གཟའ་མིག་དམར་ཉིན་ཤིན་ཅང་ཡེ་ཁྲིན་རྫོང་དུ་དྲག་རྒོལ་དམར་འཛིང་དོན་རྐྱེན་ཞིག་བྱུང་སྟེ། མི་ ༢༠ རྐྱེན་འདས་དང་མི་མང་པོར་རྨས་སྐྱོན་བཟོས་ཡོད་འདུག
ཕྱི་ཟླ་ ༢ ཚེས་ ༢༨ ཉིན་གྱི་ཕྱི་དྲོ་ཆུ་ཚོད་ ༦ ཙམ་གྱི་སྟེང་། ཤིན་ཅང་ཀུ་ཧྲི་ཡེ་ཁྲིན་རྫོང་གི་རྒྱ་རིགས་འདུས་སྡོད་ཤུགས་ཆེ་སའི་བདེ་སྐྱིད་ཁྲོམ་གཞུང་དུ་དྲག་རྒོལ་དམར་འཛིང་གི་གནས་ཚུལ་ཞིག་བྱུང་འདུག སྐབས་དེར་རྒྱ་གཞུང་དྲག་དམག་གིས་ཡུ་གུར་དྲག་རྒོལ་བ་མི་ ༧ དམར་གསོད་བཏང་ཡོད་པ་དང་། ཡུ་གུར་དྲག་རྒོལ་བ་ཚོས་ཀྱང་དམག་མི་གཙོས་པའི་ཁ་གཏད་ཀྱི་མི་ ༡༣ བསད་ཡོད་འདུག དོན་རྐྱེན་གྱི་འབྱུང་རྩ་གང་ཡིན་མིན་དང་རྐྱེན་འདས་སུ་ཕྱིན་པའི་མིའི་གྲངས་འབོར་ཐད་གཅིག་གྱུར་ཁ་གསལ་ཞིག་བྱུང་མི་འདུག
འཛམ་གླིང་ཡུ་གུར་མཐུན་ཚོགས་ཀྱིས་གསར་ལམ་ཁག་ཏུ་བརྗོད་པ་ལྟར་ན། དོན་རྐྱེན་དེ་ནི་རྒྱ་གཞུང་གི་དྲག་གནོན་སྲིད་ཇུས་དང་། རྒྱ་རིགས་གནས་སྤོ་བ་ཚོས་དུས་རྒྱུན་ས་གནས་ཡུ་གུར་མང་ཚོགས་ལ་མཐོང་ཆུང་བརྙས་བཅོས་བྱས་པ་ལ་བརྟེན་ནས་བྱུང་བ་ཞིག་ཡིན་པ་དང་། དོན་རྐྱེན་ཁྲོད་རྒྱ་གཞུང་དྲག་དམག་གིས་མེ་མདའ་བརྒྱབ་སྟེ་ཡུ་གུར་བ་མི་ ༡༠ དམར་གསོད་དང་། མི་ ༡༡ ལ་རྨས་སྐྱོན་བཟོས་ཡོད་པའི་ཁྲོད་མི་ ༡ ལ་སྲོག་ཉེན་འཕྲད་ཡོད་ལ། ཡུ་གུར་བ་མི་ ༡༠༠ ལྷག་འཇུ་བཟུང་བྱས་ཡོད་འདུག དེ་བཞིན། ཡུ་གུར་ངོ་རྒོལ་བ་རྣམས་ཀྱིས་ཀྱང་ཕར་མི་ ༡༢ བསད་ཡོད་པའི་ཁྲོད་ནས་མི་ ༧ ནི་རྒྱ་གཞུང་གི་ཉེན་རྟོགས་ལས་ཀ་གཉེར་མཁན་ཡིན་འདུག
རྒྱ་གཞུང་གིས་གསར་ལམ་ཁག་ཏུ་གནས་ཚུལ་སྤེལ་བའི་ནང་། ལག་ཏུ་གྲི་ཐོག་པའི་དྲག་སྤྱོད་པ་མི་ ༩ ཡིས་གློ་བུར་ཁྲོམ་གཞུང་དུ་དྲག་པོའི་བྱ་སྤྱོད་སྤེལ་ཏེ། ལམ་འགྲོ་བ་མང་ཚོགས་དཀྱུས་མ་ ༡༣ དམར་གསོད་དང་མི་མང་པོར་རྨས་སྐྱོན་བཟོས་པར་བརྟེན། རྒྱ་གཞུང་ཉེན་རྟོག་པས་འགོག་རྒོལ་ཆེད་མེ་མདའ་བརྒྱབ་སྟེ་དྲག་སྤྱོད་པ་མི་ ༧ དམར་གསོད་དང་མི་ ༢ འཇུ་བཟུང་བྱས་ཡོད་ཚུལ་བཀོད་འདུག་ལ། ཕྱི་ཚེས་ ༢༩ ཉིན་རྒྱ་གཞུང་ཕྱི་འབྲེལ་མགྲིན་ཚབ་པ་ཧོང་ལིས་ཡིས། དོན་རྐྱེན་དེ་ནི་དྲག་སྤྱོད་འཇིགས་སྐུལ་རིང་ལུགས་དང་ཁ་བྲལ་རིང་ལུགས་པས་བཟོས་པ་ཞིག་ཡིན་པ་དང་། རྒྱ་གཞུང་གི་ངོས་ནས་དྲག་སྤྱོད་པ་དང་ཁ་བྲལ་བ་ཉུང་ཤོས་ཀྱིས་རྒྱལ་ཁབ་ཀྱི་མཐུན་སྒྲིལ་དང་། ཞི་བདེ་ལ་གཏོར་སྐྱོན་བཟོ་བཞིན་པར་མཐའ་གཅིག་ཏུ་ངོ་རྒོལ་ཡོད་ཚུལ་བརྗོད་འདུག
འཛམ་གླིང་ཡུ་གུར་མཐུན་ཚོགས་ཀྱི་མགྲིན་ཚབ་པ་ཏིས་ལིས་ཞཱ་ཐཱིས་ཀྱིས། ཡུ་གུར་མི་རིགས་རྣམས་རྒྱ་གཞུང་གི་སྒྲིག་གཞི་དང་འཆར་འགོད་རང་བཞིན་ཅན་གྱི་དྲག་གནོན་སྲིད་ཇུས་འོག་མུ་མཐུད་གནས་ཐབས་བྲལ་བ་དང་། ཞི་བའི་སྒོ་ནས་སོ་སོའི་རེ་འདུན་བརྗོད་ཐབས་མེད་པར་གྱུར་བར་བརྟེན། ཕན་ཚུན་ཁ་གཏད་རང་བཞིན་གྱི་དྲག་རྒོལ་མི་བྱེད་རང་བྱེད་ཀྱི་གནས་སྟངས་ཆགས་ཡོད་ལ། རྒྱ་གཞུང་གིས་ཡུ་གུར་མི་རིགས་ཐོག་སྔར་ལས་དྲག་གནོན་ཤུགས་ཆེ་རུ་བཏང་སྟེ་ཡུ་གུར་བ་མང་པོ་འཇུ་བཟུང་བྱེད་བཞིན་བའི་གནས་སྟངས་འདིའི་རྐྱེན་པས། ད་དུང་དྲག་རྒོལ་དོན་རྐྱེན་མང་པོ་མུ་མཐུད་འབྱུང་སྲིད་པའི་བློ་འཚབ་ཡོད་སྐོར་བརྗོད་འདུག
ཡེ་ཁྲིན་རྫོང་ནི་ཤིན་ཅང་ཡུ་གུར་རང་སྐྱོང་ས་ཁུལ་གྱི་ལྷོ་ནུབ་ཕྱོགས་སུ་ཡོད་པ་དང་། རྫོང་དེར་མི་འབོར་ཁྲི་ ༥༠ ཡོད་པའི་ནང་རྒྱ་རིགས་གནས་སྤོ་བ་བརྒྱ་ཆ་ ༦ ཙམ་ཡོད་འདུག ཡེ་ཁྲིན་རྫོང་ནི་པ་ཀི་སི་ཐན་དང་རྒྱ་གར་གཉིས་ཀྱི་མངའ་ཁོངས་སུ་ཡོད་པའི་ཀ་ཤི་མུར་ས་ཁུལ་དང་འདབས་འབྲེལ་དུ་ཆགས་ཡོད་པ་རེད།
གསོད་མི་ཉན་ཚང་མ་འཚོ་འདོད་ཡོད།།
རྒོལ་ལོས་ཉན་སློབ་གསོ་མེ་མདའ་རེད།།
སྐྱོབ་ལོས་དགོས་མི་ནི་འདྲ་འདྲ་རེད།།
ཅིག་སོམས་དང་ས་སྒང་གཅིག་གི་ཡིན།།
རྒྱ་འདྲེ་ཚང་ལ་ངོ་ཚ་དང་ཁྲེལ་རྩ་བ་ནས་མི་འདུག། ཡུ་གུར་མི་དམངས་སྙིང་རྗེ། རྒྱལ་སྤྱིའི་ཁྲིམས་འགལ་གྱི་དྲག་སྤྱོད་དེ་རྒྱ་ནག་རང་ཉིད་ཡིན་བཞིན་དུ་ཉམ་ཆུང་ཡུ་གུར་མི་དམངས་ལ་འཇིགས་སྐུལ་གྱི་སྙད་འདོགས་ཏེ། མི་དམངས་ལ་ཚོད་མེད་དུ་ཁྲག་དྲི་བྲོ་བའི་དྲག་གནོན་བྱེད་བཞིན་འདུག ལག་ཏུ་མེ་མདའ་དང་གོ་མཚོན་ཅན་གྱི་དམག་གིས་བཙན་འཛུལ་ཆོག་ན། དེའི་ཁ་གཏད་ལ་གྲི་ཙམ་ཞིག་འཁྱེར་མ་ཆོག་བ་དེ། ཐུབ་ཚོད་དང་ཧམ་བཤད་རང་རེད། ཡུ་གུར་མི་དམངས་ལ་གདུང་སེམས་མཉམ་སྐྱེད་ཞུའོ།།
ཉིན་ཅིག་བོད་པས་འདི་འདྲ་ཉེན་རྟོག་པ་གསད་མི་སྲིད་པ་མ་རེད།