སྤྱི་འཐུས་གཉིས་ཀྱི་འོས་བསྡུ་འཕར་མ།

བོད་མི་མང་སྤྱི་འཐུས་སྐབས་བཅོ་ལྔ་པའི་འོས་བསྡུ་ཆེན་མོའི་ནང་། དབུས་གཙང་སྤྱི་འཐུས་གཉིས་ལ་འོས་གྲངས་བརྒྱ་ཆ་ལོང་མེད་སྟབས། སང་ཉིན་བསྐྱར་དུ་འོས་བསྡུ་འཕར་མའི་སྔོན་འགྲོའི་འོས་བསྡུ་གནང་རྒྱུ་རེད།

དེ་རིང་སྔ་དྲོ་འདི་གའི་གསར་འགོད་པས་དབུས་འོས་བསྡུ་ལྷན་ཁང་གི་འགན་འཛིན་ལས་འཕར་གཡང་མཁོ་རྒྱལ་ལགས་སུ། འོས་བསྡུ་འཕར་མའི་ལས་དོན་བྱེད་ཕྱོགས་སྐོར་ནས་བཀའ་འདྲི་ཞུས་སྐབས་ཁོང་གིས་བརྗོད་རྒྱུར། སང་ཉིན་ཕྱི་ཚེས་ ༡༩ ཉིན་སྔོན་འགྲོའི་འོས་བསྡུ་དང་། འབྱུང་འགྱུར་ཕྱི་ཟླ་ ༩ ཚེས་ ༡༡ ཉིན་དངོས་གཞིའི་འོས་བསྡུ་གནང་རྒྱུ་རེད། འོས་བསྡུ་དངོས་གཞི་གྲུབ་སྟེ་ས་གནས་ཁག་གི་འོས་གྲངས་དབུས་ལ་འབྱོར་རྗེས་ཕྱི་ཟླ་ ༩ ཚེས་ ༢༨ ཉིན་དབུས་གཙང་སྤྱི་འཐུས་གཉིས་ཀྱི་མཚན་གཞུང་གསལ་བསྒྲགས་གནང་རྒྱུ་གཏན་ཁེལ་ཡོད་པ་རེད། ཐེངས་འདིའི་འོས་བསྡུ་འཕར་མ་དེ་ཕྱི་རྒྱལ་ཡུལ་གྲུ་ཁག་ཕུད་པའི་རྒྱ་བོད་འབྲུག་གསུམ་གྱི་ས་གནས་ཡན་ལག་ལས་ཁུངས་ ༤༥ ཙམ་ནང་སྔར་རྒྱུན་ལྟར་འོས་བསྡུ་གནང་རྒྱུ་གྲ་སྒྲིག་བྱས་ཡོད་པ་རེད། ཡིན་ནའང་། ད་ལྟ་མཐོ་སློབ་ཁག་ཏུ་སློབ་མ་རྣམས་གུང་གསེང་གི་སྐབས་ལ་ཁེལ་ཡོད་སྟབས། འོས་བསྡུ་ཆེན་མོའི་སྐབས་ཀྱི་མཐོ་སློབ་ཁག་ནང་འཕྲལ་སེལ་ས་གནས་འོས་བསྡུ་ལས་ཁུངས་དག་ཕྱིར་བསྡུ་བྱེད་དགོས་བྱུང་ཡོད་པ་རེད། ཅེས་བརྗོད་བྱུང་།

དེ་མིན། སྔོན་འགྲོའི་འོས་བསྡུ་གནང་གྲུབ་རྗེས་དབུས་འོས་བསྡུ་ལྷན་ཁང་ནས་སྔོན་འགྲོ་འོས་ཐོབ་ཀྱི་རྩེ་གྲངས་ལྟར་ཉིས་ལྡབ་ལས་མ་ཉུང་བའི་ཐོག དང་བླངས་འོས་མི་རྣམས་བསྣན་དེ་དངོས་གཞིའི་འོས་མིའི་མཚན་གཞུང་གསལ་བསྒྲགས་གནང་གི་རེད། ཅེས་བརྗོད་སོང་།

གཞན་ཡང་། དབུས་འོས་བསྡུ་ལས་ཁུངས་ཀྱི་རྩིས་པ་བསོད་ནམས་པད་སྒྲོན་ལགས་ལ་ཐེངས་འདིའི་འོས་བསྡུ་འཕར་མའི་འགྲོ་གྲོན་ཐད་ལ་བཀའ་འདྲི་ཞུས་པར། ཁོ་མོས་ཐེངས་འདིའི་འོས་བསྡུ་འཕར་མའི་ཐད་འགྲོ་གྲོན་ཧིན་སྒོར་འབུམ་ ༡༨ ཙམ་གྱི་བཀའ་ཁྲོལ་ཐོབ་ཡོད་པ་རེད། འགྲོ་གྲོན་ག་ཚོད་སོང་ཡོད་མེད་དེ་དབུས་ས་གཉིས་ཀྱི་འགྲོ་གྲོན་སྣ་ཚོགས་ཕྱོགས་བསྡོམས་བྱས་ཏེ་རྩིས་རྒྱག་དགོས་ཀྱི་ཡོད་སྟབས། ད་ལྟའི་ཆར་འགྲོ་གྲོན་ག་ཚོད་སོང་ཡོད་མེད་གསལ་ཁ་འདོན་ཐུབ་ཐབས་མི་འདུག ཡིན་ནའང་། དབུས་འོས་བསྡུ་ལས་ཁུངས་ཀྱི་ངོས་ནས་འགྲོ་གྲོན་བསྲི་ཚགས་ཅི་ཡོང་གནང་གི་ཡོད་ལ། མོན་རྟ་དབང་དང་། ལ་དྭགས་བྱང་ཐང་། ཤ་བ་ར་གསུམ། ཏེ་ཛུ། ཊེ་ཀྲིང་སོགས་འོས་བསྡུའི་སྒྲིག་གཞིའི་ནང་བཀོལ་ཡོད་པའི་མཐའ་འཁོབ་ས་གནས་འོས་བསྡུ་ལས་ཁུངས་རྣམས་ལ་མ་གཏོགས། དེ་མིན་ས་གནས་ས་ཐོག་གི་འགྲོ་གྲོན་རྣམས་ས་གནས་འོས་བསྡུ་ལས་ཁུངས་རང་ནས་གཏོང་དགོས་ཀྱི་ཡོད་པ་རེད། ཅེས་བརྗོད་སོང་།