གནས་ཚུལ་འབྱོར་གསལ་ལྟར་ན། ཟླ་འདིའི་ཕྱི་ཚེས་ ༢༧ ཉིན་ཨ་རིའི་གྲོང་ཁྱེར་ཨེ་ཊི་ལན་ཊར་རྟེན་གཞི་བྱས་པའི་ཨེ་མོ་རི་གཙུག་ལག་སློབ་གཉེར་ཁང་གི་ཕྱི་ལོ་ ༢༠༡༡ ལོའི་ཁྱད་འཕགས་སྤྱི་ཚོགས་ཞབས་ཞུའི་ཆེ་བསྟོད་གཟེངས་རྟགས་ DVS ཞེས་པ་དེ་དགེ་བཤེས་བློ་བཟང་བསྟན་འཛིན་ལགས་སུ་ཕུལ་ཡོད་པ་རེད།
ལོ་འཁོར་གཟེངས་བསྟོད་བྱ་དགའ་འདི་ནི་ཌི་ཝི་ཨེསི་ཆེ་བསྟོད་མཐུན་ཚོགས་ཀྱི་ངོས་ནས་ཨེ་མོ་རི་གཙུག་ལག་སློབ་གཉེར་ཁང་གི་ཆེས་ཕུལ་ཏུ་བྱུང་བའི་མི་སྣའམ་ཚོགས་སྡེ་ཁག་ལ་འབུལ་སྲོལ་ཡོད་པ་ལྟར། འདི་ལོར་དགེ་བཤེས་བློ་བཟང་བསྟན་འཛིན་ལགས་ལ་ཆེས་ཕུལ་ཏུ་བྱུང་བའི་སྣེ་ཁྲིད་པ་དང་། སློབ་སྟོན་པ། སྤྱི་སྨན་གྱི་སྤྱི་ཚོགས་ཞབས་ཞུ་བར་ངོས་འཛིན་ཐོག་ཕུལ་བ་ཞིག་ཡིན་འདུག
ཌི་ཝི་ཨེསི་ཆེ་བསྟོད་མཐུན་ཚོགས་ཀྱི་ཚོགས་གཙོ་མཆོག་གིས་གསུངས་དོན། བོད་བརྒྱུད་ནང་བསྟན་ཆོས་ལུགས་ཀྱི་བྱམས་པ་དང་སྙིང་རྗེ་ཡིས་ཟིན་པའི་དགེ་བཤེས་བློ་བཟང་བསྟན་འཛིན་གྱིས་ནང་ཆོས་དང་ཚན་རིག་ཟུང་འབྲེལ་ཞིབ་འཇུག་གི་བྱ་གཞག་མང་པོ་ཞིག་གིས། ཨེ་མོ་རི་གཙུག་ལག་སློབ་གཉེར་ཁང་གཅིག་པུ་མ་ཡིན་པར། མི་མང་པོ་ཞིག་གི་ལུས་ཀྱི་ནད་རིགས་སྣ་ཚོགས་བཅོམ་ཞིང་། ནང་སེམས་ལ་བདེ་སྐྱིད་ཕུན་སུམ་ཚོགས་པ་བསྐྲུན་ཏེ་འཛམ་གླིང་ཞི་བདེ་ལ་བྱས་རྗེས་རླབས་ཆེན་བཞག་ཡོད། ཅེས་བརྗོད་འདུག
སྐབས་དེར་དགེ་བཤེས་བློ་བཟང་བསྟན་འཛིན་ལགས་ཀྱིས་གསུངས་དོན། ལས་དོན་འདི་དག་ཡོད་ཚད་ལེགས་གྲུབ་དང་ལམ་ལྷོང་ཡོང་བའི་རྩ་བའི་རྒྱུ་རྐྱེན་ནི། ༧གོང་ས་ཏཱ་ལའི་བླ་མ་མཆོག་གི་གཟིགས་རྒྱང་རིང་བའི་ལམ་སྟོན་དང་ཁོང་གི་བྱིན་རླབས་ཀྱིས་ཡིན་ལ། དེ་བཞིན་དུ་མཉམ་འབྲེལ་ལས་གཞི་ཁག་གི་ལས་རོགས་རྣམ་པའི་བླ་ན་མེད་པའི་ལྷག་བསམ་དང་རྒྱབ་སྐྱོར་བཅས་དང་ནམ་ཡང་ཁ་བྲལ་ཐབས་མེད། ཅེས་བརྗོད་འདུག
དགེ་བཤེས་བློ་བཟང་བསྟན་འཛིན་ནི་འབྲས་སྤུངས་བློ་གསལ་གླིང་ནས་དགེ་བཤེས་ལྷ་རམས་པ་ཐོན་ཞིང་། ཨེ་མོ་རིར་སློབ་ཞུགས་ཀྱིས་(Ph.D) སློབ་ཐོན་ལག་འཁྱེར་ཐོབ་པ་མ་ཟད། གཙུག་ལག་སློབ་གྲྭའི་རེ་འདུན་ལྟར་ནང་ཆོས་སློབ་དཔོན་ཆེན་མོའི་ལས་གནས་འཁུར་ཞིང་། རྗེས་སུ་གྲྭ་ཚང་གི་བཀོད་མངགས་ལྟར་འབྲས་སྤུངས་བློ་གསལ་གླིང་གྲྭ་ཚང་ཆོས་ཚོགས་བཙུགས་ཏེ་ཕྱི་ནང་གཉིས་ཀར་ཞབས་ཞུ་སྒྲུབ་ཀྱིན་ཡོད་པ་རེད།
ཨེ་མོ་རི་དང་བོད་ཀྱི་ཐུན་ཚོགས་ནི་༧གོང་ས་མཆོག་གི་བཀའ་དགོངས་ལྟར། ༡༩༩༨ ལོར་གསར་དུ་དབུ་བརྙེས་པ་དང་། ཨེ་མོ་རི་དང་བོད་ཀྱི་ཚན་རིག་ལས་རིམ་ནི་སྤྱི་ལོ་ ༢༠༠༦ ལོར་བོད་ཀྱི་དཔེ་མཛོད་ཁང་གི་དགེ་བཤེས་ལྷག་རྡོར་ལགས་དང་མཉམ་འབྲེལ་སྒོས་དབུ་འཛུགས་གནང་ཡོད། ༢༠༠༨ ལོར་༧གོང་ས་མཆོག་ཨེ་མོ་རི་གཙུག་ལག་སློབ་གཉེར་ཁང་གི་ཁྱད་འཕགས་གཙུག་ལག་སློབ་དཔོན་ཆེན་མོའི་མཚན་གནས་བཞེས་ཡོད།
དགེ་བཤེས་བློ་བཟང་བསྟན་འཛིན་ཁུ་ནུ་སྦུ་བྲོ་ལགས་ལ་འཚམས་འདྲིའི་བཀྲ་ཤིས་བདེ་ལེགས་ཡོད། དགེའོ། །
མང་མང་དགེ་བཤེས་ཆོས་རའི་ནང་དུ་འཁོར། འཁོར་གསུམ་སྐོར་ནས་འཁོར་བ་སྒྲོལ་རྒྱུ་ཟེར། ཉུང་ཉུང་དགེ་བཤེས་རི་ཁྲོད་དབེན་པར་སྒོམ། ཐུན་དྲུག་སྒོམ་གྱིས་རིགས་དྲུག་དགྲོལ་རྒྱུ་གསུངས། ལྷ་རམས་ཁྱོད་ཀྱིས་ནུབ་གླིང་རིག་པས་སྐོར། ཆོས་ཚན་རིག་པས་ཞི་བདེའི་མཛད་རྗེས་བཞག
དགའ་རྟགས་ཐོབ་པར་བཀྲ་ཤིས་བདེ་ལེགས་ཞུ། དགེ་བཤེས་ཤིག་ལ་མི་རིག་གི ཁྱིམ་རྟགས་སྤོང་ཉམས་རབ་བྱུང་རྟགས་ལེན་ཉམས། ཞེས་པ་ཞིག་འདུལ་བ་ན་ཡོད་པ་དེ་དྲན་ཡོང་གི །