ཨ་འདུས་མིག་ཆུ། ས་རཱ།
གསུམ་བཅུའི་འོས་ལངས་ཀྱི་ངོ་བོ་བཤད་པ།
གསུམ་བཅུའི་དུས་དྲན་ནི་སྲིད་གཞུང་གི་རྩ་འཛུགས་ཡོད་པ་དང་། ཚོགས་པ་གང་ཞིག་གི་སྒྲིག་འཛུགས་ཡོད་པའི་ཐོག་བྱས་བཞག་པའི་ཞི་བའི་འོས་ལངས་ཆེན་པོ་ཞིག་མ་རེད། དེ་ནི་རྒྱལ་ཁབ་ཅིག་དང་མི་རིགས་ཤིག་ཆག་དང་འཇིག་གི་སྐེ་མཚམས་རང་ལ་ཡོད་པའི་སྐབས་ཏག་ཏག་ལ། མི་དམངས་བྱིངས་ཀྱིས་རྟོགས་པ་སད་ཅིང་། བློ་སྟོབས་རྒྱས་ཏེ་བྱུང་བའི་ཞི་རྒོལ་ཆེན་པོ་ཞིག་རེད། ཞི་བའི་འོས་ལངས་རང་ཡིན་པ་ལས་དྲག་རྒོལ་གྱི་ཐབས་ཤེས་ཀྱི་ལམ་ལ་ཞུགས་པ་ཞིག་མིན་ལ། དམངས་བྱིངས་ཀྱིས་རྒོལ་ཐབས་ཤིག་ཡིན་པ་ལས་སྲིད་གཞུང་ཞིག་གིས་ཇུས་གཏོགས་བྱས་ནས་སྣེ་ཁྲིད་པའི་ཞི་རྒོལ་ཞིག་གཏན་ནས་མིན།
གསུམ་བཅུའི་འོས་ལངས་ཀྱི་མཚོན་དོན།
གསུམ་བཅུའི་འོས་ལངས་ཆེན་པོའི་མཚོན་དོན་ནི། རྒྱལ་ཁབ་ཅིག་དང་མི་རིགས་ཤིག་ཆག་འཇིག་གི་གནས་ལ་གྱར་བའི་སྐབས་སུ། རྒྱལ་འབངས་མི་སེར་མཐུན་སྒྲིལ་མཉམ་གནས་དང་། ཕྱར་བ་གྲུ་འདེགས་ཀྱི་ཚུལ་གྱིས་རྒྱལ་ཁབ་སྲུང་སྐྱོབ་དང་། མི་དམངས་མཐུན་སྒྲིལ་དགོས་པའི་བླ་འབོད་བྱས་པ་ཞིག་མཚོན་ཐུབ་ལ། ཡང་ན་རྒྱལ་ཁབ་ཅིག་སྲུང་སྐྱོབ་བྱེད་དགོས་ན། མི་རིགས་ཤིག་གི་བླ་ན་མེད་པ་དང་། གོང་ན་མེད་པའི་དབུ་ཁྲིད་དེ་རང་ཉིད་ཀྱི་ཚེ་སྲོག་ལས་ཀྱང་ལྷག་པར་བརྩི་བའི་རྟོགས་སད་ཀྱི་འོད་སྣང་མཚོན་ཐུབ་པ་མ་ཟད་བོད་རང་ཉིད་ལ་མཚོན་ན། རྒྱལ་གཅེས་དཔའ་བོ་དཔའ་མོ་དག་གིས་རྒྱལ་ཁབ་དང་དབུ་ཁྲིད་འབངས་མི་དང་བཅས་པ་རང་ཉིད་ཀྱི་བླ་སྲོག་གིས་སྐྱོབ་པའི་བློས་གཏོང་གི་བསམ་བློའི་རྒྱ་ཁྱོན་དེའང་མཚོན་ཐུབ། གསུམ་བཅུའི་དུས་དྲན་ནི་བོད་ཀྱི་རྒྱལ་གཅེས་དཔའ་བོ་དཔའ་མོ་གྲངས་མེད་ཅིག་གི་ཚེ་སྲོག་མཚོན་ཁ་ནས་ཆས་པ་དང་། ཟུངས་ཁྲག་གི་བཞུར་རྒྱུན་ཐོག་མར་འབབ་སའི་ས་མཚམས་དེ་ཡིན། གསུམ་བཅུའི་དུས་དྲན་ནི། ༡༩༥༩ ལོའི་ཟླ་ ༣ པའི་ཚེས་ ༡༠ ཉིན་ནས་འགོ་བརྩམས་དེ་ད་ལ་ཐུག་གི་བར་རང་དབང་གི་སླད་དུ་ཚེ་སྲོག་ཤོར་སོང་བའི་རྒྱལ་གཅེས་པ་དག་གི་གཟི་བརྗིད་དང་བྱས་རྗེས་དྲན་པའི་ཉི་མ་ཞིག་ཡིན་པ་ལས། ཤག་ན་གློག་བརྙན་ལྟ་བ་དང་། སློབ་སྦྱོང་ཐོས་བསམ་བྱེད་པའི་ཁ་གཡར་ཁག་དཀྲི་བྱེད་པའི་དུས་སྐབས་ཤིག་མ་རེད།
གསུམ་བཅུ་དུས་དྲན་གྱི་དོན་སྙིང་།
གསུམ་བཅུའི་དུས་དྲན་འདི་ཡོད་པས་འུ་ཚང་ལ་ད་ལྟའི་ཉི་མ་འདི་ཡོད་སོང་བ་རེད། ད་ལྟའི་ཉི་མ་འདི་བཙན་བྱོལ་དུ་གྱར་བའི་ལོ་ཟླ་ཞིག་ཡིན་དུ་ཆིག་ཀྱང་། ད་བར་བོད་པ་ཞེས་པའི་མིང་ཡིག་འདི་ལོ་རྒྱུས་ཀྱི་དེབ་ཐེར་ཁྲོད་གསལ་ལ་མི་གསལ་བའི་གཟུགས་རིས་ཙམ་མ་ཡིན་པར་ས་ཆེན་གྱི་གོ་ལའི་སྟེང་ན། དཔའ་འཛངས་གཉིས་འཛོམས་དང་། ཡ་རབས་ཀུན་སྤྱོད་ཀྱི་ཕྱུག་པའི་མི་རིགས་གསོན་པོ་ཞིག་ཆགས་བསྡད་པའི་གོ་སྐབས་འདི་བྱུང་བ་རེད། འདི་ཡང་ལྔ་དགུའི་ལོ་ནག་གི་ཁྲོད་ན་སྒལ་ཚིགས་དྲང་མོ་ཡོད་པའི་གནའ་མི་རྒན་པོ་དག་གིས་དཔའ་དང་ཇུས་ཀྱིས་བཞེངས་པའི་གྲུབ་དོན་ཉག་གཅིག་ཡིན་ལ། བོད་ཀྱི་དཔའ་བོ་དཔའ་མོ་དག་གི་ཁྲག་དང་རྣག་གིས་བསྐྲུན་པའི་མཐའ་འབྲས་འབའ་ཞིག་གོ།།
བོད་གངས་ཅན་པའི་བློ་རིག་གསལ་ལ། སྙིང་སྟོབས་ཀྱི་གོ་ཆ་གྱོན་པའི་རྒྱལ་གཅེས་དཔའ་བོ་དཔའ་མོ་དག་དང་། རྒྱལ་ཞེན་ལྡན་ལ་དད་འདུན་གྱི་སེམས་པ་དཀར་བའི་མང་ཚོགས་དཀྱུས་མི་དག་གི་འོས་ལངས་རབ་དང་རིམ་པ་འདི་དག་མེད་སོང་ན། མཉམ་སྦྲེལ་རྒྱལ་ཚོགས་དང་། རྒྱ་ནག་ལ་རེ་བའི་ཞི་མཐུན་གྱི་གྲུབ་དོན་ཞིག་ནམ་ཡང་ཐོབ་སྲིད་པ་ཞིག་མ་རེད།
སང་ཉིན་ང་ཚོ་ལངས་ནས་ངོ་རྒོལ་བྱེད་དགོས་དོན།
ང་ཚོ་ལ་རྐང་པ་ཡོད་པས་འགྲོ་ས་མ་རག་པ་དང་། ཁ་ཡོད་པས་འབོད་སྒྲ་སྒྲོག་ས་ཞིག་མ་རག་པས་མ་རེད། ལྷག་པར་བྱུང་རབས་ལོ་རྒྱུས་ཁྲོད་གསུམ་བཅུ་དུས་དྲན་མི་ཡུལ་དུ་སྐྱེ་འཇུག་མཁན་གྱི་ཐོག་མའི་མི་བུ་རྒན་པོ་དག་དང་། དེ་རྒྱུན་སྐྱོང་བྱེད་པའི་རྒྱལ་གཅེས་པ་དེ་དག་རང་ཁྱིམ་དྲོད་མོར་ལྷོད་ཀྱིས་བསྡད་དེ་དཔེ་ཀློག་དང་། ལོ་རྒྱུས་དེ་དག་གི་གློག་བརྙན་ལ་བལྟས་ནས་འདུག་མ་ཤེས་པ་གཏན་ནས་མ་རེད། ཡང་གཅིག་བཤད་ན། འུ་ཚོ་སྐད་འབོད་ཁྲོམ་སྐོར་ལ་འགྲོ་བ་ནི། འུ་ཚོ་རང་ཉིད་ཀྱི་ཁྱིམ་གཞི་དྲོད་མོ་འདིའི་ཆེད་དུ་ཡིན་པ་ལས་རྒྱལ་སྤྱིའི་མགོ་སེར་མིག་ལྗང་ཅན་དག་གི་ཆེད་དུ་མ་ཡིན། དེ་དག་ཉོབ་སོང་བས་འུ་ཚོ་བླ་འཁྱམ་དགོས་དོན་གཏན་ནས་མེད་ལ། དེ་དག་གི་རྒྱབ་སྐྱོར་མེད་ན་འུ་ཚོ་ཐང་ཆད་དགོས་དོན་གང་ན་ཡོད་ཨང་།།
འུ་ཚོས་ད་བར་སློབ་སྦྱོང་ལ་ཁ་གཡར་ནས་ལོ་གཅིག་གི་ཟླ་བ་བཅུ་གཉིས་རིང་སློབ་གྲྭའི་ར་བ་ཁོ་ནར་སྟུག་དྲི་སྐྱིད་ཐག་ཆོད་རེ་བཏང་ནས་བསྡད་པ་རེད་ལ། ཇི་ཡང་མ་བྱས་གང་ཡང་མ་འཇོན་པར་ལག་པ་བྲང་འབྱར་དང་། རྐང་པ་རྡོག་རྡོག་གི་རྣམ་ཐར་བསྐྱངས་ནས་ལོ་ཟླ་བསྐྱལ་ཡོད་ཀྱང་། ལོ་ཟླ་དེ་འདྲའི་རིང་པོ་ཞིག་གི་ནང་མི་རིགས་ལ་ཕན་པའི་སློབ་སྦྱོང་ཕུ་ཐག་ཆོད་པ་ཞིག་བྱེད་ཐུབ་མེད་པས་ན། བླ་ན་འབར་ཞིང་མང་ཚོགས་རང་བཞིན་ཅན་གྱི་ཞི་བའི་འོས་ལངས་ཆེན་པོའམ་དཔའ་བོ་དཔའ་མོ་དག་གི་མཛད་རྗེས་དྲན་པའི་གསེར་པོ་གསེར་ནག་ལྟ་བུའི་གལ་ཆེན་དོན་གྱི་ཉི་མ་འདི།
འུ་ཚོས་སྐད་འབད་ཁྲོམ་སྐོར་གྱིས་སྲུང་བརྩི་བྱེད་དགོས་ལ། ཉི་མ་འདི་ནི་བོད་ཀྱི་རྒྱལ་གཅེས་དཔའ་བོ་དཔའ་མོ་དག་གིས་རང་ཉིད་བློ་གཏོང་བྱེད་པའི་ཉིན་མ་གལ་ཆེན་ཞིག་ཏུ་ངོས་འཛིན་བྱེད་ཀྱི་ཡོད་པས་འུ་ཚོ་སང་ཉིན་ཡར་ལངས་རྒྱག་དགོས་ལ། སྐད་འབད་བྱེད་དགོས། སེམས་པ་སྐྱོ་ལྷང་ལྷང་དང་། རྣམ་འགྱུར་སྐྱོ་ལ་གདུང་བའི་ངང་ནས་གཤར་དགོས། འདིས་བོད་པ་ཞེས་པ་ཞིག་གང་ས་གང་ན་འབུར་ནས་ཡོད་པ་ཤེས་པར་བྱེད་དགོས་ལ། བོད་ཞེས་པ་ཞིག་དུས་ནམ་ཡང་འཇིག་པ་མེད་ལ་སུབ་ཏུ་མེད་པའི་བརྡ་སྤྲོད་གསལ་ཐག་ཆོད་པ་ཞིག་གནང་དགོས་ཨང་།
སང་ཉིན་ཤག་ན་སྐྱིད་པོ་བྱས་ཏེ་ཉལ་མཁན་ཐམས་ཅད་ལ་བོད་ཀྱི་མིང་ཙམ་ཡོད་ཀྱང་རྩྭ་གཟུགས་ཀྱི་ཕུང་པོ་ཞིག་རེད་འདོད་ལ། སང་ཉིན་སྒེར་དོན་བསྒྲུབས་ནས་འདུག་མཁན་དག་ནི། སྐྱེ་ས་བོད་ཁོངས་ཡིན་ཡང་རུས་གསེང་ན་རྐང་མེད་པའི་མི་རྐྱང་རྐྱང་རེད་འདོད། སང་ཉིན་གྱི་ཉི་མའི་རིན་ཐང་མི་ཤེས་མཁན་དག་ནི་བོད་པའི་དྲི་མ་མེད་ལ།
བོད་རྒྱལ་ལོ།
༧རྒྱལ་བ་རིན་པོ་ཆེ་རྒྱལ་ལོ།
རྒྱལ་གཅེས་པ་དག་རྒྱལ་ལོ།
སེམས་ཚོར་རྣོན་པོ་རྣོན་པོ་ཞིག་གིས་སྡོད་དུ་མ་བཅུགས་པ་འདྲ། བདེན་པ་རེད་ལྷག་དོན་དུ་ཉི་མ་འདི་གཞོན་རབས་པ་ཚོས་ངེས་པར་དུ་མཉམ་ཞུགས་བྱེད་གལ་ཆེ་བར་སེམས་ཡོད་་་