༧གོང་ས་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་བ་དང་ཕྱི་སྲིད་བློན་ཆེན་རྣམ་གཉིས་ལ་མཇལ་འཕྲད་གནང་རྗེས། ཡུལ་དེའི་མང་ཚོགས་ལ་བཀའ་སློབ་དང་མཁས་པའི་བགྲོ་གླེང་དུ་མཉམ་ཞུགས་གནང་ཡོད།
ཉིན་འདི་འགར་༸གོང་ས་མཆོག་གིས་ཅེག་སྤྱི་མཐུན་རྒྱལ་ཁབ་ཏུ་མཛད་འཕྲིན་སྐྱོང་བཞིན་པ་ལྟར། ཕྱི་ཚེས་ ༡༠ ཉིན་ཅེག་སྤྱི་མཐུན་རྒྱལ་ཁབ་ཀྱི་ (Forum 2000 Foundation) ཞེས་པའི་ཐེབས་རྩ་ཁང་གི་གོ་སྒྲིག་འོག ཐོག་མར་རྒྱལ་ས་པཱ་རཱག་ཏུ་སྲིད་འཛིན་ཟུར་པ་ཝག་ལབ་ཧ་སེལ་ (Vaclav Havel) མཆོག་དང་མཇལ་འཕྲད་གནང་སྟེ་བོད་དོན་སྐོར་བཀའ་བསྡུར་གནང་ཡོད་འདུག་ལ། སྐབས་དེར་༧གོང་ས་མཆོག་གིས་སྲིད་འཛིན་གྱིས་འགྲོ་བ་མིའི་ཐོབ་ཐང་དང་མང་གཙོ། བོད་ཀྱི་གནད་དོན་ཐོག་ཡུན་རིང་རྒྱབ་སྐྱོར་གནང་བར་བསྔགས་བརྗོད་གནང་སྟེ། “ སྲིད་འཛིན་མཆོག་ནི་བོད་མིའི་སྙིང་སྟོབས་ཀྱི་འབྱུང་ཁུངས་ཤིག་ཡིན ” ཞེས་གསུངས་ཡོད་འདུག་ལ། སྲིད་འཛིན་མཆོག་གིས་ཀྱང་ཅེག་སྤྱི་མཐུན་རྒྱལ་ཁབ་ཀྱི་གཞུང་འཛིན་མི་སྣས་བོད་དོན་ཐོག་རྒྱབ་སྐྱོར་བྱས་མིན་ལ་མ་ལྟོས་པར། ཡུལ་དེའི་མང་ཚོགས་ཁྲོད་ཏཱ་ལའི་བླ་མ་མཆོག་ལ་དགའ་མོས་དང་བརྩི་མཐོང་ཆེན་པོ་བྱེད་ཀྱི་ཡོད་སྐོར་སོགས་བརྗོད་དེ། “ ང་ཚོས་བོད་མིའི་ཆབ་སྲིད་འཕོ་འགྱུར་ལ་དོ་སྣང་ཆེན་པོ་བྱེད་བཞིན་པ་མ་ཟད། ད་ལྟའི་བོད་མིའི་ཆབ་སྲིད་འགྱུར་བ་དེ་དུས་དང་འཚམ་པ་ཞིག་ཏུ་མཐོང་གི་ཡོད་ ” ཅེས་བརྗོད་འདུག
ཕྱི་ཚེས་ ༡༡ ཉིན་རྒྱལ་ས་པཱ་རག་ཚོགས་ཁང་ཆེན་མོའི་ནང་། ༧གོང་ས་མཆོག་གིས་ས་གནས་མང་ཚོགས་བརྒྱ་ཕྲག་དུ་མར་༼དཀའ་ངལ་གྱི་དུས་སྐབས་སུ་བདེ་སྐྱིད་འཚོལ་བ༽ཞེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད་པ་དང་། ཉིན་རྒྱབ་རྒྱལ་སའི་མགྲོན་ཁང་ཞིག་ཏུ་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་ཀ་རེལ་ཤ་ཝར་ཛན་བྷག་ (karel Schwarzenberg) མཆོག་དང་མཇལ་འཕྲད་གནང་སྟེ། བོད་ནང་གི་གནས་སྟངས་སྐོར་བཀའ་བསྡུར་གནང་ཡོད་འདུག
དེའི་རྗེས་ཅིར་ལི་སི་གཙུག་ལག་སློབ་གྲྭ་ཆེན་མོའི་སྒྱུ་རྩལ་བསྟི་གནས་ཁང་ཞེས་པར། ༼ཨེ་ཤ་ཡའི་མང་གཙོ་དང་འགྲོ་བ་མིའི་ཐོབ་ཐང་༽ཞེས་པའི་བགྲོ་གླེང་ལྷན་ཚོགས་སུ་ཆིབས་བསྒྱུར་བསྐྱངས་ཏེ་བཀའ་སློབ་གནང་ཡོད་ཅིང་། ལྷན་ཚོགས་དེར་ཨི་རན་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ལྕམ་ཤི་རིན་ཨི་བྷ་ཌི་ (Shirin Ebadi) མཆོག་དང་རྒྱལ་ཚོགས་འགྲོ་བ་མིའི་ཐོབ་ཐང་སྙན་ཐོ་ཕྱོགས་སྒྲིག་འགན་འཛིན་ལས་རོགས་སི་ཊེ་ཕན་ཧ་སེལ་ (Stephane Hessels) ཧར་ཝར་ཌི་གཙུག་ལག་སློབ་གྲྭའི་རྒྱ་རིགས་མང་གཙོ་དོན་གཉེར་བ་ཡང་ཅན་ལི་བཅས་ཕེབས་ཡོད་འདུག
༧གོང་ས་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་གཟིགས་སྐོར་ཁག་ལེགས་པར་འགྲུབ་རྗེས། སང་ཉིན་ཕྱིར་བཞུགས་སྒར་དུ་ཆིབས་བསྒྱུར་བསྐྱང་རྒྱུ་ཡིན་འདུག
ཅེག་སྲིད་འཛིན་འཁོར་བཅས་སྐུ་ཚེ་ཡུན་བརྟན་མཛད་འཕྲིན་སྔར་ལྷག་རྒྱས་འགྱུར་ཅིག
མེས་པོའི་མཛད་འཕྲིན་རེ་ཞིག་རྒུད་ཀྱང་བདེན་དོན་ལོ་རྒྱུས་བྲིས་ནས་ཡོད།
བཙན་པོ་བང་སོང་བཙན་གྱི་འཕྲོག་ཀྱང་ཁྲག་གི་བྲིས་བའི་དེབ་ཐེར་ཡོད།
ཞི་བདེའི་འོད་སྣང་མཁའ་ལ་ཁྱབ་པས་སྨག་མུན་སྟུག་པོ་མཐའ་ནས་སེང་།
༧སྐྱབས་མཆོག་གང་གི་མཛད་འཕྲིན་ཉི་ཟླ་གླིང་བཞིའི་མུན་པ་ཚལ་བུར་བཤགས།
འཛམ་གླིང་ལེགས་སྦྱར་གནང་ལ་ཟླ་མེད་པ།
ཀུན་ཕན་གསུང་གི་བདུད་རྩིའི་ཟེར་མ་ཅན།
སྔར་མེད་ས་ཡི་ཟླ་བ་ཉ་གང་བ།
འགལ་རྐྱེན་ཚ་གདུང་སེལ་བའི་གཉེན་གཅིག་པུ།
མཛད་འཕྲིན་ཕྱོགས་བཅུར་རྒྱས་པའི་བཀྲ་ཤིས་ཤོག།