ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་གནམ་གྲུ་རྡབ་སྐྱོན་ཁྲོད་རྐྱེན་འདས་སུ་སོང་བར། ཁ་སང་ཕྱི་ཚེས་ ༦ ཉིན་༧གོང་ས་མཆོག་གིས་ཨ་རིར་མཛད་འཕྲིན་སྐྱོང་སྐབས་དང་བསྟུན་ཏེ། ཁོང་གི་ནང་མི་སྐུ་འཁོར་ལ་ཐུགས་གསོའི་འཚམས་འཕྲིན་ཞིག་ཕུལ་འདུག་ཅིང་། ཕྱག་འཕྲིན་དེའི་ནང་དུ། ངོས་ཀྱི་གྲོགས་པོ་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་ཉེ་ཆར་སྟབས་མ་ལེགས་པར་ཐད་འཕུར་གནམ་གྲུ་རྡབ་སྐྱོན་ཁྲོད་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་གོ་ཐོས་བྱུང་བར་བློ་ཕམ་ཆེན་པོ་བྱུང་། སྔ་ལོ་ངོས་རང་མོན་རྟ་དབང་དུ་འཚམས་འདྲི་ལྟ་སྐོར་དུ་བསྐྱོད་སྐབས། སྐུ་ཞབས་རྡོ་རྗེ་མཁའ་འགྲོའི་དབུ་ཁྲིད་པའི་ཁོང་གི་མངའ་སྡེ་གཞུང་གིས་ངོས་ལ་སྣེ་ལེན་གཟབ་རྒྱས་ཀྱིས་མཐུན་འགྱུར་གང་ལེགས་གནང་ཡོད་ལ། ཨ་རུ་ན་ཅལ་མངའ་སྡེར་ལྟ་སྐོར་བྱེད་སྐབས་ངོས་རང་ ༡༩༥༩ ལོར་ཐོག་མར་བཙན་བྱོལ་དུ་ཡོང་སྐབས་མངའ་སྡེ་དེའི་གཞུང་དང་མི་མང་གིས་སྣེ་ལེན་གང་ལེགས་གནང་བ་དྲན་གསོ་བྱུང་། ངོས་ནས་སྐུ་གཤེགས་དམ་པ་དང་ཁོང་གི་ནང་མི་སྐུ་འཁོར་བཅས་ལ་སྨོན་ལམ་དང་ཤུལ་ལུས་ནང་མི་ཚང་མར་གདུང་སེམས་མཉམ་སྐྱེད་ཞུ་བཞིན་ཡོད། ཅེས་འཁོད་ཡོད་འདུག
དཔལ་ལྡན་གྱིས་བསྡུ་སྒྲིག་བྱས།
གོང་ས་མཆོག་གིས་བསྐུར་བའི་ཐུགས་གསོའི་གསུང་འཕྲིན་འདིས་ཨ་རུ་ན་བཅལ་གྱི་སྤྱི་ཁྱབ་བློན་ཆེན་མཆོག་གི་ཡུལ་མི་རྣམས་ཀྱི་སྐྱོ་བ་དང་སྡུག་བསྔལ་དང་དུས་གཅིག་ཏུ་སེལ་ཐུབ་པའི་སྨོན་ལམ་འདེབས།
ཨ་རུ་ན་ཅལ་མངའ་སྡེ་སྤྱི་ཁྱབ་བློན་ཆེན་མཆོག་གནམ་གྲུ་རྡབ་སྐྱོན་ཁྲོད་རྐྱེན་འདས་སུ་སོང་བར། ༧གོང་ས་མཆོག་གིས་ཐུགས་གསོའི་འཚམས་འཕྲིན་ཞིག་ཕུལ་འདུག ཅེས་པ། ཐུགས་གསོའི་འཚམས་འཕྲིན་ཞིག་གནང་འདུག་ཅེས་བྲིས་ན་ཡག་པོ་འདུག །ཕུལ་འདུག་བྲིས་ན། ༧གོང་ས་མཆོག་ལས་མཐོ་བ་ཞིག་ལ་གོ་འགྲོ་ཡི་འདུག་པས་རྗེས་སུ་གཟབ་གཟབ་གནང་དགོས་འདུག་ཞུ།