ལས་གནས་བསྐོ་བཞག

ཉིན་དེའི་སྔ་དྲོའི་ཆུ་ཚོད་ ༡༠ དང་ཕྱེད་ཀའི་ཐོག་ནང་སྲིད་ལས་ཁུངས་སུ་དྲུང་ཆེ་བསྐོ་བཞག་གི་མཛད་སྒོ་སྟབས་བདེ་ཞིག་ཚོགས་ཡོད་ཅིང་། མཛད་སྒོའི་སྟེང་ནང་སྲིད་དྲུང་ཆེ་ཟུར་པ་དངོས་གྲུབ་རྡོ་རྗེ་ལགས་ཀྱིས་དྲུང་ཆེ་གསར་པ་བསོད་ནམས་སྟོབས་རྒྱལ་ལགས་ཀྱི་ལོ་རྒྱུས་མདོར་བསྡུས་ཤིག་ངོ་སྤྲོད་གནང་རྗེས། དྲུང་ཆེ་གསར་པ་སྐུ་ཞབས་བསོད་རྣམས་སྟོབས་རྒྱལ་ལགས་ཀྱིས། ནང་སྲིད་བཀའ་བློན་རྒྱ་རི་སྒྲོལ་མ་མཆོག་གི་མདུན་དུ་༸རྒྱལ་བའི་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་དང་། མཆོག་གསུམ་དཔང་ལ་བཙུགས་ཏེ་ལས་འཁུར་དམ་འབུལ་ཞུས་འདུག མཇུག་ཏུ་ནང་སྲིད་ལས་ཁུངས་ཀྱི་སྲི་ཞུ་བ་ཡོངས་ཀྱིས། དྲུང་ཆེ་གསར་པར་འཚམས་འདྲིའི་མཇལ་དར་དང་གསོལ་ཇ་འདེགས་འབུལ་སོགས་ཞུས་ཡོད།   

ཉིན་དེར་ཕྱི་དྲིལ་ལས་ཁུངས་ཀྱི་ཚོགས་ཁང་དུའང་དྲུང་ཆེ་གནས་སྤོར་གྱི་མཛད་སྒོ་ཞིག་ཚོགས་ཏེ། དྲིལ་བསྒྲགས་དྲུང་ཆེ་ཟུར་པ་ཐུབ་བསྟན་བསམ་འཕེལ་ལགས་ཀྱིས། གསར་དུ་བསྐོས་པའི་དྲིལ་བསྒྲགས་དྲུང་ཆེ་བཀྲ་ཤིས་ལགས་ཀྱི་ལོ་རྒྱུས་སྒྲོག་སྦྱང་གནང་རྗེས། དྲུང་ཆེ་གསར་པ་བཀྲ་ཤིས་ལགས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་དང་ལས་འཁུར་དམ་བཅའ་བཞག་འདུག་ལ། དེའི་རྗེས་ཕྱི་དྲིལ་ལས་བྱེད་ཡོངས་ཀྱིས་ཁོང་ལ་འཚམས་འདྲིའི་མཇལ་དར་བསྒྲོན་ཡོད་འདུག

དེ་བཞིན་ཉིན་དེར། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཐོག་ཁང་དུའང་། ཁྲིམས་དྲུང་བསྐོ་བཞག་གི་མཛད་སྒོ་ཞིག་ཚོགས་ཏེ། གསར་དུ་བསྐོས་པའི་ཁྲིམས་ཞིབ་དྲུང་ཆེ་བཀྲ་ཤིས་རྒྱ་མཚོ་ལགས་ཀྱིས་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་མདུན་དུ། ༸རྒྱལ་བའི་མཐོང་གྲོལ་རིན་པོ་ཆེར་མཇལ་དར་བསྒྲོན་འབུལ་ཞུས་ཏེ། མ་འོངས་པར་ཁྲིམས་དང་སྒྲིག་གཞི་ཚུལ་བཞིན་ལག་བསྟར་བྱ་རྒྱུ་ཡིན་པའི་ཁས་ལེན་དམ་བཅའ་བཞག་ཡོད་ལ། དེའི་རྗེས་དེར་ཡོད་ཁྲིམས་ཞིབ་ཁང་གི་ལས་བྱེད་ཚོས་ཁོང་ལ་འཚམས་འདྲིའི་མཇལ་དར་བསྒྲོན་ཡོད་འདུག