རྒྱལ་ཡུམ་ཆེན་མོའི་རྐང་སྤོལ་གསེར་གྱི་བུམ་པའི་རྩེད་འགྲན་ཐེངས་ ༡༨ པ་བཞུགས་སྒར་དུ་མགོ་འཛུགས་གནང་བ་དང་བསྟུན་ཏེ། བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་སྐལ་བཟང་དོན་གྲུབ་ལགས་སུ་བཅར་འདྲི་ཞུས་ཡོད།
དྲི་བ། བཙན་བྱོལ་ནང་བོད་པའི་རྐང་སྤོལ་རུ་ཁག་ཐོག་མར་གསར་འཛུགས་ཇི་ལྟར་བྱས་ཡོད་མེད་ངོ་སྤྲོད་ཅིག་གནང་རོགས།
ལན། ཐོག་མར་ ༡༩༩༨ ལོར་ཨི་ཌ་ལིའི་གཞས་ཚོགས་ཤིག་གིས་བོད་པའི་རྐང་སྤོལ་རུ་ཁག་མགྲོན་འབོད་བྱས་པ་ལྟར། ཨ་མ་རྗེ་བཙུན་པདྨ་མཆོག་གིས་དེ་ནི་གོ་སྐབས་ཡག་པོ་ཞིག་ལ་གཟིགས་ནས་མགྲོན་ཤོག་ངོས་ལེན་གནང་ཐོག བོད་པའི་སྤྱི་ཚོགས་ནང་ན་གཞོན་དང་དར་མའི་རྐང་སྤོལ་རུ་ཁག་གཉིས་འདེམས་སྒྲུག་བྱས་པ་རེད། དེ་ནི་བོད་པའི་ལོ་རྒྱུས་ནང་རྐང་སྤོལ་རུ་ཁག་དང་པོ་དེ་ཆགས་ཡོད། སྔོན་མ་ཕྱི་ལོ་ ༡༩༠༤ ཙམ་ལ་ལྷ་སར་རུ་ཁག་ཅིག་ཡོད་པ་རེད་དེ། རུ་མི་ཡོངས་རྫོགས་མཉམ་དུ་རུག་རུག་བཟོས་བཞག་པ་ཞིག་ཡོད་པ་མ་རེད། ༡༩༩༩ ལོར་བོད་པའི་རྐང་སྤོལ་རུ་ཁག་ཨི་ཊ་ལིར་བསྐྱོད་དེ་རྒྱལ་སྤྱིའི་རྐང་སྤོལ་རྩེད་མཁན་རྒན་པ་ཚོ་དང་མཉམ་དུ་བདུན་ཕྲག་གཅིག་རིང་སྦྱོང་བརྡར་གནང་བ་རེད། ༢༠༠༡ ལོར་ཌར་མཱག་རྒྱལ་ཁབ་ཀྱི་སྐུ་ཞབས་མཱ་ཀེལ་ལགས་བོད་ནང་ཕྱིན་སྐབས། ཁོང་རང་བོད་པའི་རྐང་སྤོལ་རུ་ཁག་གི་སློབ་སྟོན་པ་ཡིན་པ་ཞིག་རྨི་ལམ་དུ་རྨིས་པར་བརྟེན། ཁོ་རང་ཚུར་རྒྱ་གར་ནང་ཡོང་སྟེ་བོད་པའི་རྐང་སྤོལ་རུ་ཁག་རྩད་གཅོད་བྱས་སྐབས། དེ་སྔོན་ཨི་ཊ་ལིར་ཕྱིན་མྱོང་ཡོད་པ་ཤེས་རྟོགས་བྱུང་སྟེ། ༢༠༠༡ ལོར་ཡང་བསྐྱར་རྐང་སྤོལ་རུ་ཁག་གསར་པ་ཞིག་བཙུགས་ཏེ། ཌར་མཱག་མངའ་འོག་ཏུ་ཡོད་པའི་གྷ་རན་ནེལ་དང་མཉམ་དུ་རྩེད་འགྲན་བྱས་པ་རེད། དེ་ནི་རང་བཙན་མེད་པའི་རྒྱལ་ཁབ་གཉིས་བར་རྩེད་འགྲན་བྱས་པ་ཐོག་མ་ཆགས་ཡོད་པ་རེད།
དྲི་བ། རྒྱལ་ཡུམ་རྐང་སྤོལ་རྩེད་འགྲན་ག་དུས་གསར་འཛུགས་དང་། ད་ལྟའི་བར་རྩེད་འགྲན་ཐེངས་ག་ཚོད་ཕྱིན་ཡོད་དམ།
ལན། རྒྱལ་ཡུམ་རྐང་སྤོལ་རྩེད་འགྲན་དེ་ ༡༩༨༡ ལོར་མགོ་བཙུགས་པ་ནས་བཟུང་། ༢༠༠༢ ལོའི་བར་སྔ་ཕྱིར་ཐེངས་ ༩ རྩེད་ཡོད་པ་རེད། ༢༠༠༣ ལོར་ང་ཚོས་འགན་བླངས་རྗེས། ད་ལྟའི་བར་ཐེངས་ ༩ ལ་རྩེད་འགྲན་བྱས་ཡོད། ༢༠༠༦ རྩེད་ཐུབ་ཡོད་པ་མ་རེད། ང་ཚོས་བརྡ་ཁྱབ་སྤེལ་བའི་དུས་བཅད་ནང་དེབ་སྐྱེལ་བྱེད་མཁན་རུ་ཁག་གསུམ་མ་གཏོགས་བྱུང་མེད་པ་རེད། དུས་བཅད་རྫོགས་རྗེས་རུ་ཁག་ ༨ ཙམ་གྱི་སྙན་ཞུ་འབྱོར་ཡང་། མ་འོངས་པར་དུས་བཅད་རྩིས་མེད་མི་འགྲོ་ཆེད་རྩེད་འགྲན་མ་བྱས་པ་རེད། དེ་མ་གཏོགས་དཀའ་ངལ་མཐའ་དག་ལ་གདོང་ལེན་བྱས་ཏེ་ལོ་ལྟར་གོ་སྒྲིག་ཞུས་ཡོད། སྤྱིར་བཏང་དཀའ་ངལ་སྣ་ཚོགས་འཕྲད་ཡོང་དུས། མི་མང་ནང་དེ་ལྟར་རྙོག་དྲ་ཡོང་བསྡད་པ་ལས་གཡུགས་བཞག་ན་ཡག་པོ་འདུག་བསམ་པ་སླེབས་ཡོང་གི་འདུག ཡིན་ནའང་། ༸གོང་ས་མཆོག་གིས་ང་ཚོར་ཕྱག་དངུལ་རོགས་སྐྱོར་གནང་སྟེ་ཐུགས་རེ་གནང་ཡོད་སྟབས། ང་ཚོས་ངོས་ནས་ཀྱང་སེམས་ཤུགས་འཕར་མ་ཞིག་བསྐྱེད་ཏེ་མུ་མཐུན་འབད་བརྩོན་རྒྱུན་འཁྱོངས་གནང་བཞིན་ཡོད།
དྲི་བ། ལོ་འགའི་སྔོན་ནས་རྒྱལ་ཡུམ་རྐང་སྤོལ་རྩེད་འགྲན་དྷ་སའི་ཕྱི་ལོགས་སུ་རྩེད་མགོ་བརྩམས་ཡོད་པ་རེད། དེའི་དགོས་པ་རྒྱུ་མཚན་ག་རེ་ཡིན་ནམ།
ལན། ༢༠༠༧ ལོར་ང་ཚོས་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་དེ་ཐོག་དང་པོར་དྷ་སའི་ཕྱི་ལོགས་ནས་རྩེད་རྒྱུའི་འཆར་གཞི་བཏང་སྐབས། སྐུ་སྒེར་ཡིག་ཚང་ནས་ཀྱང་ཞལ་པར་ཕུལ་ཏེ་ཕྱི་ལོགས་ནས་རྩེད་དགོས་པའི་རྒྱུ་མཚན་བཀའ་འདྲི་གནང་སོང་། ང་ཚོས་ངོས་ནས་རྩེད་འགྲན་ས་ཆ་གཞན་དུ་བྱེད་དགོས་དོན་ནི། དང་པོ། རྒྱལ་ཡུམ་རྐང་སྤོལ་རྩེད་འགྲན་ནམ་རྒྱུན་དྷ་ས་རང་ལ་རྩེད་བསྡད་ཡོད་སྟབས། ས་ཁུལ་གཞན་པར་ཡང་དེ་འདྲ་དགོས་པའི་བསམ་ཚུལ་མང་པོ་སླེབས་ཀྱིན་འདུག གཉིས་པ། དྷ་སར་རྩེད་སྐབས་མཚམས་རེར་དཀའ་རྙོག་འཕྲད་ཡོང་གི་ཡོད་སྟབས། ༸རྒྱལ་བའི་བཞུགས་སྒར་ནས་མིང་ཆད་དེ་འདྲ་བྱུང་ཚེ་སེམས་ནས་བཟོད་དཀའ་ཆགས་ཀྱི་འདུག རྒྱུ་མཚན་དེ་གཉིས་ལ་བརྟེན་ནས་ཉེ་བའི་ལོ་འགའི་ནང་དྷ་སའི་ཕྱི་ལོགས་ནས་རྩེད་འགྲན་བྱས་པ་རེད།
དྲི་བ། བོད་རྒྱལ་ཡོངས་རྩེད་རིགས་ཚོགས་པ་འཛུགས་དགོས་པའི་རྒྱུ་མཚན་དང་ཚོགས་པའི་ལས་དོན་འཁྱེར་ཕྱོགས་ག་འདྲ་ཡིན་ནམ།
ལན། བོད་རྒྱལ་ཡོངས་རྩེད་རིགས་ཚོགས་པ་ཚུགས་དགོས་པའི་རྒྱུ་མཚན་ནི། ༢༠༠༢ ལོར་བཀའ་ཟུར་རྗེ་བཙུན་པདྨ་མཆོག་གིས་དབུས་བོད་ཁྱིམ་འབྲེལ་ཡོད་དག་གིས། བོད་ཀྱི་རྩེད་རིགས་ཚོགས་པ་ཞིག་འཛུགས་དགོས་པའི་རེད་འདུན་བཏོན་ཏེ་བཀའ་ཤག་ལ་ཡར་ཆོག་མཆན་ཞུས་པ་ལྟར། བཀའ་ཤག་གིས་མར་རྒྱབ་གཉེར་གནང་སྟེ་ལོ་དེར་བོད་རྒྱལ་ཡོངས་རྩེད་རིགས་ཚོགས་པ་གསར་འཛུགས་གནང་བ་རེད། ལས་འགན་གཙོ་བོ་དེ་བོད་པའི་རྐང་སྤོལ་རུ་ཁག་འདེམགས་སྒྲུག་དང་སྦྱོང་བརྡར་སྤྲད་དེ། ཕྱིའི་རྒྱལ་ཁབ་ཁག་དང་རྒྱ་གར་གྱི་རྩེད་འགྲན་ནང་འཛུལ་ཞུགས་བྱེད་རྒྱུ་དང་། སྔོན་མ་ཡོད་བསྡད་པའི་རྒྱལ་ཡུམ་རྐང་སྤོལ་རྩེད་འགྲན་མུ་མཐུད་མཇུག་སྐྱོང་དང་ཡར་རྒྱས་ཚགས་ཚུད་བྱ་རྒྱུ་དེ་རེད།
དྲི་བ། བོད་རྒྱལ་ཡོངས་རྩེད་རིགས་ཚོགས་པའི་ངོས་ནས་བོད་པའི་རྐང་སྤོལ་རུ་ཁག་ཚོར་སྦྱོང་བརྡར་དང་ལྟ་རྟོག་ཇི་ལྟར་གནང་གི་ཡོད་དམ།
ལན། སྤྱིར་རྩེད་རིགས་ཚོགས་པའི་དམིགས་ཡུལ་ནི་རྒྱལ་ཡུམ་རྐང་སྤོལ་རྩེད་འགྲན་ནང་ཞུགས་མཁན་རུ་ཁག་རྣམས། དུས་རྒྱུན་སོ་སོའི་གཞིས་ཆགས་ཁག་གང་དུ་ཡོད་པ་ཡིན་ན། དེ་གར་རྐང་རྩེད་སྤོ་ལོའི་རུ་ཁག་རང་གི་ངོ་བོར་གནས་མཁན་ཞིག་དགོས་ཀྱི་ཡོད་པ་རེད། རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་གཅིག་པུ་ཙམ་མ་ཡིན་པར། གཞན་པའི་རྩེད་འགྲན་ནང་འཛུལ་ཞུགས་བྱེད་མཁན་དེ་འདྲ་ཞིག་བཟོ་ཐུབ་པ་ཡིན་ན། རྗེས་མ་རིམ་པས་ཚད་དང་ལྡན་པ་ཞིག་ཡོང་གི་རེད། ད་ལྟའི་ཆར་རུ་ཁག་གི་ངོ་བོར་གནས་མཁན་ཁ་ཤས་ཤིག་མ་གཏོགས། མང་ཆེ་ཤོས་རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་རང་གི་ཆེད་གནས་སྐབས་རིང་རུ་ཁག་བཙུགས་ཏེ་རྩེད་འགྲན་མཇུག་སྒྲིལ་རྗེས་སོ་སོར་འཐོར་འགྲོ་ཡི་ཡོད་པ་རེད། ནམ་རྒྱུན་རུ་ཁག་གི་ངོ་བོར་གནས་མཁན་ཞིག་བྱུང་བ་ཡིན་ན། ང་ཚོའི་ངོས་ནས་ཀྱང་སློབ་སྟོན་དང་མཐུན་སྦྱོར། རུ་ཁག་སོ་སོའི་སློབ་སྟོན་པ་རྣམས་ལ་ཟུར་དུ་སློབ་སྦྱོང་སྤྲོད་པ། དེ་བཞིན། སོ་སོའི་ས་ཁུལ་ནང་དུའང་རྩེད་འགྲན་གྱི་འཆར་གཞི་བཟོ་ཐུབ་ཀྱི་རེད། ལྟ་རྟོག་བྱེད་མ་ཐུབ་པའི་དཀའ་ངལ་གཙོ་བོ་རུ་ཁག་གི་ངོ་བོའི་ཐོག་གནས་མཁན་ཉུང་ཉུང་ཞིག་མ་གཏོགས་མེད་པ་དེ་རེད།
དྲི་བ། མ་འོངས་པར་བོད་རྒྱལ་ཡོངས་རྐང་སྤོལ་རུ་ཁག་དེ་ཚད་ལྡན་ཞིག་ཡོང་རྒྱུར་གྲྭ་སྒྲིག་དང་འཆར་འགོད་ག་རེ་གནང་གི་ཡོད་དམ།
ལན། ཕྱི་རྒྱལ་ཁག་ནང་རྩེད་མོ་ཡག་པོ་ཡོད་མཁན་མང་ཆེ་བ་ཆུང་དུས་ནས་བཟུང་། རྩེད་མོ་རྩེད་སྟངས་ག་འདྲ་ཡིན་མིན་སློབ་སྦྱོང་གནང་སྟེ་སྐྱེད་སྲིང་བྱུང་བ་ཤ་སྟག་རེད། དེར་བརྟེན། ང་ཚོས་ངོས་ནས་ཀྱང་ ༢༠༠༣ ལོར་སློབ་གྲྭ་ཁག་ནང་ལ་རྐང་སྤོལ་རུ་ཁག་འཛུགས་རྒྱུའི་ཐབས་ཤེས་བྱང་ཀྱང་ལམ་ལྷོངས་མ་བྱུང་བ་རེད། ༢༠༠༩ ལོར་དངོས་སུ་གཏན་འཇགས་སློབ་གྲྭ་ཁག་ཉི་ཤུའི་ནང་རང་ལོ་ ༡༢ མན་གྱི་བུའི་རྐང་སྤོལ་རུ་ཁག་བཙུགས་ཏེ་སློབ་སྦྱོང་སྤྲོད་ཀྱིན་ཡོད་པ་རེད། ང་ཚོའི་འཆར་གཞི་ནི་ལོ་དྲུག་ནང་ཚུད་ལ་སློབ་གྲྭ་ཁག་ནང་ལོ་ཚད་ ༡༢ དང་ ༡༤ ། ༡༦ བཅས་བུའི་རྐང་སྤོལ་རུ་ཁག་གསུམ་འཐོན་རྒྱུའི་རེ་བ་འཆང་གི་ཡོད། ད་ལྟ་ ༢༠༠༩ ལོར་བདམས་པ་རྣམས་ལོ་ ༡༥ དང་། སྔར་ལོ་བདམས་པ་རྣམས་ལོ་ ༡༣ ལ་བསླེབས་ཡོད་པ་རེད། ༢༠༡༡ ཕྱི་ཟླ་ ༣ ནང་ཨ་རིའི་ལྕམ་ཀཱེ་སི་ལགས་དང་ང་ཚོ་མཉམ་འབྲེལ་ཐོག་བོད་ཁྱིམ་སློབ་གྲྭ་བརྒྱད་དང་། གཏན་སློབ་ཅོན་ཏ་ར་བཅས་སློབ་གྲྭ་ ༩ ནང་ནས་བུ་མོའི་རྐང་རྩེད་སྤོ་ལོའི་རུ་ཁག་གཅིག་བདམས་ཡོད། ང་ཚོས་དམིགས་ཡུལ་གཙོ་བོ་རྗེས་མ་བོད་པའི་རྐང་སྤོལ་རུ་ཁག་དེ་རྩེད་སྟངས་ཚད་དང་ལྡན་པ་ཞིག་ཡོང་ཆེད་ཡིན།
དྲི་བ། བོད་པའི་རྐང་སྤོལ་རུ་ཁག་རྒྱལ་སྤྱིའི་རྩེད་འགྲན་ཁྲོད་ཞུགས་རྒྱུར་གོ་སྐབས་དང་འགོག་རྐྱེན་གང་དག་འཕྲད་ཀྱི་འདུག་གམ།
ལན། སྤྱིར་ང་ཚོ་བོད་པའི་རྐང་སྤོལ་རུ་ཁག་རྒྱལ་ཁབ་གཞན་པ་ལྟར་རྩེད་རྒྱུར། ད་ལྟའི་ཆར་རྒྱལ་སྤྱིའི་རྐང་སྤོལ་སྒྲིག་འཛུགས་ཀྱི་ངོས་ལེན་བྱེད་ཀྱི་ཡོད་པ་མ་རེད། ཡིན་ནའང་། རྒྱལ་སྤྱིའི་རྐང་སྤོལ་སྒྲིག་འཛུགས་ཀྱིས་ངོས་ལེན་མེད་པའི་རྒྱལ་ཁབ་ ༣༠ ལྷག་རྒྱལ་སྤྱིའི་ངོས་འཛིན་མེད་པའི་རྐང་སྤོལ་མཐུན་ཚོགས་ཤིག་གསར་འཛུགས་བྱས་ཏེ། ༢༠༠༣ ལོར་ཧྥ་རན་སིར་རྩེད་འགྲན་མགོ་བཙུགས་པ་རེད། སྐབས་དེར་ང་ཚོ་བོད་པའི་རྐང་སྤོལ་རུ་ཁག་ཀྱང་དེའི་གྲས་སུ་ཡོད་པ་རེད། སྔ་ཕྱིར་འཇར་མན་ཧམ་བྷག་ (Hamburg) དང་། ཊར་ཀའེ་ (Turkey) འོག་ཡོད་པའི་བྱང་སའེ་བྷི་རེ་སི་ (North Cyprus) བཅས་ལ་ཐེངས་གཉིས་ཕྱིན་པ་རེད། དེ་མིན་གཞན་མང་པོ་ཞིག་ལ་འགྲོ་སོང་ཆ་ཚང་སོ་སོའི་ངོས་ནས་གཏོང་དགོས་སྟབས། ང་ཚོའི་ངོས་ནས་དེ་འདྲ་ཞིག་གཏོང་ཐུབ་ཐབས་ཡོད་པ་མ་རེད། ༡༩༩༩ ལོ་ནས་ད་ལྟའི་བར་ཨི་ཊ་ལི་དང་། ཌར་མཱག འཇར་མན། ཧོ་ལན་ཌི། ཨེ་སི་རལ། ཨོ་སི་ཌི་རེ་ཡ། སུད་སི་སོགས་རྒྱལ་ཁབ་ཁག་ ༡༠ ལྷག་གི་ནང་ཕྱིན་མྱོང་ཡོད་པ་རེད། ག་དུས་ཡིན་ཡང་རྒྱལ་ཁའི་ཐོབ་ཤོར་ལ་མ་བལྟས་པའི་ཐོག་ནས་བོད་པའི་བཟང་སྤྱོད་རྩེད་ཐང་དུ་སྟོན་རྒྱུ་དེ་ང་ཚོས་གལ་ཆེན་དུ་རྩིས་པ་ཡིན་ལ། དེའི་ཐད་ཕྱི་རྒྱལ་གྱི་ལྟད་མོ་བ་དང་རྩེད་མོ་བ་མ་ཚང་མས་ཧ་ཅང་དགའ་བོ་ཉེ་བོ་བྱེད་ཀྱི་འདུག དེ་ང་ཚོའི་ངོས་ནས་རྒྱལ་ཁ་ཆེ་ཤོས་ཤིག་ཏུ་རྩི་བཞིན་ཡོད།
དྲི་བ། ད་ལོར་རྒྱལ་སྤྱིའི་རྐང་སྤོལ་སྒྲིག་འཛུགས་ཀྱིས་ངོས་ལེན་ཐོབ་མེད་པའི་རྒྱལ་སྤྱིའི་ཐོག་གི་རྐང་སྤོལ་རུ་ཁག་མང་པོ་ཞིག་ཨེ་རག་ནང་རྩེད་བཞིན་པའི་ནང་། བོད་པའི་རུ་ཁག་ཞུགས་མ་ཐུབ་པའི་རྒྱུ་རྐྱེན་ག་རེ་ཡིན་ནམ།
ལན། ད་ལོར་མཚོན་ནའང་ཨེ་རག་འོག་ཡོད་པའི་ཁཱིར་ཌེ་སི་ཐན་(Kurdistan) རང་སྐྱོང་ལྗོངས་ཀྱི་གོ་སྒྲིག་འོག རྒྱལ་སྤྱིའི་ངོས་འཛིན་མེད་པའི་འཛམ་གླིང་རྒྱལ་ཁབ་ཁག་གི་རྐང་སྤོལ་རྩེད་འགྲན་དེ། ཕྱི་ཟླ་ ༦ པའི་ཚེས་ ༢ ནས་ ༩ བར་རྩེད་རྒྱུ་གཏན་ཁེལ་འདུག ང་ཚོའི་རྐང་སྤོལ་རུ་ཁག་ལའང་མགྲོན་ཤོག་འབྱོར་ཡོད་པ་མ་ཟད། གནམ་གྲུའི་གླ་ཆ་ལས་གཞན་པའི་འགྲོ་སོང་ཆ་ཚང་གོ་སྒྲིག་མཁན་གྱི་ངོས་ནས་གཏོང་རྒྱུ་ཁས་ལེན་གནང་ཡོད་སྟབས། དེར་ང་ཚོ་འཛུལ་ཞུགས་བྱ་རྒྱུ་ཐག་གཅོད་བྱས་ཀྱང་། རྗེས་སུ་དཀའ་ངལ་རིགས་གཉིས་འཕྲད་པ་རེད། གཅིག ཕྱི་སྐྱོད་ཐོངས་མཆན་དེ་ཕར་ཕྱོགས་ཀྱི་གནམ་ཐང་ལ་སླེབས་ན་མ་གཏོགས་སྤྲོད་ཀྱི་མེད་སྟབས། ང་ཚོའི་ད་ལྟའི་ལག་དེབ་སེར་པོ་ (RC)དེར་ངེས་པར་དུ་གཞུང་ཚབ་ནས་ཐོངས་མཆན་ཞུ་དགོས་ཀྱི་ཡོད་པ་རེད། དེའི་ཐད་ཡར་མར་ལ་འབྲེལ་བ་བྱས་མཐར་སྤྲོད་རྒྱུ་ཁས་ལེན་ཐོབ་པ་རེད། གཉིས་པ། གནམ་གྲུའི་འཛིན་བྱང་སྐོར་ལ་ཐོག་མ་སྦྱིན་བདག་ཅིག་རག་ཡོད་ཀྱང་། རྗེས་སུ་སྦྱིན་བདག་དེ་ཕྱིར་འཐེན་བྱས་པའི་དབང་གིས་འགྲོ་མ་ཐུབ་པ་རེད།
དྲི་བ། ད་ལྟའི་བར་རྒྱ་གར་ནང་ལོགས་ཀྱི་རྐང་སྤོལ་འགྲན་བསྡུར་ཁག་ནང་བོད་པའི་རྐང་སྤོལ་རུ་ཁག་ཐེངས་ག་ཚོད་ཙམ་འཛུལ་ཞུགས་གནང་ཐུབ་ཡོད་དམ།
ལན། ༢༠༠༣ ལོར་འབྲས་ལྗོངས་བློན་ཆེན་གྱི་མིང་ཐོག་ནས་ང་ཚོར་མགྲོན་ཤོག་ཕུལ་ཏེ། སྒང་ཏོག་མངའ་སྡེ་ཡི་གོ་སྒྲིག་འོག་ས་ཁུལ་ཁག་འདྲ་མིན་གྱི་རྐང་སྤོལ་རུ་ཁག་རྩེད་འགྲན་ནང་སྔ་ཕྱིར་ལོ་ ༧ ཙམ་རིང་འཛུལ་ཞུགས་བྱས་པ་རེད། རྗེས་སུ་ང་ཚོའི་རྒྱལ་ཡུམ་རྐང་སྤོལ་རྩེད་འགྲན་ལྷོ་ཕྱོགས་སུ་ཕྱི་ཟླ་ ༩ དང་ ༡༠ ནང་རྩེད་དགོས་བྱུང་བར་བརྟེན། འབྲས་ལྗོངས་ཀྱི་རྩེད་འགྲན་དང་དུས་མཉམ་ཆགས་ཏེ་འགྲོ་ཐུབ་ཡོད་པ་མ་རེད། ད་ལོ་རྒྱལ་ཡུམ་རྐང་སྤོལ་རྩེད་འགྲན་གྲུབ་རྗེས་བསྐྱར་དུ་རུ་ཁག་ཅིག་གསར་འདེམས་བྱས་ཏེ་འཛུལ་ཞུགས་བྱ་འཆར་ཡོད། ཡིན་ནའང་། འཛུལ་ཞུགས་བྱེད་འཇུག་མིན་དེ་ཁོ་ཚོས་ལག་ཏུ་ཡོད་པ་རེད། ཆབ་སྲིད་ཀྱི་དཀའ་ངལ་ཏོག་ཙམ་རེ་ཡོད་བསྡད་པ་རེད།
དྲི་བ། ད་ལྟའི་ཆར་བོད་པའི་གཞོན་སྐྱེས་ཚོའི་ཁྲོད་ཁྱད་ལས་རྐང་སྤོལ་རྩེད་མཁན་ག་ཚོད་ཅིག་ཡོད་པ་རེད།
ལན། ད་ལྟ་བོད་པའི་གཞོན་སྐྱེས་ནང་རྐང་སྤོལ་རྩེད་དེ་མི་ཚེ་སྐྱེལ་མཁན་མགོ་བཙུགས་ཡོང་གི་ཡོད་པ་རེད། སྔོན་ཆད་བོད་པའི་སྤྱི་ཚོགས་ནང་རྐང་སྤོལ་རྩེད་ནས་མི་ཚེ་སྐྱེལ་ཐབས་མེད་པའི་འདུ་ཤེས་ཤུགས་ཆེན་པོ་ཡོད་པ་རེད། ཕྱིས་སུ་རྒྱ་གར་གྱི་རྐང་སྤོལ་རྩེད་འགྲན་གནས་ཚད་མཐོ་ཤོས་ཨེ་ལེ་ཁི་རྩེད་འགྲན་ནང་རྩེད་མཁན་བོད་པ་གཞོན་སྐྱེས་ ༣ དང་། གནས་རིམ་གཉིས་པའི་ནང་རྩེད་མཁན་བོད་རིགས་གཞོན་སྐྱེས་ ༡ བཅས་བྱུང་ཡོད་པ་རེད། ཁོ་ཚོ་པུ་ནེ་ནང་ཡོད་པའི་ཀརྨ་ཚེ་དབང་དང་། རྡེ་ར་རྡུན་ནས་ཡིན་པ་བསྟན་འཛིན་དོན་གྲུབ། སྒང་ཏོག་ནས་ཡིན་པའི་བསྟན་འཛིན་ཚེ་བྷེ། ཤི་ལོང་ནས་ཡིན་པའི་བསྟན་འཛིན་དོན་གྲུབ་བཅས་རེད། ཁོ་ཚོར་ལོ་རེའི་ནང་ཧིན་སྒོར་འབུམ་ ༥ རེ་རག་གི་ཡོད་པ་མ་ཟད། ཟས་གོས་གནས་མལ་གྱི་འགྲོ་སོང་ཆ་ཚང་ལོགས་སུ་གཏོང་གི་ཡོད་པ་རེད། དེ་མིན། རྒྱ་གར་གྱི་རྩེད་འགྲན་ཚོགས་སྡེ་ཁག་ནང་འཛུལ་ཞུགས་རྒྱུགས་སྤྲོད་གནང་བཞིན་པའི་བོད་པའི་གཞོན་སྐྱེས་འགའ་ཤས་ཀྱང་ཡོད་པ་རེད།
དྲི་བ། རྒྱལ་ཡོངས་རྩེ་རིགས་ཚོགས་པའི་ངོས་ནས་རྩེད་རིགས་རྣམ་གྲངས་གཞན་གྱི་ཐོག་རྩེད་འགྲན་གོ་སྒྲིག་གནང་འཆར་ཡོད་དམ།
ལན། དེའི་ཐད་བསམ་ཚུལ་ཤུགས་ཆེན་པོ་ཡོང་གི་ཡོད་པ་རེད། ང་ཚོས་ཐོག་མར་མིང་འདོགས་པའི་སྐབས་སུ་བོད་པའི་རྐང་སྤོལ་ཚོགས་པ་ཞེས་མ་བཏགས་པར། བོད་རྒྱལ་ཡོངས་རྩེད་རིགས་ཚོགས་པ་ཞེས་འདོགས་དགོས་པའི་རྒྱུ་མཚན་ཡང་། རྐང་སྤོལ་ཚོགས་པའི་མིང་འོག་ནས་རྩེད་མོ་གཞན་ལ་ལག་པ་འཆིང་བདེ་བོ་ཡོད་པ་མ་རེད། རྩེད་རིགས་ཚོགས་པའི་མིང་ཐོག་ནས་རྩེད་རིགས་རྣམ་གྲངས་ཚང་མར་ལྟ་རྟོག་གནང་ཆོག་གི་རེད། ཡིན་ནའང་། ང་ཚོར་དཔལ་འབྱོར་རྒྱབ་བརྟེན་མེད་པའི་རྐྱེན་གྱིས་རྩེད་མོ་མང་པོ་ཞིག་ལ་ལག་པ་འཆང་ཐུབ་ཀྱི་མི་འདུག ༢༠༠༨ ལོར་སློབ་གྲྭ་ཁག་ནང་འཛིན་རིམ་ ༡༢ སློབ་ཕྲུག་ཚོའི་བར་ལག་སྤོལ་རྩེད་འགྲན་ཞིག་གྲ་སྒྲིག་ཆ་ཚང་བྱས་ཟིན་མོད། ལོ་དེར་བོད་ནང་གནས་སྟངས་ཛ་དྲག་ཆགས་ཏེ་ཕྱིར་འཐེན་བྱས་པ་རེད། ད་ལོ་ང་ཚོས་བསྐྱར་དུ་སློབ་གྲྭ་ཁག་ནང་འཛིན་རིམ་ ༡༢ སློབ་ཕྲུག་ཚོའི་བར་ལག་སྤོལ་རྩེད་འགྲན་ཞིག་གོ་སྒྲིག་ཞུ་འཆར་ཡོད། ང་ཚོས་རྒྱ་གར་གྱི་རྩེད་མོའི་ཚོགས་པ་དེ་འདྲར་ནམ་རྒྱུན་འབྲེལ་བ་བྱེད་ཀྱི་ཡོད། བོད་པའི་གཞོན་སྐྱེས་རྩེད་མོའི་རིགས་ལ་གནས་ཚད་ཡོད་མཁན་ཚོས་ང་ཚོར་འབྲེལ་བ་བཙུགས་པ་ཡིན་ན། ང་ཚོས་རྒྱ་གར་གྱི་རྩེད་མོའི་ཚོགས་པ་ཚོར་འབྲེལ་བ་བྱེད་ཆོག་གི་རེད། རྒྱ་གར་ནང་སྒེར་གྱི་རྩེད་མོའི་རིགས་ལ་གོ་སྐབས་ཡོད་བསྡད་པ་ཞིག་རེད།
དྲི་བ། བོད་རྒྱལ་ཡོངས་རྩེད་རིགས་ཚོགས་པའི་ངོས་ནས་རྩེད་རིགས་བྱ་འགུལ་ཐད་དཔལ་འབྱོར་འདུ་འགོད་ཇི་ལྟར་གནང་གི་ཡོད་དམ།
ལན། སྤྱིར་བཏང་རྩེད་རིགས་ལས་གཞི་ག་འདྲ་ཞིག་ཡིན་ནའང་། དཔལ་འབྱོར་རྒྱབ་རྟེན་དེ་གལ་ཆེན་པོ་ཆགས་ཡོད་པ་རེད། ཐོག་མ་མགོ་བཙུགས་དུས་ང་ཚོའི་དཔལ་འབྱོར་རྒྱབ་རྟེན་དེ། ཌར་མཱག་ཧཱ་མཱན་བཟོ་གྲྭས་ང་ཚོའི་རྐང་སྤོལ་རུ་ཁག་གི་སྒྲིག་ཆས་བཟོས་ཏེ་ཡུ་རོབ་ནང་ཕར་བཙོང་རྗེས། དེའི་ཁེ་སྤོགས་ལས་བརྒྱ་ཆ་ ༡༠ ང་ཚོར་སྤྲད་རྒྱུ་བྱས་ཏེ། ཐོག་མར་མགོ་བཙུགས་དུས་ཧིན་སྒོར་འབུམ་གཉིས་གསུམ་ཞིག་རག་པ་རེད། ཕྱིས་སུ་ཡུ་རོབ་ནང་དཔའ་འབྱོར་ཉམས་རྒུད་ཕྱིན་ཏེ་བར་མཚམས་ཆད་པ་དང་། མཐའ་མ་དེར་བཟོ་གྲྭ་དེས་རྒྱ་ནག་ལ་ཚོང་འབྲེལ་མགོ་བཙུགས་པ་དང་ང་ཚོའི་བར་གྱི་ཚོང་དེ་ཕྱིར་འཐེན་བྱས་པ་རེད། ད་ལྟ་ང་ཚོས་བསྐྱར་དུ་ཧོ་ལཱན་ཌིའི་སྒྲིག་ཆས་བཟོ་གྲྭ་ཀོ་བྷོ་དང་མཉམ་དུ་གན་རྒྱ་བཞག་སྟེ། ཐོག་མའི་གན་རྒྱ་འཇོག་སྐབས་ང་ཚོར་ཧིན་སྒོར་འབུམ་ ༣ སྤྲད་པར་མ་ཟད། བོད་པའི་རྐང་སྤོལ་རུ་ཁག་གི་སྒྲིག་ཆས་བཙོང་བའི་ཁེ་སྤོགས་ལས་བརྒྱ་ཆ་ ༡༠ སྤྲོད་རྒྱུ་བྱས་ཡོད་པ་རེད། ཕལ་ཆེར་ལོ་རེར་ཆ་སྙོམས་ཧིན་སྒོར་འབུམ་ ༤ ཙམ་རག་མི་ཡོང་ངམ་བསམ་གྱི་འདུག དེ་མིན་གཞན་དམིགས་བསལ་ཡོང་སྒོ་གང་ཡང་ཡོད་པ་མ་རེད།
དྲི་བ། ད་ཆར་བོད་པའི་སྤྱི་ཚོགས་ཁྱོན་ཡོངས་ལ་བལྟས་ཡོང་ན། རྩེད་མོའི་རིགས་ལ་དོ་སྣང་དང་དགའ་མོས་ཀྱི་གནས་སྟངས་ག་འདྲ་འདུག
ལན། སྤྱིར་བཏང་རྩེད་རིགས་རྣམ་གྲངས་སྣ་ཚོགས་ཤིག་ཡོད་པའི་ནང་ནས། རྐང་སྤོལ་ནི་ང་ཚོ་བོད་པ་རྣམས་དམིགས་གསལ་དགའ་མོས་ཡོད་པའི་རྩེད་མོ་ཞིག་ཆགས་འདུག རྩེད་མོ་རྩེད་མཁན་གཅིག་པུ་མ་ཡིན་པར། ས་ཆ་གང་དུ་རྩེད་འགྲན་བྱས་ཀྱང་ལྟད་མོ་ལྟ་མཁན་ལ་རྒན་གཞོན་དང་། སྐྱ་སེར། ཕོ་མོ་བཅས་ཀྱི་དབྱེ་བ་མེད་པར། དུས་ཚོད་རག་པ་ཡིན་ན་ཚང་མ་ཕེབས་ཡོང་གི་རེད། དྷ་རམ་ས་ལར་མཚོན་དབུ་འབྱེད་དང་མཇུག་སྡོམ་སྐབས་ཧ་ལམ་བརྒྱ་ཆ་ ༥༠ སླེབས་ཡོང་གི་ཡོད་པ་མ་ཟད། ཕྱོགས་མཐའ་ཁག་ནས་ཀྱང་ཆེད་དུ་ལྟད་མོ་ལྟ་རུ་སླེབས་མཁན་མང་པོ་ཡོད་པ་རེད། དེ་མིན་རྩེད་མོ་རྣམ་གྲངས་གཞན་པའི་རིགས་རྩེད་འགྲན་མེད་སྟབས། ད་ལྟའི་ཆར་དོ་སྣང་ག་ཚོད་ཅིག་ཡོད་མེད་བཤད་ཐུབ་ཀྱི་མི་འདུག
དྲི་བ། རྒྱལ་ཡོངས་རྩེད་རིགས་ཚོགས་པའི་ངོས་ནས་རྩེད་རིགས་སྐོར་གྱི་བརྡ་ཆད་དང་། ཚོགས་པའི་དྲ་རྒྱ་བོད་ཡིག་ཐོག་ཕབ་བསྒྱུར་གྱི་དགོངས་འཆར་དེ་འདྲ་ཡོད་དམ།
ལན། དངོས་ཡོད་གནས་ཚུལ་ཐོག་དེ་འདྲ་ང་ཚོའི་བསམ་བློ་ནང་འཁོར་མ་སོང་། ཁྱེད་རང་གི་དྲི་བ་དེ་ཕལ་ཆེར་དགོངས་ཚུལ་གནང་མཁན་དང་པོ་ཆགས་བསྡད་ཀྱི་འདུག ཡིན་ནའང་། མ་འོངས་པར་ང་ཚོས་དྲ་རྒྱའི་ཕྱག་ལས་གནང་མཁན་ཚོར་སྐྱབས་འཇུག་ཞུ་ངེས་ཡིན། དེ་བཞིན། རྩེད་རིགས་སྐོར་གྱི་བརྡ་ཆད་རྣམས་ཀྱང་བོད་ཡིག་ནང་ཕབ་བསྒྱུར་ཐད་ཐབས་ཤེས་གནང་གི་ཡིན། ཡིན་ནའང་། བསྒྱུར་བ་དེའང་ཚད་དང་ལྡན་པ་ཞིག་དགོས་ཀྱི་ཡོད་པ་རེད་མ་གཏོགས། ཐབས་ཆག་ཅིག་བསྒྱུར་བ་ཡིན་ན་ལས་ཀ་དེར་སྐྱོན་བརྗོད་དེ་ལས་མང་པོ་རག་ཡོང་གི་རེད། ད་ལྟའི་ཆར་ང་ཚོའི་ལག་ཏུ་བོད་ལྗོངས་བརྙན་འཕྲིན་ཁང་གིས་སྒྲིག་པའི་ལུས་རྩེད་སྐོར་གྱི་བརྡ་ཆད་སྐོར་ཞིག་ལས་གཞན་གང་ཡང་རག་མ་བྱུང་།
དྲི་བ། ད་ལྟའི་ཆར་བོད་རྒྱལ་ཡོངས་རྩེད་རིགས་ཚོགས་པའི་དཀའ་ངལ་ཆེ་ཤོས་གང་ཆགས་ཀྱི་འདུག་གམ།
ལན། དཀའ་ངལ་ཆེ་ཤོས་ཏེ་དཔལ་འབྱོར་གྱི་རྒྱབ་རྟེན་མེད་པ་དེ་རེད། སྤྱིར་ང་ཚོ་བོད་པའི་ནང་ལ་དཔལ་འབྱོར་གནས་སྟངས་ཡག་ཐག་ཆོད་མང་པོ་ཡོད་པ་རེད། སྤྱིར་བོད་པའི་སྤྱི་ཚོགས་ནང་ལ་རྩེད་མོའི་རིགས་ལ་ཞལ་འདེབས་ཕུལ་བའི་སྲོལ་ཧ་ལམ་མེད་པ་ལྟ་བུ་ཆགས་འདུག ཐ་ན། རྒྱལ་ཡུམ་ཆེན་མོའི་རྐང་སྤོལ་རྩེད་འགྲན་སྐབས་སུ། ལྟད་མོར་གཟིགས་མཁན་མང་ཚོགས་ཀྱི་ངོས་ནས་འཛིན་བྱང་ཉོ་མཁན་ཡང་ཧ་ཅང་ཉུང་ཉུང་རེད། དེང་སྐབས་ཡུ་རོབ་དང་ཨ་རིའི་ནང་དཔལ་འབྱོར་ཉམས་རྒུད་བྱུང་བའི་རྐྱེན་གྱིས། རྩེད་མོའི་ཐོག་ཞལ་འདེབས་རག་རྒྱུ་ཁག་པོ་འདུག ཡིན་ནའང་། ང་ཚོའི་ངོས་ནས་ཐབས་ཤེས་སྣ་ཚོགས་བྱེད་བཞིན་ཡོད།
གསར་འགོད་པ། ཚེ་རིང་རྒྱལ།
