ཟླ་བ་གསུམ་ལྷག་རིང་དང་ཞབས་ཕེབས་མཁན་ཁྱད་ལས་པ་ ༦ ཐོན་འདུག

ཉེ་སྔོན་བཀའ་ཤག་གསར་བའི་ངོས་ནས་བོད་མིའི་དང་བླངས་ཞབས་ཞུའི་ལས་གཞི་གསར་པ་ཞིག་མགོ་འཛུགས་གནང་ཡོད་པ་དང་། ལྷན་ཁང་ཁག་བདུན་ནང་དང་བླངས་ཞབས་ཞུའི་ས་མིག་ ༢༢ གསལ་བསྒྲགས་བསྐྱངས་ཡོད་སྟབས། འདི་གའི་གསར་འགོད་པས་ལས་གཞི་དེའི་འགན་འཛིན་དབུ་དཀར་ཚང་སྐལ་རྡོར་ལགས་སུ་བཅར་འདྲི་ཞུས་ཡོད། 

    དྲི་བ། བཙན་བྱོལ་སྤྱི་ཚོགས་ནང་དང་ཞབས་ལས་གཞི་འདི་གསར་འཛུགས་ཀྱི་ཐོག་མའི་བསམ་བློ་དེ་ཇི་ལྟར་འཁོར་བ་རེད་དམ། 

    ལན། དང་ཞབས་ལས་གཞི་གསར་འཛུགས་ཐད་ཀྱི་ཐོག་མའི་བསམ་འཆར་ནི། ༢༠༠༩ ལོར་ཨ་རིའི་ནེའུ་ཡོག་ཏུ་བོད་པའི་ཁྱད་ལས་པའི་ཚོགས་འདུ་ཞིག་ཚོགས་ཏེ། བྱང་ཨ་རིའི་ནང་ཡོད་པའི་བོད་པའི་ཁྱད་ལས་པ་ ༢༠༠ ལྷག་འདུ་འཛོམས་བྱུང་པ་རེད། དེ་དུས་དང་བླངས་ཞབས་ཞུའི་ལས་གཞིའི་སྐད་ཆ་ཐོག་མར་བྱུང་སོང་། དཔེ་ལེན་ས་ནི་ཨ་རིའི་ནང་ཡོད་པའི་དང་ཞབས་ལས་གཞི་རེད། ད་ལྟའི་ཆར་བཀའ་ཤག་གསར་བའི་ལོ་དང་པོའི་ལས་གཞི་གལ་ཆེ་གྲས་སུ་བཞག་སྟེ་མགོ་བཙུགས་པ་རེད། དམིགས་ཡུལ་ནི་ང་ཚོ་བཙན་བྱོལ་བོད་མི་རྣམས་རྒྱལ་ཁབ་སུམ་ཅུ་སོ་གྲངས་ནང་ཁ་འཐོར་ནས་བསྡད་ཡོད་པ་རེད། སྤྱིར་བཏང་སྒྲིག་འཛུགས་ཨ་མ་དྷ་རམ་ས་ལར་ཡོད་པ་དང་། དེའི་འགན་གཙོ་བོ་དབུས་བོད་མིའི་སྒྲིག་འཛུགས་ཀྱི་ལས་བྱེད་རྣམ་པས་འཁྱེར་གྱི་ཡོད་ཀྱང་། དེ་ལ་བཙན་བྱོལ་སྤྱི་ཚོགས་ནང་ཡོད་པའི་བོད་པའི་ཁྱད་ལས་པ་ཚོས་ཀྱང་སོ་སོའི་ཤེས་ཚད་དང་དཔག་པའི་སྒོ་ནས་དང་བླངས་ཞབས་ཞུ་བསྒྲུབ་ཐུབ་པ་ཡིན་ན། སོ་སོར་མཚོན་ནའང་གོ་སྐབས་ཤིག་རག་པ་རེད་ལ། སྒྲིག་འཛུགས་ལ་མཚོན་ནའང་ལས་དོན་ཞིག་འགྲུབ་འགྲོ་བ་རེད། 

    དྲི་བ། ཁྱོད་ཚོའི་ངོས་ནས་ལས་གཞི་གསར་བ་འདི་ལེགས་འགྲུབ་ཡོང་རྒྱུར་རེ་བ་དང་དམིགས་ཡུལ་ག་འདྲ་ཞིག་རྒྱག་གི་ཡོད།

    ལན། ལས་གཞི་འདི་གལ་ཆེན་རེད་བསམ་གྱི་ཡོད། ད་ལྟའི་ཆར་བོད་སྤྱི་ཚོགས་ནང་ཆེད་ལས་སློབ་སྦྱོང་ཐོན་མཁན་དང་ཤེས་ཡོན་ཅན་གང་འཚམ་ཡོད་པ་རེད། མང་པོ་ཞིག་གིས་བོད་མིའི་སྒྲིག་འཛུགས་ནང་ཕྱག་ལས་གནང་འདོད་ཡོད་ཀྱང་། ཇི་ལྟར་གནང་དགོས་པའི་ལམ་ཁ་རྙེན་གྱི་ཡོད་པ་མ་རེད། དེ་ང་རང་གི་ཉམས་མྱོང་ཐོག་ནས་ཤེས་རྟོགས་བྱུང་། སྔོན་མ་མི་ཁ་ཤས་དྷ་རམ་ས་ལར་སླེབས་རྗེས་ཕྱོགས་གཉིས་ཆའི་ཐོག་ནས་ཡག་པོ་མ་བྱུང་བར་ཕྱིར་ལོག་དགོས་བྱུང་བ་དེ་འདྲ་འདུག ད་ལྟ་ལས་གཞི་གསར་བ་ཡིན་སྟབས་རྒྱ་ཆེ་དྲགས་ན་ལས་ཀ་འཐོར་འགྲོ་བ་རེད། གོམ་པ་དང་པོ་དེ་སྒྲིག་འཛུགས་དང་སློབ་གྲྭ་ཁག་ཅིག་ནང་རྒྱག་ཐུབ་ན་བསམ་གྱི་ཡོད། ཡག་པོ་བྱུང་བ་ཡིན་ན་རིམ་གྱིས་གཞུང་འབྲེལ་མ་ཡིན་པའི་ཚོགས་པ་ཁག་ལའང་དང་ཞབས་པའི་ས་མིག་འབུལ་འཆར་ཡོད། ས་མིག་བཟོ་སྟངས་ཐད་ནས་ཀྱང་ལྷན་ཁང་སོ་སོའི་ངོས་ནས་ལས་གཞི་ག་རེའི་སྟེང་བླངས་པ་དགོས་མིན་ཚུར་རེ་སྐུལ་ཞུས་པ་གཞིར་བཟུང་། ང་ཚོས་དང་ཞབས་པའི་ས་མིག་བཟོས་ཏེ་དྲ་རྒྱའི་ནང་ལྡུག་གི་ཡོད། འདི་ལོར་དང་ཞབས་པ་བདུན་བརྒྱད་ཅིག་བསླེབ་ཐུབ་རྒྱུའི་རེ་བ་རྒྱག་གི་ཡོད།

    དྲི་བ། དང་ཞབས་པའི་འོས་ཆས་ཁྲོད་བོད་རིགས་ཤིག་ཡིན་དགོས་པའི་ཆ་རྐྱེན་བཏོན་འདུག ཁྱོད་ཚོའི་ངོས་ནས་བོད་རིགས་ཡིན་མིན་གྱི་ཚད་ཐིག་དེ་གང་འདྲ་ཞིག་ལ་ངོས་འཛིན་གནང་གི་ཡོད། 

    ལན། ལས་གཞི་འདིའི་མིང་ལ་བོད་མིའི་དང་བླངས་ཞབས་ཞུ་ཞེས་བཏགས་ཡོད་པ་ལྟར་ཆ་རྐྱེན་གསུམ་ཚང་དགོས་པ་རེད། དང་པོ། བོད་རིགས་ཡིན་པ། གཉིས་པ། ཁྱད་ལས་པ་དང་མཐོ་སློབ་འགྲོ་མཁན་ཡིན་པ། གསུམ་པ། དང་བླངས་ཐོག་ཕྱག་ལས་གནང་མཁན་བཅས་རེད། ཕ་མ་གཉིས་ཀྱི་གཅིག་བོད་པ་ཡིན་ནའང་འགྲིག་གི་རེད་ལ། དེ་བཞིན། ༡༩༥༩ ལོའི་ཡར་སྔོན་ནས་རྒྱ་གར་ནང་ཕེབས་མཁན་ཡིན་ནའང་། སོ་སོའི་མི་རྒྱུད་དེ་བོད་པ་ཡིན་པ་ཁུངས་སྐྱེལ་ཐུབ་ན་འགྲིག་གི་རེད། རང་བཙན་ལག་དེབ་དང་སྐྱབས་བཅོལ་ལག་དེབ་ལྟ་བུའི་ཆ་རྐྱེན་གང་ཡང་མེད། སྤྱིར་བཏང་དང་ཞབས་ཀྱི་ཕྱག་ལས་གནང་སྟངས་གསུམ་ཡོད། གཅིག དྷ་རམ་ས་ལར་ཚུར་ཕེབས་ཏེ་དང་ཞབས་ཕྱག་ལས་གནང་རྒྱུ། གཉིས། གཞིས་ཆགས་ཁག་ནང་བསྐྱོད་དེ་དང་ཞབས་ཕྱག་ལས་གནང་རྒྱུ། གསུམ་པ། སོ་སོ་བཞུགས་ཡུལ་རང་ལ་བསྡད་དེ་བརྒྱུད་ལམ་སྣ་ཚོགས་ཐོག་ནས་དང་ཞབས་ཕྱག་ལས་གནང་རྒྱུ་བཅས་རེད། དེ་བཞིན། དང་ཞབས་པར་ཡང་གནས་རིམ་གསུམ་དུ་བགར་ཡོད། གཅིག ད་ལྟ་མཐོ་སློབ་ཏུ་འགྲོ་བཞིན་པ། གཉིས། ཁྱད་ལས་པའི་སློབ་སྦྱོང་ཐོན་མཁན། གསུམ། ཁྱད་ལས་པ་ཡིན་པ་གཞིར་བཞག་ཐོག་ལོ་ ༢༠ ལྷག་གི་ཉམས་མྱོང་ཡོད་པའི་མཁས་དབང་བཅས་ཡིན། 

    དྲི་བ། ཉེ་ཆར་དྲ་རྒྱའི་སྟེང་དང་ཞབས་པའི་ས་མིག་ ༢༡ ཁྱབ་བསྒྲགས་བྱས་པ་ལྟར། ད་ལྟའི་ཆར་ས་མིག་དེ་དག་ནང་དངོས་སུ་ཕྱག་ལས་གནང་བར་ཕེབས་མཁན་ག་ཚོད་བྱུང་ཡོད་དམ།

    ལན། དེ་སྔོན་དྲ་རྒྱའི་ནང་གསལ་བསྒྲགས་བྱས་ཟིན་པའི་ས་མིག་ ༢༡ ཡོད་པའི་ཐོག དྲ་རྒྱའི་ནང་བླུགས་མེད་པར་ཉེ་ཆར་ལྷན་ཁང་ཁག་དང་འབྲེལ་བ་གནང་སྟེ་ཐོན་པའི་ས་མིག་ ༣ ཡོད། ད་ལྟའི་ཆར་གཏན་འཁེལ་ཟིན་པའི་དང་ཞབས་པ་ ༦ སླེབས་སོང་། དང་པོ། ཨ་རི་ནས་ཕེབས་པའི་ཤེས་རབས་མཚོ་མོ་ལགས་ནི་རྩིས་ཀྱི་ཐོག་ཁྱད་ལས་སློབ་སྦྱོང་ཐོན་མཁན་རེད། ཁོ་མོས་ཟླ་ ༣ རིང་རྩིས་ཞིབ་ལས་ཁུངས་ནང་དང་ཞབས་ཞུས་ཏེ་ཕྱིར་ཕེབས་ཚར་བ་རེད། གཉིས་པ། དབྱིན་ཡུལ་ལོན་ཌོན་ནས་སླེབས་པའི་ཁའེ་རའོ་ལིན་བློ་བཟང་ལགས་ནི་ཁྲིམས་ལུགས་ཐོག་ཁྱད་ལས་སློབ་སྦྱོང་ཐོན་མཁན་རེད། ཁོང་གི་ཕ་བོད་པ་དང་མ་དབྱིན་ཇི་རེད། ཁོང་གིས་སྐུ་སྒེར་ཡིག་ཚང་དུ་ལས་གཞི་འདྲ་མིན་ཐད་འཆར་འགོད་འབྲི་བཞིན་ཡོད་ལ། ད་ལྟ་ཕྱག་ལས་མགོ་བཙུགས་ནས་ཟླ་ ༡ ལྷག་འགྲོ་བཞིན་ཡོད། གསུམ་པ། ཨ་རིའི་བྷོ་སི་ཊོན་དུ་གནས་བཞུགས་བསྟན་འཛིན་སྙིང་རྗེ་ལགས་རེད། དྲ་རྒྱའི་བདེ་འཇགས་སྲུང་སྐྱོབ་ཐད་ཁྱད་ལས་སློབ་སྦྱོང་ཐོན་མཁན་རེད། ཁོང་དྷ་རམ་ས་ལར་དངོས་སུ་ཕེབས་ཡོད་པ་མ་རེད། དྲ་ལམ་དང་ཁ་པར་བརྒྱུད་བདུན་ཕྲག་རེའི་ནང་ཆུ་ཚོད་ ༢༠ རིང་བོད་གཞུང་གློག་ཀླད་སྡེ་ཚན་ལ་དང་ཞབས་གནང་མགོ་བཙུགས་ཏེ་ཟླ་ ༡ ཙམ་འགྲོ་བཞིན་ཡོད། བཞི་བ། བལ་ཡུལ་སྦོག་ར་གཞིས་ཆགས་ནས་ཡིན་པའི་བསྟན་འཛིན་འཇིགས་མེད་ལགས་རེད། དབང་བོ་སྐྱོན་ཅན་གྱི་སྨན་བཅོས་ཐོག་ཁྱད་ལས་སློབ་སྦྱོང་ཐོན་མཁན་རེད། ཁོང་གིས་མོན་གྷོ་ཊི་བོད་མིའི་འཕྲོད་བསྟེན་སྨན་ཁང་ནང་ཟླ་ ༣ རིང་དང་ཞབས་གནང་བཞིན་ཡོད་པ་རེད། ལྔ་བ། ཁེ་ན་ཊ་ནས་ཡིན་པའི་ཧྥེ་ནའེ་བྷོ་ཞི་ལགས་རེད། ད་ལྟ་མཐོ་སློབ་འགྲིམ་བཞིན་པ་ཞིག་རེད། ཕྱི་ཟླ་ ༨ མཇུག་ཙམ་ལ་ཕྱི་དྲིལ་ལས་ཁུངས་ནང་ཕེབས་ཏེ་ཟླ་ ༤ རིང་འགྲོ་བ་མིའི་ཐོབ་ཐང་ཐོག་ཉམས་ཞིབ་གནང་རྒྱུ་རེད། ཁོང་མོ་འདི་ལོའི་དང་ཞབས་པའི་ཁྲོད་ཀྱི་ལོ་ཆུང་ཤོས་ཆགས་འདུག དྲུག་པ། ༸གོང་ས་མཆོག་གི་སྐུའི་གསུང་བསྒྱུར་མཁས་དབང་ཐུབ་བསྟན་སྦྱིན་པ་ལགས་རེད། ཁོང་ང་ཚོས་གདན་ཞུ་ལྟར་ཤེས་རིག་ལས་ཁུངས་སུ་ལས་གཞི་གསར་བ་ཞིག་ཡོད་པ་དེར་སློབ་སྟོན་གྱི་ཕྱག་ལས་གནང་གི་ཡོད། ཁོང་དྷ་རམ་ས་ལར་ཕེབས་ཡོད་པ་མ་རེད། སོ་སོའི་བཞུགས་ཡུལ་རང་དུ་སློབ་སྟོན་ཕྱག་ནས་གནང་གི་ཡོད། དེ་མིན། ཉེ་སྔོན་ཨ་རིའི་བོད་རིགས་གཞོན་སྐྱེས་བརྙན་སྦྱོར་ཐོག་ཁྱད་ལས་སློབ་སྦྱོང་ཐོན་མཁན་ཞིག་གིས་ཀྱང་། ཕྱི་ཟླ་ ༡༠ ནང་ཕྱི་དྲིལ་ལས་ཁུངས་ཀྱི་བོད་པའི་དྲ་བརྙན་ཐོག་ཕྱག་ལས་གནང་རྒྱུ་ཕལ་ཆེར་གཏན་ཁེལ་སོང་།

    དྲི་བ། དང་ཞབས་ཕྱག་ལས་གནང་བར་ཕེབས་མཁན་རྣམས་ཀྱིས་ལས་གཞི་འདི་ཤེས་རྟོག་ཅི་ལྟར་བྱུང་འདུག 

ལན། ཁྱད་ལས་མཁས་དབང་གནས་རིམ་རྣམས་ལ། ང་ཚོའི་སྔོན་མའི་འཆར་གཞི་གཞིར་བཟུང་ཕར་འབྲེལ་བ་ཞུས་པ་ཡིན། དེ་མིན་གཞན་པའི་ཁྱད་ལས་དང་ཞབས་པ་ཁ་ཤས་ཀྱིས་དྲ་རྒྱའི་ཐོག་མཐོང་སྟེ་ཚུར་འབྲེལ་བ་གནང་མཁན་དང་། ཡང་ཁ་ཤས་ཤིག་ང་རང་ཉེ་ཆར་ཨ་རི་དང་ཁེ་ན་ཊའི་ས་གནས་ཁག་བདུན་ནང་ཕྱིན་སྐབས། དང་ཞབས་ལས་གཞིའི་སྐོར་ངོ་སྤྲོད་གནང་བ་བཅས་ལ་བརྟེན་ནས་ཚུར་འབྲེལ་བ་ཞུ་མཁན་སོགས་རེད། ལས་གཞི་འདི་ཤེས་རྟོགས་ཡོང་རྒྱུའི་ཐད་རིམ་གྱིས་ལམ་ཁ་མང་པོ་ཞིག་ཆགས་ཡོང་གི་རེད་བསམ། ད་ལྟ་དང་ཞབས་གནང་བཞིན་པ་རྣམས་ཕར་ལོག་རྗེས། ཁོང་ཚོ་བརྒྱུད་དེ་སྤྱི་ཚོགས་ནང་ཁྱབ་བསྒྲགས་འགྲོ་ངེས་རེད། མ་འོངས་པར་ལས་གཞི་འདི་ཁྱབ་བསྒྲགས་ཀྱི་བརྒྱུད་ལམ་ཡག་ཤོས་ནི་དང་ཞབས་པ་རྣམས་ཆགས་རྒྱུ་རེད་བསམ།

    དྲི་བ། དང་ཞབས་ལས་གཞི་འདི་ཁྱབ་བརྡལ་ཡོང་ཐབས་ཐད་ཁྱེད་ཚོའི་ངོས་ནས་ཁྱབ་བསྒྲགས་ཀྱི་ལས་འཆར་ག་རེ་གནང་རྩིས་ཡོད།

    ལན། མ་འོངས་པར་བཀའ་ཤག་གི་ངོས་ནས་བོད་པའི་ཆེད་ལས་ཚོགས་འདུ་ཁག་གསུམ་འཚོགས་རྒྱུ་རེད། བྱང་ཨ་རིར་ཡོད་པའི་བོད་པའི་ཁྱད་ལས་པའི་ཚོགས་འདུ་དང་། ཡུ་རོབ་ཁུལ་དུ་ཡོད་པའི་བོད་པའི་ཁྱད་ལས་པའི་ཚོགས་འདུ། རྒྱ་གར་ནང་ཡོད་པའི་བོད་པའི་ཁྱད་ལས་པའི་ཚོགས་འདུ་བཅས་འཚོགས་རྒྱུ་རེད། ཚོགས་འདུའི་ཐོག་དང་ཞབས་ལས་གཞི་ཁྱབ་བསྒྲགས་བྱ་རྒྱུའི་འཆར་གཞི་ཡོད། དེ་མིན། ང་ཚོའི་སྤྱི་ཚོགས་ནང་མཐོང་དང་སྐད་གྲགས་ཡོད་པའི་མི་རྒན་པ་ཚོའི་ངོས་ནས་སྐར་ཆ་ ༣༠ རེའི་ནང་ལས་གཞི་འདིའི་ནང་མཉམ་ཞུགས་ཡོང་རྒྱུར་སྐུལ་འདེད་ཀྱི་བཀའ་སློབ་གསུང་བཤད་ཀྱི་བརྙན་རིས་ཕྱོགས་བསྒྲིགས་བྱས་ཏེ། དང་ཞབས་ལས་གཞིའི་དྲ་རྒྱ་དང་བོད་གཞུང་དྲ་བརྙན། བོད་གཞུང་དྲ་རྒྱ་སོགས་ཀྱི་སྟེང་བཞག་སྟེ་སྤྱི་ཚོགས་ནང་ཁྱབ་བསྒྲགས་ཡོང་ཐབས་དང་། ཁྱབ་བསྒྲགས་སྐོར་གྱི་དེབ་སོགས་འདོན་རྒྱུའི་བསམ་བློ་གཏོང་གི་ཡོད། ཡིན་ནའང་། དེ་དག་ད་ལྟ་གཞི་ནས་འཆར་གཞི་བསྒྲིག་རྒྱུའི་རིགས་ཡིན། 

    དྲི་བ། འདིར་ཕེབས་མཁན་དང་ཞབས་པ་རྣམས་ལ་དབུས་བོད་མིའི་སྒྲིག་འཛུགས་ཀྱི་ངོས་ནས་མཐུན་འགྱུར་ག་རེ་ཞུ་བཞིན་ཡོད། 

    ལན། ང་ཚོའི་སྒྲིག་འཛུགས་ཀྱི་ངོས་ནས་དང་ཞབས་གྲས་ནས་བཞུགས་ས་མེད་མཁན་ཚོར་བཞུགས་ས་དང་། འདིར་ཕྱག་ལས་གནང་བའི་རིང་ཟླ་རེར་ལག་དངུལ་ཨ་སྒོར་ ༡༠༠ འབུལ་རྒྱུར་གྲ་སྒྲིག་བྱེད་ཀྱི་ཡོད། དེ་བཞིན། ལྷན་ཁང་ཁག་སོ་སོ་ནས་དང་ཞབས་སྐབས་ཕྱག་ལས་དང་འབྲེལ་བའི་འགྲོ་བསྐྱོད་ཐད་མཐུན་འགྱུར་གནང་གི་རེད། ཡིན་ནའང་། དང་ཞབས་པ་རྣམས་འདིར་ཕེབས་རྗེས་ཞོགས་པའི་ཆུ་ཚོད་ ༩ ནས་ཕྱི་དྲོ་ཆུ་ཚོད་ ༥ བར་ཕྱག་ལས་གནང་དགོས་པ་མ་ཟད། དང་ཞབས་ཀྱི་དུས་ཡུན་ནང་དབུས་བོད་མིའི་སྒྲིག་འཛུགས་ཀྱི་ལས་བྱེད་སྒྲིག་གཞི་ཆ་ཚང་འཁུར་དགོས་པ་རེད།

    དྲི་བ། དང་ཞབས་པ་དང་ལྷན་ཁང་ཁག་བར་ལས་ཀ་ཏག་ཏག་འགྲོ་ཐུབ་ཀྱིན་ཡོད་མིན་ཐད། ཁྱོད་ཚོའི་ངོས་ནས་ལྟ་རྟོག་ཅི་ལྟར་གནང་གི་ཡོད།

    ལན། སྤྱིར་འདི་དང་བླངས་ལས་གཞི་རེད། ཡིན་ནའང་། ང་ཚོས་དང་ཞབས་གནང་སྟངས་དེ་ལས་བྱེད་ནང་བཞིན་བྱེད་ཀྱིན་ཡོད། དང་ཐོག་ང་ཚོ་དང་བླངས་ལས་གཞི་གོ་སྒྲིག་ཚོགས་ཆུང་དང་ལྷན་ཁང་ཁག དང་ཞབས་པ་བཅས་ཀྱི་བར། ཕྱག་ལས་ག་དུས་མགོ་བཙུགས་ཏེ་དུས་ཡུན་ཅི་ཙམ་རིང་གནང་རྒྱུ་བཅས་ཀྱི་ཐད་གན་རྒྱ་བཞག་སྟེ་ས་རྟགས་བརྒྱབ་རྗེས། ངོ་བཤུས་གསུམ་བཟོས་ཏེ་དང་ཞབས་སྒེར་དང་ཕྱག་ལས་གནང་ཡུལ་ལྷན་ཁང་། ང་ཚོ་དང་ཞབས་ལས་གཞི་གོ་སྒྲིག་ཚོགས་ཆུང་བཅས་ནས་གཅིག་རེ་ཉར་བཞིན་ཡོད། དེ་བཞིན། དང་ཞབས་ཕྱག་ལས་གནང་བཞིན་པའི་དུས་སྐབས་སུ། ཉིན་ ༡༥ རེའི་རྗེས་སུ་ང་ཚོའི་ངོས་ནས་དང་ཞབས་པ་སྒེར་དང་ལྷན་ཁང་ཁག་གི་འགན་འཛིན་བཅས་སོ་སོར་ལོགས་སུ་ཐུག་འཕྲད་ཀྱིས། གན་རྒྱ་གཞིར་བཟུང་དང་ཞབས་པར་ལས་ཀ་ཏག་ཏག་སྤྲོད་ཀྱི་ཡོད་མེད་དང་། དང་ཞབས་པའི་ངོས་ནས་ལས་ཀ་སྒྲུབ་སྟངས་ག་འདྲ་ཡོད་མེད་སྐོར་ལ་བསམ་ཚུལ་བསྡུ་བཞིན་ཡོད། དང་ཞབས་དུས་ཡུན་རྫོགས་རྗེས་སླར་ཡང་དང་ཞབས་པ་སྒེར་དང་ལྷན་ཁང་འགན་འཛིན་གཉིས་སོ་སོར་ལོགས་སུ་ཐུག་འཕྲད་དང་། དེ་ནས་ཕྱོགས་གསུམ་ཆ་མཉམ་འཛོམས་ཐོག་བསམ་ཚུལ་བརྗེ་རེས་གནང་རྗེས། དང་ཞབས་པ་སྒེར་དང་ལྷན་ཁང་སོ་སོར་དྲི་བ་ ༡༥ ཙམ་ཡོད་པའི་བསམ་ཚུལ་འགངས་ཤོག་རེ་བསྐངས་བཅུག་སྟེ། དང་ཞབས་པའི་ཉམས་མྱོང་དང་ལྷན་ཁང་གི་བསམ་ཚུལ་སོགས་བསྡུ་ལེན་གྱིས་དང་ཞབས་ལས་གཞི་ཡར་རྒྱས་ཚགས་ཚུད་ཡོང་ཐབས་གནང་གི་ཡོད། 

    དྲི་བ། འདིར་ཕེབས་མཁན་དང་ཞབས་པ་དག་གི་ངོས་ནས་སོ་སོའི་ཁྱད་ལས་དང་འབྲེལ་བའི་ཐོག་ནས། ལྷན་ཁང་ཁག་གི་འབྲེལ་ཡོད་ལས་བྱེད་ཚོར་ཟབ་སྦྱོང་རིགས་གོ་སྒྲིག་གནང་གི་ཡོད་དམ།  

    ལན། ང་ཚོས་ལས་གཞི་འདི་སྤེལ་དགོས་པའི་དམིགས་ཡུལ་གཅིག་ཀྱང་དེ་རེད། ཕྱི་ལོགས་ནས་ཕེབས་མཁན་ཚོའི་བསམ་བློ་གཏོང་སྟངས་དང་ཕྱག་ལས་གནང་སྟངས་མ་འདྲ་བ་ཡོད་སྟབས། དང་ཞབས་ཕེབས་མཁན་དང་འདི་གར་བཞུགས་མཁན་ལས་བྱེད་གཉིས་མཉམ་དུ་ཕྱག་ལས་གནང་བའི་བརྒྱུད་རིམ་ཁྲོད། ཕན་ཚུན་ཉམས་མྱོང་དང་ཤེས་བྱ་བརྗེ་རེས་ཏན་ཏན་ཡོང་གི་རེད། དཔེར་ན། ཤེས་རབ་མཚོ་མོ་ལགས་ཀྱིས་འདིར་དང་ཞབས་གནང་བའི་སྐབས་ཀྱང་། ཨ་རིའི་ནང་རྩིས་ཉར་སྟངས་དང་འགྲོ་སྟངས་ཐད་ཟབ་སྦྱོང་དང་སྦྱོང་བརྡར་སྤྲད་པ་རེད། དེ་བཞིན། ཁོ་མོའི་ངོས་ནས་ཀྱང་ང་ཚོ་བཙན་བྱོལ་སྒྲིག་འཛུགས་ཀྱི་རྩིས་ཁྲ་ཉར་སྟངས་རྒྱུས་ལོན་བྱུང་ཡོད། མ་འོངས་པར་དང་ཞབས་པ་དང་ང་ཚོའི་ལས་བྱེད་ཕྱོགས་གཉིས་ཆར་ཕན་ཐོགས་ཡོང་གི་རེད་བསམ། 

    དྲི་བ། དང་ཞབས་དྲ་རྒྱའི་སྟེང་ཐོ་འགོད་གནང་མཁན་ཚོགས་མི་ ༣༠༠ ལྷག་འདུག ཁོ་ཚོ་ནི་དང་ཞབས་ལས་གཞི་འདི་དང་འབྲེལ་བ་ག་རེ་ཆགས་ཀྱི་ཡོད་དམ།  

    ལན། ང་ཚོའི་དམིགས་ཡུལ་ནི་བོད་པའི་སྤྱི་ཚོགས་ནང་མཐོ་སློབ་ཐོན་མཁན་དང་། བོད་པའི་ཁྱད་ལས་པ་གང་མང་ཞིག་ང་ཚོའི་དང་ཞབས་དྲ་རྒྱའི་སྟེང་བསྡུ་རུབ་ཐུབ་པ་ཡིན་ན། དང་ཞབས་ལས་གཞི་འདི་ལ་ཕན་ཐོགས་ཡོད་པ་གཞིར་བཞག་ཐོག བོད་པའི་སྤྱི་ཚོགས་ནང་ཆེད་ལས་པ་དང་མཐོ་སློབ་ཐོན་མཁན་ག་ཚོད་ཡོད་མེད་དང་གང་དུ་བཞུགས་མིན་གསལ་བོ་ངོ་འཕྲོད་ཐུབ་པ་མ་ཟད། རྗེས་ཕྱོགས་ལས་གཞི་ག་འདྲ་ཞིག་སྤེལ་ཀྱང་ཕན་ཐོགས་ཆེན་པོ་ཡོང་གི་རེད། ང་ཚོས་མུ་མཐུད་དྲ་རྒྱའི་སྒྲིག་འགོད་ཡར་རྒྱས་གཏོང་གི་ཡོད། ད་ལྟའི་ཆར་དྲ་རྒྱའི་ནང་ཐོ་འགོད་བྱས་ཡོད་པའི་ཆེད་ལས་པ་དང་མཐོ་སློབ་པ་རྣམས་ཀྱི་མིང་དང་སྡོད་གནས། ལས་རིགས་བཅས་འཚོལ་བཤེར་བྱེད་ཐུབ་ཀྱི་ཡོད། མ་འོངས་པར་ཐོ་འགོད་བྱེད་མཁན་བོད་པའི་ཁྱད་ལས་པ་དང་མཐོ་སློབ་པ་མང་པོ་སླེབས་པ་ཡིན་ན། བོད་པའི་གཞུང་སྒེར་ལས་ཁུངས་གང་རུང་ཞིག་ལ་ཁྱད་ལས་པ་གང་རུང་ཞིག་དགོས་མཁོ་བྱུང་ཚེ། དང་ཞབས་དྲ་རྒྱ་བརྒྱུད་སོ་སོར་མཁོ་བའི་ཁྱད་ལས་མི་སྣར་བཙལ་ཏེ་ཐད་ཀར་ཕན་ཚུན་འབྲེལ་བ་གནང་ཐུབ་རྒྱུར་སྟབས་བདེ་ཡོང་བར་ཕན་གྱི་རེད། 

གསར་འགོད་པ། ཚེ་རིང་རྒྱལ།

༼ བོད་ཀྱི་དུས་བབ་ཚགས་པར་ལས་འདིར་བདམས་བཀོད་བྱས། ༽