གཟའ་སྤེན་པའི་ཉིན་༧གོང་ས་མཆོག་གིས་སོག་ཡུལ་དུ་མི་མང་ ༡༠༠༠༠ ལྷག་ལ་བཀའ་སློབ་བསྩལ་ཏེ། དོལ་རྒྱལ་མཚམས་འཇོག་གནང་དགོས་སྐོར་གསུངས་འདུག
ཟླ་འདིའི་ཕྱི་ཚེས་ ༨ ཉིན་༧གོང་ས་མཆོག་གིས་སོག་ཡུལ་རྒྱལ་ས་ཨ་ལན་བྷ་ཐིའི་རྩེད་ཐང་ཆེན་མོ་ (Buyant Ukhaa) ཞེས་པར། སོག་པོའི་བླ་ཆེན་ཁལ་ཁ་རྗེ་བཙུན་དམ་པ་མཆོག་དང་། ཁལ་མུག་ནང་བསྟན་འགན་འཛིན་ཏེ་ལོ་རིན་པོ་ཆེ་གཙོས་པའི་ཧོར་སོག་གི་གྲོས་ཚོགས་འཐུས་མི་དང་། སེར་སྐྱ་མང་ཚོགས་ཆིག་ཁྲི་ ༡༠༠༠༠ བརྒལ་བར་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ་བཀའ་ཁྲིད་གནང་ཡོད་ཅིང་། ཐོག་མར་༧གོང་ས་མཆོག་གིས་དཔལ་ནཱ་ལེནྡའི་ཆོས་བརྒྱུད་འཛིན་པའི་བོད་ཀྱི་ནང་ཆོས་འདི་ཧ་ཅང་སྤུས་དག་ཅིག་ཡིན་ཚུལ་དང་། ད་ལྟ་ཚན་རིག་པ་ཚོས་བོད་ཀྱི་ནང་ཆོས་ལ་དོ་སྣང་ཆེན་པོ་བྱེད་གྱི་ཡོད་སྐོར་གསུངས་ཏེ། མ་འོངས་པར་སོག་རིགས་ཚོས་ནང་ཆོས་ལ་ཤེས་ནས་དད་པ་འཐོབ་རྒྱུ་གལ་ཆེན་ཡིན་སྐོར་གསུངས་འདུག
ཕྱི་ཚེས་ ༩ ཉིན་༧གོང་ས་མཆོག་གིས་རྩེད་ཐང་དེར་བོད་སོག་གི་ལོ་རྒྱུུས་ནས་མགོ་བཙུགས་ཏེ། འགྲོ་མགོན་ཆོས་རྒྱལ་འཕགས་པ་སོག་ཡུལ་དུ་ཕེབས་པ་དང་། ༧རྒྱལ་བ་བསོད་ནམས་རྒྱ་མཚོ་མཆོག་སོག་ཡུལ་དུ་འཁྲུངས་པ་བཅས་ཀྱིས་སོག་ཡུལ་དུ་བོད་ཀྱི་ནང་ཆོས་དར་ཡོད་སྐོར་དང་། དེ་སྔོན་སེ་འབྲས་དགེ་གསུམ་དུ་སོག་པོའི་གྲྭ་རྒྱུན་ཡོད་པ་དེ་དག་རིག་གནས་གསར་བརྗེའི་སྐབས་ཆད་ཡོད་ཀྱང་། དེང་སྐབས་སོག་ཡུལ་དུ་རང་དབང་ཡོད་སྟབས་ནང་བསྟན་སླར་གཙོ་བྱ་རྒྱུའི་དུས་ལ་བབས་ཡོད་སྐོར་གསུངས་འདུག
སྐབས་དེར་༧གོང་ས་མཆོག་གིས་མང་ཚོགས་ལ་དོལ་རྒྱལ་གྱི་བྱེད་ལས་དང་ངོ་བོ་དང་། དོལ་རྒྱལ་དང་༧གོང་ས་མཆོག་བར་གྱི་འགལ་འབྲེལ་སྐོར་ངོ་སྤྲོད་གནང་དོན། “ ༧གོང་ས་ལྔ་པའི་ཡང་སྲིད་སྐུ་མདུན་སྐུ་གོང་མར་ཆ་བཞག་ན། རྒྱལ་པོ་ཤུགས་ལྡན་ལ་དམ་དྲག་ཆེན་པོ་གནང་ཡོད། སྐུ་མདུན་སྐུ་གོང་མ་སོག་ཡུལ་དུ་ཕེབས་མཁན་ལ་ཁྱེད་ཚོ་དམ་ཚིག་ཉམས་པ་རེད། ངོས་ཀྱི་མདུན་ནས་དབང་ཞུས་ན་དམ་ཚིག་ཉམས་འགྲོ་ཡི་ཡོད་སྟབས། རྒྱལ་པོ་ཤུགས་ལྡན་བསྟེན་མཁན་ཚོིས་ངོས་ཀྱི་མདུན་ནས་ཆོས་ཞུས་ན་འགྲིག་གི་མ་རེད། སང་ཉིན་བླ་སློབ་ཀྱི་འབྲེལ་བ་འཇོག་དགོས་དུས། དོལ་རྒྱལ་བསྟེན་མཁན་སྐྱ་སེར་སུ་ཡིན་རུང་མ་ཡོང་རོགས་ཟེར་རྒྱུ་ཡིན། མ་གཞི་རྒྱལ་པོ་ཤུགས་ལྡན་བསྟེན་དང་མི་བསྟེན་སོ་སོའི་རང་དབང་རེད། གལ་ཏེ་ཚོང་དང་ལམ་འགྲོ་ཡོང་གི་རེད་ཟེར་ནས་མགོ་སྐོར་འོག་ཚུད་ཀྱི་ཡོད་ན། དེ་རིང་ནས་མཚམས་འཇོག་བྱ་ཆོག་གི་རེད། ཞེད་སྣང་རྩ་བ་ནས་དགོས་ཀྱི་མ་རེད། ཁ་མཆུ་རྒྱག་དགོས་ན་ངོས་ཀྱིས་རྒྱག་གི་རེད། དེའི་སྐྱོན་ཤེས་བཞིན་དུ་ཁྱད་གསོད་བྱས་ན་སོ་སོའི་རང་དབང་རེད། མགོ་རྟིང་སློག་སྟེ་ཕྱིན་ཀྱང་ངོས་ལ་ཁྱད་པར་མེད་ ” ཅེས་གསུངས་འདུག
འདི་ནི་༧གོང་ས་མཆོག་སོག་ཡུལ་ཆིབས་སྒྱུར་བསྐྱངས་པ་ཐེངས་ ༩ པ་དེ་ཆགས་ཡོད་འདུག
གསར་འགོད་པ། དཔལ་ལྡན།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
ཆབ་བྲག་འདིས་དེང་སང་གང་ས་གང་དུ་སྐད་རྒྱགས་སྟངས་ལ་ལྟ་ན་མི་འདི་དུས་ཚོད་མ་འཁྱོལ་བའི་ལས་མེད་གཅིག་ཆགས་མིན་པ་མིན་འགྲོ་་་་་་་་་
ཕྱི་སོག་གིས་ནང་སོག་ལ་འགན་ཁུར་གྱིན་མེད་པ་འདྲ། གསར་འགོད་པ་དེ་ཚོས་བོད་དང་སོག་པའི་འབྲེལ་བ་དང་ད་ལྟའི་གནས་བབ་སྐོར་ལ་བཅར་འདྲའི་དང་སློབ་སྟོན་རེ་ཞུས་ན་ཅིས་མི་ཆོག
བོད་རིགས་སོག་རིགས་མཚེ་མ་གཉིས། །
ཟས་གོས་གཉིས་མཚུངས་དམ་ཚིག་གཅིག །
བོད་ཆོས་དར་སའི་མི་རིགས་གཉིས། །
སྐད་རིགས་མི་མཚུངས་དད་ས་གཅིག །
སོག་ཡུལ་དུ་བོད་བརྒྱུད་ནང་བསྟན་གྱི་བསྟན་པ་སྔར་ལས་དར་ཞིང་རྒྱས་པའི་རྟེན་འབྲེལ་གྱི་རྩ་བ་བཟང་པོ་འགྲིག་འདུག ཉེ་ཆར་འཕགས་མཆོག་ཕྱག་ན་པདྨོ་༸ རྒྱལ་བ་བསྟན་འཛིན་རྒྱ་མཚོ་གདན་འདྲེན་ཞུ་ཐུབ་པ་བྱུང་བ་དེ་ནི་ཆེས་རླབས་ཆེན་གྱི་བྱ་གཞག་བཟང་པོ་ཞིག་རེད།
ད་དུང་སོག་པོའི་ནང་འགོང་པོ་དོལ་རྒྱལ་དམ་སྲི་འབྱུང་པོ་དེ་བསྟེན་ན་མི་འགྲིག་པའི་གནས་ལུགས་ཐད་བཀའ་སློབ་བླང་དོར་གསལ་ཞིང་རྒྱས་པ་ཞིག་གནང་བ་དེ་ནི་ལྕགས་ཚ་ཐོག་ལ་བརྡུང་བའི་དཔེ་ལྟར་ཡོངས་སུ་ཡང་དག་པ་ཞིག་རེད།
སོག་མི་རིགས་གཉིས་ཀྱི་ཆོས་དང་། རིག་གཞུང་། སྤྱི་ཚོགས་བཅས་ཀྱི་འབཻལ་ལམ་སྔར་ལས་ལྷག་པ་ཡོང་རྒྱུའི་དགེ་མཚན྄ཆེར་མངོན། མ་འོངས་པར་མུ་མཐུད་མགོན་པོ་གང་ཉིད་ཆིབས་བསྒྱུར་བསྐྱང་ཐུབ་པའི་འབད་བརྩོན་སྤྱི་དང་སྒོས་ཧོར་སོག་ལུང་པའི་ནང་དཔལ་དུས་ཀྱི་འཁོར་ལོའི་དབང་ཆེན་ཞིག་གྲ་སྒྲིག་གནང་ཐུབ་ན་བསྟན་དང་འགྲོ་སྤྱི་ལ་སྨིན་པའི་དོན་ཆེན་ཞིག་འགྲུབ་པ་རེད།
ཧོར་སོག་ཡུལ་གྲུའི་དད་ལྡན་མི་ཚོགས་ཁྲི་སྟོང་མང་པོར་གཟབ་རྒྱས་གསུང་གི་བདུད་རྩིའི་གྲུ་ཆར་ཕབ་ནས་བསླབ་གསུམ་ངུར་སྨྲིག་གི་མཚན་དཔེའི་གཟི་བྱིན་དཔལ་འབར་གྱི་ལོ་འབྲས་གཡུར་དུ་ཟ་བའི་བཀྲིས་ཀྱི་དགེ་མཚན་འོད་སྟོང་འཕྲོ་བཞིན་པར་སྤྲོ་བ་ཤིན་ཏུ་བརྟས།
སངས་རྒྱས་སྐུ་ཚེ་ཡུན་རིང་བརྟན་ཅིང་ཐུགས་འདུན་གེགས་མེད་ལྷུན་གྱི་འགྲུབ་པའི་སྨོན་ལམ་འདེབས།
ཧོར་སོག་མི་རིགས་ཀྱི་མཐུན་བསྒྲིལ་ཁྲི་ལོར་བརྟན་པར་ཤོག།
སོག་ཡུལ་དུ་འཁྲུངས་པ་དེ་རྒྱལ་བ་བསོད་ནམས་རྒྱ་མཚོ་མ་ཡིན་པར། རྒྱལ་བ་བཞི་པ་ཡོན་ཏན་རྒྱ་མཚོ་ཡིན་པས། འབྲི་ནོར་ཐེབས་པ་ཞིག་ཡིན་པ་འདྲ། མཆན་འདི་རྩོམ་སྒྲིག་པར་ཕུལ་བ་ཙམ་ལས། ཀློག་པ་པོའི་མདུན་དུ་བསྟར་དགོས་དོན་མེད།