ཁ་སང་གཟའ་ལྷག་པའི་ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བདེན་པའི་མེ་ལྕེ་ངྷ་སྟེང་བོད་ཁྱིམ་དུ་སྐོར་སྐྱོད་བྱས་འདུག
ཁ་སང་ཕྱི་ཚེས་ ༢༥ ཉིན་བོད་མི་མང་སྤྱི་འཐུས་ལྷན་ཚོགས་བདེན་པའི་མེ་ལྕེ་སྐོར་སྐྱོད་དེ་ས་རཱ་མཐོ་སློབ་ཀྱི་སློབ་མ་ཚོས་ངྷ་སྟེང་བོད་ཁྱིམ་དུ་རྩིས་སྤྲོད་གནང་ཡོད་ཅིང་། རྩིས་སྤྲོད་མཛད་སྒོའི་ཐོག་ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་དང་བོད་ཁྱིམ་སྤྱི་ཁྱབ་འགན་འཛིན་རྒན་ཚེ་དབང་ཡེ་ཤེས་རྣམ་གཉིས་གཙོས། དགེ་ལས་དང་སློབ་ཕྲུག་བཅས་མི་ ༣༠༠༠ ལྷག་མཉམ་ཞུགས་གནང་ཡོད་འདུག་ལ། སྐབས་དེར་བོད་ཁྱིམ་སྤྱི་ཁྱབ་འགན་འཛིན་གྱིས་དེར་ཡོད་དགེ་སློབ་རྣམས་ལ་བདེན་པའི་མེ་ལྕེ་སྐོར་སྐྱོད་དང་འབྲེལ་བའི་ངོ་སྤྲོད་གཏམ་བཤད་དང་། བོད་ཁྱིམ་སློབ་གྲྭ་ཆུང་བའི་སློབ་ཕྲུག་ ༡༠༠ ལྷག་གིས་རྒྱལ་ཞེན་གྱི་གླུ་གཞས་ ༼ བོད་ལ་ལོག་འགྲོ༽ ཞེས་པ་བཏང་སྟེ་མེ་ལྕེ་སྐོར་སྐྱོད་དང་མཚན་རྟགས་བསྡུ་རུབ་གནང་ཡོད་འདུག
ཁ་སང་ཕྱི་དྲོ་བོད་མི་མང་སྤྱི་འཐུས་ལྷན་ཚོགས་ཀྱི་སྣེ་འཁྲིད་པའི་བདེན་པའི་མེ་ལྕེ་སྐོར་སྐྱོད་དེ་ངྷ་སྟེང་བོད་ཁྱིམ་སྤྱི་ཁྱབ་འགན་འཛིན་གྱིས་བོད་ཀྱི་ཟློས་གར་ཚོགས་པའི་འགན་འཛིན་ལ་རྩིས་སྤྲོད་གནང་སྟེ། མུ་མཐུད་བཞུགས་སྒར་དུ་མེ་ལྕེ་སྐོར་སྐྱོད་དང་མཚན་རྟགས་བསྡུ་རུབ་ཀྱི་ལས་འགུལ་སྤེལ་རྒྱུ་ཡིན་འདུག
གསར་འགོད་པ། དོན་གོ
