སྐར་མ་ལྔ་ཅན་གྱི་གསོལ་མགྲོན་ཁང་ལ་ལས་ཀ་བྱེད་དུ་ཤོག

རྒྱ་གར་ཧ་རི་ཡ་ཎའི་སྙན་གྲགས་ཅན་གྱི་སྐར་ལྔ་ཧྥོར་ཇོན་(fortune hotel)མགྲོན་ཁང་དུ་ཕྱག་ལས་གནང་བཞིན་པའི་སྐུ་ཞབས་ངག་དབང་ལགས་ཀྱིས། ལག་ཤེས་ལས་རིགས་ནི་མཐོང་ཆུང་བྱ་ཡུལ་ཞིག་མིན་པར། བོད་པ་ཚོས་ལག་ཤེས་ལ་དོ་སྣང་མང་ཙམ་སྤྲོད་དགོས་པའི་འབོད་སྐུལ་ཞུས་ཡོིད།  

སྒོང་ཟས་(Cake)ལས་རིགས་ལ་ཆེད་མཁས་པ་སྐུ་ཞབས་ངག་དབང་ལགས་ནི། ཕྱི་ལོ་ ༡༩༩༩ ལོར་བོིད་ནས་གསར་དུ་འབྱོར་ཞིང་། ༢༠༠༦ ལོར་སུ་ཇཱ་བོད་ཁྱིམ་སློབ་གྲྭར་གཞི་རིམ་འཛིན་གྲྭ་བཅུ་པ་ཐོན་རྗེས། རྡེ་ར་རྡུན་བོད་མིའི་ལག་ཤེས་སློབ་གྲྭར་འཛུལ་ཞུགས་ཀྱིས། དེ་གར་དུས་ཡུན་ལོ་གཉིས་ཙམ་རིང་སྒོང་ཟས་ལག་ཤེས་ལས་རིགས་ཐོག་སློབ་སྦྱོང་གནང་ཡོད་པ་དང་། ༢༠༠༨ ལོར་སློབ་གྲྭ་ཐོན་རྗེས་སྔ་རྗེས་སུ་རྒྱ་གར་གྲོང་ཁྱེར་འདྲ་མིན་གྱི་བཟོ་གྲྭ་དང་ཟ་ཁང་། མགྲོན་ཁང་བཅས་སུ་ལས་ཀའི་ཉམས་མྱོང་རིམ་བསགས་ཀྱིས། ད་ཆར་རྒྱ་གར་ཧ་རི་ཡ་ཎའི་མངའ་སྡེའི་གྷོར་གྷིན་(Gurgaon)གྲོང་ཁྱེར་དུ་ཡོད་པའི་སྐར་མ་ལྔ་ཅན་གྱི་ཧྥོར་ཇོན་མགྲོན་ཁང་(fortune hotel)ནང་། སྒོང་ཟས་ལས་རིགས་ཐད་ཀྱི་ལས་བྱ་བའི་གཙོ་འགན་འཁུར་བཞིན་ཡོད་པ་རེད།

འདི་གའི་གསར་འགོད་པས་སྐུ་ཞབས་ངག་དབང་ལགས་སུ་ད་ལྟའི་ལས་ཀའི་གནས་སྟངས་སྐོར་བཅར་འདྲི་ཞུས་སྐབས། “ ང་རང་གིས་ཧ་རི་ཡ་ཎར་ཡོད་པའི་སྐར་ལྔ་ཧྥོར་ཇོན་མགྲོན་ཁང་དུ་ལས་ཀ་བྱེད་ཀྱི་ཡོད། ཟླ་རེའི་གླ་ཕོགས་ཧིན་སྒོར་ ༡༣༠༠༠ ཙམ་ཡིན། གནས་སྐབས་གླ་ཕོགས་དེ་ཙམ་མཐོ་རྒྱུ་མེད་ཀྱང་། ཟས་རིན་དང་གྱོན་པ། འཕྲོད་བསྟེན་ལྟ་སྐྱོང་བཅས་ཀྱི་འགན་ཆ་ཚང་མགྲོན་ཁང་འཛིན་སྐྱོང་གིས་འགན་ལེན་གྱི་ཡོད་ཐོག ལོ་ལྟར་ལས་བྱེད་ཚོའི་གླ་ཆ་འཕར་གྱི་ཡོད་སྟབས། ལས་བྱེད་ཚོའི་མ་འོངས་པའི་མདུན་ལམ་ཡག་པོ་འདུག དེ་ལྟ་ནའང་། བོད་པའི་སྤྱི་ཚོགས་ནང་ལག་ཤེས་ལས་རིགས་ནང་འགྲོ་མཁན་ཚོར་མཐོང་ཆུང་དང་། སློབ་སྦྱོང་ཁུངས་མ་འཁྱོལ་བར་ངོས་འཛིན་བྱེད་པ་དེ་ཡག་པོ་མི་འདུག  ” ཅེས་བརྗོད་སོང་།

ཡང་ཁོང་ལ་སྐར་ལྔ་མགྲོན་ཁང་དུ་ལས་ཀ་འདི་ཇི་ལྟར་རག་མིན་སྐོར་དྲིས་པར།  “ ང་རང་རྡེ་ར་རྡུན་ལག་ཤེས་སློབ་གྲྭ་ཐོན་སྐབས་སློབ་གྲྭ་གཞུང་ལ་ལས་ཀ་འཚོལ་རོགས་ཞུས་ཀྱང་རོགས་རམ་གནང་མ་སོང་། དེ་ནས་རྒྱ་གར་གྲོང་ཁྱེར་བྷིང་ལོར་སོགས་སུ་ཕྱིན་ཏེ། བཟོ་གྲྭ་དང་ཟ་ཁང་ཁག་ཏུ་ལས་ཀ་བྱས་པ་ཡིན། ཐོག་མའི་ཆ་ལ་ཟླ་རེར་ཧིན་སྒོར་ ༣༠༠༠ ཙམ་ལས་རག་གི་མི་འདུག སྐབས་དེར་ཟས་རིན་དང་ཁང་གླའི་དཀའ་ངལ་གྱིས་རྐྱེན་པས་མཚམས་རེར་སེམས་པ་ཧ་ཅང་སྐྱོ་སོང་། རྒྱ་གར་ནང་གཉེན་ཉེ་སྤུན་མཆེད་གང་ཡང་མེད་སྟབས། ལས་ཀའི་ཐོག་སེམས་ཤུགས་མ་ཆག་པར་མུ་མཐུད་ཤུགས་བརྒྱབ་པ་ཡིན། དེའི་རྗེས་རིམ་བཞིན་ཟླ་རེར་ཧིན་སྒོར་ ༥༠༠༠ དང་། དེ་ནས་ ༧༠༠༠། མཐར་ ༩༠༠༠ བཅས་རག་གི་འདུག ༢༠༡༠ ལོར་སློབ་གྲོགས་ཤིག་གིས་ངོ་སྤྲོད་བྱས་པ་ལྟར། ཧ་རི་ཡ་ཎའི་མངའ་སྡེའི་སྐར་ལྔ་ཧྥོར་ཇོན་མགྲོན་ཁང་ལ་ཡིག་རྒྱུགས་བཏང་བ་ཡིན། ཡིག་རྒྱུགས་སྐབས་མི་རེ་ནས་སྒོང་ཟས་རིགས་མི་འདྲ་བ་ ༡༥ རེ་བཟོས་ཏེ་གཏན་འཇགས་ལས་བྱེད་ཁོངས་བདམས་པ་རེད།  ” ཅེས་བརྗོད་བྱུང་།

ཁྱེད་རང་ལག་ཤེས་པ་ཞིག་ཡིན་པའི་ཆ་ནས་དེའི་ཐོག་ལྟ་སྟངས་དང་དམིགས་ཡུལ་གང་འདྲ་ཡོད་མེད་དྲིས་པར།  “ ང་རང་གིས་འཛིན་རིམ་བཅུ་པའི་བར་བོད་ཁྱིམ་དུ་སློབ་སྦྱོང་བྱས་ཡོད་ལ། ད་བར་ཡིག་རྒྱུགས་མ་འཕྲོད་པ་དེ་འདྲ་གཅིག་ཀྱང་བྱུང་མེད། དེང་སྐབས་རྒྱ་གར་མཐོ་སློབ་ཁག་ནས་ལོ་རེར་བོད་རིགས་སློབ་མ་ ༥༠༠ རེ་སློབ་མཐར་ཕྱིན་གྱི་ཡོད་སྟབས། མཐོ་སློབ་ཏུ་སོང་ནའང་ལས་ཀ་རག་རྒྱུར་ཁག་པོ་ཆགས་ཡོད་པ་རེད། དེ་ཡིན་དུས། རང་ཉིད་ཀྱིས་བསམ་བློ་བཏང་སྟེ་ལག་ཤེས་སློབ་སྦྱོང་གི་ལམ་ཁ་འདི་བདམས་པ་ཡིན། ད་ལྟ་ཕྱིར་བལྟ་བྱས་ཡོང་སྐབས་དེ་སྔོན་རང་གིས་བདམས་པའི་ལམ་ཁ་དེ་ནོར་མི་འདུག་བསམ་གྱི་ཡོད། བོད་རིགས་ན་གཞོན་ཚོས་ཀྱང་ལག་ཤེས་ལས་རིགས་ཐོིག་དོ་སྣང་མང་ཙམ་སྤྲོད་ཐུབ་པ་ཡིན་ན། རྒྱ་གར་གྲོང་ཁྱེར་ཆེ་ཁག་ཏུ་ང་ཚོས་བསྒྲུབ་ཐུབ་པའི་ལས་ཀ་མང་པོ་འདུག ཕྱོགས་གཞན་ཞིག་ནས། ང་རང་གིས་ནུས་པ་དང་ཉམས་མྱོང་གིས་འདང་པ་ཡིན་ན། རྗེས་ཕྱོགས་ང་རང་སྒེར་ངོས་ནས་སྒོང་ཟས་བཟོ་འཚོང་གི་ལས་གནས་ཞིག་གཉེར་བསམ་གྱི་ཡོད། དེ་བཞིན། དབུས་བོད་མིའི་སྒྲིག་མིའི་སྒྲིག་འཛུགས་ཀྱིས་ཀྱང་། བོད་ཀྱི་ལག་ཤེས་ལས་རིགས་པ་ཚོར་བདག་པོ་རྒྱག་ཐུབ་ན། སྤྱི་ཚོགས་ནང་ལག་ཤེས་ཀྱི་ཐོག་ནས་ཞབས་འདེགས་བསྒྲུབ་ཐུབ་མཁན་མང་པོ་ཡོད་པ་རེད། ” ཅེས་བརྗོད་བྱུང་།

གྷོར་གྷིན་གྲོང་ཁྱེར་དུ་ཡོད་པའི་ཧྥོར་ཇོན་མགྲོན་ཁང་ནི་རྒྱ་གར་རྒྱལ་ཡོངས་སུ་ཡོད་པའི་སྐར་མ་ལྔ་ཅན་མགྲོན་ཁང་དག་གི་ཁྲོད་སྙན་གྲགས་ཆེ་ཤོས་ཀྱི་མགྲོན་ཁང་ཞིག་ཡིན་ཞིང་། ད་ཆར་མགྲོན་ཁང་ཨ་མ་དེར་ལས་བྱེད་ ༣༠༠ ལྷག་དང་། རྒྱ་གར་གྲོང་ཁྱེར་ཆེ་ཁག་ཏུ་ཡན་ལག་མགྲོན་ཁང་ ༥༢ ཙམ་ཡོད་འདུག མགྲོན་ཁང་གི་ལས་ཀའི་ངོ་བོར་རིགས་ཁ་ཤས་ཡོད་དག་ནི། དོ་དམ་བྱེད་མཁན། ཁ་ལག་བཟོ་མཁན། སྒོང་ཟས་བརྔོ་མཁན། གྱོན་པ་བཀྲུ་མཁན། ཞབས་ཞུ་མ། གཙང་སྦྲ་བྱེད་མཁན། འཕུད་མཉེད་གཏོང་མཁན་བཅས་ཡིན་ཞིང་། དེ་དག་གི་ཟླ་རེའི་གླ་ཕོགས་ཀྱང་མི་འདྲ་བར་ལས་བྱེད་མཐོ་ཤོས་ཤིག་ལ་ཟླ་རེར་གླ་ཕོགས་ཧིན་སྒོར་ཆིག་འབུམ་ ༡༠༠༠༠༠ རེ་དང་། ཉུང་ཤས་ལ་ཟླ་རེར་ཧིན་སྒོར་ལྔ་སྟོང་ ༥༠༠༠ བཅས་ལྷག་རག་གི་ཡོད་འདུག 

གསར་འགོད་པ། དཔལ་ལྡན།

༼ བོད་ཀྱི་དུས་བབ་ཚགས་ཤོག་ལས་འདིར་བསྐྱར་འགོད་བྱས། ༽