དེ་རིང་དབུས་གཞོན་ནུ་ལྷན་ཚོགས་ཀྱི་གོ་སྒྲིག་འོག བཞུགས་སྒར་ནས་ཀ་ཅཱ་རིལ་བར་སྐད་འབོད་ཁྲོམ་སྐོར་གྱི་ལས་འགུལ་ཞིག་སྤེལ་སོང་ལ། སྐབས་དེར་བཞུགས་སྒར་ཁུལ་གྱི་སྐྱ་སེར་མི་མང་ ༢༠༠ ལྷག་མཉམ་ཞུགས་ཀྱིས་རྒྱ་ནག་གཞུང་ལ་ངོ་རྒོལ་དང་རྒྱལ་སྤྱིའི་ཐོག་ཏུ་འབོད་སྐུལ་བཅས་ཞུས་སོང་།
དེ་རིང་ཞོགས་པའི་ཆུ་ཚོད་ ༡༠ ། ༣༠ སྟེང་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོའི་རྗེས་དྲན་རྡོ་རིང་མདུན་ནས་ཀ་ཅཱ་རིལ་བར་སྐད་འབོད་ཁྲོམ་སྐོར་གྱི་ལས་འགུལ་ཞིག་སྤེལ་སོང་། ལས་འགུལ་ནང་སཱ་ར་མཐོ་སློབ་དང་བོད་ཀྱི་ཟློས་གར་ཚོགས་པ། བཞུགས་སྒར་རྣམ་རྒྱལ་གྲྭ་ཚང་དང་མཚན་ཉིད་གྲྭ་ཚང་། ཀིརྟི་བྱེས་བ་གྲྭ་ཚང་སོགས་གཙོས་པའི་བཞུགས་སྒར་ཉེ་འཁྲིས་ཀྱི་དགོན་སྡེ་ཁག་གི་གྲྭ་བཙུན་སེར་སྐྱ་ ༢༠༠ ལྷག་མཉམ་ཞུགས་གནང་སྟེ། ཉེ་ལམ་བོད་བསྟན་སྲིད་ཀྱི་ཆེད་དུ་རང་ལུས་མཆོད་འབུལ་བྱས་པའི་རྒྱལ་སྤྱིའི་དཔའ་བོ་རྣམ་པའི་སྐུ་པར་དང་། དབྱིན་ཡིག་གིས( Tibt burning )སོགས་ཀྱི་བརྗོད་ཚིག་འདྲ་མིན་བཀོད་པའི་འཕྲེད་དར་འཕྱར་བཞིན། “ བོད་ནང་འགྲོ་བ་མིའི་ཐོབ་ཐང་སྤྲོད་དགོས། བོད་རང་བཙན་ཡིན” སོགས་ཀྱི་འབོད་ཚིག་སྒྲོག་བཞིན་བཞུགས་སྒར་དཔའ་བོའི་རྗེས་དྲན་རྡོ་རིང་མདུན་ནས་ངྷ་ཤོད་ཀ་ཅཱ་རིལ་བར་སྐད་འབོད་ཁྲོམ་སྐོར་གཞི་རྒྱ་ཆེན་པོ་ཞིག་གནང་སོང་ལ། ལས་འགུལ་མཇུག་བསྡོམས་སྐབས་དུས་ཡུན་སྐར་མ་གཅིག་རིང་ངག་བཅད་མྱ་ངན་གུས་འདུད་ཞུས་རྗེས། ལས་འགུལ་སྣེ་འཁྲིད་པ་དག་གིས་བོད་ནང་གི་གནས་ཚུལ་དང་འབྲེལ་བའི་ཐོག་གཏམ་བཤད་དང་། རྒྱ་ནག་གི་རྒྱལ་དར་མེར་བསྲེགས་བཅས་བཏང་སོང་།
ལས་འགུལ་མཇུག་བསྡོམས་ཐོག་དབུས་གཞོན་ནུའི་ཚོགས་གཞོན་དོན་འགྲུབ་ལྷ་དར་ལགས་ཀྱིས་དེར་ཡོད་མི་མང་ལ། ད་ལོའི་ཕྱི་ཟླ་ ༣ པ་ནས་བཟུང་རྒྱ་ནག་གི་དྲག་གནོན་འོག་བོད་ནང་རང་ལོ་ ༡༧ ནས་ ༡༨ བར་ཡིན་པའི་རྒྱལ་གཅེས་དཔའ་བོ་ ༧ གྱིས་རང་ལུས་མེར་བསྲེགས་བཏང་སྟེ་རྩ་ཆེའི་སྐུ་སྲོག་བློས་གཏོང་གནང་བ་དེ་འཕྲོ་བརླག་ཏུ་ཕྱིན་མེད་པར། བོད་ཀྱི་གཞོན་ནུ་ལྷན་ཚོགས་ཀྱིས་ཁོང་རྣམ་པའི་བློས་གཏོང་དེས་མི་རིགས་ཀྱི་འཐབ་རྩོད་ལ་ནུས་པ་དང་། ཁ་གཏད་ཀྱི་དགྲ་བོར་གནོན་ཤུགས། འཛམ་གླིང་གི་རྒྱབ་སྐྱོར་བཅས་ལ་གྲུབ་འབྲས་ཆེན་པོ་བླངས་ཡོད་པར་ངོས་འཛིན་ཞུ་རྒྱུ་མ་ཟད། རྒྱལ་གཅེས་དཔའ་བོ་བདུན་གྱིས་སྐུ་སྲོག་མཆོད་མེར་ཕུལ་བ་དེ། ༸གོང་ས་མཆོག་གི་སྐུ་དབང་རྩིས་སྤྲོད་ཀྱི་སྔ་རྗེས་སུ་བྱུང་ཡོད་སྟབས། གནས་ཚུལ་དེས་བོད་ཀྱི་མི་རབས་གསར་བའི་གཞོན་སྐྱེས་ཚོས་མི་རབས་ནས་མི་རབས་སུ་འགྱུར་བ་གང་འདྲ་ཕྱིན་ཡང་བོད་ཀྱི་འཐབ་རྩོད་ལ་འགྱུར་བ་མེད་པར། རྒྱ་ནག་གཞུང་ལ་ངོ་རྒོལ་བྱེད་པའི་ཆོད་སེམས་དང་སྙིང་སྟོབས་རྒྱུན་གནས་ཐུབ་པའི་བརྡ་ལན་གསལ་བོ་ཞིག་སྤྲད་སྟབས་སྐོར་བཅས་བརྗོད་བྱུང་།
དེ་བཞིན་ཁོང་གིས་གཞོན་ལྷན་གྱི་ངོས་ནས་ཉེ་ཆར་རྒྱལ་གཅེས་དཔའ་བོ་ཆོས་འཕེལ་ལགས་དང་མཁའ་དབྱིངས་ལགས་གཉིས་ཀྱི་སྐུ་སྲོག་ཤོར་བ་དེ་མེར་འཚིགས་པ་གཅིག་པུ་མིན་པར། མེར་བསྲེགས་བཏང་བའི་རྗེས་སུ་རྒྱ་གཞུང་གིས་ཚད་ལས་བརྒལ་བའི་མནར་གཅོད་དང་སྨན་བཅོས་མ་བྱས་པར་འདས་གྲོངས་སུ་སོང་བ་ཞིག་ལ་ངོས་འཛིན་བྱ་རྒྱུ་ཡིན་སྐོར་དང་། ཉིན་ཤས་རྗེས་སུ་ཧྥ་རན་སིར་འཛམ་གླིང་གི་སྟོབས་ཆེན་རྒྱལ་ཁབ་ ༢༠ ཙམ་གྱི་ལྷན་ཚོགས་ཚོགས་ཐོག་རྒྱ་ནག་གི་སྲིད་འཛིན་ཧུའུ་ཅིན་ཐའོ་མཉམ་ཞུགས་བྱེད་ཀྱི་ཡོད་པར། ད་ལྟའི་ཆར་རྒྱ་ནག་གི་ལག་ཏུ་ཡོད་པའི་རང་ལུས་མེར་བསྲེགས་བཏང་བའི་རྒྱལ་གཅེས་པ་གསུམ་ལ་སྨན་བཅོས་ཀྱི་མཐུན་རྐྱེན་སྤྲོད་ཕྱིར་མྱུར་དུ་ནང་མིར་རྩིས་སྤྲོད་བྱ་རྒྱུར་རྒྱ་ནག་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུ་འཆར་ཡོད་ཚུལ་བཅས་བརྗོད་སོང་།
མཇུག་ཏུ་ཁོང་གིས། “ གཞོན་ནུ་ལྷན་ཚོགས་ཀྱི་ངོས་ནས་སློབ་གྲྭ་ཁག་དང་དགོན་སྡེ་ཁག་ལ་ཞུ་སྙན་ཕུལ་ཏེ། ལས་འགུལ་ནང་མཉམ་ཞུགས་གནང་རྒྱུར་རེ་སྐུལ་ཞུས་ཀྱང་། བོད་ཁྱིམ་གྱི་ངོས་ནས་གཞུང་གི་ལས་འགུལ་ནང་མཉམ་ཞུགས་བྱ་རྒྱུ་ལས། གཞུང་འབྲེལ་མིན་པའི་ཚོགས་པ་ཁག་གི་ལས་འགུལ་ནང་མཉམ་ཞུགས་བྱ་རྒྱུ་མིན་ཞེས་བརྡ་ལན་སྤྲད་སོང་། ང་ཚོའི་ངོས་ནས་དེའི་ཐད་བློ་ཕམ་ཆེན་པོ་ཡོད། ང་ཚོའི་འཐབ་རྩོད་དེ་གཞུང་དང་གཞུང་འབྲེལ་མིན་པ་དབྱེ་འབྱེད་ཀྱི་འཐབ་རྩོད་ཅིག་མིན་པར། བོད་རྒྱལ་ཁབ་དང་མི་རིགས་ཀྱི་འཐབ་རྩོད་ཆགས་ཡོད ” ཅེས་བརྗོད་བྱུང་།
ཐེངས་འདིའི་ཛ་དྲག་གི་ལས་འགུལ་ཆེད་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མཆོག་དང་ཕྱི་འབྲེལ་འགན་འཛིན་རྣམ་གཉིས་ལྡི་ལིར་ཡོད་པའི་རྒྱལ་སྤྱིའི་གཞུང་ཚབ་ཁག་གི་མི་སྣ་དང་རྒྱ་གར་གནད་ཡོད་མི་སྣ། ཨ་རི་དང་ཡུ་རོབ་མཐུན་ཚོགས་ཀྱི་མི་སྣར་ཐུག་འཕྲད་ཀྱིས་ཞུ་སྙན་འབུལ་འཆར་ཡོད་འདུག་ལ། དེ་རིང་དགོང་དྲོའི་ཆུ་ཚོད་ ༦ པའི་ཐོག་ངྷ་ས་ས་གནས་གཞོན་ནུའི་གོ་སྒྲིག་འོག་བཞུགས་སྒར་རླངས་འཁོར་ས་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་མར་མེ་ཁྲོམ་སྐོར་ཞིག་ཀྱང་སྤེལ་རྒྱུ་ཡིན་འདུག
གསར་འགོད་པ། དོན་གོ
བཙན་བྱོལ་དུ་ཡོད་པའི་བོད་མི་ཚོས་ལས་འགུལ་གང་འདྲ་ཤིག་སྤེལ་ནའང་འགྲིག་ཀྱང་།གཙོ་བོ་དེར་བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་པའི་ཚེ་སྲོག་ལ་རིན་ཐང་ལྡན་པའི་བརྩི་འཇོག་དང་།ཚེ་སྲོག་ལ་འགན་ཁྱེར་དགོས་པ་དེ་གལ་གནས་ཆེ་ཤོས་སུ་མཐོང་།
གོང་དུ་དྲ་གྲོགས་ཚེ་རིང་རྡོ་རྗེ་ལགས་ཀྱིས་དངོས་ཡོད་དང་རྒྱུ་མཚན་གཞིར་བཞག་ཐོག་ནས་མཆན་བཀོད་འདུག་པར་དགའ་བསུ་ཞུ།
གཞིས་ལུས་བོད་མིས་རྩ་དོན་ཁོ་ནའི་ཆེད།།
ལུས་དང་སྲོག་གི་མཆོད་འབུལ་ཕངས་མེད་བྱེད།།
བྱེས་འཁོད་བོད་མིས་མིང་དང་སྙན་གྲགས་ཆེད།།
ཁྱོད་དང་ང་ཡི་ནང་འཁྲུག་རྫོགས་མེད་བྱེད།།
རྒྱ་གཞུང་མ་རབས་བཙན་ཤེད་གཉའ་གནོན་གྱི་མེ་ཡིས། །
བོད་མིའི་བཟོད་བསྲན་ལྗང་མྱུག་མང་དག་ཅིག་བསྲེགས་སོང། །
མཚུངས་མེད་དབུས་གཞོན་ནུ་ཚོགས་པའི་ཚོགས་གཙོ་དང་སྣེ་ལས་ཡོངས་ཀྱི་དྲུད་དུ།
བོད་ཀྱི་གཞོན་ནུ་ཚོགས་པ་ནས་ལས་འགུལ་གང་མང་ཞིག་སྤེལ་ཟིན་པ་དང་།
གྲུབ་འབྲས་ཀྱང་གང་མཚམས་ཤིག་ཐོབ་ཡོད།དེ་ལ་བོད་མི་ཡོངས་ནས་ཡི་རངས་དང་བསྔགས་བརྗོད་ལོས་ཡོད།
ཡིན་ན་ཡང་ལངས་ཕྱོགས་དང་དམིགས་ཡུལ་ཁ་ནས་བཤད་པ་བཞིན་ལས་འགུལ་སྣ་གཅིག་སྤེལ་མེད་ལ།
2008་ནང་གྲ་སྒྲིག་དང་འཆར་གཞི་འཐུས་ཚང་མེད་པའི་ལས་འགུལ་སྤེལ་བའི་སྐབས།
བོད་མི་ཡོངས་ལ་འདོད་བློ་མ་ཁེངས་པ་དང་བློ་ཕམ་དགོས་པའི་གནས་ཚུལ་བྱུང་ཡོད།
བོད་ལ་མི་སླེབས་རྒྱུའི་གྲ་སྒྲིག་དང་འཆར་གཞི་འཐུས་ཚང་བྱས་ནས་བོད་ལ་གོམ་འགྲོ་བྱས་ཁུལ་བྱས་པ་སོགས།
བོད་མི་ཡོངས་ལ་རེ་ཐག་ཆད་ཡོད་པ་ལྟ་བུའི་ཚོར་སྣང་བྱུང་ཡོད།
ལྷག་པར་དུ་གཞིས་ལུས་མི་དམངས་རྣམས་ཐུགས་ཕམ་དགོས་པ་ཆགས་ཡོད།
གཞིས་ལུས་མི་དམངས་ནས་བོད་ལ་གོམ་འགྲོ་པ་རྣམས་ཡོང་གི་རེད་ཅེས་གྲ་སྒྲིག་བྱས་ནས་སྒུག་ཡོད།
ཡིན་ན་ཡང་བོད་ཀྱི་གཞོན་ནུ་ཚོགས་པ་ནས་མིང་དོན་མཚུངས་པའི་གོམ་འགྲོ་དང་ལས་འགུལ་སྤེལ་ཐུབ་མེད།
བཅོས་མིན་གྱི་ལྟ་བ་དང་ལངས་ཕྱོགས་བརྟན་པོ་ཡོད་པའི་ཐོག་ཚོགས་པ་རང་ཉིད་ལ་ཡོད་པའི་ཐོ་ཐང་དང་རང་དབང་
ནུས་པ་གསུམ་བེད་སྤྱོད་ཆ་ཚང་གཏོང་ཐུབ་དགོས་པ་ནི་ཚོགས་པ་གང་ཞིག་གི་རྩ་དོན་རེད།
ལར་ནས་དོན་གྲུབ་ལྷ་དར་གྱིས་མགོ་མཇུག་གཙང་སྒྲིལ་གྱི་ལས་ཀ འགན་འཁུར་ཐུབ་པའི་སྐད་ཆ་ཧ་ལམ་བཤད་མྱོང་མེད་ཚོད
གཞོན་ནུ་ཚོགས་པས་རང་གི་ཚོགས་པའི་དམིགས་ཡུལ་གཞིར་བཟུང་དུས་བསྟུན་ལས་འགུལ་གང་ཞིག་སྤེལ་ཐུབ་ན་དེ་ཡག་པོ་རེད། ཚོགས་པ་ཞིག་ཡིན་ཕྱིན་དེ་འདྲ་དགོས་ངེས་ཀྱང་རེད། གཞན་དག་ལྷན་དུ་ཞུགས་མིན་དེ་ཡང་དོན་དག་གཞན་པ་རེད། གལ་ཏེ་ལས་འགུལ་ཆེན་པོ་ཞིག་སྤེལ་འདོད་ན་དང་པོ་ནས་ཚོགས་སྡེ་ཁག་མཉམ་འབྲེལ་གནང་རྒྱུ་གལ་ཆེ།
ད་ལྟ་བཀའ་སྤྱི་གཉིས་ནས་སྣེ་ཁྲིད་ནས་ལས་འགུལ་སྤེལ་རྒྱུ་ཡིན་པས་ཚོགས་སྡེ་སོ་སོ་ནས་དམིགས་བསལ་མ་བྱས་ཀྱང་འགྲིགས། གཞུང་གིས་བྱེད་ཀྱིན་མེད་དུས་ཚོགས་སྡེ་སོ་སོས་སྤེལ་གང་ལ་གང་འོས་དང་ཐུན་མོང་གིས་གང་འོས་བསམ་གཞིགས་ཀྱིས་སྤེལ་རྒྱུ་གལ་ཆེ།
དེ་མ་གཏོགས་ད་བསམ་པ་ཆིག་སྒྲིལ་དང་ནུས་པ་ཆིག་སྒྲིལ་ཡག་པོ་ཡོང་རྒྱུ་དཀའ་སེ་རེད་པ། མནའ་གན་དང་ལྷན་དུ་ཐུན་མོང་གི་སྒྲིག་གཞི་ཞིག་ཀྱང་དགོས་པ་འདྲ།
ང་ཚོའི་མཐའ་རྩོད་ནི་གཞུང་འབྲེལ་ཡིན་མིན་གྱི་ཁྱད་པ་མེད་ན་ཡང་ང་ཚོའི་རྡོག་རྩ་ཅིག་སྒྲིལ་ནི་ནམ་ཡིན་ཡང་གལ་ཆེ་ནང་གི་དོན་ཆེ་རེད་བསམ་གྱི་འདུག
སོང་ཙམ་ང་ཚོ་སྐྱབས་མགོན་རིན་པོ་ཆེའི་དཀའ་དགོངས་དང་བོད་མི་མང་གི་བསམ་ཚུལ་བཞིན་རང་བཙན་དོར་ནས་དབུ་མའི་ལམ་རྩོད་ན་ཡག་པོ་འདུག་
མི་ཁ་ཤེས་ཀྱི་འཁྱོགས་བཤད་ལ་རྩ་བ་ནས་མགོ་འཐོམ་མི་ཉེན།
འཐབ་གྲོགས་རྣམས། ཐུགས་ཕམ་མ་གནང་རོགས། ཁྱེད་རྣམས་ཀྱིས་བོད་སྤྱི་དོན་ལ་སྨན་པའི་ལས་དོན་གང་སྤྱིར་རྒྱབ་སྐྱོར་ཡོད། བུ་ཁྱིམ་གྱིས་ཡོང་ལ་ཉེ་བའི་གཞུང་འབྲེལ་ལས་འགུལ་ནང་མཉམ་ཞུགས་ཇི་ལྟར་བྱེད་མིན་ལྟ་རྒྱུ་རེད།
རྡ་ས་ནས་མི་སྲོག་ལ་སྣང་ཆུང་འཕྲོག་གིན་འདུག
དོན་དངོས་ཐོག་ཁ་གཡང་ཙམ་ལས་བྱེས་གྱར་གྱི་བོད་མི་དང་རྒྱབ་སྐྱོར་བ་སུ་ཞིག་གིས་ཀྱང་བོད་རང་དབང་འཐབ་རྩོད་ཀྱི་ནུས་པ་དང་། སྙིང་སྟོབས་དང་སེམས་ཤུགས་མེད་པ་མི་ལོ་བཅུ་གྲངས་རྡ་སར་བསྡད་རྗེས་ཤེས་ཚོར་བྱུང་། འོན་ཀྱང་སོ་སོའི་རྐུབ་སྟེགས་དང་དཔལ་འབྱོར་འདུ་འགོད་ཀྱིས་ཆེད་ཁྱི་ཟུག་པ་དང་མཚུངས་པའི་ནུས་མེད་ལས་འདྲ་ལས། གཞན་ཕན་ཐོག་སོང་བསམ་པའི་ལས་འགུལ་ནི་སྣ་ཅིག་ཀྱང་སྤེལ་ཐུབ་པའི་ནུས་པ་མིན་འདུག གསལ་པོར་ཞུས། གཞུང་དང་གཞུང་འབྲེལ་མ་ཡིན་པའི་ཚོགས་པ་ག་གེ་མོ་དེ་བར་སོ་སོའི་ལངས་ཕྱོགས་གསལ་པོ་སྨྲ་བའི་སྤོབས་པ་དངོས་གནས་མིན་འདུག འོན་ཀྱང་སོ་སོའི་ཁེ་ཕན་ཕྲ་མོ་ཙམ་གྱི་ཆེད་དུ་བོད་ནང་གི་བོད་མི་ཚོའི་ཚེ་སྲོག་ལ་སྣང་ཆུང་རྡོག་རོལ་གཏོང་གིན་པའི་བློ་ཕམ་ནང་གི་བློ་ཕམ་རང་རེད། དུས་རྒྱུན་དུ་མི་རིགས་ཀྱི་ལ་རྒྱ་དང་ཞེན་ཁོག་ བོད་ནང་གི་བོད་མོའི་ཚོའི་ཆེད་དུ་ཟེར་བ་དངོས་ནས་སྐེ་ཡན་གྱི་སྐད་ཆ་རང་རེད། བོད་ནས་དངོས་སུ་བཙན་བྱོལ་ནང་སླེབས་པའི་གསར་འབྱོར་ཚོར་ལྟ་སྟངས་དང་ཁོ་ཚོའི་དོན་དུ་སེམས་འཁུར་ཇི་ཙམ་བྱེད་ཀྱིན་འདུག་པ་ནི་ཕྱི་གསལ་ནང་གསལ་རེད། སྐད་ཆ་གསལ་པོ་བྱས་ནས་ཞུས་ན་བོད་ནང་གི་བོད་མི་དེ་ཚོ་བཙན་བྱོལ་སྒྲིག་འཛུགས་དང་ཚོགས་པ་ཁག་གི་དཔལ་འབྱོར་འདུ་འགོད་དང་ཆབ་སྲིད་ཀྱི་ལག་ཆ་རང་ཡིན་པ་གསལ་པོ་རེད། ཡང་ང་བའི་མཐོ་སྒང་གི་མི་རིགས་དེར་རྒྱ་དམར་པོའི་འོག་ཏུ་ཆབ་སྲིད་ཀྱི་ཐོབ་ཐང་མེད་པ་འཛམ་གླིང་ཁ་གཅིག་གྲགས་ཡིན་པ་གང་ཞིག་ལ། དེ་ལས་ལྷག་བསམ་ཟོལ་མེད་ཀྱིས་སྐྱོབ་འདོད་པ་བོད་ནང་གི་བོད་མི་དེ་དག་རེད་མ་གཏོགས། བྱེས་སུ་གྱར་བའི་གང་ཟག་གམ་སྒྲིག་ཚོགས་སུ་ལའང་ནུས་པ་དང་སྙིང་སྟོབས། སེམས་ཤུགས་སོགས་རྩ་བ་མེད་པ་དེ་གཞིས་ཀྱི་བོད་མི་དེ་དག་གིས་ཤེས་དགོས་རྒྱུར། ང་དང་ང་འདྲ་བའི་ཆབ་སྲིད་དང་རྒྱང་ཐག་རིང་ཞིང་རང་གི་རྐང་རུས་ཤ་ཁྲག་གཅིག་པའི་མི་རིགས་ལ་དུང་བ་ཟབ་པ་ཁག་གཅིག་གིས་འབོད་སྐུལ་ཡིན། རང་གིས་འདོད་པ་སྒྲུབ་ཆེད་དུ་ཅིག་འཇོན་མདོག་མདོག་དང་། གཉིས་བསྒྲུབ་མདོག་མདོག་གིས་ཉམས་ཆུང་བོད་རིགས་རྣམས་ལ་མགོ་སྐོར་མི་གཏོང་བར་ཁོང་ཚོར་ཞི་བདེ་ལྷིང་འཇགས་དང་ནང་མི་ཚ་སོབ་སོབ་གི་འཚོ་བ་ཞིག་བསྐྱལ་བཅུག་རོགས།
དོན་དམ་བོད་ནང་དུ་ད་སྐབས་གནང་སྟངས་འཛའ་དྲག་ཆགས་ཡོད་པ་དངོས་ཡོད་རེད། འདི་འདྲ་ལས་འགུལ་གནང་ཐུབ་པ་ཧ་ཀྱང་ཡག་པོ་འདུག ད་དུང་ལས་འགུལ་གང་མང་ཞིག་གནང་རོགས་ཞུ་དང་གང་ཟང་སྒེར་པ་གཅིག་གཉིས་ཞིག་གི་དུས་རྟག་ཏུ་སྐྱོན་བརྗོད་བྱེད་ཀྱི་རེད་དེ་ལ་ཉལ་དགོས་པ་གང་ཡང་ཡོད་ནི་མ་རེད་དེ་ཚོས་རྒྱབ་ན་སུ་ཞིག་ཡོད་མེད་གླེང་དཀའ་མོ་རེད། ང་ཚོ་ལ་ནུས་པ་ཞིག་ཡོད་པ་ལས་འགུལ་སྤེལ་ནས་འཛམ་གླིང་མི་མང་ལ་བསྒྲགས་ཀྱི་དེ་རེད་མ་ཟད་ང་ཚོ་བོད་ནང་གི་བོད་མིའི་མགྲིན་ཚབ་པ་ཞིག་བྱེད་ཐུབ་གནང་དགོས་པ་རེད་དྲན་སོང་ལས་འགུལ་གནང་མཁན་ཚང་མ་ལ་དགའ་བསུ་དང་དུ་དུང་ཤུགས་རྒྱག་རོགས་ཞུ་རྒྱུ་ཡིན།
ཡག་པོ་བྱུང་འདུག གཞུང་འབྲེལ་མ་ཡིན་པའི་ཚོགས་པ་ཆེ་ཤོས་རེད་ཟེར་ནས་བཤད་བཞིན་ཡོད་རེད་ལ། དོན་ལ་ཡང་ལས་འགུལ་དེ་ལྟ་བུ་སྤེལ་བཞིན་འདུག་པས་དོན་དང་མཐུན་པ་ཞུག་རེད་འདུག་པས་བསྔགས་བརྗོད་ཡོད། མུ་མཐུད་མདུན་བསྐྱོད་བྱེད་རོགས།
ངེད་ཅག་རྣམས་བརྒྱ་བཤད་སྟོང་བཤད་ཞེ་དྲག་བྱེད་མ་དགོས་པའི་ཐོག་ནས་ཚེས་ ༡༩ ཉིན་བརྒྱ་དུས་གཅིག་ཏུ་ལས་འགུལ་ལ་མཉམ་ཞུགས་གནང་རོགས། བྱུང་ན་རྒྱ་གར་གྱི་རྒྱལ་ས་དྷི་ལི་རུ་འཛོམས་རོགས། དེ་མིན་དཔྱད་རྩོམ་འདྲ་ཆགས་པོ་དང་ཁ་ནས་གཅིག་བྱེད་དགོས་རྒྱུ་གཉིས་བྱེད་དགོས་རྒྱུ་སོགས་མང་དག་གཅིག་བཤད་ནས་ཕན་ཐོགས་མེད། འདྲ་ཆགས་པོ་སུས་ཀྱང་བཤད་ཐུབ། དགོངས་འགལ་མེད་པར་ཞུ། འདི་ནི་གང་ཟག་བྱེ་བྲག་པ་ལ་ཞུས་པ་ཞིག་མིན་པར་སྤྱི་ཡོངས་ལ་ཞུས་པ་ཡིན།
མི་ལོ་ལྔ་བཅུ་ལ་འདི་འདྲའི་འདྲ་ཆགས་མདོག་གི་སྐད་ཆ་རྐྱང་བཤད་བཤད་ནས་ད་རྣ་བ་ཚ་སོང་།
རྡ་སའི་རི་གྲོང་ནས་ཀ་ཅ་རི་བར་དུ་གོམ་པ་བརྒྱབ་བརྒྱབ་ནས་རྐང་པ་ན་སོང།
གྲུབ་འབྲས་སྣ་གཅིག་ཀྱང་ཐོན་མ་སོང།
ལས་འགུལ་ཚང་མ་ལ་རྒྱ་དང་མི་རིགས་ཀྱི་ཞེན་འཁོགས་ཚོར་སྣང་དང་འཆར་གཞི་དམིག་ཡུལ་ཡོད་པའི་ལས་འགུལ་ཞིག་སུས་ཀྱས་སྤེལ་གྱི་མི་འདུག
ལས་འགུལ་ཚང་མ་ངོ་སྲུང་དང་སྤེལ་ལད།
དཔལ་འབྱོར་འདུ་འགོད་ཀྱི་ལས་འགུལ་རེད་ཤག
ང་དེང་སང་ལས་འགུལ་གང་ལ་ཡང་འགྲོ་གི་མེད་ཕྱིན་ཆད་ཀྱང་འགྲི་རྩིས་མེད།
བོད་ནང་གི་རྒྱལ་གཅེས་དཔའ་བོ་དེ་ཚོའི་ཆེད་དུ་མ་ཎི་རེ་དང་སྨོན་ལམ་རེ་བྱ་གི་ཡོད།
ཁོང་ཚོ་དང་ཁོང་ཚོའི་ནང་མི་སྤུན་མཆེད་ལ་སྙིང་རྗེ་གི་འདུག
ཤ་ཚ་གི་འདུག
གཞན་ང་ལ་རེ་བ་གང་ཡང་མེད་པར་ཆགས་ཚར་སོང
སྐད་ཆ་དྲང་གཏམ་རང་ཡིན།
ཕྱོགས་གཅིག་ལ་ཛ་དྲག་གི་གནས་ཚུལ་བྱུང་སྐབས་ཕྱོགས་ཡོངས་ནས་རྡོག་རྩ་ཅིག་ཏུ་སྒྲིལ་ནས་ནུས་པ་མཉམ་རུབས་བྱེད་གལ་ཆེ།. ད་ལན་གྱི་གོ་སྐབས་འདི་བརྒྱུད་ནས་བཙན་བྱོལ་ནང་ནས་རྒྱ་མིས་བཅའ་ལག་ཉོ་ཚོང་མཚམས་འཇོག་དང་ལྷག་པར་དུ་དུས་འཁོར་དབང་ཆེན་སྐབས་སུ་སྐད་ཡིད་དར་སྤེལ་དང་རྒྱ་མིས་བཅའ་དངོས་གཅིག་ཀྱང་བཀོལ་སྤྱོད་མི་གནང་ཐབས་སུ་ལས་འགུལ་སྤེལ་དགོས།