༸གོང་ས་མཆོག་གིས་ཉིན་གཉིས་རིང་བཞུགས་སྒར་གཙོས་པའི་ཕྱོགས་མཐའ་ཁག་གི་བོད་རིགས་གཞོན་སྐྱེས་ཚོར་ཉིན་གཉིས་རིང་ནང་ཆོས་ངོ་སྤྲོད་གནང་རྒྱུ་ཡིན་འདུག
ཕྱི་ལོ་ ༢༠༠༧ ལོ་ནས་བཟུང་ངྷ་ས་ནང་ཆོས་གོ་སྒྲིག་ཚོགས་ཆུང་གིས་ལོ་ལྟར་༸གོང་ས་མཆོག་ལ་གསོལ་འདེབས་ཀྱིས་བཞུགས་སྒར་ཉེ་འཁྲིས་སུ་ཡོད་པའི་སཱ་ར་དང་ནོར་གླིང་། སྨན་རྩིས་ཁང་བཅས་མཐོ་སློབ་ཁག་གསུམ་དང་ཕྱོགས་མཐའ་ཁག་ནས་སླེབས་པའི་མཐོ་སློབ་ཁག་གི་སློབ་མ། གཞན་ངྷ་སྟེང་བོད་ཁྱིམ་དང་ངྷ་ཤོད། གྷོལ་པ་པུར། སུ་ཇཱ་བོད་ཁྱིམ་བཅས་ཀྱི་འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་མ། ཤེས་རབ་དགའ་ཚལ་སློབ་གླིང་བཅས་ཀྱི་སློབ་མ་དང་གཞན་སློབ་གྲྭ་བ་མ་ཡིན་པའི་གཞོན་སྐྱེས་ཚོར་ནང་ཆོས་ངོ་སྤྲོད་གནང་གི་ཡོད་པ་ལྟར། ཉེ་ཆར་༸གོང་ས་མཆོག་གི་ཞལ་བཞེས་གནང་སྟེ་འདི་ལོའི་ནང་ཆོས་ངོ་སྤྲོད་དེ་འདི་ལོའི་ཕྱི་ཟླ་ ༦ པའི་ཚེས་ ༣ ནས་ ༤ བར་གྱི་ཉིན་གྲངས་གཉིས་རིང་ངྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་གནང་གཏན་འཁེལ་ཡོད་འདུག
འདིའི་ཐད་གསར་འགོད་པས་ངྷ་ས་ནང་ཆོས་གོ་སྒྲིག་ཚོགས་ཆུང་གི་ཚོགས་གཙོ་དང་བོད་མི་མང་སྤྱི་འཐུས་ཡོངས་གླིང་ཟླ་བ་ཚེ་རིང་ལགས་སུ་ནང་ཆོས་ངོ་སྤྲོད་ཀྱི་བརྗོད་གཞི་དང་ཚོགས་ཞུགས་མི་སྣའི་གྲངས་འབོར་སོགས་ཀྱི་སྐོར་ནས་བཅར་འདྲི་བྱས་པར། ཁོང་གིས། ༸གོང་ས་མཆོག་གིས་བོད་རིགས་གཞོན་སྐྱེས་ཚོར་དམིགས་བསལ་ནང་ཆོས་ངོ་སྤྲོད་གནང་བའི་ལས་རིམ་འདི་ ༢༠༠༧ ལོ་ནས་༸གོང་ས་མཆོག་གིས་ཞལ་བཞེས་གནང་བཞིན་པ་ལྟར། འདི་ལོའི་ཕྱི་ཟླ་ ༦ པའི་ཚེས་ ༣ ནས་ ༤ བར་ཉིན་གྲངས་གཉིས་རིང་ནང་ཆོས་ངོ་སྤྲོད་གནང་གཏན་ཁེལ་ཡོད། ཡིན་ནའང་། བརྗོད་གཞིའི་ཐད་ནས་ང་ཚོས་༸གོང་ས་མཆོག་གིས་སྔོན་མར་ནང་ཆོས་ངོ་སྤྲོད་གནང་ཟིན་པའི་༼ལེགས་བཤད་བློ་གསལ་མིག་འབྱེད༽གནང་ཐུབ་ན་ཡག་པོ་འདུག ཅེས་སྙན་སེང་ཞུས་ཡོད། ཡིན་ནའང། ད་ལྟའི་ཆར་ནང་ཆོས་ངོ་སྤྲོད་ཀྱི་བརྗོད་གཞི་གང་ཡིན་ཐུགས་གཏན་ཁེལ་ཏེ་ཐག་བཅད་གནང་ཡོད་པ་མ་རེད། ཅེས་བརྗོད་བྱུང་།
ཡང་ཁོང་གིས། ང་ཚོའི་ནང་ཆོས་ངོ་སྤྲོད་ཀྱི་དམིགས་བྱ་གཙོ་བོ། ༸གོང་ས་མཆོག་གིས་དུས་རྟག་ཏུ་སྔོན་མའི་ལུགས་སྲོལ་ལྟར་ནང་པའི་ཆོས་དེ་དད་པ་དང་ཡིད་ཆེས་ཁོ་ན་མིན་པར། དངོས་ཡོད་ཀྱི་ནང་པའི་ཆོས་དེ་གང་འདྲ་ཞིག་ཡིན་མིན་ཤེས་པའི་ཐོག་ནས་ནང་པ་ཚད་ལྡན་ཞིག་བྱ་རྒྱུར་འབད་བརྩོན་བྱ་དགོས། ཞེས་གསུངས་བ་ལྟར། ང་ཚོ་ནང་པ་ཡིན་ཡང་ནང་པ་ཚད་ལྡན་ཞིག་ཡོང་ཐུབ་ཀྱིན་མེད་པའི་གནས་སྟངས་དང་། ང་ཚོའི་ནང་པའི་བསྟན་པ་དེ་བོད་པའི་གཞོན་སྐྱེས་ཚོས་གང་འདྲ་ཞིག་ཡིན་མིན་ཤེས་རྒྱུ་དང་དེ་ཤེས་པའི་ཐོག་ནས་ནང་པའི་ཆོས་ལ་ཡིད་ཆེས་འཕེར་བ་ཞིག་ཡོང་ཆེད་གོ་སྒྲིག་གནང་གི་ཡོད་སྟབས། གཙོ་བོ། མཐོ་སློབ་འགྲིམ་བཞིན་པའི་གཞོན་སྐྱེས་དང་ལྷག་པར་དུ་སློབ་གྲྭ་ཁག་གི་འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་མ། དེ་བཞིན་སློབ་མ་མ་ཡིན་པའི་གཞིས་ཆགས་དང་བཞུགས་སྒར་ཁུལ་གྱི་གཞོན་སྐྱེས་མང་པོ་ཞིག་ལ་དམིགས་པ་ཡིན་ལ། ཐེངས་འདིའི་ནང་ཆོས་ངོ་སྤྲོད་སྐབས་གཞོན་སྐྱེས་མང་པོ་ཞིག་ཡོང་བའི་རེ་བ་བྱེད་ཀྱིན་ཡོད། ཅེས་བརྗོད་བྱུང་།
ནང་ཆོས་ངོ་སྤྲོད་ཀྱི་ལས་རིམ་འདི་ནི། ཕྱི་ལོ་ ༢༠༠༧ ལོ་ནས་བཟུང་ངྷ་ས་ནང་ཆོས་གོ་སྒྲིག་ཚོགས་ཆུང་གིས་གོ་སྒྲིག་བྱེད་ཀྱིན་ཡོད་པ་དང་། འདས་པའི་ཐེངས་གསུམ་རིང་གི་ནང་ཆོས་ངོ་སྤྲོད་སྐབས་བཞུགས་སྒར་མ་ཡིན་པའི་ཕྱོགས་མཐའ་ཁག་ནས་ལོ་ལྟར་གཞོན་སྐྱེས་ ༥༠༠ ལྷག་ཕེབས་ཡོད་པར་མ་ཟད། བཞུགས་སྒར་ཉེ་འཁྲིས་ཀྱི་སློབ་གྲྭ་ཁག་དང་ཕྱོགས་མཐའ་ཁག་ནས་ཕེབས་པའི་གཞོན་སྐྱེས་ ༣༠༠༠ ལྷག་ལ་སྔ་དྲོ་ནང་ཆོས་ངོ་སྤྲོད་རྗེས་༸གོང་ས་མཆོག་ལ་དྲི་བ་ཕུལ་བའི་གོ་སྐབས་གནང་བ་དང་། ཉིན་རྒྱབ་དགེ་བཤེས་ཁག་ཅིག་གདན་ཞུས་ཐོག་གཞོན་སྐྱེས་ཚོར་དོག་གཅོད་ཀྱི་དྲི་བ་དྲིས་ལན་གནང་བའི་གོ་སྐབས་སྤྲོད་ཀྱིན་པ་ལྟར། འདི་ལོ་ཡང་གཅིག་མཚུངས་ཀྱིས་གོ་སྒྲིག་གནང་འཆར་ཡོད་འདུག
གསར་འགོད་པ། དོན་གོ
