ཉེ་བའི་ཉིན་གསུམ་རིང་ཐཱ་ལན་ཌིའི་རྒྱལ་ས་བྷན་ཀོག་ཏུ་ཤར་ཨེ་ཤ་ཡའི་རྒྱལ་སྤྱིའི་དཔལ་འབྱོར་གླེག་སྟེགས་ཀྱི་ཚོགས་ཆེན་སྟེང་ །ལྕམ་ཨང་སན་སུའུ་ཀེ་ཡིས་གཏམ་བཤད་གནང་འདུག
དེ་རིང་ཕྱི་ཚེས་ ༡ བར་གྱི་འདས་པའི་གསུམ་རིང་ཐཱ་ལན་ཌིའི་ (Thailand) རྒྱལ་ས་བྷན་ཀོག་ (Bangkok) ནང་ཤར་ཨེ་ཤ་ཡའི་རྒྱལ་སྤྱིའི་དཔལ་འབྱོར་གླེང་སྟེགས་ (the World Economic Forum) ཚོགས་ཆེན་ཚོགས་ཡོད་པ་དང་། འབར་མའི་དམངས་གཙོ་དོན་གཉེར་བ་ལྕམ་ཨང་སན་སུའུ་ཀེ་མཆོག་ལོ་ ༢༠ རྗེས་སུ་འབར་མ་ནས་ཐེངས་དང་པོར་ཕྱི་སྐྱོད་ཀྱིས་ཚོགས་ཆེན་དེར་མཉམ་ཞུགས་ཐོག ཁོང་མོས་འབར་མའི་ནང་ཕྱི་ཚུལ་ནས་བཅོས་སྒྱུར་བྱས་དང་བྱེད་མུས་སུ་སྣང་ཡང་། དོན་དངོས་ཐོག་ད་དུང་འབར་མའི་ནང་དམངས་གཙོ་ཚད་ལྡན་ཞིག་ཡོང་རྒྱུར་རྒྱང་ཐག་ཧ་ཅང་རིང་ལ། ཕྱི་ཕྱོགས་ནས་འབར་མའི་ནང་མ་དངུལ་གཏོང་འདོད་ཡོད་པ་རྣམས་ཀྱིས་མི་མང་དཀྱུས་མ་ཚོའི་དགོས་མཁོ་ལ་གཞིགས་ཏེ་རོགས་དངུལ་གཏོང་རྒྱུ་ལས་ལྐོག་ཟ་རུལ་སུངས་བའི་ལག་ཏུ་མ་ཤོར་པ་ཞིག་བྱ་དགོས་པ་སོགས་བརྗོད་དེ། “ཐུགས་རྗེ་གཟིགས། ང་ཚོ་ལ་བསམ་བློ་གཏིང་ཟབ་ཅིག་གཏོང་རོགས་”ཞེས་རེ་འབོད་བྱས་ཡོད་འདུག
ཁོང་མོས་དེང་སྐབས་འབར་མའི་མང་ཚོགས་ཀྱི་དཀའ་ངལ་ཆེ་ཤོས་ནི་ལས་མེད་ཀྱི་གྲངས་འབོར་ཡིན་པ་དང་། སྤྱིར་མང་ཚོགས་ལ་ཤེས་ཡོན་སྤྲོད་རྒྱུ་དེ་སྤྱི་ཚོགས་འཕེལ་རྒྱས་ཀྱི་རྒྱུ་ཆ་ཞིག་ཆགས་ཡོད་ཀྱང་། ཁ་ཚ་དགོས་གཏུགས་ནི་མང་ཚོགས་ལ་ལག་ཤེས་རིགས་ཀྱི་སློབ་སྦྱོང་དང་སྦྱོང་བརྡར་སྤྲད་དེ་གཞི་རིམ་མང་ཚོགས་ཚོར་འཚོ་གནས་ཀྱི་དཀའ་ངལ་མེད་པ་བཟོ་རྒྱུ་དེ་ཡིན་སྟབས། རྒྱབ་སྐྱོར་བ་ཚོའི་དེའི་ཕྱོགས་ལ་བསམ་བློ་གཏོང་དགོས་པའི་འབོད་སྐུལ་ཞུས་འདུག
