བོད་
བཙན་བྱོལ་བོད་མི་ཚོ་ཆབ་སྲིད་ཀྱི་སྐྱབས་བཅོལ་བ་ཞིག་ཡིན་པའི་ངོས་ཐད་ནས་རྩ་དོན་རྩོད་མཁན་དང་། བོད་དོན་རྒྱལ་སྤྱིའི་སྡིངས་ཆར་སྐྱེལ་མཁན་ཞིག་ཆགས་ཡོད། གངས་ཅན་སྐྱིད་གཤོངས་འདི་ཡང་རྒྱལ་སྤྱིའི་ཐོག་ནས་བོད་དོན་ལ་ལྟ་ས་དང་ཉན་སའི་སྒེའུ་ཁུང་ཞིག་ཆགས་ཡོད། འདི་ལ་འགན་འཁྲི་ཡོད་པའི་ཐོག་ནས་ཞིབ་འདང་ཞིག་བརྒྱབ་ན། ད་ལྟའི་སྤྱི་འཐུས་ཚོགས་གཙོ་དང་སྲིད་སྐྱོང་རྣམ་གཉིས་རྒྱ་གར་ནང་སྐྱེས་པ་རེད། དེ་བཞིན་དྲིལ་བསྒྲགས་དང་ནང་སྲིད། འཕྲོད་བསྟན། དཔལ་འབྱོར་བཀའ་བློན་སོགས་ཀྱང་བཙན་བྱོལ་ནང་སྐྱེས་ཤིང་འཚར་བ་རྐྱང་ཆགས་ཡོད། ཁོང་རྣམ་པས་བོད་ནང་གི་གནས་ཚུལ་མང་པོ་ཞིག་ལ་མཁྱེན་རྟོགས་གཏིང་ཟབ་མེད་པ་མ་ཟད། རྒྱ་ནག་གི་གཤིས་སྤྱོད་དང་ས་གནས་ཁག་གི་སྲིད་ཇུས། ཉིན་རེའི་འཚོ་བའི་ནང་གི་བོད་མི་དང་རྒྱ་མིའི་ཛ་དྲག་གི་འབྲེལ་འདྲིས་སོགས་དེ་བས་ཀྱང་ཀློག་གྱུར་ཡིན།
བཀའ་ཤག་གསར་པས་ལས་ཀ་མགོ་འཛུགས་གནང་བ་དང་མཉམ་དུ་བོད་དོན་དྲིལ་བསྒྲགས་སྐོར་སྐྱོད་ཀྱང་མགོ་འཛུགས་གནང་སོང་། བཀའ་ཤག་སྐབས་བཅུ་བཞི་པ་འདི་ཕྱི་རྒྱལ་ཁག་ཏུ་སྐྱོད་ཐེངས་མང་ཤོས་ཀྱི་བཀའ་ཤག་ཅིག་ཆགས་ཡོད། མགོ་སྲིད་སྐྱོང་ནས་མཇུག་སྤྱི་འཐུས་རྒྱུན་ལས་བར་བོད་དོན་དྲིལ་བསྒྲགས་ཀྱི་མིང་ཐོག་ནས་ཕྱི་རྒྱལ་དུ་སྐོར་སྐྱོད་ལམ་ཁར་ཧབ་ཐོབ་དང་འགྲན་རྩོད་བྱས་ཡོད། འོན་ཀྱང་ཕྱི་རྒྱལ་གྱི་ཆབ་སྲིད་པ་དང་གསར་འགོད་པ་ཚོའི་མདུན་དུ། བོད་དོན་གང་ཞིག་ཇི་ལྟར་འཆད་ཀྱིན་ཡོད་ན། ཕར་འགྲོ་སོང་ལས་ལྷག་གི་ཚུར་ཡོང་འབབ་ཅི་ཞིག་བསྣམས་ཡོད་ན། བོད་པ་རང་གི་ལས་འགུལ་དང་མཛད་སྒོ་ཁག་ཏུ་གཏམ་བཤད་སྤེལ་སྐབས་ཀྱང་ཡར་དཀྲུག་མར་དཀྲུག་དང་ར་མགོ་ལུག་སྦྱར་མང་པོ་ཡོང་གི་ཡོད། མེར་བསྲེགས་ཀྱི་གྲངས་ཀ་སྐྱོར་འདོན་དང་འཛིན་བཟུང་བཙོན་འཇུག་གི་གསར་འགྱུར་བསྐྱར་ཀློག་གིས་བོད་དོན་དྲིལ་བསྒྲགས་ཡོང་ངམ།
བོད་དོན་སྤྱི་བཤད་ནས་བྱེ་བྲག་ཏུ་བབས་ཏེ་བོད་ནང་གི་དགོན་པ་གང་གི་ཆོས་ལུགས་བྱེད་སྒོ་ཅི་ཞིག་དུས་ཚོད་ནམ་ཞིག་ལ་བཀག་སྡོམ་བྱས་སོང་བ་དང་། སློབ་གྲྭ་གང་ཞིག་ཏུ་ཤེས་ཡོན་སློབ་ཚན་ཅི་ཞིག་དུས་སྐབས་ནམ་ཞིག་ལ་བསྒྱུར་བཅོས་བཏང་བ། འབྲོག་ས་གང་ཞིག་གི་དུད་ཁྱིམ་ག་ཚོད་ཅིག་ཟླ་ཚེས་ནམ་ཞིག་ལ་ཀློང་དུ་ཕབ་སྟེ་གྲོང་རྡལ་བཟོས་པ། རོང་སྡེ་གང་ཞིག་གི་ཞིང་ས་ཅི་ཙམ་ནང་དུས་ཚོད་ནམ་ཞིག་ལ་ཤིང་ནག་འདེབས་འཛུགས་བྱས་ཟིན་པ། དེ་བཞིན། ཞིང་ཆེན་གང་ཞིག་གིས་དུས་ཚོད་ནམ་ཞིག་ལ་སྲིད་ཇུས་ཅི་ཞིག་སྤེལ་བ་དང་། ཁུལ་དང་རྫོང་གང་ཞིག་གི་མགོ་ཁྲིད་སུ་ཞིག་གིས་དུས་ཚོད་ནམ་ཞིག་ལ་ཁྲིམས་མེད་ལུགས་མེད་ཀྱི་བྱ་འགུལ་ཅི་ཞིག་སྤེལ་བ། ཤང་དང་ས་གནས་གང་ཞིག་ནས་དུས་ནམ་ཞིག་ལ་མང་ཚོགས་ག་ཚོད་ཀྱི་ལག་ནས་རྒྱུ་ནོར་འཕྲོག་སོང་བ་སོགས་བོད་དོན་དྲིལ་བསྒྲགས་ཡིན།
བོད་པའི་རང་ལུས་མེར་བསྲེགས་འདི་རྒྱལ་སྤྱིར་ཁྱབ་བསྒྲགས་འགྲོ་མ་ཐུབ་པ་དང་། བོད་པའི་ཛ་དྲག་གནས་སྟངས་ཐོག་ཕྱི་ཕྱོགས་ཀྱི་རྒྱབ་སྐྱོར་དེ་ཙམ་མ་རག་པ་དེར་རྒྱུ་མཚན་མང་པོ་བགྲང་རྒྱུ་ཡོད་སྲིད་མོད། བོད་ནང་གི་གནས་ཚུལ་དུས་ཐོག་ཏུ་རྒྱལ་སྤྱིར་ཁྱབ་བསྒྲགས་མ་ཐུབ་པ་དང་། བོད་དོན་ཞུ་གཏུག་བྱེད་མཁན་ཚོས་བོད་ནང་གི་ས་ཁུལ་རེ་རེའི་གནས་ཚུལ་ཅི་བཞིན་མ་རྟོགས་པར་ནེ་ཙོས་མ་ཎི་བགྲང་བ་དང་། བྱི་ལས་སྒྲོལ་མ་འདོན་པ་ལྟ་བུའི་ལྡབ་ལྡིབ་དང་བསྐྱར་ཟློས་རེ་བྱེད་པ་ལས། རྒྱལ་སྤྱིའི་སྡིངས་ཆར་གསལ་གསལ་ཐང་ཐང་གི་བོད་དོན་རྣལ་མ་ཞིག་སྐྱེལ་མ་ཐུབ་པ་སོགས་ནི་མེར་བསྲེགས་ལ་བདག་པོ་མ་བྱུང་བ་དང་། བོད་དོན་ལ་རྒྱབ་སྐྱོར་མ་རག་པའི་རྒྱུ་མཚན་གཙོ་གྲས་ཞིག་ཆགས་ཡོད་དོ།།
