ཨ་རིའི་རྐང་སྤོལ་ཆེད་མཁས་པ་ལྕམ་ཁཱེ་སི་ཆེལ་ཊིར་སཱི་ལགས་ཀྱིས་ངྷ་སྟེང་བོད་ཁྱིམ་ཞི་བདེ་ཚོགས་ཁང་དུ། རྒྱ་གར་རྒྱལ་ཡོངས་བོད་ཀྱི་སློབ་གྲྭ་ཁག་ ༡༧ ཙམ་གྱི་ལུས་རྩེད་དགེ་རྒན་ཚོར། བོད་རིགས་བུད་མེད་རྐང་སྤོལ་རྩེད་འགྲན་པ་སྐྱེད་སྲིང་བྱ་ཐབས་སྐོར་ཀྱི་ཟབ་སྦྱོང་ཞིག་སྤྲོད་འགོ་བཙུགས་འདུག
བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་འོག དེ་རིང་ཕྱི་ཚེས་ ༢༡ ཉིན་གྱི་ཞོགས་པའི་ཆུ་ཚོད་ ༩ པའི་སྟེང་ངྷ་སྟེང་བོད་ཕྲུག་ཁྱིམ་སྡེའི་ཞི་བདེ་ཚོགས་ཁང་དུ། ཨ་རིའི་རྐང་རྩེད་སྤོ་ལོ་ཆེད་མཁས་པ་ལྕམ་ཁཱེ་སི་ཆེལ་ཊིར་སི་ (Cassie Childers) ལགས་ཀྱིས། རྒྱ་གར་རྒྱལ་ཡོངས་སུ་ཡོད་པའི་བོད་ཀྱི་སློབ་གྲྭ་ཁག་གི་ ༡༧ ཙམ་གྱི་ལུས་རྩེད་དགེ་རྒན་ཚོར། དུས་ཡུན་བདུན་ཕྲག་གཅིག་རིང་བོད་ཀྱི་བུད་མེད་ཚོའི་རྐང་སྤོལ་ཡར་རྒྱས་ཡོང་རྒྱུར་དམིགས་ཏེ་ཟབ་སྦྱོང་ཞིག་སྤྲོད་མགོ་བཙུགས་ཡོད། དེའི་ཐད་ཟབ་སྦྱོང་སྤྲོད་མཁན་ལྕམ་ཁཱེ་སི་ཆེལ་ཊིར་སཱི་ལགས་ཀྱིས་བརྗོད་པ་ལྟར་ན། ལོ་ཤས་གོང་ཁོ་མོ་བཞུགས་སྒར་ངྷ་རམ་ས་ལར་ཚོགས་པའི་རྒྱལ་ཡུམ་ཆེན་མོའི་རྩེད་འགྲན་ལ་ལྟ་རུ་བསྐྱོད་སྐབས། བོད་རིགས་བུད་མེད་ཚོ་རྩེད་རིགས་ལ་དོ་སྣང་མེད་པའི་ཚོར་སྣང་བྱུང་ཡོད་འདུག གནད་དོན་དེའི་ཆེད་ཁོ་མོ་བཙན་བྱོལ་བོད་མིའི་གནས་ཡུལ་ཁག་ཅིག་ཏུ་ཕྱིན་ཏེ། མང་ཚོགས་ཀྱི་བསམ་ཚུལ་བསྡུས་པར་མང་ཆེ་བས་དགའ་མོས་ཡོད་པའི་རྣམ་འགྱུར་བསྟན་ཡོད་འདུག་ལ། ལས་གཞི་འདིར་བོད་ཀྱི་རྩེད་རིགས་ཚོགས་པ་དང་བུད་མེད་ལྷན་ཚོགས། བོད་ཕྲུག་ཁྱིམ་སྡེ་སོགས་གཞུང་འབྲེལ་མིན་པའི་ཚོགས་པ་ཁག་ཅིག་གིས་རྒྱབ་སྐྱོར་སྤྲད་ཡོད་འདུག
ལྕམ་ཁཱེ་སི་ཆེལ་ཊིར་སཱི་ལགས་ཀྱིས་བརྗོད་དོན། “ བོད་ཀྱི་བུད་མེད་ཚོའི་ལུས་པོ་མི་རིགས་གཞན་གྱི་བུད་མེད་དང་མི་འདྲ་བར་ལྷན་སྐྱེས་ཐོག་ཧ་ཅང་མཁྲེགས་པོ་ཞིག་ཡིན་སྟབས། གལ་སྲིད་ཁོང་ཚོར་སྦྱོང་བརྡར་གྱི་གོ་སྐབས་ཡག་པོ་སྤྲོད་ཐུབ་པ་ཡིན་ན། རྒྱལ་སྤྱིའི་ཐོག་གི་འགྲན་བསྡུར་ནང་ཞུགས་ཐུབ་པ་མ་ཟད། ཨེ་ཤ་ཡའི་རྒྱལ་ཁབ་ཁག་གི་བུད་མེད་འགྲན་བསྡུར་ཁྲོད་ཨང་རིམ་རྩེ་ཕུད་ཆགས་ཐུབ་རྒྱུའི་རེ་བ་ཡོད་ཟེར། ” ཡང་ཁོ་མོས་མུ་མཐུད་དུ་ “ བོད་ཀྱི་བུད་མེད་ཚོར་ཁ་ཆེའི་བུ་མོ་ལྟར་མགོ་རས་བཏུམས་དགོས་པའི་བཀག་རྒྱ་དེ་འདྲ་མེད་དུས། རང་དབང་གི་སྒོ་ནས་ནུས་པ་འདོན་རྒྱུའི་གོ་སྐབས་མང་པོ་ཡོད་པ་རེད། ཕྱོགས་གཞན་ཞིག་ནས་ལུས་རྩེད་སྦྱངས་ན་ལུས་པོའི་འཕྲོད་བསྟེན་དང་རང་ཉིད་ལ་གདེང་ཚོད་བསླེབ་རྒྱུར་ཕན་ཐོགས་ཡོད་སྟབས། བོད་པའི་སྤྱི་ཚོགས་ནང་བུད་མེད་ཚོའི་ལུས་རྩེད་ཐོག་རྒྱབ་སྐྱོར་གནང་རྒྱུ་གལ་ཆེན་པོ་རེད་ ” ཅེས་བརྗོད་སོང་།
ཅོང་ཏཱ་ར་བོད་ཁྱིམ་གྱི་ལུས་རྩེད་དགེ་རྒན་ཚེ་དབང་རྡོ་རྗེ་ལགས་སུ་བཀའ་འདྲི་ཞུས་པར། “ བོད་པའི་སྤྱི་ཚོགས་ནང་སྐྱེས་པ་ཚོར་ལུས་རྩེད་ཀྱི་གོ་སྐབས་མང་པོ་རག་གི་ཡོད་ལ། ལྷག་པར་དུ་བོད་རྒྱལ་ཡོངས་རྩེད་རིགས་ཚོགས་པའི་མིང་ཐོག་ནས་ཕྱི་རྒྱལ་དུ་ཡང་ཡང་བསྐྱོད་ཀྱི་ཡོད། བོད་པའི་བུད་མེད་ཚོར་གོ་སྐབས་དེ་འདྲ་རག་གི་ཡོད་པ་མ་རེད། ངས་བསམ་ན་ཟབ་སྦྱོང་འདི་བརྒྱུད་མ་འོངས་པར་བོད་ཀྱི་བུད་མེད་ཚོར་ཡང་ལུས་རྩེད་ཀྱི་གོ་སྐབས་རག་གི་རེད་བསམ་གྱི་ཡོད། མ་འོངས་པའི་བོད་རྒྱལ་ཡོངས་ལུས་རྩེད་འགྲན་བསྡུར་ནང་བུད་མེད་རྩེད་འགྲན་ཚུད་ཐུབ་པའི་རེ་བ་ཡོད་ ” ཟེར། སུ་ཇཱ་བོད་ཁྱིམ་སློབ་གྲྭའི་ལུས་རྩེད་དགེ་རྒན་སྐལ་བཟང་ལྷུན་གྲུབ་ལགས་ཀྱིས། “ སུ་ཇཱ་སློབ་ཁྱིམ་སློབ་གྲྭའི་བུ་མོ་ཚོ་ལུས་རྩེད་ཐོག་དམིགས་བསལ་ཡག་པོ་ཡོད། སློབ་གྲྭ་གཞན་དག་ནས་ཀྱང་ལུས་རྩེད་ཐོག་སྦྱོང་བརྡར་སྤྲད་པ་ཡིན་ན། ལོ་ཤས་རྗེས་བོད་ཀྱི་བུད་མེད་ཚོས་སྤྱིའི་ལུས་རྩེད་ཐོག་ནུས་པ་འདོན་ཐུབ་ཀྱི་རེད། སློབ་གྲྭ་ནི་ལུས་རྩེད་སྦྱོང་བརྡར་སྤྲོད་ས་ཡག་ཤོས་ཆགས་ཡོད་སྟབས། དགེ་རྒན་ཚོས་ལུས་རྩེད་ཐོག་སློབ་ཕྲུག་གང་མང་སྐྱེད་སྲིང་བྱ་རྒྱུ་གལ་ཆེན་རེད་ ” ཅེས་བརྗོད་བྱུང་།
བོད་ཀྱི་བུད་མེད་ཟབ་སྦྱོང་ཐེངས་གཉིས་པ་དེ་འཆར་ལོའི་ཕྱི་ཟླ་དང་པོའི་ནང་བཞུགས་སྒར་ངྷ་སར་མགོ་འཛུགས་གནང་རྒྱུ་ཡིན་འདུག
གསར་འགོད་པ། དཔལ་ལྡན།
ཨཧཧཧཧཧ་
བོད་པའི་བུ་མོ་འཁྲེགས་པོ་འདུག་ཟེར་བ་དེ་བདེན་པ་མ་རེད་
ལས་རིགས་འདི་ཙམ་ཡང་ཕྱི་གླིང་བའི་བུད་མེད་ཀྱིས་གཟིགས་སྐྱོང་གནང་དགོས་པ་འདི་བོད་ཀྱི་བུད་མེད་ཚོའི་རང་གི་རྐང་ལག་གི་རིན་ཐང་ཤེས་ཀྱིན་མེད་པས་ཡིན་ནམ། གང་ལྟར་ལུས་རྩལ་རྩེད་རིགས་ཐད་ལ་དོ་སྣང་དང་ཡར་རྒྱས་གཏོང་ཐུབ་པའི་རེ་བ་ཡོད། རྒྱུ་མཚན་བོད་ཀྱི་བུ་མོ་ཚོ་ཡང་འཛམ་གླིང་གི་བུ་མོ་གཞན་དག་དང་གཅིག་མཚུངས་ཀྱི་ལུས་རྟེན་ཞིག་ཡོད་པས། རྗེས་མ་ནས་ཕོ་མོ་འདྲ་མཉམ་ལས་བུད་མེད་འདྲ་མཉམ་གྱི་ལས་གཞི་སྤེལ་ན་བཟང་ངོ།
དེ་ནི་བདེན་པ་རེད། ངས་ཡང་དེ་འདྲ་བསམ་བཞིན་འདུག་ཡིན་ཡང་བོད་པའི་བུད་མེད་ཚོར་ལུས་པོ་སྲེག་པའི་སྒང་ལ་ལྟའང་མཁྲེགས་པོ་ཡོད་པས་དེ་འདྲ་ལས་སླ་པོས་འགྱུར་པ་གཏོང་ཐུབ་རྒྱུ་ཁེགསཔོ་རེད།གལ་སྲིད་གོ་སྐབས་ཟིག་ཡོད་ན་རེ་བ་་ཧ་ཅང་ཆེ།