བདུན་ཚིགས་བཞི་པ་སྲུང་གཙི།

དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྒྱུད་སྟོད་མཁན་རིན་པོ་ཆེ་དབུ་བཞུགས་ཐོག  ཉེ་ཆར་བོད་ནང་འདས་གྲོངས་སུ་ཕྱིན་པ་རྣམས་ཀྱི་ཆེད་བདུན་ཚིགས་སྨོན་ལམ་བཞི་པ་སྲུང་གཙི་བྱས་ཡོད།

ངྷ་སའི་གཞུང་འབྲེལ་མིན་པའི་ཚོགས་པ་ཁག་ ༡༡ གི་གོ་སྒྲིག་འོག དེ་རིང་ཕྱི་ཚེས་༥ཉིན་གྱི་ཞོགས་པའི་ཆུ་ཚོད་༩པའི་སྟེང་། བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ཁག་ཁང་དུ། དཔལ་ལྡན་རྒྱུད་སྟོད་གྲྭ་ཚང་གི་མཁན་རིན་པོ་ཆེ་བསྟན་འཛིན་བྱམས་མཆོག་དབུ་བཞུགས་ཐོག ངྷ་སའི་ཉེ་འཁོར་དགོན་སྡེ་ཁག་གི་གྲྭ་བཙུན་དང་ས་གནས་མང་ཚོགས་བཅས་ཁྱོན་མི་ ༡༠༠༠ ལྷག་འདུ་འཛོམས་བྱས་ཏེ། ད་ལོར་བོད་ནང་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པ་ཚོའི་ཆེད། བདུན་ཚིགས་བཞི་བའི་མཆོད་འབུལ་སྨོིན་ལམ་ཞིག་ཚོགས་སོང་། དེའི་ཐད་གོ་སྒྲིག་ཚོགས་ཆུང་གི་ཚོགས་མི་ངྷ་ས་མདོ་སྨད་དབུས་རྒྱུན་ལས་ཚོགས་གཞོན་རྨ་ཆུའི་མགོན་པོ་དོན་གྲུབ་ལགས་ཀྱིས་བརྗོད་དོན།  “ ཕྱི་ལོ་༢༠༠༨ལོ་ནས་བོད་ནང་བོད་མི་མང་པོ་ཞིག་འདས་གྲོངས་སུ་ཕྱིན་ཡོད་པ་དང་། ལྷག་པར་དུ་འདི་ལོའི་ཕྱི་ཟླ་༣པ་ནས་བོད་ཨ་མདོ་རྔ་པ་དང་། ཁམས་དཀར་མཛེས་དང་རྟའུ་ཁུལ་བཅས་སུ་སྔ་ཕྱིར་བོད་མི་༡༡ཙམ་གྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་ཡོད། ང་ཚོས་འདས་པོ་དེ་དག་ལ་ཚེ་ཕྱི་མར་དལ་འབྱོར་ལུས་རྟེན་ཞིག་འཐོབ་ཐུབ་པ་དང་། ཤུལ་ལུས་ནང་མི་ཚོར་གདུང་སེམས་མཉམ་སྐྱེད་མཚོན་ཆེད་མཆོད་འབུལ་སྨོན་ལམ་འདི་གོ་སྒྲིག་ཞུས་པ་ཡིན” ཞེས་བརྗོད་སོང་།