སྤྱི་འཐུས་ཚོགས་གཙོ་མཆོག་སུད་སི་ཁུལ་དུ་ཕྱོགས་སྐྱོད་ཀྱིས་རྒྱལ་ཚོགས་འགྲོ་བ་མིའི་ཐོབ་ཐང་ཚན་པ་ཁག་ཏུ་བོད་ནང་གི་གནས་སྟངས་ཞུ་གཏུག་གནང་ཡོད་པ་དང་། ཁོང་གིས་ཉིན་འདི་གའི་སྟོབས་ཆེན་རྒྱལ་ཁབ་ཉི་ཤུའི་ཚོགས་ཐོག་ཏུ་བོད་དོན་གླེང་སློང་ཡོང་དཀའ་ཡང་། བོད་པ་ཚོས་ངོ་རྒོལ་ཤུགས་ཆེན་བྱེད་བཞིན་པ་དེ་གཟི་བརྗིད་ཅིག་ཆགས་ཡོད་གསུངས་བྱུང་།
ཟླ་སྔོན་མའི་ཕྱི་ཚེས་ ༢༣ ཉིན་སིད་སིར་བོད་མི་ ༡༠༠༠ ལྷག་གིས་འཇེ་ནེ་ཝར་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་ཁུངས་མདུན་ཐང་དུ། གཞི་རྒྱ་ཆེ་བའི་ཞི་བའི་གོམ་བགྲོད་ཀྱི་ལས་འགུལ་སྤེལ་སྐབས། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཆེད་ཕེབས་ཀྱིས་མང་ཚོགས་ལ་གཏམ་བཤད་དང་། རྒྱལ་ཚོགས་འགྲོ་བ་མིའི་ཐོབ་ཐང་ཚན་པའི་ལས་ཁུངས་སུ་བཅར་ཏེ་བོད་ནང་གི་ཛ་དྲག་གནས་སྟངས་སྐོར་གསལ་བཤད་བྱས་ཡོད་འདུག
གནས་སྟངས་དེའི་སྐོར་ལ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ཐེངས་འདིར་ཁོང་སུད་སིར་འགྲོ་དགོས་དོན་ནི་སུད་བོད་མཛད་འབྲེལ་ཚོགས་པའི་གདན་ཞུས་ལྟར། ཐོག་མར་ཡུལ་དེའི་མང་ཚོགས་ལ་༧གོང་ས་མཆོག་གི་སྐུ་དབང་རྩིས་སྤྲོད་གནང་རྗེས་གོ་སྐབས་དང་གདོང་ལེན་བྱ་དགོས་པ་གང་དག་ཡོད་མེད་ཐོག་གཏམ་བཤད་སྤེལ་དུ་ཕྱིན་ཡང་། ཕར་བསླེབས་རྗེས་བོད་ནང་གི་གནས་སྟངས་ཛ་དྲག་གི་ངོ་བོར་འགྱུར་སྟབས། ཁོང་དང་སུད་སི་སྐུ་ཚབ་དོན་གཅོད། རྒྱལ་སྤྱིའི་འབྲེལ་མཐུད་པ་བསམ་འཕེལ་བཅས་མཉམ་འབྲེལ་རྒྱལ་ཚོགས་ཆོས་དད་རང་མོས་སྡེ་ཚན་དང་། འདུ་འཛོམས་རང་དབང་སྡེ་ཚན། གཏམ་བརྗོད་རང་དབང་སྡེ་ཚན། བཙན་ཁྲིད་བོར་བརླག་སྡེ་ཚན། ཉེས་མེད་བཙོན་འཇུག་སྡེ་ཚན། གྲངས་ཉུང་མི་རིགས་སྡེ་ཚན་བཅས་སུ་ཕྱིན་ཏེ། ལས་ཁུངས་ཁག་གི་མགོ་ཁྲིད་ཚོར་ཐུག་འཕྲད་ཀྱིས། ད་ལྟའི་རྔ་པ་ཀིརྟི་དགོན་པ་གཙོས་པའི་ཁམས་དཀར་མཛེས་དང་རྟའུ་ཁུལ་གྱི་ཛ་དྲག་གནས་སྟངས་གསལ་བཤད་དང་། མི་འགྱངས་བར་བོད་ནང་རང་དབང་རྟོག་ཞིབ་ཚོགས་ཆུང་ཞིག་གཏོང་དགོས་པའི་འབོད་སྐུལ་ཞུས་ཡོད་འདུག་ལ། རྒྱལ་ཚོགས་འབྲེལ་ཡོད་ལས་དོན་ཚན་པ་ཁག་གིས་ཀྱང་བོད་ནང་གི་གནས་སྟངས་ལ་གདུང་སེམས་མཉམ་སྐྱེད་དང་། མ་འོངས་པར་བོད་ནང་རྟོག་ཞིབ་ཚོགས་ཆུང་ཆེད་གཏོང་ཐུབ་མིན་ལ་མ་ལྟོས་པར། དངོས་ཤུགས་བརྒྱུད་གསུམ་ཐོག་བོད་ནང་གི་འགྲོ་བ་མིའི་ཐོབ་ཐང་ལ་ཤུགས་སྣོན་རྒྱག་རྒྱུའི་ཁས་ལེན་གནང་ཡོད་སྐོར་གསུངས་སོང་།
གསར་འགོད་པས་ཐེངས་འདིའི་གཞུང་དམངས་ལས་འགུལ་ལ་རྒྱལ་སྤྱིའི་སྟེང་ཤུགས་རྐྱེན་ཅི་ཙམ་ཐེབས་ཡོད་མེད་དྲིས་པར། “ བཙན་བྱོལ་བོད་མི་ཚོས་བོད་ནང་གི་གནས་སྟངས་ལ་སེམས་འཚབ་བྱེད་བཞིན་པ་ཧ་ཅང་གསལ་པོ་རེད། ལྡི་ལིར་མི་མང་ལས་འགུལ་སྤེལ་སྐབས། ས་ཐག་རིང་ཐུང་ལ་མ་ལྟོས་པར་རྒྱ་བལ་འབྲུག་གསུམ་ནས་མི་མང་ ༣༠༠༠ ལྷག་འཛོམས་པ་རེད། རྒྱ་གར་ནས་གཞིས་ཆགས་ཁག་དང་དགོན་སྡེ་ཁག སིལ་འཚོང་བ་བཅས་དང་། ཕྱི་རྒྱལ་ཨ་རི་དང་ཡུ་རོབ། ཐེ་ཝན། ཉི་ཧོང་། ཨོ་སི་ཊོ་ལི་ཡ་སོགས་ནས་ཀྱང་ལས་འགུལ་ཤུགས་ཆེན་སྤེལ་སྟབས། གོ་སྒྲིག་ཚོགས་པའི་ངོས་ནས་ལས་འགུལ་ལ་འདོད་པ་ཁེངས་ཡོད། ང་ཚོ་ཕྱི་ཚེས་ ༡༧ དང་ ༡༨ ཉིན་བར་གཞུང་ཚབ་ཁག་ ༡༨ ཙམ་ལ་ཕྱིན་ཏེ། སྐུ་ཚབ་ཚོར་བོད་ནང་གི་གནས་སྟངས་སྐོར་གསལ་བཤད་བྱས་པ་ཡིན་ལ། ཉེ་ཆར་བོད་ནང་དུ་གནས་ཚུལ་བྱུང་མ་ཐག་ཨ་རིའི་ཕྱི་སྲིད་ལས་ཁུངས་དང་འཇར་མན། ཌན་མག་ཕྱི་སྲིད་ལས་ཁུངས་བཅས་ཀྱིས། རྒྱ་གཞུང་ལ་བོད་ནང་གི་གནས་སྟངས་ཐོག་སེམས་འཚབ་ཡོད་པའི་འབོད་སྐུལ། འཇར་མན་གྲོས་ཚོགས་འཐུས་མི་ ༣ གྱིས་འཇར་མན་སྲིད་འཛིན་གྱིས་སྟོབས་ཆེན་ཉི་ཤུའི་ཚོང་དོན་ལྷན་ཚོགས་ཐོག་ཧུའུ་ཅིན་ཐའོ་ལ་བོད་ཀྱི་གནས་སྟངས་གླེང་སློང་དགོས་པ་དང་། འཇར་མན་ཆབ་སྲིད་ཚོགས་པ་ཁག་གིས་བོད་ནང་གི་གནས་སྟངས་སྐོར་ཤུགས་ཆེའི་གླེང་སློང་བྱུང་བ། དེ་བཞིན། རྒྱལ་ཁབ་ཁག་ཅིག་གིས་མངོན་གསལ་མ་ཡིན་པར་རྒྱ་གཞུང་ལ་འབོད་སྐུལ་ཞུས་པ་བཅས་ཀྱིས། རྒྱ་ནག་ལ་གནོན་ཤུགས་ཐེབས་ཡོད་པ་རེད། སྤྱིར་བཏང་ཨ་རི་དང་དབྱིན་ཇི། འཇར་མན། ཧྥ་རན་སི་བཅས་ཀྱིས་དུས་རྒྱུན་བོད་དོན་ཐོག་རྒྱབ་སྐྱོར་གནང་གི་ཡོད་ ” ཅེས་གསུངས།
ཐེངས་འདིའི་སྟོབས་ཆེན་རྒྱལ་ཁབ་ཉི་ཤུའི་ཚོགས་འདུའི་སྐབས་བོད་ཀྱི་གནད་དོན་གླེང་སློང་ཡོང་མིན་དྲིས་པར། “ སྟོབས་ཆེན་ ༢༠ ཚོགས་ཆེན་དེ་གཙོ་བོ་ཚོང་དོན་སྐོར་ཆགས་ཡོད་སྟབས། ཚོགས་འདུ་དངོས་གཞིའི་སྐབས་བོད་དོན་གླེང་ཡོང་རྒྱུ་ཁག་པོ་ཡིན་ཀྱང་། བགྲོ་གླེང་བར་གསེང་སྐབས་མགོ་ཁྲིད་ཁག་བར་བོད་དོན་གླེང་སློང་ཡོང་རྒྱུའི་རེ་བ་ཡོད་པ་རེད། ད་ཐེངས་བགྲོ་གླེང་འདི་དཔལ་འབྱོར་དང་ཁོར་ཡུག་སོགས་གནད་དོན་མང་པོ་ཞིག་ལ་འབྲེལ་བ་ཆགས་ཡོད་དུས། ངོ་རྒོལ་བྱེད་མཁན་ཡང་ཧ་ཅང་མང་པོ་ཡོད་པ་རེད། བོད་པ་ཚོས་ཀྱང་ངོ་རྒོལ་ཤུགས་ཆེན་བྱེད་བཞིན་པ་དེ་གཟི་བརྗིད་ཆགས་ཡོད་པ་རེད། ཐེངས་འདིའི་ཚོགས་འདུའི་སྐབས་དོན་རྒྱབ་སྐྱོར་ཚོགས་པ་ཁག་གིས་ལས་འགུལ་སྤེལ་འདྲ་མིན་སྤེལ་བཞིན་པའི་སྐབས་དང་བསྟུན་ཏེ། ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཀྱང་ལས་འགུལ་དེར་མཉམ་ཞུགས་གནང་གི་ཡོད། སྐབས་དེར་གནད་ཡོད་མི་སྣ་ཁག་ལ་མཇལ་འཕྲད་ཀྱི་ལས་རིམ་སོགས་གོ་སྒྲིག་བྱས་ཡོད། མ་གཞི་རྒྱལ་སྤྱིའི་དོ་སྣང་དེ་ཨ་ཧྥི་རི་ཁ་དང་དཀྱིལ་ཤར་ཡུལ་གྲུ་ཁག་ཏུ་ཕྱོགས་ཡོད་ཀྱང་། ང་ཚོས་འབད་བརྩོན་བྱས་ཏེ་བོད་ནང་དོ་སྣང་ཡོང་བ་ཞིག་བཟོ་དགོས་པ་རེད ” ཅེས་གསུངས་བྱུང་།
བོད་ནང་གི་ཛ་དྲག་གནས་སྟངས་ཐོག་མ་འོངས་པར་ལས་འགུལ་སྤེལ་འཆར་ཡོད་མེད་དྲིས་སྐབས། “ སྤྱི་ཡོངས་ཀྱི་སྲིད་བྱུས་དེ་བཀའ་སྤྱི་ཐུན་མོང་ནས་བཏོན་ཟིན་པ་རེད། ད་ལྟ་སྤེལ་དགོས་པའི་ལས་འགུལ་ཁག་ཅིག་སྤེལ་ཚར་བ་རེད། མ་འོངས་པའི་ལས་འགུལ་སྤེལ་ཕྱོགས་ཐོག་གནས་སྐབས་རིང་བཀའ་སྤྱི་གཉིས་ལྷན་འཛོམས་ཐུབ་ཀྱི་མེད་ཀྱང་། སྤྱི་འཐུས་རྒྱུན་ལས་ནང་ལས་འགུལ་སྤེལ་ཕྱོགས་ཐོག་གོ་བསྡུར་ཞུ་རྒྱུའི་ལས་རིམ་ཞིག་བང་སྒྲིག་ཡོད། སྤྱི་ཡོངས་ཀྱི་ཛ་དྲག་གནས་སྟངས་དེ་ད་ལྟ་གནས་ཡོད་པ་རེད། ལས་འགུལ་སྤེལ་ཕྱོགས་དེའི་ཐོག་ཕྱི་ཟླ་ ༡༡ པའི་ནང་སྤྱི་འཐུས་ ༢༤ ཙམ་ཞིག་ལྡི་ལིར་འཛོམས་ཏེ། ཉིན་གསུམ་རིང་ཚོགས་འདུ་འཚོགས་འཆར་ཡོད། བཀའ་བློན་ཁྲི་པ་མཆོག་དེང་སྐབས་ཨ་རིིར་ཕེབས་ཏེ་གཞུང་འཛིན་མི་སྣ་དང་གྲོས་ཚོགས་འཐུས་མི། མཁས་དབང་དང་གསར་འགོད་པ་བཅས་ལ་མཇལ་འཕྲད་གནང་བཞིན་པ་རེད། ཟླ་འདིའི་ཚེས་མགོ་ནས་དབྱིན་ཇི་དང་སྦེལ་ཇེམ། ཧྥ་རན་སི། སུད་སི། འཇར་མན། ཨི་ཊ་ལི་བཅས་རྒྱལ་ཁབ་ཁག་ ༡༠ ཙམ་ལ་ཕེབས་ཏེ། མཐོ་རིམ་དཔོན་རིགས་ཚོར་མཇལ་འཕྲད་དང་མང་ཚོགས་ལ་གཏམ་བཤད་གནང་རྒྱུ་རེད། ཚོགས་གཙོ་ལ་ཆ་བཞག་ན། ཕྱི་ཟླ་ ༡༡ ནང་ཨི་ཊ་ལི་དང་ཨོ་སི་ཊི་རི་ཡ། སྦེལ་ཇེམ་བཅས་ལ་ཕྱིན་ཏེ་གཞུང་དང་གྲོས་ཚོགས་མི་སྣར་ཐུག་འཕྲད་ལས་རིམ་གོ་སྒྲིག་བྱས་ཡོད ” ཅེས་གསུངས་བྱུང་།
གསར་འགོད་པ། དཔལ་ལྡན།
ང་ཚོས་རྒྱལ་ཁབ་ཉི་ཤུའི་ཚོགས་ཆེན་ལ་ངོ་རྒོལ་བྱས་པ་རེད་དམ། ང་ཚོས་རྒྱལ་ཁབ་ཉི་ཤུའི་ཚོགས་ཆེན་ལ་བོད་དོན་གླེང་སློང་ཡོང་བའི་འབོད་སྐུལ་ཞུ་གིན་ཡོད་པ་རེད།
འདི་གཉིས་མཉམ་བསྲེས་བྱས་ན་ཁྱད་མཚར་ཞིག་མ་རེད་དམ།
ཚོགས་གཙོ་མཆོག་ཐུགས་རྗེ་ཆེ། རེ་བ་དང་ཡིད་ཆེས་བྱས་པ་ནང་བཞིན་ལས་འགུལ་སྤེལ་འདུག
བོད་ནང་གི་ལས་འགུལ་ལ་མིག་དཔེ་བལྟས་ཏེ། ད་ནི་དོན་དག་དངོས་ཤིག་སྒྲུབ་ན་མ་རེད་དམ།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་བདག་གིས་སྙིང་ཁོང་རུས་པའི་གཏིང་ནས་ཐུགས་རྗེ་ཆེ་ཞུ་བཞིན་ཡོད། ང་ཚོ་ནི་འཚེ་མེད་ཞི་བ་དང་། བདེན་པ་བདེན་དྲང་གི་ཐོག་ནས་སྨྲ་བརྗོད་རང་དབང་། འགྲོ་བ་མིའི་ཐོབ་ཐང་། ཡུལ་སྲོལ་གོམས་གཤིས། སྐད་ཡིག་དང་རིག་གཞུང་གི་རང་དབང་རྩོད་མི་ཡིན་ལ། མཐར་གཏུགས་ན༧གོང་ས་སྐྱབས་མགོན་ཆེན་པོ་མཆོག་གི་ཐུགས་རེ་བཞིན་འཛམ་གླིང་ཞི་བདེའི་རང་དབང་རྩོད་མི་ཞིག་ཡིན་པར་ངོས་འཛིན་བྱེད་བཞིན་ཡོད། འཛམ་གླིང་གི་རང་དབང་མེད་པའི་མི་སེར་ཚོའི་རང་དབང་གི་འཐབ་རྩོད་བྱེད་པའི་མིག་དཔེ་ཞིག་ཏུ་ད་ཡན་ཆད་༧གོང་ས་མཆོག་གིས་ཁྲིད་ཡོད་ལ། ད་ནས་ཀྱང་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གན་ངྷི་དང་། ཨ་རིའི་མི་རིགས་ནག་པོའི་འཐབ་རྩོད་པ་གྲགས་ཅན་སྐུ་ཞབས་མར་ཊིན་ལི་ཐར་ཀིང་གི་ལྟ་བ་གཞིར་བཞག་ཏེ་ཤེས་ཡོན་དང་ཆིག་སྒྲིལ་གྱི་ནུས་པ་སྲོག་ཏུ་བྱས་ནས་འཆར་གཞི་དང་། སྒྲིག་འཛུགས། དམིགས་ཡུལ་དང་གོ་རིམ་ཡོད་པའི་ལམ་ལ་མདུན་སྐྱོད་བྱེད་རྒྱུ་གལ་ཆེ་སྙམ། དེ་ལྟར་ང་ཚོ་འཚེ་མེད་ཞི་བ་རང་གི་སྟེང་ནས་ལམ་ལ་ཆས་ན་༧གོང་ས་མཆོག་གི་འཛམ་གླིང་སྟེང་བཞག་པའི་རིན་ཐང་ཅན་གྱི་རང་དབང་རྩོད་ཚུལ་འདི་བརླག་མི་སྲིད་ལ། ཞི་བདེའི་དེད་དཔོན་གྱི་མཚན་མཐོང་ཡང་ཆེ་ནས་ཆེ་རུ་འགྲོ་བ་ཞིག་ཏུ་མཐོང་། དེ་མ་ཡིན་པར་སྡུག་གི་ཁུར་བོ་མ་ཆགས་པར་གཏོར་བཅོམ་དང་། སྡང་སྡིགས་སོགས་འཚེ་བའི་ལམ་ཁར་སོང་ན་སེམས་ཅན་སྤྱིའི་བདེ་སྐྱིད་དང་། མི་མང་ལ་སྡུག་བསྔལ་སྣོན་མ་ཡོང་རྒྱུ་ཡིན་ལ། རང་དབང་བརྩད་པའི་དགོས་དོན་ཡང་མ་འགྲུབ་པ་དང་། རྒྱ་ནག་དམར་པོའི་གཞུང་གི་མངོན་འདོད་བསྒྲུབས་པ། རྐང་རྗེས་ལག་སུབ་ལྟ་བུར་ཡང་འགྲོ་ཉེན་ཆེ་བས།
ད་རེས་མི་མང་སྣེ་ཁྲིད་ཀྱི་ལས་འགུལ་སྤེལ་སྟངས་དང་། རྒྱལ་སྤྱི་དང་ཕྱིའི་རྒྱལ་ཁབ་ཁག་གི་ཚོགས་པ་དང་གནད་ཡོད་ཀྱི་མི་སྣར་རེ་སྐུལ་ཞུ་སྟངས་དག་ནི་འཚེ་མེད་ཞི་བའི་འཐབ་རྩོད་སྤེལ་སྟངས་ཀྱི་རྒྱ་ལས་ནམ་ཡང་འགོངས་མེད་པས་རེ་བ་དང་གསོན་ཤུགས་གསར་བ་ཞིག་གིས་བདག་གི་ལུས་སེམས་ཡོངས་སུ་ཁྱབ་ཡོད། མ་འོངས་པར་ཡང་ཆགས་སྒོ་ཅི་ཞིག་བྱུང་ཡང་འཚེ་བ་མེད་པ་གཞི་ལ་བཞག་ནས་ཐབས་ལམ་སྣ་ཚོགས་ཀྱིས་གོམ་གང་ཕྱི་ནུར་མི་བྱེད་པར་ལས་འགུལ་སྤེལ་རྒྱུ་གནད་ཀྱི་དོན་པོ་ཞིག་ཏུ་མཐོང་སོང་ལ། དེ་ལྟར་བྱས་ཚེ་མི་མང་མཉམ་ཞུགས་བྱེད་དགོས་སར་ག་དུས་བརྡ་བཏང་ན་ཞུགས་འདོད་ཀྱང་ཡོད། ཉེ་ལམ་གྱི་ལྡི་ལིའི་གཞུང་འབྲེལ་གདུང་སེམས་མཉམ་སྐྱེད་ཀྱི་ལས་འགུལ་སྐབས་ཀྱི་གཏམ་བཤད་དེས་ཀྱང་བདག་གི་འདོད་པ་ཁེངས་ཡོད། ཁྱེད་ལྟ་བུའི་ལྷག་བསམ་དང་ཤེས་འཇོན་ལྡན་པའི་དབུ་ཁྲིད་ལ་ནམ་ཡང་བརྩི་བཀུར་ཡོད། འདི་ནི་བདག་གི་ཁ་མིན་དོན་གྱིས་བཤད་པ་ལས་ཕྱོགས་ལྷུང་དང་རྒྱ་ཆད་ཀྱི་སྐད་ཆ་བཤད་དོན་ཡང་མེད་ལ་བཤད་ཀྱང་ཅི་ཕན། ཆབ་སྲིད་ནི་བདག་གི་མི་ཤེས་མོད་དྲན་ཚུལ་ནི་བདག་ལའང་ཡོད་པས་བསམ་ཚུལ་ཙམ་བརྗོད་པ་ཡིན། ཁྱེད་རང་མི་རིགས་ནག་པའི་འཐབ་རྩོད་པ་སྐད་གྲགས་ཅན་སྐུ་ཞབས་ མར་ཊིན་ལི་ཐར་ཀིང་དང་འདྲ་བོ་ཡང་འདུག་པས་མི་ལ་སེམས་འགུལ་ཐེབས་པའི་ཀི་བཞེངས་རེ་བྱེད་རོགས། ཀུ་རེ་ཡིན། དགོངས་དག
མར་ཊིན་ལི་ཐར་ཀིང་དང་འདྲ་བར་ཁྱེད་ལ་ཡང་རྨི་ལམ་ཞིག་ཡོད་ཆོག་ལ། རྨི་ལམ་དེ་ནི་བོད་རྒྱལ་ཁབ་ཀྱི་རྨི་ལམ་དང་ངོ་བོ་དབྱེར་མེད་དུ་འདྲེས་ནས་ཡོད་ཆོག ནམ་ཞིག་བོད་མི་རིགས་འདི་རྨོངས་གཉིད་ལས་སད་ཅིང་ཡར་ལངས་དུས་དཀོན་མཆོག་གིས་འགྲོ་བ་མི་རྣམས་འདྲ་མཉམ་གྱི་ངོ་བོར་བསྐྲུན་པའི་བདེན་ལུགས་ལ་ཡིད་ཆེས་ཀྱང་ཡོད་ཆོག་ལ། དེའི་ཚེ་ང་ཚོ་ཚང་མས་ཆོས་དང་མཐུན་པའི་འཚོ་བ་བསྐྱལ་ཆོག་པའི་རྨི་ལམ་ཡང་ཡོད་པར་འདོད།
ཚོགས་གཙོ་མཆོག་ལ་གུས་འདུད་དང་། ཁ་སང་དེ་རིང་གི་ལས་འགུལ་དག་ནི་དངོས་གནས་ཕྱོགས་གང་ནས་བལྟས་ཀྱང་ཧ་ཅང་གི་ལས་འགུལ་རླབས་ཆེན་ཞིག་ཏུ་མཐོང་བས། ལས་འགུལ་མཉམ་ཞུགས་པ་ཡོངས་ལ་སེམས་གཏིང་ནས་ཐུགས་རྗེ་ཆེ་གྲངས་མེད་ཞུ་རྒྱུ་ཡིན།
ཚོགས་གཙོ་མཆོག་གི་ཕྱོགས་ཕེབས་ལམ་ཡོང་བར་ཤོག
རྒྱལ་ཁབ་ཉི་ཤུ་ལྷག་གི་ཚོང་དོན་འཚོགས་འདུའི་ཐོག་བོད་དོན་གླེང་སློང་དང་། བོད་ནང་རང་ལུས་མེ་སྲེག་བཏང་ནས་འུ་ཐུག་ཐབས་ཟད་ཀྱི་གནས་སྟངས་བྱུང་དང་འབྱུང་བཞིན་པ་དང་། ལྷག་པར་དུ་དེ་རིང་གི་ཁམས་རྟའུ་ནས་བཙུན་མ་དཔའ་ལྡན་ཆོས་འཚོས་སྐུ་ལུས་མེར་སྒྲོན་པའི་གནས་ཚུལ་དེ་སྟོབས་ཆེན་རྒྱལ་ཁབ་ཚོའི་དབུ་ཁྲིད་ཁག་ཡོད་སར་ཧུའུ་ཅིང་ཐོའུ་ལ་གོ་ཐུབ་པ་བཟོ་རོགས་གནང་།
རྟ་བདུན་དབང་པོའི་ལང་ཚོ་ངོམ་པ་ཚེ། །བློ་ངན་ལག་འགྲོའི་ཚོགས་རྣམས་སྐྱུམ་བཅུགས་ཤིག །འདི་ནི་གཟི་བརྗིད་མིན་ནམ་གང་རེད། འདི་ནི་འཇོན་ཐང་མིན་གང་རེད། དེང་བར་གྲགས་མྱོང་མེད་པའི་བཀའ་སྤྱིའི་ལས་དོན་དག་ངོ་མཚར་ཆེ།
ངོ་ནས་ཡིད་སྨོན་ཤོར་གི. མི་རབས་གསར་བའི་དབུ་འཁྲིད་གཉིས་ཀ. ཤུགས་རྒྱོབས་དང་བོད་མི་མང་རྒྱག་གཅིག་མཆོང་གཅིག་ཡིན་ནི་རེད་དོ
ལྷག་པར་ད་ཆ་རྒྱལ་སྤྱིའི་རྒྱབ་སྐྱོར་འཚོལ་ནས་དམར་སྲིན་ལ་འགྲན་རྒྱུའི་དུས་ལ་བབ་པ་རེད. རྒྱ་དམར་གཞུང་གིས སྡུག་ཐང་གི་ལང་ནས་ཐོད་པ་རེད་. སེམས་ནས་གྲོས་མོལ་བྱེད་དུས་མགོ་བདེ་ཁྲབ་ན་དེ་ལས་ཡོང་རྒྱུ་གང་ཡོད་. ད་རུང་རང་བཙན་ཡང་སྲིད.