དེ་རིང་ཕྱི་དྲོ་བཞུགས་སྒར་བོད་ཀྱི་འགྲེམས་སྟོན་ཁང་ནང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རང་ལུས་མེར་བསྲེགས་སྐོར་གྱི་གློག་བརྙན་ཞིག་གཟིགས་འབུལ་གནང་སོང་།
དེ་རིང་ཕྱི་ཚེས་ ༡༢ ཉིན་གྱི་ཕྱི་དྲོ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བཞུགས་སྒར་བོད་ཀྱི་འགྲེམས་སྟོན་ཁང་དུ། རྒྱ་གར་དང་བོད་པའི་གསར་འགོད་པ་རྣམས་གཙོས་ཕྱི་རྒྱལ་བ་དང་བོད་མི་མང་ཚོགས་བཅས་ལ། Beyond the Numbers ཞེས་པའི་སྐར་མ་ ༢༦ ཅན་གྱི་གློག་བརྙན་ཞིག་གཟིགས་འབུལ་གནང་སོང་ལ། གློག་བརྙན་དེའི་ནང་བོད་ནང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་དེ་སྔའི་མི་ཚེ་ལོ་རྒྱུས་དང་། ནམ་རྒྱུན་ཁོང་རྣམས་པའི་དགོངས་པ་བཞེས་སྟངས་དང་བོད་དོན་ཐད་ཀྱི་ཐུགས་རེ་སོགས་འབྲེལ་ཡོད་ལ་བཅར་འདྲི་བརྒྱུད་འགྲེལ་བརྗོད་གནང་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ་གློག་བརྙན་དེ་བཟོ་དགོས་པའི་དམིགས་ཡུལ་སྐོར་དྲིས་པར། ཁོ་མོས་ “ང་ཚོས་འདི་འདྲ་ཞིག་བཟོ་དགོས་དོན་ནི། བོད་ནང་རང་ལུས་མེར་བསྲེགས་གནང་སྟེ་མི་མང་པོ་ཞིག་སྐུ་གྲོངས་ཡོང་དུས། ང་ཚོ་ཕྱི་ལ་ཡོད་པའི་བོད་མི་ཚོའི་ངོས་ནས་གྲངས་ཀ་ཙམ་ཞིག་རྩིས་ནས་སྡོད་རྒྱུའི་ངོ་བོར་མི་འགྱུར་པར། རྒྱལ་གཅེས་དཔའ་བོ་གྲྭ་བྷེ་ལགས་ཨང་གྲངས་དང་པོ་ནས་རྩིས་ཏེ་པང་རིམ་ལྟར་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རེ་རེར་ཨང་གྲངས་རེ་ཡོད་པ་ལྟར། ཨང་གྲངས་དེ་དག་དམིགས་སུ་བཏོན་པའི་ཐོག་ནས་རྒྱལ་གཅེས་དཔའ་བོ་དཔའ་མོ་སུ་སུ་ཡིན་མིན་སྤྱི་ཚོགས་ཁྲོད་ངོས་འཛིན་དང་། ཁོང་རྣམས་སྐུ་མ་གྲོངས་སྔོན་གྱི་ལོ་རྒྱུས་དང་ཁོང་ཚོའི་ནམ་རྒྱུན་གྱི་དགོངས་པ་བཞེས་ཕྱོགས། ཁོང་ཚོའི་རེ་བ་དང་དམིགས་ཡུལ་སོགས་ཤེས་རྟོགས་ཆེད། རྒྱལ་གཅེས་དཔའ་བོ་དཔའ་མོ་ཁོང་ཚོའི་གཉེན་ཉེ་འབྲེལ་མི་སྣར་བཅར་འདྲི་བརྒྱུད་གློག་བརྙན་དེ་སྒྲིག་བཟོ་བྱས་ཡོད་ལ། དམིགས་ཡུལ་གཙོ་བོ་ནི་སྤྱི་ཚོགས་ཁྲོད་རྒྱལ་གཅེས་དཔའ་བོ་དཔའ་མོ་ཁོང་རྣམ་པའི་གནས་ཚུལ་ཤེས་རྟོགས་དང་། ལྷག་པར་དུ་བོད་དོན་སྐོར་གྱི་གནས་ཚུལ་གང་ཡང་མི་ཤེས་མཁན་ཕྱི་རྒྱལ་པ་རྣམས་ཀྱིས་བལྟས་པ་ཡིན་ནའང་། མང་པོ་འགྲེལ་བཤད་རྒྱག་མ་དགོས་པའི་ཐོག་ནས་བོད་ནང་གི་ཛ་དྲག་གནས་སྟངས་རྣམས་ཤེས་ཐུབ་པ་བཅས་ལ་དམིགས་ཏེ་བཟོས་ཡོད།” ཅེས་བརྗོད་བྱུང་།
གློག་བརྙན་དེའི་ནང་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་གཉེན་ཉེ་འབྲེལ་ཡིན་པའི་བཙན་བྱོལ་བོད་མི་སྐོར་ཞིག་ལ་བཅར་འདྲི་གནང་འདུག་ལ། དེ་དག་ཁྲོད་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་དང་ཕ་མ་སྤུན་མཆེད་ཡིན་པའི་ཤ་ཉེ་དང་ཨ་ཁུ། ཚ་བོ་ཚ་མོ་བཅས་འདུས་ཡོད་པ་རེད།
ཚེ་རིང་མཚོ་མོ་ལགས་སུ་བཅར་འདྲི་གནང་ཡུལ་ཉེ་འབྲེལ་ཚོར་སེམས་ཚོར་ཅི་ཞིག་ཡོང་བཞིན་ཡོད་མེད་དྲིས་པར། ཁོ་མོས་བཙན་བྱོལ་ནང་ཡོད་པའི་གཉེན་ཉེ་འབྲེལ་དག་གི་ངོས་ནས་ཕྱོགས་གཅིག་ནས་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་ཁོང་རྣམ་པའི་སྙིང་སྟོབས་དང་རླབས་ཆེན་གྱི་བློས་གཏོང་ལ་ཡི་རངས་གུས་བརྩི་གནང་བཞིན་འདུག་ལ། ཡང་ཕྱོགས་གཞན་ཞིག་ནས་སོ་སོའི་ཤ་ཉེ་སྤུན་མཆེད་ཀྱིས་རང་ལུས་མེར་བསྲེགས་བཏང་སྟེ་སྐུ་གྲོངས་པ་དང་། ལྷག་པར་དུ་རྒྱལ་གཅེས་དཔའ་བོ་དཔའ་མོ་ཕལ་ཆེ་བ་ནི་དགུང་ལོ་གཞོན་གཞོན་ཆགས་ཡོད་སྟབས། སེམས་པར་ཕངས་སེམས་ཆེན་པོ་དང་སྐྱོ་ཚོར་དྲག་པོས་མནར་བཞིན་ཡོད་སྐོར་བརྗོད་སོང་།
གཞན་ཡང་། དགོང་དྲོའི་ཆུ་ཚོད་ ༧ པ་ཙམ་ལ་མོག་གྷན་ཉི་མ་སློབ་གྲྭའི་ནང་། བློ་བཟང་དབང་རྒྱལ་ལགས་ཀྱིས་གོ་སྒྲིག་འོག ༼བོད་ཀྱི་ཆེད་དུ་གླུ་ལེན༽ཞེས་པའི་མྱ་ངན་གྱི་གླུ་གཞས་གཏོང་བའི་ལས་འགུལ་ཞིག་སྤེལ་སོང་ལ། བློ་བཟང་དབང་རྒྱལ་ལགས་ཀྱིས་བརྗོད་ན་དེ་ཁོས་གོ་སྒྲིག་བྱས་པའི་མྱ་ངན་གླུ་གཞས་ལས་འགུལ་ཐེངས་གསུམ་པ་ཆགས་ཡོད་པ་དང་། བོད་ནང་ཛ་དྲག་གནས་སྟངས་ཆགས་བཞིན་པའི་སྐབས་འདིར་རྣམ་པ་འདྲ་མིན་གྱི་ཐོག་ནས་ལས་འགུལ་སྤེལ་ཏེ། བོད་ནང་གི་བོད་མིར་གདུང་སེམས་མཉམ་སྐྱེད་དང་ཕྱི་ཕྱོགས་སུ་བོད་དོན་དྲིལ་བསྒྲགས་བྱེད་དགོས་སྐོར་བརྗོད་སོང་།
མྱ་ངན་གླུ་གཞས་གཏོང་བའི་ལས་འགུལ་དེར་རྒྱ་གར་གྱི་རོལ་མོ་རམ་དཀྲོལ་རུ་ཁག་གཅིག་དང་། དྷ་སར་གནས་སྡོད་ཕྱི་རྒྱལ་ལུང་པ་འདྲ་མིན་གྱི་གླུ་ལེན་པ་ཁག་ཅིག་མཉམ་རུབ་ཐོག རང་དབང་འཐབ་རྩོད་ཀྱི་དབྱིན་ཇིའི་སྐད་ཀྱི་གླུ་གཞས་ཁག་ཅིག་དང་། དེ་བཞིན། བདེན་ཚིག་སྨོན་ལམ་གྱེར་འདོན། གཞིས་བཞུགས་གླུ་བ་ཤེར་བསྟན་གྱི་མཐུན་སྒྲིལ་ཞེས་པའི་གླུ་གཞས་སོགས་བླངས་ཤིང་། བོད་པ་དང་རྒྱ་གར་བ། ཕྱི་རྒྱལ་བ་སོགས་མི་གྲངས་བརྒྱ་སྐོར་ཙམ་མཉམ་ཞུགས་གནང་སྟེ་ཞག་སྒྲོན་མཆོད་འབུལ་བཅས་གནང་སོང་།
གསར་འགོད་པ། ཚེ་རིང་རྒྱལ།
