ས་ཡོམ་ཁྲོད་མི་ ༡༩༣ གྲོངས་འདུག

སི་ཁྲོན་གཡག་རྔ་གྲོང་ཁྱེར་ལོའུ་ཧྲན་རྫོང་དུ་ཚད་རིམ་ ༧ ཅན་གྱི་ས་ཡོམ་བྱུང་སྟེ། མི་ ༡༩༣ འདས་གྲོངས་དང་། མི་ ༡༢༢༡༡ ལྷག་ལ་རྨས་སྐྱོན་བྱུང་འདུག

 ཟླ་འདིའི་ཕྱི་ཚེས་ ༢༠ ཉིན་གྱི་ཞོཊ་པའི་ཆུ་ཚོད་ ༨།༠༢ ཡས་མས་སུ་རྒྱ་ནག་སི་ཁྲོན་ཞིང་ཆེན་གཡག་རྔ་གྲོང་ཁྱེར་ལོའུ་ཧྲན་རྫོང་དུ་ཚད་རིམ་ ༧ ཅན་གྱི་ས་ཡོམ་བྱུང་སྟེ། དེ་རིང་བར་མི་ ༡༩༣ འདས་གྲོངས་དང་།  མི་ ༡༢༢༡༡ ལྷག་ལ་རྨས་སྐྱོན་བྱུང་ཡོད་པ་མ་ཟད། ཐེངས་འདིའི་ས་ཡོམ་དེས་ཉེ་ཁུལ་གྱི་ཁྲིན་ཏུའུ་དང་ཝེ་ཧྲན། ཙི་ཀོན། ཏི་ཡཱང་། མེན་ཡཱང་། ལིག་ཧྲན། ཡིས་པེན། ནེ་ཅཱང་། ཙི་ཡཱང་། དཀར་མཛེས། རྔ་པ། ལིང་ཧྲན་བཅས་ཁུལ་དང་གྲོང་ཁྱེར་ཁག་ ༡༣ དང་། རྫོང་ཁག་ ༦༩ ལྷག་གི་མི་ཁྲི་ ༡༥༠ ཙམ་ལ་གནོད་སྐྱོན་ཐེབས་ཡོད་འདུག་ལ། དཀར་མཛེས་བོད་རིགས་རང་སྐྱོང་ཁུལ་གྱི་གྲོང་གསེབ་ཀྱི་སྡོད་ཁང་ ༩༥ ལྷག་ལ་གཏོར་སྐྱོན་དང་སྡོད་ཁང་ ༧ ལྷག་རྡིབ་ཡོད་པ་དང་། གྲོང་ཁྱེར་སྡོད་དམངས་ཀྱི་ཁང་པ་ ༣༠༠ ལྷག་དང་། ཆེད་ལས་སློབ་གྲྭ་ ༡ ། སློབ་འབྲིང་ ༨ ། སློབ་ཆུང་ ༦༨ ། བུ་བཅོལ་ཁང་ ༦ བཅས་ལ་ཚད་རིམ་མི་འདྲ་བའི་གནོད་སྐྱོན་ཐེབས་ཏེ། མི་  ༥ འདས་གྲོངས་དང་། མི་ ༣ ༧ རྨས་སྐྱོན། དཀར་མཛེས་ཁུལ་གྱི་དར་མདོ་རྫོང་དང་རྟའུ་རྫོང་ཐེས་པའི་རྫོང་ཁག་ ༥ ལྷག་གི་ཁྱོན་མི་ ༡༡༤༩༢༦ ལ་གནོད་སྐྱོན་བྱུང་ཡོད་པ་དང་།  རྔ་པ་བོད་རིགས་རང་སྐྱོང་ཁུལ་གྱི་མི་ ༡ འདས་གྲོངས་དང་། མི་ ༥ ལ་རྨས་སྐྱོན་བཟོས་ཡོད་འདུག

ས་ཡོམ་གྱི་གནོད་འཚེ་བྱུང་རྗེས་རྒྱ་ནག་གི་སྲིད་བློན་ལིས་ཁི་ཆང་དང་།  སི་ཁྲོན་ཞིང་ཆེན་གྱི་དམར་ཤོག་དྲུང་ཆེ་ལིག་ཙོ་མིན་གཙོས་པའི་མགོ་ཁྲིད་དང་ལས་བྱེད་ཁག་ས་གནས་ས་ཐོག་ཏུ་ཕྱིན་སྟེ་བཀོད་འདོམས་དང་། སྨན་ཁང་ཁག་ཏུ་ཕྱིན་སྟེ་ནད་པར་གཟིགས་སྐོར་བཅས་གནང་ཡོད་པ་མ་ཟད། རྒྱ་ནག་གཞུང་འབྲེལ་ཐོག་དྲག་ཆས་དམག་མི་གཙོས་རྒུད་སྐྱོབ་མི་སྣ་ ༢༠༠༠༠ ལྷག་མངགས་གཏོང་གིས་གནོད་ཐེབས་རྒུད་སྐྱོབ་ཀྱི་ལས་དོན་སྒྲུབ་ཀྱི་ཡོད་འདུག

ས་ཡོམ་གྱི་གནོད་འཚེ་བྱུང་རྗེས་རྒྱ་ནག་རྒྱལ་ཡོངས་ཀྱི་ས་གནས་ཁག་གི་དང་བླངས་རོགས་སྐྱོར་མི་སྣ་དང་། རྒྱ་ནག་གཞུང་ལྟ་བ་མི་མཐུན་པའི་མི་སྣ། བོད་ཁུལ་གྱི་བླ་སྤྲུལ་གཙོས་པའི་མི་མང་པོ་གནོད་ཐེབས་ས་ཁུལ་དུ་སྐྱོད་ཡོད་ཀྱང་།  རྒྱ་ནག་དམངས་སྲིད་སྡེ་ཁག་གིས་གསལ་བསྒྲགས་ཤིག་སྤེལ་ཏེ། ཉེ་བའི་ཆར་ས་ཡོམ་བྱུང་ཡུལ་གྱི་འགྲིམ་འགྲུལ་དང་བརྒྱུད་ལམ་གྱི་ཆ་རྐྱེན་མི་ལེཊ་པ་དང་། ད་ཆར་ཡང་ས་འགུལ་ཆུང་ཙག་རིཊ་ཡོང་གི་ཡོད་སྟབས། དམངས་སྲིད་སྡེ་ཁག་གིས་བཀོད་ཁྱབ་མེད་པར་ས་གནས་ཁག་གིས་མི་བཏང་མི་ཆོག་པ་དང་། ལྷག་པར་དུ་ཆེད་ལས་མི་སྣ་ལས་གཞན་མི་སུ་གང་གིས་ཀྱང་གནོད་ཐེབས་ས་ཁུལ་གྱི་གནས་ཚུལ་ཁྱབ་བསྒྲགས་མི་ཆོག་པ་མ་ཟད། ཕྱི་ཚེས་ ༢༡ ཉིན་རྒྱ་ནག་གི་མགྲིན་ཚབ་པ་ཆིན་ཀཱང་གིས། ད་ཆར་གཡག་རྔའི་གནོད་ཐེབས་ས་ཁུལ་དུ་སྨན་བཅོས་དང་བཟའ་ཆས་རིཊ་འདང་ངེས་ཡོད་པ་དང་། གནོད་ཐེབས་ས་ཁུལ་གྱི་འགྲིམ་འགྲུལ་དང་བརྒྱུད་ལམ་སྟབས་བདེ་མིན་སྟབས། གནས་སྐབས་རིང་རྒྱལ་ཁབ་གཞན་གྱི་རོགས་སྐྱོབ་མི་སྣ་དང་སྨན་བཅོས། དངོས་པོའི་མཐུན་འགྱུར་སོགས་དང་ལེན་བྱེད་ཀྱི་མིན་ཞེས་བཤད་དེ། ཉེ་ལམ་སི་ཁྲོན་ཞིང་ཆེན་གྱི་༼དྲུག་བཞི་ཐེན་ཝང་དྲ་རྒྱ༽ འགན་འཁུར་བ་རྒྱ་རིགས་ཧོང་ཆི་དང་ཡིས་ཏྲིན། ཕུ་ཧྥེ། ཀྲིག་ཝུན་མེན། ཅཱང་ཀྲི་ལེ་བཅས་རྒྱ་ནག་གཞུང་དང་ལྟ་བ་མི་མཐུན་པའི་མི་སྣ་ཁག་ཅིག་གཡག་རྔའི་གནོད་ཐེབས་ས་ཁུལ་དུ་འགྲོ་སྐབས། རྒྱ་ནག་གཞུང་གིས་འཛིན་བཟུང་བཀག་ཉར་བྱས་ཡོད་འདུག་ལ། བོད་པའི་བླ་སྤྲུལ་དང་མཁན་པོ། གྲྭ་པ་གཙོས་པའི་བོད་རིགས་མང་པོ་ས་འགུལ་བྱུང་ཡུལ་གྱི་མི་མང་རོགས་སྐྱོར་བྱེད་དུ་འགྲོ་སྐབས། ལམ་བར་དུ་བཀག་འགོག་བྱས་ཡོད་འདུག

ཁ་སང་ཕྱི་ཚེས་ ༢༢ ཉིན་ཨུ་རུ་སུ་གནས་སྡོད་རྒྱ་ནག་ཕྱི་འབྲེལ་མི་སྣ་ ༢ ཀྱིས་སྣེ་འཁྲིད་པའི་རྒུད་སྐྱོབ་མི་སྣ་ ༡༩༨ ཁྲིན་ཏུའུ་གནམ་ཐང་དུ་བསླེབས་ཏེ། རྒྱ་ནག་ས་ཡོམ་བརྟག་དཔྱད་ཚན་པའི་བཀོད་མངགས་ལྟར་ལོའུ་ཧྲན་རྫོང་གི་གནོད་ཐེབས་ས་ཁུལ་དུ་མངགས་གཏོང་བྱས་ཡོད་འདུག་ལ། དེའི་ཐད་རྒྱ་ནག་གི་ཧྥིན་ཧོང་དྲ་རྒྱའི་གསར་འགོད་པས་བཅར་འདྲི་སྐབས། ཨུ་རུ་སུ་ཕྱོགས་ནས་རྒུད་སྐྱོབ་མི་སྣ་ཐོག་མ་དེ་གནོད་ཐེབས་ས་ཁུལ་དུ་བསླེབས་ཡོད་ཀྱང་། རྒྱ་ནག་གཞུང་ཕྱོགས་ནས་ད་དུང་ཨུ་རུ་སུ་གཞུང་ལ་རྒུད་སྐྱོབ་མི་སྣ་གདན་ཞུའི་བརྡ་ལན་འབྱོར་མེད་སྐོར་བརྗོད་འདུག 

ཐེངས་འདིའི་རྒུད་སྐྱོབ་སྤྱི་ཡོངས་ཀྱི་ལས་དོན་ཐད། རྒྱ་རིགས་ཤེས་ལྡན་པ་ཞཱ་ཡེ་ལིང་གིས། གཞུང་ཕྱོགས་ནས་ཐེངས་འདིའི་གནོད་ཐེབས་ས་ཁུལ་དུ་དེ་སྔོན་ལྟར། ཕྱོགས་གཅིག་ནས་རོགས་སྐྱོར་དང་ཕྱོགས་གཞན་ནས་གཞུང་གི་དྲིལ་བསྒྲགས་ལས་དོན་སྤེལ་གྱི་ཡོད་པ་ལས། མི་མང་གི་དཀའ་ངལ་དང་འབྲེལ་བའི་དངོས་ཡོད་གནས་ཚུལ་ཁག་བཀག་སྡོམ་བྱེད་ཀྱི་ཡོད་པ་དང་། ད་ལྟའི་བར་རྒྱ་ནག་ནང་རང་བྱུང་གནོད་འཚེ་ཐེངས་མང་བྱུང་ཡང་རྒུད་སྐྱོབ་ལས་དོན་དེ་དྲག་ཆས་དམག་མི་དང་མི་མང་ཁོ་ནར་བརྟེན་པ་ལས། ཆེད་ལས་རང་བཞིན་གྱི་རྒུད་སྐྱོབ་དཔུང་སྡེ་མེད་སྟབས། མ་འོངས་པར་ཉི་ཧོང་ལྟར་གནོད་སྐྱོན་འདིའི་རིགས་བྱུང་སྐབས། གནས་སྐབས་ཙམ་མིན་པར་ཆེད་ལས་རང་བཞིན་གྱི་རྒུད་སྐྱོབ་མི་སྣ་སྐྱེད་སྲིང་བྱ་རྒྱུ་གལ་ཆེན་ཡིན་སྐོར་དང་། གྲ་སྒྲིག་མེད་པ་དེས་ལས་དོན་མང་པོ་ཞིག་འཐུས་ཤོར་དུ་འགྲོ་བཞིན་ཡོད་སྐོར་བརྗོད་འདུག