དེ་
བཀའ་
ད་ལོ་ཁོང་དགུང་གྲངས་ ༧༧ ལ་ཕེབས་ཡོད་པ་དང་། ཤུལ་དུ་བུ་མོ་གསུམ་དང་སྐུ་ཟླ་བཅས་ཡོད་འདུག ཁོང་སྐུ་གཤེགས་པའི་གནས་ཚུལ་དེ་བྱུང་རྗེས་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་གཙོས་པའི་གནད་ཡོད་མི་སྣ་རྣམས་འདས་པོའི་སྐུ་ཕུང་ལ་མཇལ་དར་སྒྲོན་འབུལ་དུ་བཅར་ཡོད་འདུག
བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་ནི་ ༡༩༣༥ ལོར་ཡབ་སྟག་ར་གཤིས་ཀྱི་མཛེས་བཅུ་དཔོན་ཀུན་བཟང་ཚེ་བརྟན་དང་། ཡུམ་ཨ་ཡག་ལྷ་མོ་གཉིས་སུ་སྲས་སུ་ཁམས་ཆབ་མདོ་རི་ཐུང་དུ་ཡུམ་ཨ་ཡག་གི་ནང་ཁྱིམ་ཆབ་མདོ་ཚང་དུ་སྐུ་འཁྲུངས་ཤིང་། རང་ལོ་ ༧ ལ་སོན་སྐབས་བོད་ཡིག་འབྲི་ཀློག་སློབ་མགོ་བཙུགས་ཤིང་། རང་ལོ་ ༡༢ ལ་ཕེབས་སྐབས་བྲག་གཡབ་རྟག་ར་གཤེས་རང་ཁྱིམ་མཛེས་བཅུ་ཚང་དུ་ཕྱིར་ཕེབས་ཏེ། བོད་ཡིག་སློབ་སྦྱོང་མཇུག་སྐྱོང་དང་། རང་ལོ་ ༡༦ ཐོག་བྲག་གཡབ་བླ་བྲང་གི་རྩེ་སྐོར་གྱི་མགྲོན་ལས་སུ་བསྐོ་བཞག་གནང་ཡོད་འདུག ༡༩༥༣ ལོའི་མཇུག་ཏུ་བྲག་གཡབ་འདབས་མགོན་རིན་པོ་ཆེ་ལྷ་སར་ཆོས་ཞུགས་ཆིབས་བསྒྱུར་སྐབས་ཆིབས་ཞབས་སུ་བཅར་ཏེ། མཉེས་ཐང་བདེ་བ་ཅན་ནམ་ར་སྟོད་གྲྭ་ཚང་དུ་ཆོས་སྒོར་ཞུགས་ཏེ་ ༡༩༥༩ ལོའི་ཕྱི་ཟླ་ ༣ ཚེས་ ༡༠ ཉིན་བོད་ནས་རྒྱ་གར་དུ་བཙན་བྱོལ་ལ་མ་ཕེབས་བར་མཚན་ཉིད་ཀྱི་གཞུང་ལ་ཐོས་བསམ་གནང་ཡོད་འདུག
༡༩༦༠ ལོར་རྒྱ་གར་བྱང་རྒྱུད་ཝ་ར་ཎ་སི་ལེགས་སྦྱར་མཐོ་རིམ་སློབ་གྲྭར་ལོ་ ༣ རིང་ལེགས་སྦྱར་སྐད་ཡིག་སློབ་སྦྱོང་གནང་ཡོད་པ་དང་། ༡༩༦༣ ལོར་བོད་གཞུང་ཆོས་དོན་ལས་ཁུངས་ཀྱི་བཀའ་འབྲེལ་འོག་ཝ་ར་ཎ་སི་ཧིན་རྡུའི་སློབ་གཉེར་ཁང་(Banaras Hindu University)དུ་ནང་པའི་སྐུ་ཟོར་འགྲེལ་བཤད་ཧིན་བསྒྱུར་དང་། བོད་ཡིག་འཛིན་གྲྭ་གཉེར་ཏེ་ ༡༩༦༧ ལོའི་བར་བཞུགས་ཡོད་འདུག དེའི་རྗེས་དགོངས་པ་ཞུས་ཏེ་ངྷ་རམ་ས་ལར་ཕེབས་ཤིང་། ༡༩༦༨ ཟླ་ ༨ པ་ནས་བཟུང་བཀྲས་མཐོང་བསྟན་འཛིན་དགེ་བྱེད་དང་སྐུ་མཆེད་བསྟན་འཛིན་རྣམ་རྒྱལ་གཉིས་དང་མཉམ་དུ་༼ཤེས་བྱ་གསར་དེབ ༽ཀྱི་བོད་ཡིག་རྩོམ་སྒྲིག་གི་ཕྱག་ལས་གནང་ཡོད་འདུག
༡༩༧༠ ལོར་བོད་ཀྱི་གཞོན་ནུ་ལྷན་ཚོགས་གསར་འཛུགས་གནང་མཁན་གྲས་ཡིན་པ་དང་། ༡༩༧༡ ལོར་ཤེས་བྱ་གསར་དེབ་དེ་བོད་གཞུང་དྲིལ་བསྒྲགས་ལས་ཁུངས་སུ་ཟླ་སྒྲིལ་བཏང་རྗེས་ཁོང་དྲིལ་བསྒྲགས་ལས་ཁུངས་ཀྱི་དྲུང་གཞོན་དུ་བསྐོ་བཞག་དང་། ༡༩༧༣ ལོར་དྲིལ་བསྒྲགས་དྲུང་ཆེ་ལ་གནས་སྤར་གནང་ཡོད། ༡༩༧༧ ལོའི་མཇུག་ཏུ་བཀའ་དྲུང་ལས་འཕར་དུ་བསྐོ་བཞག་དང་། ༡༩༨༠ ལོར་བསྐྱར་དུ་དྲིལ་བསྒྲགས་དྲུང་ཆེ་ལ་བསྐོ་བཞག ༡༩༩༡ ཟླ་ ༩ པ་ནས་བཀའ་ཤག་ཁྱབ་ཁོངས་ཀྱི་ཆབ་སྲིད་ཚོགས་ཆུང་གི་རྒྱུན་ལས་དྲུང་ཆེ་གནང་ཞིང་། ༡༩༩༣ ཟླ་ ༧ ཚེས་ ༣༡ ནས་བཀའ་བློན་དུ་འདེམས་ཐོན་གྱིས་ཕྱག་ལས་གནང་ཡོད།
༡༩༩༥ ཟླ་ ༥ པར་སྐབས་དེའི་བཀའ་བློན་ཁྲི་པ་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་ལས་གནས་ནས་དགོངས་པ་ཞུས་རྗེས། དབུས་སྤྱི་ཁྱབ་འོས་བསྡུ་ལས་ཁུངས་ཀྱིས་བཅའ་ཁྲིམས་ཀྱི་དོན་ཚན་ ༡༠།༡༡།༡༢ བཅས་ཀྱི་དགོངས་དོན་འོས་འདེམས་ཞུས་དོན་ལྟར་བཀའ་བློན་ཁྲི་པར་བསྐོ་བཞག་བྱུང་ཡོད་ཅིང་། ༢༠༠༡ ཟླ་ ༨ པའི་ནང་བཀའ་བློན་ཁྲི་པའི་དུས་ཡུན་རྫོགས་རྗེས་བགྲེས་ཡོལ་གྱི་ཚུལ་དུ་ནོར་གླིང་མཛད་རྣམ་སྡེ་ཚན་དུ་༧གོང་ས་མཆོག་གི་མཛད་རྣམ་༼ མཛད་རྣམ་རྒྱ་ཆེན་སྙིང་རྗེ་རོལ་མཚོ། ༽ཞེས་པ་འབྲི་རྩོམ་གྱི་ཕྱག་ལས་གནང་སྟེ་དམ་པ་ཁོང་གིས་མི་ཚེ་ཧྲིལ་བོ་བོད་སྤྱི་བའི་དོན་དུ་ཕུལ་ཡོད།
གསར་འགོད་པ། དོན་གྲུབ་བཀྲ་ཤིས།
སྐུ་གཤེགས་བཀའ་ཟུར་མཆོག་དགོངས་པ་རྗོགས་པར་མྱ་ངན་གུས་འདུད་ཞུ། ཚང་མས་ཁོང་བཟང་རབས་མང་ཙམ་བཤད་འདུག་ཀྱང་བཀའ་བློན་སྐབས་ཆང་རག་དང་ཤོ་བག་ལ་དབུ་འཁོར་ཏེ་གཞུང་གི་ལས་དོན་ལ་མཐུས་ཤོར་མང་པོ་བཏང་བའི་ལོ་རྒྱུས་གོ་རྒྱུ་འདུག་ལ་ཇི་ལྟར་ཁོང་ལ་དག་མིན་གསལ་པོ་མ་ཤེས་པའི་ས་ཆ་ཡང་ཆེན་པོ་ཞིག་ཡོད་སྐད་འདུག འོན་ཀྱང་འཚོ་བཞུགས་སྐབས་གླེང་དགོས་པ་ལས་ད་ཕྱི་དྲག་འདུག་སྙམ།
དཔལ་ལྡན་བཀའ་ཁྲི་ཟུར་བ་བསོད་ནམ་སྟོབས་རྒྱལ་མཆོག་ལགས་དགོངས་པ་རྫོགས་པར་མྱ་ངན་དང་། ནང་མིར་འཚམས་འདྲི་ཡོད།
དྲ་གྲོགས་རྒྱ་མཚོ་ལགས། སྤྱིར་བཏང་༼ ཞོགས་པ ༽དང་ ༼ ཐོ་རངས ༽ གཉིས་ལ་སྔ་ཕྱིའི་ཁྱད་པར་ཏོག་ཙམ་མེད་འགྲོ་བསམ་པའི་ཐེ་ཚོམ་ང་ལའང་ཡོད། དཔེར་ན། སྐྱ་རེངས་མ་བཀྱགས་སྔོན་ཙམ་ལ་ཐོ་རངས་དང་། སྐྱ་རེངས་བཀྱགས་པའི་རྗེས་མ་ཐག་ལ་ཞོགས་པ་ཞེས་བོས་ན་དོན་ལ་ཅུང་འབྱོར་པོ་མེད་འགྲོ་སྙམ།
ཡིན་ནའང་འདིའི་སྐོར་གྱི་ཐ་སྙད་སྦྱོར་སྟངས་རིགས་སྐར་རྩིས་དང་ནག་རྩིས་སོགས་སུ་ཡོད་ཤས་ཆེ་ཡང་ལྟ་རྒྱུའི་གོ་སྐབས་མ་བྱུང་མོད། དག་ཡིག་གསར་བསྒྲིགས་ནང་། ༼ ཞོགས་པ ༽ཀྱི་འགྲེལ་ལ”ནམ་ལང་ཁའི་དུས་ཀྱི་མིང་” ཞེས་དང་། ༼ ཐོ་རངས ༽ཀྱི་འགྲེལ་ལའང་གོང་བཞིན་”ནམ་ལང་ཁའི་དུས་ཀྱི་མིང” ཞེས་འགྲེལ་སྟངས་གཅིག་པ་ཡིན་པར་གཞིགས་ན། ཐ་སྙད་དེ་གཉིས་དོན་གཅིག་མིང་གི་རྣམ་གྲངས་དང་། ནམ་མ་གསལ་སྔོན་ཙམ་གྱི་དུས་ཚོད་ཅིག་ལ་འཇུག་པ་མིན་འགྲོ་སྙམ།
གསར་འགྱུར་སྤེལ་བ་ཐུགས་རྗེ་ཆེ། གཤམ་གྱི་འདི་གཉིས་ཀྱི་གང་དག་པ་ཡིན་ནམ།
སྒང་ན།
༼དེ་རིང་ཞོགས་པའི་ཆུ་ཚོད་ ༤།༣༠ སྟེང་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག བཞུགས་སྒར་ངྷ་རམ་ས་ལའི་ཉེ་འཁྲིས་ནོར་བུ་གླིང་ཁའི་གཟིམ་ཤག་ཏུ་སྐུ་གཤེགས་ཡོད་འདུག༽ཅེས་བྲིས་འདུག
འོག་ན།
༼མདང་དགོང་ཐོ་རངས་ཆུ་ཚོད་ ༤།༣༠ སྟེང་ནོར་བུ་གླིང་ཁའི་གཟིམ་ཤག་ནས་སྐུ་ཚེའི་ཕེན་པ་རྫོགས་པའི་གནས་ཚུལ་བྱུང་འདུག༽ཅེས་བྲིས་འདུག
ཧ་ཧ་་་་སྤྱིར་བཀའ་ཟུར་ཁོངས་བཙན་བྱོལ་ནང་གི་ལས་བྱེད་རྒན་གྲས་དང་། ལྷག་བསམ་ཅན་ཞིག་ཡིན་མོད། ཡིན་ན་ཡང་། སྐྱོན་མེད་ཡོན་ཏན་ཅན་གྱི་མི་དཀོན། །ཟེར་སྲོལ་བཞིན་ཁོངས་ཉིད་འཇིག་རྟེན་འདིར་འཚོ་བཞུགས་སྐབས་སུ་མི་མང་པོའི་ཁོང་ལ་སྐྱོན་འཛུག་བཟོས་པ་ཉུང་ཉུང་གཏན་ནས་མིན་ག་སྐྱོན་ཡང་ཡོད་པ་ཡིན། ད་ནི་འཇིག་རྟེན་ཕྱི་མའི་ལམ་དུ་གཤེགས་ཟིན་རྗེས་སུ་སྐྱོན་མེད་ཡོན་ཏན་ཅན་གྱི་མི་ལ་ངོས་འཛིན་པ་འདི་ནི་ཆེས་ཕྱི་དྲག་ཐག་ཆོད་པ་རེད། འོན་ཀྱང་འདི་ནི་བོད་པ་ཚང་གི་ལུགས་སྲོལ་ཞིག་རེད་འདོད། །
སྐྱེས་ཆེན་དམ་པོ་ཁོང་ལ་མྱ་ངན་གུས་འདུད་གྲངས་མེད་ཞུ་བ་དང་འབྲེལ། ཁོང་ནི་བཙན་བྱོལ་བོད་གཞུང་གི་མགོ་ཁྲིད་རྒན་པ་དག་ལས་ལབ་རྒྱུ་གླེང་རྒྱུ་མེད་པ་དང་། བོད་སྤྱི་དོན་ལ་ཕྱག་རྗེས་ཆེ་ཤོས་ཀྱི་གྲས་ཤིག་ཡིན། ཁོང་ལ་ཆོལ་ཁ་ལུང་ཚན་གྱི་དུག་ནག་མ་འགོས་པར། ༧གོང་ས་མཆོག་དང་སྐྱིད་སྡུག་མཉམ་མྱོང་གིས་བོད་མི་རིགས་དང་བོད་ལུང་པའི་ཆེད་དུ་མི་ཚེ་གང་བོར་སྐུ་ངལ་སྐྱོན་མཁན་གྱི་བོད་པའི་བུ་རྒོད་ཅིག་ཡིན། ཨོཾ་མ་ཎྀ་བདྨེ་ཧོུཾ། བྱང་ཕྱོགས་བདེ་བ་ཅན་དུ་ཚེ་བསོད་འཕོ་པར་ཤོག།
ཧ་ཅང་ཡིད་སྐྱོའི་གནས་ཚུལ་རེད། ཡིན་ནའང་དགུང་གྲངས་མཐོན་པོ་བཞེས་ཡོད་པ་རེད། འདུས་བྱས་ཐམས་ཅད་མི་རྟག་པ་དེའང་ང་ཚོས་མི་འདོད་བཞིན་དུ་ངོས་ལེན་མི་བྱེད་ཐབས་མེད་རེད། སྐུ་ངོ་ཁོང་ཡང་བོད་བསྟན་པ་ཆབ་སྲིད་ཐོགས་ལྷག་བསམ་རྣམ་དག་དང་༧གོང་ས་མཆོག་དང་སྐྱིད་སྡུག་མཉམ་མྱོང་གནང་མཁན་གཙོ་གྲས་ཤིག་ཡིན། ལྷག་པར་དུ་ཆོལ་ཁ་ཆོས་ལུགས་ཀྱི་ཕྱོགས་རེས་མེད་པར་དྲང་ཚུགས་ཐུབ་ཅིང་ལངས་ཕྱོགས་བརྟན་པོ། གཞུང་རྒྱུད་དྲང་ཞིང་རྣམ་རིགས་བཀྲ་བ་ཞིག་ཡིན། དམ་པ་ཁོང་འདི་ལྟར་སྐུ་གཤཻགས་པར་གདུང་སེམས་མཉམ་སྐྱེད་དང་མྱ་ངན་གུས་འདུད། ཤུལ་བཞུགས་ནང་མི་ཡོངས་ལ་སེམས་གསོའི་འཚམས་འདྲི་བཅས་སེམས་ཁུངས་རུས་པའི་རྟིང་ནས་ཞུ་རྒྱུ་ཡིན་ལ། སྐུ་གཤཻགས་ཁོང་ཐར་པ་དང་ཐམས་ཅད་མཁྱེན་པའི་ལམ་སྣ་ཟིན་པའི་བསྔོ་བ་སྨོན་ལམ་ཡང་ལྷན་གཅིག་ཏུ་འདེབས་བཞིན་ཡོད།
ཨོམ་མ་ཎི་པདྨེ་ཧུམ་་་་་་་་་་་་་་་་་་་་་་་་་ནང་མི་ལ་གདུང་སེམས་མཉམ་སྐྱེད་ཡོད་་་་འདས་པོ་ལ་ཡིད་རངས་ཡོད་་་་
ཁྲི་ཟུར་ཁོང་ལ་མྱ་ངན་གུས་འདུད་ཞུ་
ཤུལ་ལུས་ནང་མི་ལ་མྱ་ངན་གདུང་སེམས་ཡོད། དལ་འབྱོར་རྟེན་བཟང་མྱུར་དུ་ཐོབ་ནས་སྤྱན་རས་གཟིགས་ཀྱིས་རྗེས་སུ་བཟུང་བར་ཤོག །
བོད་བསྟན་སྲིད་ཀྱི་སླད་དུ་ཕྱག་ལས་སྣ་མང་གནང་མྱོང་བས་སྐུ་ངོ་ཁོང་དག་ཞིང་དུ་སྐྱེ་བར་སྨོན།
དུས་དང་གནས་སྐབས་སྡུག་དུས་འབད་འབུངས་གནང་ཞིང་།།
ཐུགས་རེ་རི་ལྟར་སྤུངས་ནས་མདུན་དུ་ཕེབས་ཡོད།།
སྙུན་གཞི་དྭངས་ཐབས་བྲལ་བ་ཆོས་ཉིད་གཞང་གིས།།
གཟུགས་སྐུ་འདི་དང་བྲལ་བར་ཕངས་སེམས་སྐྱེས་སོང་།།
བཀའ་དྲིན་མཚུངས་མེད་ཀྱི་བཀའ་བློན་ཁྲི་བསོད་ནམས་སྟོབས་རྒྱལ་མཆོག་གིས་བོད་སྤྱི་དོན་དུ་དཀའ་ལས་བརྒྱབ་པ། བོད་གངས་ཅན་ལྷ་མི་ཡོངས་ཀྱིས་ཚེ་རབས་ནས་ཚེ་རབས་བར་དུ་རྗེས་སུ་བཟུང་ནས་དྲིན་ཀྱིས་སྐྱོངས་བར་ཤོག ཤུལ་ལུས་ནང་མི་ལ་མྱ་ངན་གདུང་སེམས་ཡོད།
ཨོཾ་མ་ཎི་པདྨེ་ཧུཾ། འདི་ནི་ཧ་ཅང་ཡིད་སྐྱོའི་གནས་ཚུལ་ཞིག་རེད། ཡིན་ནའང་དགུང་ལོ་གང་ལ་གང་འཚམས་མཐོན་པོ་རེད།