ་ཡིན། སློབ་སྦྱོང་གི་ཐོག་ནས་བསམ་བློ་དང་རྣམ་དཔྱོད་ཀྱི་སྒོ་མོ་ཡག་པོ་ཞིག་ཕྱེ་མ་ཐུབ་པར་སེམས་ཚོར་ཙམ་གྱི་རྗེས་སུ་རྒྱུག་འགྲོ་བ་ལས།ཤེས་ཡོན་ཞེས་པར་ལྡེ་མིག་ལྟ་བུའི་འཛིན་སྟངས་དང་། ལྡེ་མིག་དེས་སྐྱེས་སྦྱངས་ཡོན་ཏན་ཕྱུག་ཏུ་བཏང་ནས། བསམ་བློ་དང་འདུ་ཤེས་ཁྱད་པར་བས་སྤྱི་ཚོགས་ཀྱི་འཁུར་ལེན་པའི་ནུས་པ་ཞིག་མེད་ན་ནི། ད་གཟོད་ཁྱོད་ཀྱི་ཤེས་ཡོན་ལ་ཡང་བརྒྱ་ཆ་ཙམ་དང་སློབ་དེབ་ཙམ་ལས་གཞན་གང་གི་རིན་ཐང་ཡང་མེད། 

འདི་ནི་སློབ་ཕྲུག་ཅིག་གི་ངོས་ནས་བཤད་ཅིང་། འདི་དང་འདི་ལྟ་བུའི་འོས་འགན་ནི་བཙལ་འཚོལ་བྱས་ན་མིའི་སྤྱི་ཚོགས་ཀྱི་གྲལ་རིམ་གང་དུའང་ཡོད། ཐམས་ཅད་ཀྱིས་ཐོག་མར་རང་གི་མདུན་དུ་ལྷག་འགྲོ་བའི་བྱ་གཞག་དེར་སྣང་འཇོག་མེད་པར།   གནད་དོན་དེའི་ངོ་བོ་གཞན་ཞིག་ནས་མ་གཏོགས་སྒྲུབ་རྒྱུ་མེད་པའི་སྣང་ཚུལ་ཤུགས་ཆེན་དེའི་དབང་གིས་ང་ཚོ་དང་ང་ཚོའི་བོད་དོན་བར་དོན་མེད་ཀྱི་བར་སྟོང་ཞིག་ལྷག་གི་འདུག  སྟོན་པའི་གསུང་བདག་ཉིད་བདག་གི་མགོན་ཡིན་ཏེ། ཞེས་པ་འདི་དང་། Charity Begins At Home ཞེས་པའི་དབྱིན་ཇིའི་གཏམ་དཔེ་འདི་ཚོའི་ཐོག་ནས་ང་ཚོས་བསླབ་བྱ་ཞིག་ལེན་རན་གྱི་འདུག་སྙམ།འདི་ལ་ང་ཚོས་བསམ་གཞིག་དང་དོ་འཁུར་མ་བྱས་པའི་རྐྱེན་གྱིས་ང་ཚོས་བོད་པའི་སློབ་ཕྲུག་སྐོར་ཞིག་ལ་བོད་དོན་ཤོད་དུ་བཅུག་ནའང་། ཁོང་ཚོས་རང་ཉིད་ཀྱི་འོས་འགན་དང་སྦྲེལ་ཏེ་གནད་དོན་དེ་གསོན་ཉམས་དོད་པོའི་ཐོག་ནས་ཤོད་མཁན་དཀོན་པོ་རེད། དེ་བས་བོད་དོན་བདག་མེད་ཀྱི་རི་དྭགས་ལྟ་བུའམ་བར་སྣང་དུ་ལྷག་འགྲོ་བཞིན་པའི་སྣང་ཚུལ་འདི་འབྱུང་བཞིན་ཡོད། གལ་ཏེ་ཁོང་ཚོས་རང་ཉིད་སློབ་ཕྲུག་ཅིག་ཡིན་པའི་རྨང་གཞིའི་ཐོག་ནས་སྐད་ཆ་འདིའི་དོན་སྙིང་སློང་བ་དང་། དེའི་ཆེད་རང་གི་ངོ་བོའི་ཐོག་ནས་སྣ་མང་ཕུན་སུམ་བྱེད་ཐབས་འདི་དང་འདི་བསྒྲུབ་རྒྱུ་ཡོད་ཅེས་བཤད་ན་སྐད་ཆ་འདི་གསོན་ཉམས་དོད་པོ་གང་འདྲ་མི་ཆགས་སམ།   དེ་བས་སྐད་ཆ་ཤོད་དུ་འཇུག་མཁན་ཚོས་ཀྱང་བོད་དོན་ཞེས་པ་ཙམ་མིན་པར་སློབ་ཕྲུག་གི་བོད་དོན་ཞེས་པ་ལྟ་བུའི་བརྗོད་གཞིའི་ཐོག་དམིགས་སུ་བཀར་ནས་བསམ་བློ་གཏོང་དུ་འཇུག་དགོས་ཀྱི་འདུག   ངའི་ལྟ་ཚུལ་འདིས་སློབ་ཕྲུག་དང་བོད་དོན་བར་ཐག་ཉེ་རུ་འགྲོ་བའི་ཚོར་བ་དང་། ཚོར་བ་དེས་སློབ་ཕྲུག་ལ་ཤེས་ཡོན་གྱི་ནུས་པ་གོང་མཐོར་གཏོང་བའི་སྐུལ་ལྕག་ངེས་ཅན་ཞིག་ཐེབས་རྒྱུའི་ཁྱད་ཆོས་ཡོད་པ་ལས། གསུམ་བཅུའི་དུས་དྲན་སོགས་ཀྱི་སྐབས་སུའང་སྐད་འབོད་རྒྱག་པར་འགྲོ་རྒྱུ་གལ་ཆེན་མིན་པའི་ལྟ་ཚུལ་གཏན་ནས་འཛིན་གྱི་མེད། 

 འོ་ན་གྲྭ་གཞོན་ཞིག་གི་བོད་དོན་ག་རེ་རེད་དམ་ཞེ་ན།   བོད་ཀྱི་གྲྭ་གཞོན་ཞིག་གི་ངོས་ནས་དངོས་གནས་མི་རིགས་ཀྱི་དོན་དག་ལ་བསམ་བློ་བཏང་ནས་འགུལ་སྐྱོད་ཅིག་རྒྱག་འདོད་ན།    སེམས་ཚོར་ཙམ་གྱི་རྗེས་སུ་རྒྱུག་འགྲོ་བ་གཏན་ནས་མིན་པར། ཨང་དང་པོ་བོད་ཀྱི་རིག་གནས་སྤྱི་དང་གཙོ་བོ་བོད་ཀྱི་ནང་བསྟན་མཚན་ཉིད་རིག་པ་དང་ཚད་མ་རིག་པའི་གོ་རྟོགས་ངེས་ཅན་ཞིག་སྐྱེད་ཐབས་བྱ་དགོས་ཀྱི་འདུག་སྙམ། ངས་གཞུང་ལུགས་འདི་གཉིས་ཀྱི་ངོ་བོ་དང་རྒྱུ་འབྲས་གླེང་བསྡད་ན་སྐབས་དོན་ཉམས་འགྲོ་བའི་ཆོས་ཉིད་ལས་མ་འདས་ཀྱང་། བོད་ཀྱི་ནང་བསྟན་ཚད་མ་རིག་པའི་རྨང་གཞིའི་ཤེས་བྱས་མིའི་རྣམ་དཔྱོད་ཀྱི་སྒོ་འཕར་འབྱེད་པའི་དངོས་བྱུང་ཀྱི་དན་རྟགས་འགོད་ཐུབ་ལ།   རྩོམ་ཡིག་འདི་འབྲི་མཁན་རང་ཉིད་ལའང་ཁྱད་དུ་འཕགས་པའི་རིག་པའི་གཞུང་ལུགས་ཉམས་དགའ་བ་དེས་བླ་ན་མེད་པའི་ནུས་སྟོབས་བྱིན་པའི་མྱོང་བ་གཏིང་ཟབ་ཡོད་ཅེས་སྤོབས་པ་དང་བཅས་པའི་སྒོ་ནས་བརྗོད་ཐུབ།  བསམ་བློའི་སྒྲོམ་གཞི་དང་ལྟ་གྲུབ་ཀྱི་གཞི་འཛིན་སའི་ཁྱད་དུ་འཕགས་པའི་བོད་ཀྱི་རིག་པའི་གཞུང་ལུགས་ཀྱི་གཏད་སོ་དང་།  དེང་རབས་ཀྱི་རིག་གནས་ཆེ་ཕྲ་གང་ལའང་གོ་རྟོགས་མེད་པར་ཚངས་སྤྱོད་ཙམ་ལ་གནས་ཐབས་བྱེད་པ་འདི་ནི་ཕྱི་རབས་པ་རྣམས་ཀྱིས་ཁག་དཀྲི་ས་ཞིག་ཏུ་འགྱུར་རྒྱུ་ལས་གང་ཡང་མེད་པས་ད་ལྟ་ནས་གཟབ་དགོས།   འོན་ཏེ་བརྒྱུད་རིམ་དེ་དག་གི་ནང་ཤེས་ཡོན་ཞེས་པའི་གོ་དོན་ལ་ངོས་འཛིན་གསལ་པོ་དགོས་པ་དང་། ཤེས་ཡོན་ནི་ལྡེ་མིག་ལྟ་བུ་ཡིན་པའི་འདུ་ཤེས་བརྟན་པོ་དགོས། 

 གཉིས་པ་ནི་གཞུང་ལུགས་དང་མཉམ་དུ་སྤྱི་ཚོགས་ཀྱི་གལ་ཆེའི་གནད་དོན་ལ་བལྟ་རྒྱུ་དེ་རེད། གང་ཡིན་ཟེར་ན། གོང་དུ་བཤད་པ་བཞིན་གཞུང་ལུགས་ཀྱི་ཤེས་ཚད་དང་ལག་འཁྱེར་སོགས་ཀྱིས་ཕོངས་པ་མེད་ཀྱང་། གཞུང་ལུགས་བྱེ་བྲག་པ་དེའི་ཁ་ཕྱོགས་སུ་ཤར་སྐྱོད་བྱེད་མི་ཐུབ་པའི་ཉེར་ལེན་ནམ་ཡང་ན་གཞུང་ལུགས་ཀྱི་སྤྱིར་བཏང་ཤེས་བྱར་བསམ་གཞིག་བྱ་རྒྱུ་ཉུང་དྲགས་པའི་རྐྱེན་གྱིས་ར་མ་ལུག་གི་མི་ཐོག་ཅིག་འཐོན་བཞིན་ཡོད། གལ་ཏེ་སྤྱི་ཚོགས་དང་དེ་ཚོས་སྦྱངས་པའི་རིག་གཞུང་གཉིས་བར་འགལ་འབྲེལ་ཤ་སྟག་གིས་ཆོད་ཡོད་ན་ནི་ཁོང་ཚོའི་གཞུང་ལུགས་ཀྱི་རིན་ཐང་དེ་ཡང་སྙིང་ཅི་ཞིག་གིས་འཇལ་དགོས་མིན་ནི་བསམ་གཞིག་བྱ་དགོས་པའི་གནད་དོན་གལ་ཆེན་ཞིག་ཡིན། གང་ཡིན་ཟེར་ན་སྐབས་རེར་ང་ཚོས་རྟོག་གེའམ་རིག་པའི་རོལ་རྩེད་རྐྱང་པར་མགོ་འཁོར་ཏེ། སྤྱིར་བཏང་གི་མིའི་སྤྱི་ཚོགས་ཀྱི་ལྟ་གྲུབ་ལ་སྣང་མེད་གཏོང་བའི་ཉེན་ཁ་ཞིག་འབྱུང་བཞིན་ཡོད། མི་ཆོས་རིང་ལུགས་སམ་བཟང་སྤྱོད་ཅེས་པ་ནི་ཆོས་ལུགས་ཀྱི་སྐད་ཆའི་རྒྱ་ལས་བརྒལ་བའི་སྤྱི་ཚོགས་ཀྱི་དགོས་མཁོའི་གནད་དོན་ཞིག་ཡིན་པས། གལ་ཏེ་འདི་ལ་ཡ་མེད་ཀྱི་ལྟ་ཚུལ་འཛིན་འདོད་ན་ནི་ཁྱོད་ཀྱིས་འགྲོ་བ་མིའི་གཞི་རྩའི་གནད་དོན་གྱི་འགན་མ་འཁྱེར་བ་རེད་ཅེས་བརྗོད་ན་འགྲིག འདིའི་གོ་རྟོགས་རྒྱ་སྐྱེད་ཀྱི་ཆེད་ད་ལྟ་ཡོད་བཞིན་པའི་ཤར་ནུབ་ཀྱི་ལྟ་བ་གསར་པ་དེ་ཚོར་ཉན་འཇོག་བྱ་རྒྱུ་གལ་ཆེན་པོར་མཐོང་། 

 འོན་ཏེ་ཡིད་རྦད་དེ་ཐར་པར་ཕྱོགས་པའི་གང་ཟག་དག་གིས་ནི་གནད་དོན་འདིར་བསམ་གཞིག་གནང་རིན་མེད་པ་ནི་རང་ཉིད་ཀྱི་མི་ཚེའི་གདམ་ཀ་ཞིག་གི་དབང་གིས་ཡིན། དེ་ནི་གནས་སྟངས་གཞན་ཞིག་རེད།   འོན་ཏེ་ཁྱེད་དང་ང་འདྲ་བ་ཆོས་དང་འཇིག་རྟེན་གྱི་བར་མཚམས་སུ་ལྷག་པ་དག་ལ་ནི་གནད་དོན་འདི་གལ་ཆེན་ཞིག་ཏུ་གྲུབ་པར་ལྟ་དགོས་ཀྱི་འདུག་སྙམ། མི་ཆོས་རིང་ལུགས་སམ། ཀུན་སྤྱོད། ཡང་ན་བཟང་སྤྱོད་ཅེས་པ་འདི་དག་ནི་དབྱིན་ཇིའི་ཐ་སྙད་ Humanism ཞེས་པ་འདིའི་དོན་ཡིན་སྙམ་ཞིང་། དེ་ཡང་བོད་ནང་ནས་སྔ་མ་གཉིས་བེད་སྤྱོད་གཏོང་ཤུགས་ཆེ་ཞིང་། ཕྱི་མ་འདི་ནི་༸གོང་ས་མཆོག་གིས་ནམ་རྒྱུན་བེད་སྤྱོད་གནང་བ་དང་། བཙན་བྱོལ་ནང་ཡོངས་སུ་གྲགས་པའི་ཐ་སྙད་ཅིག་ཡིན། གལ་ཆེ་ཤོས་ཤིག་ནི་འདིའི་དོན་རང་མཚན་པ་ཤོད་སྐབས་ག་དུས་ཡིན་ནའང་ཆོས་ལུགས་ཀྱི་རྨང་གཞིའི་བསམ་བློ་དང་གཏན་ནས་མ་འབྲེལ་བར་བྱ་དགོས་པ་དེ་རེད། ༼ནང་པ་སངས་རྒྱས་པའི་གཞུང་ལུགས་ནང་ནས་གནད་དོན་འདི་དག་ནན་བཤད་བྱེད་ཀྱི་ཡོད་ཅིང་། ལྷག་པར་མིའི་གཞི་རྩའི་རང་བཞིན་དེ་བདེ་བ་འདོད་ཅིང་སྡུག་བསྔལ་གཏན་ནས་མི་འདོད་པ་ཡིན་པའི་སྡོམ་ཚིག་བཀོད་ནས། རིམ་པ་གོང་མ་ཐར་པའི་ས་དང་། སངས་རྒྱས་ཀྱི་གོ་འཕང་ལ་སོགས་པའི་རྣམ་གཞག་ངོ་མཚར་བ་ཞིག་སྟོན་གྱི་ཡོད་ཀྱང་། ད་ལྟའི་འཛམ་གླིང་གི་སྤྱི་ཚོགས་འདི་ནི་བཟང་སྤྱོད་ཁོ་ནས་ཕོངས་པས་ཆོས་ལུགས་དང་རྒྱལ་ཞེན་ཨང་གཉིས་པར་འཛིན་པའི་ལྟ་ཚུལ་གྱི་ཐོག་ནས། ཆོས་ལུགས་ཀྱི་ཁེ་ཕན་དང་འདུ་ཤེས་འཛིན་སྟངས། ཆོས་ལུགས་དང་སྤྱི་ཚོགས་ཀྱི་འགལ་འབྲེལ་སོགས་ཀྱི་སྐོར་ལས་གྲུབ་པའི་འཕེལ་བཞིན་པའི་བསམ་བློ་འདི་ཚོར་ཉན་འཇོག་བྱེད་རྒྱུ་ཁ་ཚ་དགོས་གཏུགས་རང་ཆགས་ཡོད། ༽ འདིས་ནང་བསྟན་གཞུང་ལུགས་ཀྱི་དོན་སྙིང་ལའང་ལྟ་སྟངས་གསར་པ་ཞིག་དང་འདུ་ཤེས་གསར་པ་ཞིག་འཛིན་པའི་སྐུལ་འདེད་དང་དེའི་ཐབས་ལམ་རྙེད་རྒྱུའི་གདེང་ཞིག་འཐོབ།

 གསུམ་པ་ནི་སྐད་ཡིག་གཞན་གྱི་ཐབས་ལམ་བརྒྱུད་དེ། ཉིད་ཀྱི་ཤེས་བྱ་དང་རིག་པའི་གཞུང་ལུགས་ཀྱི་དོན་སྙིང་རྣམས་ཕྱོགས་སྡོམ་བྱ་དགོས། ལར་ནས་བོད་པའི་སྤྱི་ཚོགས་ནང་དེང་དུས་ཀྱི་ཤེས་ཡོན་ཞེས་པར་སྤྱི་ཡོངས་ཀྱིས་ངོས་འཛིན་ལེགས་པོ་ཞིག་བྱེད་ཐུབ་ཀྱི་མེད་པ་དང་། དེའི་དབང་གིས་ཕྱི་རྒྱལ་གྱི་སྐད་ཡིག་ཤེས་པ་ཙམ་ལའང་དེང་དུས་ཀྱི་ཤེས་ཡོན་ཡོད་པའི་ཆ་འཇོག་བྱེད། སྐད་ཡིག་ཙམ་ལ་ཡིད་ཚིམས་ནས་སྡོད་པ་ལས་སྐད་ཡིག་གི་བརྗོད་དོན་ཡ་མཚན་པ་དག་སྐྱུར་རྐྱང་བྱས་པའི་ཉེར་ལེན་ལས་ང་ཚོའི་སྤྱི་ཚོགས་སུ་དེང་དུས་ཀྱི་ཤེས་ཡོན་གྱི་ནུས་པས་མ་ལྡང་བ་འདི་ཆགས་པ་གསལ་པོ་རེད།

 འདིའི་ཐོག་ལ་བློ་ཁ་མཐོ་བ་ཁ་ཤས་ཡོད་ཀྱང་དེ་ཚོ་མང་ཆེ་བས་དེང་དུས་ཤེས་ཡོན་ནི་གཙོ་བོ་ཚན་རིག་དང་འཕྲུལ་ཆས་རེད་ཅེས་སྦོམ་བཤད་བྱེད་པ་ལས། འདིའི་སྒང་ལ་ཅུང་ཞིབ་ཕྲའི་སྒོ་ནས་བསམ་རིན་ཡོད་པའི་ལེགས་སྦྱར་ཤོད་མཁན་ཁ་ཤས་ལས་མེད་པ་ལྟ་བུ་རེད། ངས་ནི་དེང་དུས་ཤེས་ཡོན་ཞེས་པ་འདི་ནི་གཙོ་བོ་དེང་དུས་ཀྱི་ལྟོས་གྲུབ་རིག་པ་དང་། ཀུན་སྤྱོད་རིག་པ།   འཕེལ་གྱུར་རིག་པ་སོགས་ཀྱི་རྣམ་གཞག་ཁོ་ན་དང་། ཡང་ན་ད་ལྟའམ་དེང་སང་གི་འཚོ་བའི་ཁྱབ་ཁོངས་སུ་གཏོགས་པའི་ལྟ་སྤྱོད་ཅེས་དུས་ཚོད་ཀྱི་ངོ་བོ་ལ་བལྟས་ནས་དེའི་རྣམ་གཞག་འབྱེད་པའང་ཡང་དག་པ་གཏན་ནས་མིན་སེམས་ཀྱི་འདུག སྲོལ་རྒྱུན་དང་དེང་དུས་ཀྱི་ཤེས་ཡོན་གྱི་རིན་ཐང་གླེང་དུས་དེའི་དགེ་ཕན་དེ་ཨང་དང་པོར་བརྩི་དགོས། མདོར་ན་དགེ་ཆོས་ཀྱིས་གསུངས་པ་ལྟར་རྙིང་པ་དང་གསར་པའི་དུས་ཀྱི་རང་ལྡོག་ཙམ་ལ་བརྟེན་ནས་རྒྱུགས་པ་ལེབ་རྡུང་གི་ལྟ་ཚུལ་གཏན་ནས་འཛིན་མི་རིགས། གསར་རྙིང་གི་ཁྱད་ཆོས་དེ་གཙོ་བོ་ཕྱོགས་གཉིས་ཀྱི་དགེ་མཚན་གྱི་ངོ་བོའི་ཐོག་ནས་གླེང་དགོས་པའི་དོན་དངོས་འདིར་རིགས་པའི་ལམ་ནས་དག་ཐེར་ཞིག་བྱེད་པ་ལ། གལ་ཆེ་ཤོས་ནི་ཕྱོགས་གཉིས་ཀྱི་ལྟ་ཚུལ་དངོས་གཞུང་ལུགས་དང་ལག་ལེན་གྱི་ཕན་འབྲས་ཐོག་ནས་ཐོག་མར་ཤེས་དགོས་པས། དེང་དུས་ཀྱི་ཤེས་ཡོན་སྦྱོང་བ་ནི་དོན་ལ་དེང་དུས་ཀྱི་སྤྱི་ཚོགས་ཤིག་ལ་རྒྱུས་ལོན་བྱེད་པ་དང་། རིགས་པའི་ལམ་གསར་པ་ཞིག་གི་ཐོག་ནས་མི་ཚེའི་ལྟ་སྟངས་ལ་འགྱུར་བ་གཏོང་བའི་ཐབས་ལམ་ཞིག་ལས་གཞན་གང་ཡང་མིན་པར་ཤེས་དགོས་པ་བཅས་སོ།།