ལོ་གསུམ་གྱི་ཁྲིམས་ཐག་བཅད་འདུག

རྒྱ་ནག་གཞུང་གིས་བོད་ནང་༼དུས་རབས་ཀྱི་ང་།༽ཞེས་པའི་དུས་དེབ་ཀྱི་རྩོམ་སྒྲིག་པ་དང་དགེ་རྒན་ཇོ་ལེབ་ཟླ་བ་ལགས་སུ་ལོ་གསུམ་གྱི་ཁྲིམས་ཐག་བཅད་འདུག

བོད་ཀྱི་བུད་མེད་རྩོམ་པ་པོ་འོད་ཟེར་ལགས་ཀྱི་དྲ་བའི་སྟེང་གནས་ཚུལ་སྤེལ་བ་ལྟར་ན། ཉེ་ཆར་རྒྱ་ནག་གཞུང་གིས་ ༢༠༡༠ ལོའི་ཕྱི་ཟླ་ ༡༠ བའི་ཚེས་ ༡ ཉིན་རྒྱ་ནག་ཁྲིན་ཏུའུ་གྲོང་ཁྱེར་ནང་འཛིན་བཟུང་བཙོན་འཇུག་བྱས་ཡོད་པའི་༼དུས་རབས་ཀྱི་ང་།༽ ཞེས་པའི་དུས་དེབ་ཀྱི་རྩོམ་སྒྲིག་པ་དང་རྔ་པ་རྫོང་མི་རིགས་སློབ་འབྲིང་གི་དགེ་རྒན་ཇོ་ལེབ་ཟླ་བ་ལགས་འདས་པའི་ལོ་ངོ་གཅིག་ལ་ཉེ་བའི་རིང་བཀག་ཉར་གྱིས་གར་ཡོད་ཅི་བྱུང་གི་གནས་ཚུལ་ཅི་ཡང་གསལ་བཤད་གནང་མེད་པར་མ་ཟད། ཉིན་འགའི་སྔོན་ཁྲིམས་ཁང་གང་ཡིན་དང་ནག་ཉེས་ཅི་ཡིན་གསལ་ཁ་མེད་པར་ལོ་ ༣ གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པའི་གནས་ཚུལ་བཀོད་འདུག   

རང་ལོ་ ༣༨ ཡིན་པའི་ཇོ་ལེབ་ཟླ་བ་ལགས་ནི། བོད་མདོ་སྨད་རྔ་བ་བོད་རིགས་རང་སྐྱོང་ཁུལ་རྔ་བ་རྫོང་ཇོ་ལེབ་སྡེ་བ་ནས་ཡིན་ཞིང་། སྔར་ལོ་ཕྱི་ཟླ་ ༡༠ པའི་ཚེས་ ༡ ཉིན་རྒྱ་ནག་གཞུང་གིས་གྲོང་ཁྱེར་ཁྲིན་ཏུའུ་ནས་གློ་བུར་འཛིན་བཟུང་བྱས་རྗེས་ཁྲོ་ཆུ་རྫོང་དུ་བཀག་ཉར་བྱས་ཡོད་པའི་གནས་ཚུལ་ཙམ་ལས། ཁོང་འཛིན་བཟུང་བྱེད་དོན་སྐོར་ནས་ནང་མི་གཉེན་འབྲེལ་དང་ས་གནས་མི་མང་གིས།  ༼ དུས་རབས་ཀྱི་ང་། ༽ ཞེས་པའི་དུས་དེབ་ཀྱི་ཁོང་གི་རྩོམ་སྒྲིག་ལས་རོགས་གཉིས་འཛིན་བཟུང་བྱས་ཡོད་སྟབས། ཁོང་གི་ནག་ཉེས་ཀྱང་དུས་དེབ་དང་འབྲེལ་བ་ཡོད་པའི་ཚོད་དཔག་ཙམ་ལས་ད་ལྟའི་བར་ཞིབ་ཕྲའི་གནས་ཚུལ་སུ་ཅི་ཡང་ཤེས་རྟོགས་བྱུང་མི་འདུག

ཉེ་ལམ་ཁྲིམས་ཐག་གཅོད་པའི་སྐབས་སུ་འབྲེལ་ཡོད་ཀྱིས་ཁོང་གི་བཟའ་ཟླ་འཛམ་ལྷ་དང་བུ་ཕྲུག་གཉིས་བཅས་ཁྲིམས་ཁང་དུ་ཡོང་ཆོག་པའི་བརྡ་ལན་སྤྲད་ཡོད་པ་ལྟར། བཟའ་ཟླ་དང་བུ་ཕྲུག་བཅས་ཁྲིམས་ཁང་དུ་པ་དང་ཕྱིན་ཡོད་འདུག་ལ།  སྐབས་དེར་ཁོང་ནང་མི་དང་ཐུག་འཕྲད་ཀྱི་གོ་སྐབས་ཅུང་ཙམ་སྤྲད་ཡོད་པ་ལས། ཐེངས་འདིའི་ཁྲིམས་ཐག་གཅོད་པའི་སྐབས་སུ་ཁྲིམས་རྩོད་པ་སོགས་ཅི་ཡང་མེད་པའི་ཐོག་ཐག་གཅོད་བྱས་ཡོད་འདུག   

ཇོ་ལོ་ཟླ་བ་ལགས།  ༢༠༠༦ ལོར་ཁོང་རྔ་པ་ཁུལ་དུ་པགས་རིགས་མེ་བསྲེགས་གཏོང་བའི་ལས་འགུལ་གྱི་སྣེ་འཁྲིད་པའི་དོགས་གཞིའི་འོག་ཟླ་ ༡ ཙམ་རིང་རྔ་པ་རྫོང་དུ་བཀག་ཉར་བྱས་འདུག་ལ།  ༢༠༠༨ ལོའི་ཞི་རྒོལ་ཆེན་མོའི་སྐབས་སླར་ཡང་དོགས་ཡོད་ཉེས་ཅན་དུ་རྩིས་ཏེ་ཕྱི་ཟླ་ ༣ པའི་ཚེས་ ༡༦ ཉིན་གྱི་ཞོགས་པར་རང་ཁྱིམ་ནས་འཛིན་བཟུང་གིས་ཟླ་ཤས་རིང་བཀག་ཉར་བྱས་ཡོད་པ་མ་ཟད། སྔ་ཕྱི་ཐེངས་མང་པོར་སུན་གཙེར་དང་འཇིགས་སྐུལ་རིམ་པ་བྱས་ཡོད་འདུག

གསར་འགོད་པ། དོན་གོ