ལྡི་ལི་བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག ཟླ་འདིའི་ཕྱི་ཚེས་ ༢༩ ཉིན་ལྡི་ལི་གཙུག་ལག་སློབ་གྲྭ་ཆེན་མོའི་ཡན་ལག་བུད་མེད་མཐོ་སློབ་ལཱེ་ཌེ་ཤི་རུ་རམ་ ( Lady Shri Ram ) ཞེས་པར། རྒྱ་གར་གྱི་མཐོ་རིམ་སློབ་མ་ཚོས་བོད་དོན་ཤེས་རྟོགས་ཡོང་རྒྱུར་དམིགས་ཏེ་༼ བོད་ཀྱི་འདུ་འཛོམས་ ༽ཞེས་པའི་རིག་གཞུང་འཁྲབ་སྟོན་སྤྲོ་ཚོགས་ཤིག་ཚོགས་ཡོད་ཅིང་། མཛད་སྒོའི་ཐོག་རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་འགན་འཛིན་རྡོ་རྗེ་ཚེ་བརྟན་ལགས་ཀྱིས། མཐོ་སློབ་ཁག་འདྲ་མིན་ནས་ཕེབས་པའི་རྒྱ་གར་མཐོི་རིམ་སློབ་མ་ཚོར་བོད་ཀྱི་གནའ་བོའི་ལོ་རྒྱུས་དང་། མི་ལོ་ ༦༠ རིང་གི་བོད་ནང་གི་དྲག་གནོན། ད་ལྟའི་བོད་ཀྱི་ཛ་དྲག་གནས་བབ་བཅས་ངོ་སྤྲོད་གནང་ཡོད།
དེའི་རྗེས། ལྡི་ལི་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་ལ་དྭགས་པ་རིག་འཛིན་དཔལ་མགོན་ལགས་ཀྱིས། ད་ལྟའི་དུས་འདིར་བོད་པ་ཚོ་ཁྲོམ་གཞུང་ལ་བུད་དེ་ངོ་རྒོལ་སྐད་འབོད་བྱ་རྒྱུའི་དུས་ཚོད་མིན་པར། ཤེས་ཡོན་གྱི་བརྒྱུད་ལམ་འདྲ་མིན་སྤྱད་དེ་རྒྱ་གར་གཞོན་སྐྱེས་ཚོར་བོད་དོན་གོ་རྟོགས་སྤེལ་རྒྱུའི་དུས་ལ་བབས་ཡོད་སྐོར་བཅས་བརྗོད་ཡོད་པ་དང་། ལྡི་ལི་བོད་རང་བཙན་སློབ་ཕྲུག་ཚོགས་པའི་འབྲེལ་མཐུད་པ་སྐུ་ཞབས་ཚེ་རིང་བཀྲ་ཤིས་ལགས་ཀྱིས། རང་བཙན་སློབ་ཕྲུག་ཚོགས་པའི་དམིགས་ཡུལ་གཙོ་བོ་རྒྱལ་ས་ལྡི་ལིའི་ཤེས་ཡོན་བསྟི་གནས་དང་མཐོ་སློབ་ཁག་ཏུ་ལས་འགུལ་སྤེལ་དགོས་སྐོར། རྒྱ་གར་མི་རབས་གསར་པ་རྣམས་མ་འོངས་པའི་རྒྱལ་ཁབ་ཀྱི་ཆབ་སྲིད་གནད་དོན་ཐག་གཅོད་བྱེད་མཁན་ཆགས་ཡོད་སྟབས། ད་ལྟ་ནས་ཁོ་ཚོར་བོད་དོན་སྐོར་གོ་རྟོགས་སྤེལ་བ་ཡིན་ན། ཆུང་ས་ནས་རྒྱ་གར་བོད་མི་སྐྱབས་བཅོལ་བའི་དཀའ་ངལ་སེལ་རྒྱུ་དང་། ཆེ་ས་ནས་བོད་རྒྱའི་དཀའ་རྙོག་སེལ་རྒྱུར་ནུས་པ་འདོན་ཐུབ་ཀྱི་ཡོད་ཚུལ་བརྗོད་ཡོད།
ལྡི་ལིོ་བོད་རང་བཙན་སློབ་ཕྲུག་ཚོགས་པའི་ངོས་ནས། ལོ་ལྟར་རྒྱ་གར་དང་བོད་ཀྱི་མཁས་པ་ཁག་ཅིག་རྒྱལ་ས་ལྡི་ལིའི་མཐོ་སློབ་ཁག་ནང་གདན་ཞུས་ཀྱིས་བོད་ཀྱི་རྒྱལ་རབས་ལོ་རྒྱུས་དང་། ཆབ་སྲིད་དང་ཁོར་ཡུག བོད་དོན་གློག་བརྙན། སྲོལ་རྒྱུན་གཞས་སྣ། དཔེ་དེབ་འགྲེམས་སྤེལ་བཅས་ལས་འགུལ་མང་དག་ཅིག་སྤེལ་བཞིན་ཡོད་འདུག
དཔལ་ལྡན་གྱིས་བསྡུ་སྒྲིག་བྱས།
