ཟིན་བྲིས་པ་དང་ངའི་ལས་དབང་།

གནའ་བོའི་རི་གྲོང་གི་ལྷིང་འཇགས་དཀྲོགས་པའི་རྫས་འཕྲུལ་འཕེལ་རྒྱས་ཀྱི་མ་ལག་ཁག་ལ་ངས་ཚད་མཐོའི་གདེང་འཇོག་བྱ་རྒྱུའི་ཡང་དག་པའི་ངེས་ཤེས་ཤིག་གཏན་ནས་མ་རྙེད་མོད། འོན་ཀྱང་བརྡ་འཕྲིན་འཕྲུལ་ལས་མ་ལག་ཁག་གིས་མིའི་རིགས་ལ་བློ་ཡུལ་ལས་འདས་པའི་ཕན་ནུས་དང་། གལ་ཆེའི་མཁོ་ནུས་རང་བཞིན་ཅན་གྱི་རིག་གསར་མ་ལག་གཅིག་ཏུ་དངོས་ར་གསར་སྤྲོད་བྱས་པ་དེས། ངས་ཚན་རྩལ་རིག་པར་འཛིན་པའི་རིན་ཐང་ལྟ་ཚུལ་དང་། འདུ་ཤེས་འཛིན་ཚུལ་ལ་བཟང་ཕྱོགས་ཀྱི་འགྱུར་ལྡོག་བྱུང་བ་སོགས་ནི་ང་ཚོའི་བར་གྱི་ཐོག་མའི་འབྲེལ་ལམ་བྱུང་བའི་འཇུག་སྒོ་ལྟ་བུ་དེ་ཡིན།

ཟིན་བྲིས་ཀྱི་ཕན་ནུས་དང་བྱེད་ལས་རང་བཞིན་ལ་བསྔགས་བརྗོད་ཀྱི་མེ་ཏོག་གཏོར་ཞོར་དུ་གཅིག་རྗེས་གཉིས་མཐུད་ཀྱིས་ཟིན་བྲིས་ནང་འཚངས་ཏེ། བསམ་བློའི་དམག་འཁྲུག་གི་འཐབ་རྭའི་ཁྲོད་ནས་མཐར་ཐུག་གི་ཐུན་མོང་མངོན་འདོད་འགྲུབ་ཐབས་ལ་ཟིན་བྲིས་པ་ཚོས་གུས་རྟག་གི་བརྩོན་པ་ལྷུར་ལེན་བྱེད་དུས། ང་ས་རྭ་མཐོ་སློབ་ཀྱི་སློབ་གྲྭའི་རྭ་བའི་ནང་ཤེས་བྱའི་མཁའ་དབྱིངས་ཀྱི་དཀྱིལ་འཁོར་ཡངས་པོར་འཕུར་ལྡིང་གི་བང་རྩལ་ལ་འགྲན་བཞིན་ཡོད། 

སྐབས་དེར་ངས་ཀྱང་ཁྱེད་ཅག་དང་མཉམ་དུ་བསམ་བློའི་དམག་འཁྲུག་གི་གཡུལ་སའི་ཁྲོད་ནས་རང་མི་རིགས་ཀྱི་ཐུན་མོང་མངོན་འདོད་འགྲུབ་ཐབས་ལ་བརྩོན་ཤུགས་ཀྱི་ནུས་པ་མཉམ་སྤུངས་བྱ་དགོས་བསམ་ཀྱང་།  བསམ་དོན་བཞིན་སྐབས་དེར་ལེགས་འགྲུབ་མ་ཐུབ། འོན་ཀྱང་དངོས་ཡོད་དང་འཚམས་ཤིང་མཁོ་ངེས་ཆེ་བའི་བསམ་ཚུལ་གང་ཞིག་ཡིན་རུང་། བཟང་རྟགས་ངན་རྟགས་ཇི་བྱུང་ལ་མ་ལྟོས་པར་ཚོད་ལྟ་ཞིག་མ་བྱས་ན་བདེ་ལྷོད་བྲལ་བའི་ངའི་མི་གཤིས་གྲུབ་སྟངས་འདིས་རྐྱེན་པས། ངའི་བསམ་ཚུལ་འདི་སློབ་མཐར་མ་ཕྱིན་བར་སེམས་ཁོང་ནས་གཏན་ནས་ཡལ་མ་མྱོང་། 

དེའི་སྟབས་ཀྱིས་སློབ་མཐར་ཕྱིན་པ་དང་མཉམ་དུ་ང་ལ་ཆ་རྐྱེན་ཁག་ཀྱང་ལྡན་པར་གྱུར་པས་ང་ཡང་ཟིན་བྲིས་ནང་འཚངས་ཏེ། ཁྱེད་ཅག་དང་ལྷན་དུ་མི་རིགས་ཀྱི་ལས་དབང་དང་འབྲེལ་བའི་གནད་དོན་མཐའ་དག་ལ་བསམ་བློའི་ནུས་པ་མཉམ་སྤུངས་བྱ་དགོས་བསམས་ཏེ་ཟིན་བྲིས་ཁག་ཅིག་བཀླག་མགོ་བརྩམས་པ་ཡིན། དེ་ལྟ་ནའང་ཟིན་བྲིས་པ་ཚོས་མི་རིགས་ཀྱི་ལས་དབང་ལ་འགན་འཁུར་བའི་ཐོག་རང་ནུས་ལྕོགས་ཚོད་ཀྱིས་མིག་རྒྱང་རིང་ཞིང་། བློ་གྲོས་ལྡན་པའི་སྒོ་ནས་ལྟ་ཚུལ་ལྷུག་བརྗོད་གནང་བ་སོགས་ལ་དགའ་གུས་ཡི་རང་དང་བསྔགས་བརྗོད་ཀྱི་མེ་ཏོག་ལན་བརྒྱར་གཏོར་བཞིན་མཆིས་ཀྱང་།  མཉམ་འཇོག་བྱེད་ཁོམ་མ་བྱུང་བའམ་རྒྱུན་འབྱམས་སུ་སོང་བ་གང་ཡིན་ཆ་མ་མཆིས་མོད། 

བརྡ་སྤྲོད་གཞུང་ལུགས་དང་མ་མཐུན་པའི་མིང་མཐའ་འདྲེན་ཚུལ་དཔེར་ན་༼ ཡོད་གྱི་ ༽ལྟ་བུ་རྗེས་འཇུག་ད་ཡིག་གི་རྗེས་ཕྲད་ཀྱིའི་ཚབ་ཏུ་གྱི་བྲིས་པ་ཇི་སྙེད་ཅིག་ཡོད་པ་དང་།  དེ་ལས་ཀྱང་ཉེན་ཚབས་ཆེ་བའི་ཐལ་སྤྱོད་གཞན་ཞིག་ནི་ཕ་ཡུལ་གྱི་ཁ་སྐད་འགའ་རེ་བཙན་སྦྱོར་བྱས་པ་དག་རེད།  ངས་རྒྱུན་པར་ཡིག་སྐད་ཀྱི་ཚབ་ཏུ་ཡུལ་སྐད་བཀོལ་སྤྱོད་བྱས་པའམ།  ཡུལ་སྐད་རེ་ཟུང་ཡིག་སྐད་ཀྱི་ཐོག་མཐའ་བར་གསུམ་དུ་བཙན་བཅུག་བྱེད་པ་སོགས་ནི་ཡི་གེ་དག་ནོར་རེ་ཟུང་བྱུང་བ་ལས་ཀྱང་ཡིག་སྐད་ཀྱི་སྤྱི་སྒྲོམ་ལ་གཏོར་སྐྱོན་ཐེབས་ཚད་དེ་ཆེས་ཆེ་བ་ཞིག་ཏུ་ངོས་འཛིན་བྱེད་ཀྱི་ཡོད།    

 གང་ལགས་ཤེ་ན། སྤྱིར་ཡི་གེའི་དག་ཆ་མ་ནོར་མ་འཆུག་པ་ཞིག་འབྲི་དགོས་པ་ནི་རང་ཉིད་ཀྱི་བརྗོད་དོན་ཇི་བཞིན་གཞན་ལ་འཁྲུལ་མེད་དུ་གོ་བྱེད་ཀྱི་རྨང་གཞིའི་ཆ་རྐྱེན་དེ་ཡིན་པས་ཡིད་གཟབ་དགོས་གལ་ཆེ་ཡང་། ཡི་གེ་དག་ནོར་རེ་ཟུང་བྱུང་བ་ཙམ་གྱིས་འབྲི་བ་པོ་རང་ཉིད་ཀྱི་བརྗོད་དོན་ཇི་བཞིན་གཞན་ལ་མི་གོ་བའི་དཀའ་རྙོག་ཙམ་ལས་ཡིག་སྐད་སྤྱིའི་སྒྲོམ་གཞིར་ཤུགས་རྐྱེན་དེ་ཙམ་ཐེབས་མི་ཐུབ། འོན་ཀྱང་ཁ་སྐད་དམ་ཡུལ་སྐད་བཀོལ་སྤྱོད་བྱས་པ་དེས་ཡིག་སྐད་ཀྱི་གོ་ས་འཕྲོག་བཞིན་པ་མ་ཟད།  གསར་སྣན་སྣ་ཚོགས་ཤིག་ཡོད་པ་དེས་མི་རབས་རིམ་སོང་དང་དུས་ཚོད་རིམ་འདས་ཀྱི་འགྱུར་འགྲོས་འོག སྔོན་གྱི་བརྡ་སྤྲོད་གཞུང་ལུགས་དང་དུས་སྐབས་དེའི་ནང་བཀོལ་སྤྱོད་བྱེད་པའི་ཡི་གེའི་བར་གནམ་ས་ལྟ་བུའི་ཧེ་བག་ཤོར་བའི་སྟབས་ཀྱིས་སྔོན་གྱི་བརྡ་སྤྲོད་གཞུང་ལུགས་ཀྱིས་དུས་སྐབས་དེའི་ཡི་གེའི་རྨང་གཞིར་མི་རུང་སྟབས། དུས་སྐབས་དེའི་ཡི་གེ་དང་འཚམས་པའི་བརྡ་སྤྲོད་གཞུང་ལུགས་ཤིག་བརྩམ་དགོས་པའི་མཐར་ལ་གཏུགས་དུས་ད་ལྟའི་བརྡ་སྤྲོད་གཞུང་ལུགས་དག་ལྟ་ཅི་སྨོས། འཕགས་ཡུལ་ནས་བསྒྱུར་བའི་བཀའ་བསྟན་གྱི་གཞུང་ལུགས་ཁག་དང་། དེའི་དགོངས་འགྲེལ་དང་བཅས་པ་རྒྱ་བོད་མཁས་པ་ནམ་མཁའི་སྐར་ཚོགས་ལྟར་མཆིས་པ་དེ་དག་གིས་བརྩམས་པའི་གཞུང་ལུགས་ཇི་སྙེད་ཅིག་ཡོད་འདི་དག་ཐམས་ཅད་བེད་མེད་དུ་འགྱུར་དུས་མི་རིགས་འདི་ཡང་སྲོག་སྙིང་བྲལ་བའི་རུས་སྒྲོམ་ལྟ་བུ་ཞིག་ཏུ་གྱུར་ཟིན་པས་དེ་དུས་འགྱོད་ཀྱང་བྱ་ཐབས་ཅི་ཞིག་ཡོད།

འདས་པའི་ལོ་རྒྱུས་ཐོག་ནས་ཀྱང་ཡིག་སྐད་ལ་ཁ་སྐད་དམ་ཡུལ་སྐད་ཀྱིས་བཙན་འཛུལ་བྱས་འབྲས་སུ་སྤྱི་སྐད་ཀྱི་སྒྲོམ་གཞི་གཏོར་བརླག་ཏུ་གྱུར་ཏེ། ཡུལ་མི་རང་རང་གི་སྐད་དང་ལྷན་དུ་དེ་དང་མཐུན་པའི་བརྡ་སྤྲོད་གཞུང་ལུགས་ཀྱང་རྩོམ་དགོས་པ་ཆགས་ཀྱི་ཡོད་པ་ནི་རྒྱ་གར་གྱི་སྐད་རིགས་ཆེན་པོ་བཞིའི་འཕེལ་རིམ་འདི་ཁོ་ནས་བདེན་དཔང་བྱེད་ཐུབ། རྒྱུ་མཚན་དེ་བས་ན་ངས་ཆོས་རྒྱལ་ཚོས་དགོངས་པ་ཆེ་བཞེས་ཐོག་ལོ་པཎ་རིམ་བྱོན་རྣམས་ཀྱིས་དཀའ་ཁག་གདོང་གཏད་ཀྱིས།  བཀའ་བསྟན་གཞུང་ལུགས་དྲི་མ་མེད་པ་འདི་དག་ཆོལ་གསུམ་བོད་མི་མཐོ་དམན་དྲག་ཞན་སུ་ཞིག་གིས་བཀླག་ཀྱང་། དཀའ་ཚེགས་མེད་པར་བདེ་བླག་ཏུ་ཀློག་ཐུབ་པའི་རྗེས་འབྲས་རླབས་པོ་ཆེ་འདི་དག་མི་རབས་ཕྱི་མ་ཕྱི་མ་ཚོས་ཀྱང་དེ་དེ་བཞིན་བདེ་བླག་ཏུ་གོ་ཐུབ་ན། མི་རིགས་འདི་ཡང་འཚོ་གནས་ལེགས་པོ་ཞིག་ཡོང་ཐུབ་སྙམ་པའི་ཀུན་སློང་དྭངས་གཙང་ཞིག་གི་བློ་མིག་སྔོན་དུ་བཏང་ནས།  ཡུལ་སྐད་བཙན་སྦྱོར་བྱེད་པ་འདི་ལུགས་མཐུན་མིན་ཚུལ་བརྗོད་པ་ལས་བྱེ་བྲག་པ་ཞིག་ལ་དགའ་མིན་དགའ་མདོག་གིས་དེ་ལྟར་བརྗོད་པ་ནི་གཏན་ནས་མིན།

ཡང་གཅིག་བཤད་ན་སྤྱིར་ཆོལ་ཁ་གསུམ་གྱི་ཡུལ་སྐད་མི་འདྲ་བ་རྒྱུན་ཤེས་ཤིག་ཡིན་པ་དང་།  ལྷག་ཏུ་ཆོལ་ཁ་སོ་སོའི་ནང་ལའང་ཡུལ་སྐད་མི་འདྲ་བ་སྣ་ཚོགས་ཤིག་ཡོད་པའི་གསང་གནད་ཁག་ལ་ཞིབ་བརྟག་གིས་ཤེས་རྟོགས་རྒྱུས་ལོན་གཏིང་ཟབ་བྱ་དགོས་པ་གལ་ཆེར་སྣང་ཡང་། དེ་ལྟར་བརྟག་དཔྱད་སྔོན་དུ་མ་སོང་བས་རང་ཉིད་ཀྱིས་བཙན་སྦྱོར་བྱེད་བཞིན་པའི་ཐ་སྙད་དེ་དག རང་གི་ལུང་པ་རྐྱང་པའི་ཁ་སྐད་ཅིག་ཡིན་པར་རང་བསམ་བདེན་རློམ་གྱིས་རང་ཉིད་ཀྱི་ཁྱད་རྣམ་དང་རྒྱན་དུ་བརྩི་བའི་བྱ་སྤྱོད་ནི་ཐ་སྙད་དེ་དག་ཡུལ་ལུང་གཞན་དང་གཞན་གྱི་མི་སྣས་ཀྱང་། བཀོལ་སྤྱོད་དེ་ལྟར་བྱེད་བཞིན་པ་ཤེས་རྟོགས་རྒྱུས་ལོན་ཐུབ་པའི་མི་སྣ་ཚོའི་མདུན་སར། ཁྱེད་ཀྱིས་གཡག་ཞྭར་གྱིས་རྩྭ་ཟ་ཚུལ་གྱི་སྣང་བརྙན་དེ་ཇི་འདྲའི་ཉམ་ཆུང་ནུས་མེད་ཅིག་རེད་ཨང་། 

དེ་བས་ན་རྒྱུན་པར་ཁ་ནས་རྗོད་ཀྱིན་པའི་སྤྱི་དོན་ཞེས་པའང་ཆུང་ས་འདི་རིགས་ནས་སྤྱི་དོན་ལ་སྲུང་སྐྱོབ་དང་འགན་འཁུར་བྱ་དགོས་པ་ལས། རྡོག་རྡོག་རང་མཚན་པ་གཅིག་ལ་སྲུང་སྐྱོབ་བྱ་གཞི་ཞིག་མེད་པས་ན། སྤྱི་དོན་ཞེས་པ་ཆུང་ས་ནས་བསྒྲུབ་རྒྱུ་ལས་གཞན་དུ་མེད་ལ། སྤྱི་དོན་ལ་འགན་སེམས་བྲལ་བའི་བྱ་སྤྱོད་དང་གཏོར་རྒོལ་བཏང་བ་ཞེས་པ་ཡང་ཆུང་ཆུང་འདི་རིགས་ལ་སྣང་མེད་དང་རྡོག་རྫིས་བཏང་བ་ལས་ལོགས་སུ་བརྗོད་དུ་མེད་པས་ན་དགོངས་པ་ཆེ་བཞེས་གནང་དགོས་པ་ནི་སྤྱི་པའི་ཐུན་མོང་གི་མངོན་འདོད་དེའི་སླད་དུའོ།  

དེ་ལྟར་ཟིན་བྲིས་པས་བརྡ་སྤྲོད་ཀྱི་ལུགས་དང་འགལ་བའི་མིང་མཐའ་འདྲེན་ཚུལ་དང་ཡུལ་སྐད་བཙན་སྦྱོར་བྱེད་བཞིན་པའི་སྣང་བརྙན་ཡ་མཚན་པ་དེས།  ཟིན་བྲིས་ཀྱི་རྭ་བའི་དཀྱིལ་འཁོར་ནང་འཛུལ་འདོད་ཀྱི་ངའི་ཚོར་ཤུགས་དེ་རི་དྭགས་རྨས་པ་བཞིན་དུ་ཉམས་ཉེས་སུ་གྱུར་སྟབས། ད་གཟོད་ང་དང་ཟིན་བྲིས་པའི་ལས་དབང་དེ་ཁ་ཐག་ཇེ་རིང་དུ་འགྱུར་བཞིན་པ་ནི་ང་ལ་མཚོན་ན་བློ་ཕམ་གྱི་གནས་ཤིག་ལས་མ་འདས།  དེ་ལྟ་ནའང་བཅོས་སུ་ཡོད་པའི་གཏན་ཚིགས་དེས་ང་ཚོའི་བར་གྱི་ལས་དབང་ལའང་བཟང་ཕྱོགས་ཀྱི་འགྱུར་ལྡོག་ཡོང་བའི་རེ་བ་ཡོད།།