གཟའ་ཟླ་བའི་ཉིན་གྱི་ཞོགས་པར་ངྷ་ས་ཐེག་ཆེན་གཙུག་ལག་ཁང་དུ། བོད་ཀྱི་སྨན་ལུགས་གཙང་བྲིས་ཐང་གའི་ལྷ་བྲིས་པ་ནུབ་རྒྱ་བུ་ཆུང་ལགས་ཀྱིས་བསྐྱངས་པའི་སློབ་ཕྲུག་འགའ་སློབ་མཐར་ཕྱིན་པའི་མཛད་སྒོ་དང་སྦྲགས་ཐང་གའི་འགྲེམས་སྟོན་ཞིག་ཚུགས་ཡོད་པ་རེད།
ཕྱི་ཟླ་ ༦ ཚེས་ ༢༧ ཉིན་གྱི་འགྲེམས་སྟོན་གྱི་དབུ་འབྱེད་མཛད་སྒོ་དེའི་སྟེང་། དཔལ་རྒྱལ་བ་ཀརྨ་པ་མཆོག་དང་བཀའ་ཁྲིའི་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག བཀའ་ཟུར་ཀིརྟི་རིན་པོ་ཆེ་མཆོག་གི་སྐུ་ཚབ། ཆོས་རིག་དང་ཤེས་རིག་ལས་ཁུངས་ཀྱི་དྲུང་ཆེ་རྣམ་པ། རྣམ་རྒྱལ་གྲྭ་ཚང་གི་མཁན་རིན་པོ་ཆེ། བོད་ཀྱི་དཔེ་མཛོད་ཁང་གི་འགན་འཛིན་སོགས་དབུ་བཞུགས་ཐོག ཐང་བྲིས་སྒྱུ་རྩལ་ཁང་ངོ་སྤྲོད་དང་སློབ་གཉེར་པ་ཁག་ཅིག་ལ་མཐར་ཕྱིན་ཕྱག་འཁྱེར་བསྩལ་སོང་།
ཐེངས་འདིར་༧གོང་ས་སྐུ་ཕྲེང་རིམ་བྱོན་དང་། སྟོན་པའི་མཛད་པ་བཅུ་གཉིས། ཙོང་ཁ་བརྒྱད་ཅུའི་ཐང་ག་བཅས་ཚུད་པའི་བོད་ཀྱི་སྲོལ་རྒྱུན་བྲིས་ཐང་རིགས་ཤིག་འགྲེམས་སྟོན་ཞུས་ཡོད་ཅིང་། བོད་ཀྱི་སྒྱུ་རྩལ་བྲིས་ཐང་འདི་ནི་བོད་གཙང་ཁུལ་གྱི་བྲིས་རྒྱུན་ཞིག་ཡིན་ཞིང་། ༡༩༨༥ ལོར་༧ པཎ་ཆེན་སྐུ་ཕྲེང་བཅུ་པ་ཆེན་པོས་བཀྲ་ཤིས་ལྷུན་པོར་ལྷ་བྲིས་སློབ་སྦྱོང་གསར་འཇུག་གནང་སྐབས། པཎ་ཆེན་རིན་པོ་ཆེ་མཆོག་གི་གམ་བཅར་སྨན་ཐང་གསར་མའི་ལུགས་ཀྱི་ལྷ་བྲིས་པ་དཀར་ཆེན་བློ་བཟང་ཕུན་ཚོགས་དང་། གཡང་པ་ཕུན་ཚོགས་རྡོ་རྗེ་རྣམ་གཉིས་ལ་ཆེད་དུ་བཀོལ་མངགས་གནང་པ་ལས་སྦྱངས་བརྩོན་བྱས་པའི་བྲིས་རྒྱུན་ཞིག་རེད་འདུག
མཛད་སྒོའི་ཐོག་མར་ལྷ་བྲིས་དགེ་རྒན་ནུབ་རྒྱ་བུ་ཆུང་ལགས་ཀྱིས་ཐེངས་འདིའི་སྒྱུ་རྩལ་ཐང་གའི་འགྲེམས་སྟོན་དང་འབྲེལ་ཏེ་བརྗོད་དོན། པཎ་ཆེན་སྐུ་ཕྲེང་བཅུ་པ་མཆོག་སྐུ་འཚོ་བཞུགས་སྐབས་ཁོང་གིས། དཀའ་ཆེན་ཁྱེད་ཀྱིས་དགེ་ཕྲུག་འགའ་གསོ་སྐྱོང་བྱས་ཏེ། བོད་ཀྱི་སྲོལ་རྒྱུན་ཞལ་ཐང་འབྲི་མཁན་གྱི་གཞོན་སྐྱེས་སྐྱེད་སྲིང་བྱེད་དགོས། བོད་ཀྱི་སྲོལ་རྒྱུན་བྲིས་ཐང་མི་ཉམས་རྒྱུན་འཛིན་བྱེད་པའི་ལས་འགན་དེ་དཀའ་ཆེན་ཁྱེད་ལ་སྤྲད་ཡོད་ཅེས་བཀའ་ཕེབས་པ་བཞིན། རྒན་ལགས་རྣམ་གཉིས་ཀྱིས་ཀྱང་གུས་པ་ཚོར་ད་ལྟ་སློབ་སྦྱོང་ཡག་པོ་བྱས་ཏེ་རྗེས་སུ་བོད་ཀྱི་སྲོལ་རྒྱུན་ཞལ་ཐང་འབྲི་མཁན་མི་སྣ་སྐྱེད་སྲིང་བྱ་དགོས་པའི་བཀའ་སློབ་ཡང་ཡང་གནང་པའི་བག་ཆགས་དེས་ཕྲན་ལ་དམིགས་བསལ་འགན་འཁྲི་ཞིག་ཡོད་པའི་སྐུལ་ལྕག་དང་སེམས་ཚོར་ཐེབས་པ་ཞིག་ཡིན། ཞེས་དང་། ལོ་རབས་ ༨༠ དང་༩༠ ནང་ཕྲན་གྱིས་བཀྲིས་ལྷུན་པོར་༧པཎ་ཆེན་སྐུ་ཕྲེང་ལྔ་པ་ནས་དགུ་པ་བར་གྱི་སྐུ་གདུང་གསར་བཞེངས་དང་། ༧པཎ་ཆེན་སྐུ་ཕྲེང་བཅུ་པ་མཆོག་གི་སྐུ་གདུང་གསར་བཞེངས་ཀྱི་ལྡེབས་རིས་སོགས་མཚོན་པའི་བོད་ནང་ལྷ་སྐུ་དང་ལྡེབས་རིས་འབྲི་རྒྱུན་འཛིན་ཐུབ་ཙམ་ལས། རྒྱུན་འཛིན་སློབ་མ་སྐྱེད་སྲིང་བྱེད་མ་ཐུབ། འོན་ཀྱང་། ༡༩༩༧ ལོར་བཙན་བྱོལ་དུ་འབྱོར་པ་ནས་༧གོང་ས་མཆོག་དང་རང་གཞུང་གི་བཀའ་དྲིན་འོག་གཟིམ་ཆུང་དང་སྐུ་སྒེར་ཡིག་ཚང་། རྣམ་རྒྱལ་གྲྭ་ཚང་སོགས་བཙན་བྱོལ་ནང་གི་ཚོགས་སྒེར་མང་པོ་ཞིག་ལ་ཞལ་ཐང་གསར་བཞེངས་དང་རིམ་བཞིན་རྒྱུན་འཛིན་སློབ་བུ་སྐྱེད་སྲིང་གི་ལས་དོན་གཉེར་ཐུབ་པ་བྱུང་། ད་སྔ་བོད་རིགས་དང་ཕྱི་རྒྱལ་པ་བོད་ཀྱི་ལྷ་བྲིས་ལ་དོན་གཉེར་ཅན་བཅས་སློབ་ཕྲུག་ ༣༧ ཙམ་བྱུང་པའི་ཁྲོད། རང་རྐྱ་འཕེར་མཁན་སློབ་ཕྲུག་ ༧ མཐར་ཕྱིན་ཅིང་། ད་ལྟ་སློབ་གཉེར་པ་ ༡༠ ཡོད། མ་འོངས་པར་སློབ་གཉེར་ཁང་འདི་རྒྱ་སྐྱེད་དང་། བོད་ཀྱི་མཐོ་རིམ་སློབ་གྲྭ་གང་རུང་ཞིག་དང་ཟུང་འབྲེལ་གྱིས་སློབ་གཉེར་པའི་ལག་འཁྱེར་ཚད་ལྡན་བཟོ་ཐབས་བཅས་ཀྱི་ལས་འཆར་འགྲོ་བཞིན་ཡོད། ཅེས་ངོ་སྤྲོད་གནང་བྱུང་།
དེའི་རྗེས་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་གསུང་བཤད་གནང་དོན། སངས་རྒྱས་བཅོམ་ལྡན་འདས་ཞལ་བཞུགས་པའི་སྐབས་སུ་རྒྱ་གར་གྱི་རྒྱལ་པོ་དེ་ཚོས་ཁོང་གི་མཛད་པ་འཕྲིན་ལས་རི་མོར་བཀོད་དེ་འདི་ཕྱི་གཉིས་ཕན་ཡོང་པའི་བྱ་བ་རླབས་ཆེན་བསྒྲུབས་མྱོང་ཡོད་རེད་ལ། ད་ལྟའི་དུས་ཚོད་ལ་ཡང་སྐུ་པར་དང་ཞལ་ཐང་རིགས་ལ་ཧ་ཅང་རིན་ཐང་ཡོད་བསྡད་པ་ཞིག་རེད། དཔེར་ན་༧གོང་ས་མཆོག་གི་སྐུ་པར་ཞིག་བོད་ནང་གི་བོད་མི་ཞིག་ལ་རག་ཡོང་སྐབས་སེམས་ཚོར་གང་འདྲ་སླེབས་ཀྱི་ཡོད་པ་གསལ་པོ་ཤེས་ཐུབ་པ་ཞིག་རེད། དེ་བཞིན་ང་འདྲ་བོ་ཞིག་གིས་སྐད་ཆ་བཤད་པ་ཡིན་ན། ཉན་འདོད་ཡོད་མེད་སྣ་ཚོགས་ཡོང་གི་རེད། འོན་ཀྱང་། སྐུ་ཐང་ཞིག་སྒྱུ་རྩལ་གྱི་ལམ་ནས་རི་མོར་བྲིས་ཡོད་ཚེ། ལོང་པ་ཞིག་ཡིན་ན་མ་གཏོགས་ཚང་མས་བལྟ་ངེས་རེད་ལ། བལྟས་པ་ཙམ་མ་ཡིན་པར་རི་མོའི་སྟེང་གི་བླ་མའམ་སངས་རྒྱས་བྱང་སེམས་གང་དེའི་མཛད་པ་དང་འཕྲིན་ལས་སོགས་ལ་རྒྱུས་ལོན་བྱ་ངེས་ཀྱི་ཕན་ཐོགས་ཆེན་པོ་ཡོད་སྟབས། བྲིས་ཐང་སྒྱུ་རྩལ་འདི་བོད་ཀྱི་སྲོལ་རྒྱུན་རི་མོའི་འབྲི་རྒྱུན་དར་སྤེལ་དང་། ཕྱི་རྒྱལ་མི་རིགས་ལ་བོད་ཀྱི་རིག་གཞུང་གིས་མཚོན་པའི་སྒྱུ་རྩལ་རི་མོ་ངོ་སྤྲོད་ཡོང་རྒྱུར་ཕན་ཐོགས་ཆེན་པོ་ཡོད་ངེས་རེད། ཅེས་གསུངས་བྱུང་།
མཐར་སྐུ་མགྲོན་གཙོ་བོ་དཔལ་རྒྱལ་པ་ཀརྨ་པ་མཆོག་གིས་བཀའ་སློབ་གནང་དོན། ང་རང་རི་མོ་ལ་དོ་སྣང་ཡོད་པ་ལས་རི་མོའི་བྱུང་རབས་ལོ་རྒྱུས་ལ་དེ་ཙམ་ཤེས་རྟོགས་མེད། གང་ལྟར་རྒན་བུ་ཆུང་ལགས་དང་ངེད་གཉིས་ངོ་ཤེས་པ་ཡིན་པས། ཁོང་གི་བྲིས་ཐང་ལ་རྒྱུས་མངའ་གང་འཚམ་ཡོད་ལ་སྨན་ལུགས་ཀྱི་ཐང་བྲིས་རྒྱུན་འཛིན་ཐོག་འདི་འདྲའི་འགྲེམས་སྟོན་བྱས་པར་ཡང་བསྔགས་བརྗོད། བོད་ལ་ལྷ་བྲིས་ཀྱི་ཕྱག་རྒྱུན་ཕུལ་དུ་བྱུང་པ་མང་པོ་བྱུང་ཡོད་པ་དེ་དག་དེང་སྐབས་དཀོན་པོ་ཆགས་འདུག འོན་ཀྱང་། སྨན་ལུགས་གསར་མའི་ཐང་བྲིས་ཀྱི་རྒྱུན་འདི་པཎ་ཆེན་སྐུ་ཕྲེང་རིམ་བྱོན་གྱི་སྐུ་བཅར་ལྷ་བྲིས་ཚོ་བརྒྱུད་ད་ལྟའི་བར་རྒྱུན་མ་ཆད་ཅིང་། ད་ལྟ་རྒན་བུ་ཆུང་ལགས་ཀྱིས་མི་རབས་མང་པོ་བརྒྱུད་ཡོད་པའི་བྲིས་རྒྱུན་འདི་མུ་མཐུད་རྒྱུན་འཛིན་བྱེད་ཀྱི་ཡོད་པ་ཧ་ཅང་གལ་ཆེན་པོ་རེད། ཅེས་དང་།
ཁོང་གིས་མུ་མཐུད། དེང་སང་ཐང་ག་གང་བྱུང་མ་བྱུང་འབྲི་མཁན་དེ་འདྲ་ཡོང་གི་འདུག དཀྱིལ་འཁོར་ཡིན་པའི་ཟོལ་གྱིས་དེ་འདྲའི་སྟེང་བོད་ཡིག་འདྲ་མི་འདྲ་ཞིག་བྲིས། ཡིན་པ་སྔགས་ཡིན་མདོག་མདོག་རེད། ཡིན་ན་ཡང་ཕྱི་རྒྱལ་དེ་ཚོས་བོད་ཡིག་ཀློག་ཤེས་ཀྱི་མེད་སྟབས་སྣང་བ་གང་ཤར་འདྲ་པོ་ཞིག་བྲིས། རི་མོའི་སྟེང་བྲིས་བཞག་པ་དེ་ཚོ་ལྷ་ཡིན་པ་འདྲ་པོ། འདྲེ་ཡིན་པ་འདྲ་པོ། གང་ལྟར་ཚོང་གི་ཆེད་དུ་འདྲ་མི་འདྲ་བྲིས་ཏེ་བོད་ཀྱི་ཐང་ག་ཡིན་ཁུལ་གྱིས་བཙོང་གི་ཡོད་པ་དེ་དག་བློ་ཕམ་འབྱུང་ཡུལ་རང་རེད་འདུག དཔེར་ན་ང་འདྲ་པོ་ཞིག་ཐང་ག་དེ་དག་ཉོ་མཁན་ཞིག་ཡིན་པ་ཆ་བཞག་ན། ཐང་ག་དེ་ཚོ་ཡར་མཆོད་བཤམས་ནང་སྒྲིག་དགོས་ཡོད་དང་མར་གད་སྙིགས་ནང་གཡུགས་དགོས་ཡོད་ཁྱོན་ནས་ཧ་གོ་ཡ་མི་འདུག སྤྱིར་རི་མོ་མཁན་སོ་སོའི་རྣམ་དཔྱོད་དང་སྒྱུ་རྩལ་ལ་བརྟེན་ནས་རི་མོ་གསར་གཏོད་བྱ་རྒྱུ་དེ་གལ་ཆེན་པོ་རེད། བོད་ཀྱི་རི་མོ་ལབ་དུས་ཆོས་ཕྱོགས་དང་འབྲེལ་བའི་ལྷ་སྐུ་ཐང་ག་རྐྱང་ཡིན་དགོས་མ་རེད། མང་ཚོགས་ཀྱི་འཚོ་བ་དང་འབྲེལ་ཏེ་བརྩམས་ཆོས་གསར་པ་གསར་གཏོད་བྱ་རྒྱུ་དེ་གལ་ཆེན་པོ་རེད་དྲན་བསྡད་ཡོད། ཡིན་ན་ཡང་། ཆོས་ལུགས་ཀྱི་བརྩམས་བྱ་ཞིག་འབྲི་སྐབས་ལུགས་དང་མཐུན་པ་ཞིག་འབྲི་དགོས་རེད་མ་གཏོགས་གང་བྱུང་མ་བྱུང་བྲིས་ན་འགྲིག་གི་ཡོད་པ་མ་རེད།
དེ་བཞིན་ང་རང་པཎ་ཆེན་སྐུ་ཕྲང་བཅུ་པ་ཆེན་པོ་མཆོག་ལ་མཇལ་ཐུབ་མེད། འོན་ཀྱང་། པཎ་ཆེན་རིན་པོ་ཆེ་མཆོག་གིས་ཆོས་ལུགས་ཙམ་མ་ཡིན་པར་བོད་མི་རིགས་རྒྱུན་གནས་སྲ་བརྟན་ཡོང་ཆེད་སྐད་ཡིག་རིག་གཞུང་སོགས་ཕྱོགས་ཡོངས་ནས་སྐུ་ལས་ཆེན་པོ་བསྐྱོན་གནང་མཛད་ཡོད། ཁོང་དུས་ངན་དེ་འདྲ་ཞིག་གི་ཁྲོད་བྱོན་པ་དང་སྐུ་ཚེ་རིང་པོར་འཚོ་བཞུགས་མ་ཐུབ་པ་རེད་ལ། ཁོང་གི་ཡང་སྲིད་སྐོར་ལ་ཡང་ད་ལྟ་གོ་རྒྱུ་ཚོར་རྒྱུ་མེད་པར་ལྷག་ཡོད་པའི་གནས་སྟངས་ཤིག་གྱུར་ཡོད། ད་ལྟ་པཎ་ཆེན་རིན་པོ་ཆེ་མཆོག་གི་མཛད་པ་འཕྲིན་ལས་ཀྱི་ཆ་ལག་རེ་ང་ཚོའི་ལག་ཏུ་ཡོད་པ་རྣམས་མུ་མཐུད་འཛིན་སྐྱོང་སྤེལ་གསུམ་བྱ་རྒྱུ་དེ་བླ་མའི་ཐུགས་རྒྱས་པར་བསྐང་པའི་མཆོད་པ་ཞིག་ཆགས་ཡོད། རི་མོའི་སྒྱུ་རྩལ་འདི་ལ་མཚོན་ན་ཡང་ཁོང་གི་མཛད་འཕྲིན་གྱི་ཆ་ལག་ཅིག་ཆགས་ཡོད་སྟབས། སྔར་ནས་ཐུགས་ཁུར་ཆེར་བཞེས་གནང་པ་རེད་ལ་མུ་མཐུད་གནང་རོགས་ཞུ་རྒྱུ་ཡིན། ངའི་ངོས་ནས་ཐུབ་པ་རེ་ཡིན་ན་རོགས་པ་ག་རེ་དགོས་ན་གནང་གི་ཡིན། མ་གཞི་ངས་རོགས་པ་ཞུ་ཐུབ་ཡ་ཆེན་པོ་གང་ཡང་ཡོད་པ་མ་རེད། སྔོན་མ་ཡིན་ན་མཚམས་རེར་ཞལ་འདེབས་ཞུ་མཁན་འདྲ་ཡོང་གི་ཡོད་རེད། ད་ཞལ་འདེབས་ནི་འབུལ་རྒྱུ་མེད། ཚང་མ་འཁྱེར་སོང་། ད་གཅིག་ལྷག་ཡོད་པ་ནི་སེམས་ཤུགས་སྤར་རྒྱུ་ཙམ་རེད། ཅེས་གསུངས་སོང་།
ལྷ་བྲིས་དགེ་རྒན་ནུབ་རྒྱ་བུ་ཆུང་ལགས་ཀྱིས་ ༡༩༩༨ ལོ་ནས་མགོ་འཛུགས་ཀྱིས་ཐང་གའི་སློབ་ཁྲིད་གནང་ཡོད་པ་དང་། ད་བར་སློབ་ཕྲུག་སུམ་ཅུ་ལྷག་ཙམ་གསོ་སྐྱོང་བྱས་དང་བྱེད་བཞིན་པའི་ཁྲོད་ བོད་པ་དང་ཕྱི་རྒྱལ་རྒྱལ་ཁབ་ཁག་འགའ་བཅས་ཀྱི་སློབ་ཕྲུག་འདུས་ཡོད་པ་རེད།
གསར་འགོད་པ། བནྡེ་སྐྱབས།
དངོས་གནས་དོན་སྙིང་དང་ལྡན་པ་ཞིག་བྲིས་འདུག་་་་་་ལྷ་བྲིས་དགེ་རྒན་ནུབ་རྒྱ་བུ་ཆུང་ལ་ཐུགས་རྗེ་རྒྱུ་ཡིནཆེ་ཞུ་
མཐར་སྐུ་མགྲོན་གཙོ་བོ་དཔལ་རྒྱལ་བ་ཀརྨ་པ་མཆོག་གིས་ངའི་ངོས་ནས་ཐུབ་པ་རེ་ཡིན་ན་རོགས་པ་ག་རེ་དགོས་ན་གནང་གི་ཡིན། མ་གཞི་ངས་རོགས་པ་ཞུ་ཐུབ་ཡ་ཆེན་པོ་གང་ཡང་ཡོད་པ་མ་རེད། སྔོན་མ་ཡིན་ན་མཚམས་རེར་ཞལ་འདེབས་ཞུ་མཁན་འདྲ་ཡོང་གི་ཡོད་རེད། ད་ཞལ་འདེབས་ནི་འབུལ་རྒྱུ་མེད། ཚང་མ་འཁྱེར་སོང་། ད་གཅིག་ལྷག་ཡོད་པ་ནི་སེམས་ཤུགས་སྤར་རྒྱུ་ཙམ་རེད། གསུང་འདུག་པས་དེ་ལྟར་གསུང་དགོས་པ་བཟོ་མཁན་གྱི་མི་དེ་དག་ངོ་སྤྲོད་ཞིག་ཤམ་བྷ་ལའི་ཕོ་ཉ་དྲྭ་ཚིག་ཐོག་འདུག་པས་དྲྭ་གྲོགས་ཚོ་གཟིགས་དང་། དྲྭ་ཚིག་ནི། http://www.shambalapost.com/component/content/article/328-ནམ་མཁའ།/6668-2011-06-20-04-45-01