རྒྱ་ནག་གཞུང་གིས་ཁམས་དཀར་མཛེས་ལམ་བྲག་དགོན་པའི་བཙུན་མ་ཞིག་ལ་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
རྒྱ་གཞུང་གིས་སྔར་ལོའི་ཕྱི་ཟླ་ ༦ པའི་ནང་ཁམས་དཀར་མཛེས་ལམ་བྲག་དགོན་པའི་བཙུན་མ་སྨན་པ་འཆི་མེད་ལགས་ཆབ་སྲིད་ཀྱི་དོགས་གཞིའི་འོག་དགོན་པ་ནས་འཛིན་བཟུང་བཙན་འཁྲིད་བྱས་ཏེ། ལོ་ ༡ ལྷག་གི་རིང་ནང་མི་གཉེན་འབྲེལ་ཚོས་ཁོང་འཛིན་བཟུང་བྱེད་དོན་དང་གར་ཡོད་ཀྱི་གནས་ཚུལ་ཅི་ཡང་མ་ཤེས་པར་ལྷག་ཡོད་པ་དང་། ཕྱིས་སུ་དར་རྩེ་མདོ་བཙོན་ཁང་ནས་ཀློད་གྲོལ་ཐོབ་པའི་བཙོན་པ་ཞིག་བརྒྱུད་བཙུན་མ་ཁོང་དར་རྩེ་མདོ་རུ་བཙོན་འཇུག་བཀག་ཉར་བྱས་ཡོད་པ་ཤེས་ཡོད་ཀྱང་། ཉེ་ཆར་དར་རྩེ་མདོ་ནས་རྒྱ་ནག་གཞུང་གི་འབྲེལ་ཡོད་ལས་བྱེད་ཅིག་བརྒྱུད་ཨ་ནེ་འཆི་མེད་ལགས་ལ་རྒྱ་གཞུང་གིས་གསང་བའི་ཐོག་ལོ་ ༣ གྱི་དུས་བཀག་བཙོན་འཇུག་ཁྲིམས་ཐག་བཅད་ཡོད་པ་ཤེས་ཡོད་སྐོར་བོད་ནས་འབྲེལ་ཡོད་མི་སྣ་ཞིག་གིས་ཨེ་ཤ་ཡ་རང་དབང་རླུང་འཕྲིན་ཁང་ལ་བརྗོད་ཡོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ཨ་ནེ་འཆི་མེད་ལགས་ཕྱི་ལོ་ ༢༠༡༡ ལོའི་ཕྱི་ཟླ་ ༦ པའི་ནང་རྒྱ་གཞུང་གིས་འཛིན་བཟུང་བཙོན་འཇུག་བྱས་རྗེས། ཁོང་གིས་སྨན་བཅོས་བྱེད་བཞིན་པའི་བོད་མི་མང་པོ་ཞིག་ལ་དཀའ་ངལ་འཕྲད་ཡོད་པ་མ་ཟད། ནད་པ་མང་པོ་མང་པོ་ཞིག་གིས་ཁོང་གི་ཆེད་བསྔོ་བ་སྨོན་ལམ་གསུང་ཡོད་འདུག་ལ། ཉེ་ཆར་བཙོན་འཇུག་ཁྲིམས་ཐག་བཅད་རྗེས་ཁོང་གི་ནང་མི་གཉེན་འབྲེལ་ཚོས་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གསར་འགོད་པ། དོན་གོ
