ཅི་ཕྱིར་དབུ་མའི་ལམ་དུ་བསྐྱོད་དགོས་སམ།

ཧོ་ཕིན་གྱིས་བརྩམས། ལོ་མ་རྒྱལ་གྱིས་བསྒྱུར།

ད་ལོའི་ཕྱི་ཟླ་ ༤ ཚེས་ ༡༤ ཉིན། བོད་ཀྱི་བླ་ན་མེད་པའི་དབུ་ཁྲིད་༧གོང་ས་ཏཱ་ལའི་བླ་མ་མཆོག་སུད་སུ་ལ་ཕེབས་ཏེ། དེ་གར་གནས་སྡོད་བོད་མི་རྣམས་ལ་ཐུག་སྐབས། ཁོང་གིས་བསྐྱར་དུ་དབུ་མའི་ལམ་དང་འཚེ་མེད་ཞི་བའི་སྐོར་ལ་གསུང་བཤད་གནང་བྱུང་།

༧གོང་ས་མཆོག་གིས་གསུངས་དོན།  བོད་དོན་སེལ་བར་སྔ་ཕྱི་མ་གཏོགས་རྒྱ་ནག་གཞུང་དང་བཀའ་མོལ་གནང་དགོས་པ་ལས་གདམ་ག་གཞན་མེད། དེར་བརྟེན། གནས་སྟངས་དེ་འདྲ་ཞིག་གི་འོག་ནས། གལ་ཏེ་བོད་རང་བཙན་གླེང་བ་ཡིན་ན། ངོ་རྒོལ་བྱེད་དགོས་པ་ཙམ་ལས་བཀའ་མོལ་གནང་ཐབས་མེད། དེ་ཡག་པོ་མ་རེད། རེ་བ་ཡང་ཡོད་པ་མ་རེད། གལ་ཏེ་བོད་པར་མིང་དོན་མཚུངས་བའི་རང་སྲིད་རང་སྐྱོང་ཞིག་ཐོབ་ན། བོད་པར་ཁེ་ཕན་ཡོད་ལ། རྒྱ་ནག་གཞུང་ལ་ཡང་ཁེ་ཕན་ཡོད། ཅེས་གསུངས།

ང་རང་གིས་བལྟས་ན། དབུ་མའི་ལམ་ལ་བཟང་ཆ་ཆེན་པོ་གཉིས་འདུག དང་པོ། དབུ་མའི་ལམ་ནི་ལམ་ལུགས་ཀྱི་ཐོག་ནས་ཡང་དག་པ་ཞིག་ཆགས་ཡོད། རྒྱུ་མཚན་གང་ཡིན་ཟེར་ན། དེ་ཡིས་བོད་མིའི་རྩ་བའི་ཁེ་དབང་ལ་ཁག་ཐེག་བྱེད་པ་མ་ཟད། རྒྱ་བོད་གཉིས་ཀར་ཕན་པའི་གཉིས་ཕན་གྱི་ཐབས་ལམ་ཞིག་ཀྱང་རེད། གཉིས་པ། དབུ་མའི་ལམ་ནི་ཆབ་སྲིད་ཀྱི་ཐོག་ནས་ལག་ལེན་དུ་བསྟར་ཐུབ་པ་ཞིག་དང་། ཡུལ་དུས་གནས་བབ་ལའང་མཐུན་པ་ཞིག་རེད།

གཉིས་པ་དེ་ཧ་ཅང་གལ་འགངས་ཆེན་པོ་ཞིག་རེད། ཕྱོགས་གཅིག་ནས་དངོས་ཡོད་གནས་ཚུལ་ཁོ་ན་ལ་བསམ་བློ་བཏང་སྟེ་ཕུགས་བསམ་བློས་གཏོང་བྱས་ན། དེ་ཡང་མིག་སྔར་གྱི་དངོས་ཡོད་གལ་ཆེན་དུ་བརྩིས་ཏེ། རྩ་བའི་ཁེ་དབང་འཐབ་རྩོད་བློས་གཏོང་བྱས་པ་དེ་ནི་ནོར་འཁྲུལ་ཞིག་ཡིན་པ་གདོན་མི་ཟ། ཡིན་ན་ཡང་། ཕྱོགས་གཞན་ཞིག་ནས། ཕུགས་བསམ་ཁོ་ན་གླེང་སྟེ་དངོས་ཡོད་ལ་ཁ་ཡ་མ་བྱས་ན། དེ་ནི་ཡང་དག་པ་ཞིག་མ་རེད།

ལོ་སྔོན་མའི་ (༢༠༡༡) ཕྱི་ཟླ་ ༣ པའི་ནང་། ང་དང་སུ་ཞོ་ཁང་གཉིས་ངྷ་རམ་ས་ལར་ལྟ་སྐོར་དུ་ཕྱིན་པ་ཡིན། ཏག་ཏག་སྐབས་དེར་བྱང་ཨ་མེ་རི་ཀའི་<<ཤིན་ཏོ་ཉིན་རེ་ཚགས་པར་>>གྱི་སྤྱི་ཁྱབ་རྩོམ་སྒྲིག་པ་སྐུ་ཞབས་ཝང་ནུ་ཡང་ངྷ་རམ་ས་ལར་ཕེབས་འདུག དེའི་རྗེས་ཁོ་ཕྱིར་ཨ་རི་ལ་ལོག་རྗེས། <<ཤིན་ཏོ་ཉིན་རེ་ཚགས་པར་>>གྱི་སྟེང་དུ་རྩོམ་ཡིག་ཁ་ཤས་སྤེལ་འདུག དེའི་ཁྲོད་ཀྱི་གཅིག་ནི་༧གོང་ས་མཆོག་ལ་བཅར་འདྲི་ཞུས་པ་ཞིག་རེད།

བཅར་འདྲི་དེའི་ནང་འདི་ལྟར་བཀོད་འདུག ཏཱ་ལའི་བླ་མ་དང་བོད་མིས་ཅིའི་ཕྱིར་རང་ཉིད་ཀྱི་དམིགས་ཡུལ་འགྲུབ་ཆེད་འཚེ་བའི་ཐབས་ལམ་མ་སྤྱད་པའི་སྐོར་ལ་བདེན་ཐུབ་ཀྱིས་དབྱེ་ཞིབ་བྱེད་པ། ཞེས་བཀོད་འདུག

ཁོང་གིས་གསུངས་དོན། ཐེངས་ཤིག་ཁོ་བོད་པའི་གཞོན་སྐྱེས་ཤིག་ལ་འཕྲད་དེ་འདི་ལྟར་བརྗོད་མྱོང་ཟེར། གལ་ཏེ་ང་ཚོས་རང་ཉིད་ཀྱི་དམིགས་ཡུལ་འགྲུབ་ཆེད་འཚེ་བའི་ཐབས་ལམ་སྤྱོད་པའི་དབང་དུ་བཏང་ན།  དང་པོ་ང་ཚོ་ལ་མེ་མདའ་དགོས་པ་མ་ཟད།  ད་དུང་མདེའུ་ཡང་དགོས། ད་དུང་མེ་མདའ་རྐང་ཁ་ཤས་ཤིག་གི་འདང་གི་མ་རེད། སྟོང་ཕྲག་ཁྲི་ཕྲག་དགོས་པ་རེད། ཡིན་ན་ཡང་། སུས་ང་ཚོར་བཙོང་གི་རེད། རྒྱ་གར་གྱིས་བཙོང་གི་ཡོད་དམ། ཨ་རིས་བཙོང་གི་རེད། ཕལ་ཆེར་སུ་གཅིག་གིས་ཀྱང་ང་ཚོར་མཚོན་ཆ་བཙོང་གི་མ་རེད།

ཅིག་བྱས་ན་ཨབ་གྷན་དང་པ་ཀི་སི་ཐན་གྱིས་ཨུ་རུ་སུའི་སྔོན་མའི་མཚོན་ཆ་དེ་དག་ང་ཚོར་བཙོང་མདོག་ཁ་བོ་རེད། ཡང་ན། མཚོན་ཆའི་ཡོང་ཁོངས་ཡོད་པའི་དབང་དུ་བཏང་ཡང་། དངུལ་སྒོར་གང་ནས་ཁྱེར་ཡོང་། གོང་གི་རྒྱལ་ཁབ་དེ་དག་གིས་རིན་མེད་ཐོག་མི་སྤྲོད་ཁོ་ཐག་ཡིན། གལ་སྲིད། དངུལ་སྒོར་དང་མཚོན་ཆ་ཡོད་པའི་དབང་དུ་བཏང་ཡང་། དེ་དག་རྒྱ་ནག་ཏུ་དེ་ཇི་ལྟར་དབོར་འདྲེན་བྱེད། རྒྱལ་ཁབ་གང་ཞིག་གི་ས་མཚམས་བརྒྱུད་ནས་དབོར་འདྲེན་བྱེད། མདོར་ན། རྒྱལ་ཁབ་སུ་གཅིག་གིས་ཀྱང་དེ་ལ་མོས་མཐུན་མི་བྱེད། སྔོན་མ་ཡིན་ན་(CIA)ཡིས་ང་ཚོར་རོགས་འདེགས་བྱས་པ་རེད། འོན་ཀྱང་དེ་ནི་འདས་ཟིན་པ་རེད། ད་ལྟ་དེ་ལྟར་བྱེད་རྒྱུ་ཁག་པོ་རེད། དེར་བརྟེན། འཚེ་བའི་ཐབས་ལམ་གྱི་སྒོ་ནས་ང་ཚོའི་གནད་དོན་འདི་སེལ་ཐབས་ཁྱོན་ནས་མེད།

༧གོང་ས་མཆོག་གིས་ད་དུང་གསུངས་དོན།  ཕྱི་རྒྱལ་གྱི་མི་མང་པོ་ཞིག་གིས་ཁོ་ལ་འདི་ལྟར་བརྗོད་མྱོང་ཏེ།  “གལ་ཏེ།  བོད་མི་ཚོས་འཚེ་བའི་ལམ་ནས་དཀའ་ངལ་སེལ་ཐབས་བྱས་པ་ཡིན་ན། ཕྱིན་ཆད་བོད་དོན་ལ་རྒྱབ་སྐྱོར་མི་བྱེད།”  དེ་ནས་༧གོང་ས་མཆོག་གིས་བཅར་འདྲིའི་སྐབས་སུ་ཡང་འདི་ལྟར་གསུངས་བྱུང་། ཕྱི་རྒྱལ་ན་ཡོད་པའི་བོད་མི་རེ་ཟུང་ཞིག་གིས་རྒྱང་ནས་རྟག་པར་གཞུང་ལ་སྐྱོན་བརྗོད་བྱེད་བཞིན་འདུག་མོད། འོན་ཀྱང་ཁོ་ཚོ་ལ་ལས་ཀ་དེ་བསྒྲུབ་དུ་བཅུག་པའི་སྐབས་སུ། ཁོ་ཚོས་གཞི་ནས་དོན་དག་ཚང་མ་རྒྱང་ནས་མཐོང་བའི་དེ་འདྲའི་ལས་སླ་བོ་ཞིག་མིན་པ་ཤེས་རྒྱུ་རེད།  

ལོ་སྔོན་མའི་ཕྱི་ཟླ་ ༣ པར། ང་དང་སུ་ཞོ་ཁང་ངྷ་རམ་ས་ལར་ཕྱིན་ཏེ། ཟམ་གདོང་རིན་པོ་ཆེ་དང་བཀའ་མོལ་བྱས་པ་དང་དབུ་མའི་ལམ་གྱི་སྐོར་ཡང་གླེང་སློང་བྱས་པ་ཡིན། ངེད་གཉིས་ཁོང་ལ་བཀའ་འདྲི་ཞུས་དོན། ༧གོང་ས་མཆོག་རྒན་ཡོལ་བྱས་པ་དང་གཞུང་འཛིན་མི་སྣ་བརྗེ་སྤོར་བྱས་རྗེས། བོད་མི་ཡིས་དབུ་མའི་ལམ་ལ་འགྱུར་བ་གཏོང་སྲིད་དམ།

ཟམ་གདོང་རིན་པོ་ཆེ་ཡིས་གསལ་བོར་གསུངས་དོན། འགྱུར་བ་འགྲོ་གི་མ་རེད།  བོད་མི་ཕལ་མོ་ཆེ་ཡིས་དབུ་མའི་ལམ་ལ་རྒྱབ་སྐྱོར་བྱེད་བཞིན་ཡོད། མ་ཟད་ཐེངས་འདིའི་སྲིད་སྐྱོང་བའི་འོས་མི་གསུམ་ཆའི་ལངས་ཕྱོགས་ཀྱང་དབུ་མའི་ལམ་རེད། དེར་བརྟེན། སུ་ཞིག་བདམས་ཐོན་བྱུང་ཡང་། དབུ་མའི་ལམ་མུ་མཐུད་གནས་ཡོང་གི་རེད།

དེ་ནས་ངས་འདི་ལྟར་གླེང་སློང་བྱས་པ་ཡིན། ༧གོང་ས་མཆོག་གི་དབུ་མའི་ལམ་ནི་དངོས་ཡོད་དང་མཐུན་པ། ལག་ལེན་དུ་བསྟར་རུང་བ་ཞིག་རེད། གལ་ཏེ། དབུ་མའི་ལམ་དེ་རང་བཙན་གྱི་ཕྱོགས་སུ་བསྒྱུར་བ་ཡིན་ན།  བོད་དོན་ལ་རྒྱལ་སྤྱིའི་དོ་སྣང་ཉུང་དུ་འགྲོ་ངེས། དེང་སྐབས་༧གོང་ས་མཆོག་ཨ་རིར་ཕེབས་ཏེ་ཨ་རིའི་སྲིད་འཛིན་ལ་མཇལ་འཕྲད་གནང་བ་དང་། དེ་བཞིན་འཇར་མན་ལ་ཕེབས་ཏེ་འཇར་མན་གྱི་སྲིད་འཛིན་ལ་ཐུགས་འཕྲད་གནང་གི་ཡོད། ཡིན་ན་ཡང་།  རྒྱ་གཞུང་གིས་དེ་ལ་ངོ་རྒོལ་བྱེད་ཀྱི་ཡོད་པ་མ་ཟད། ༧གོང་ས་མཆོག་ནི་ཁ་བྲལ་བ་ཞེས་སྐྱོན་བརྗོད་བྱེད་བཞིན་ཡོད། 

ཡིན་ན་ཡང་། ནུབ་ཕྱོགས་གཞུང་ཁག་གིས་དེ་ལ་ངོ་རྒོལ་ཤུགས་ཆེན་བྱས་ཏེ། ༧གོང་ས་མཆོག་ནི་ཁ་བྲལ་བ་མིན་པ་དང་ཁོང་གི་དགོངས་པ་ནི་དོན་གྱི་རང་སྲིད་རང་སྐྱོང་རེད་ཅེས་རྗོད་ཀྱིན་ཡོད། ད་དུང་ཁོ་ཚོས་རྒྱ་གཞུང་ལ་༧གོང་ས་མཆོག་དང་མཉམ་དུ་གྲོས་མོལ་བྱ་དགོས་པའིའབོད་སྐུལ་ཡང་ཞུ་བཞིན་ཡོད། གལ་ཏེ། བོད་མི་ཚོས་དབུ་མའི་ལམ་གཡུགས་ཏེ་རང་བཙན་གྱི་ཕྱོགས་སུ་བསྐྱོད་པ་ཡིན་ན། ནུབ་ཕྱོགས་གཞུང་ཁག་གིས་རྒྱ་གཞུང་གིས་གང་བཤད་པ་དེ་ཁས་ལེན་དགོས་པ་ཆགས་ཀྱི་ཡོད་ལ། ༧གོང་ས་མཆོག་དང་རྒྱ་གཞུང་གི་མཇལ་འཕྲད་ཀྱང་ཇི་ལྟར་བྱེད་དགོས་སམ།

ཟམ་གདོང་རིན་པོ་ཆེ་མཆོག་གིས་ངས་དབྱེ་ཞིབ་བྱས་པ་ལ་རྒྱུ་མཚན་གནས་ལུགས་ལྡན་པར་བརྗོད། ཁོང་གིས་གསུངས་དོན། བཙན་བྱོལ་བོད་མི་ཚོར་དབུ་མའི་ལམ་གྱི་སྐོར་ལ་གཏིང་ཟབ་ཀྱི་ངོས་འཛིན་དང་གོ་བ་ཡོད། ཅེས་གསུངས་སོང་།

 ཡང་མི་ལ་ལས་འདི་ལྟར་བརྗོད་སྲིད་དེ། དབུ་མའི་ལམ་དང་འཚེ་བ་མེད་པ་ནི་ཧ་ཅང་ཡག་པོ་ཡོད་ན་ཡང་། ལག་ལེན་དུ་འགྲོ་ཐུབ་བམ།  རྡོ་ལྟ་བུའི་རྒྱ་གཞུང་ལ་མཚོན་ན། དབུ་མའི་ལམ་མངོན་འགྱུར་བྱེད་སྲིད་དམ།

དྲི་བ་འདི་ལྟ་བུའི་སྐོར་ལ་༧གོང་ས་མཆོག་གིས་སྔ་མོ་ནས་གསུངས་ཚར་ཡོད། ཁོས་རྒྱ་ནག་གཞུང་ལ་རེ་བ་བྱེད་ཀྱིན་མེད། ཡིན་ན་ཡང་། རྒྱ་ནག་མི་མང་ལ་རེ་བ་བྱེད་བཞིན་ཡོད། ད་ལོའི་ཕྱི་ཟླ་ ༣ ཚེས་ ༢༩ ཉིན་ནུབ་པེན་གཱལ་ནས་ཀྱང་།  ༧གོང་ས་མཆོག་གིས་ཁོའི་ལངས་ཕྱོགས་འདི་ལ་བསྐྱར་ནན་གྱིས་གསུངས་སོང་། ༧གོང་ས་མཆོག་གིས་གསུངས་དོན། ད་ལྟའི་བར་དུ་དབུ་མའི་ལམ་ལ་རྒྱ་གཞུང་གི་ངོས་ནས་ཡ་ལན་ཡག་པོ་ཞིག་མེད་ན་ཡང་། སྲིད་གཞུང་དང་མི་མང་གང་གཙོ་ཞེ་ན། དེ་ནི་མི་མང་གཙོ་བོའོ། སྲིད་དབང་སྒེར་གཅོད་ཀྱི་གཞུང་ན། གཞུང་ལ་དབང་ཆ་ཆེ་ན་ཡང་། བསམ་བློ་ཕུགས་སུ་བཏང་ན། མི་མང་ཧ་ཅང་ཧ་ཅང་གལ་ཆེན་རེད།

དེ་ནས་༧གོང་ས་མཆོག་གིས་ང་ཚོར་འདི་ལྟར་གསུངས། འདས་པའི་ལོ་ ༢༠ དང་། ལྷག་པར་དུ་ ༢༠༠༨ ཀྱི་རྗེས་ནས། ང་རང་རྒྱ་མི་གང་མང་ལ་ཐུག་མྱོང་། དེ་དག་ཁྲོད་ན་ཤེས་ཡོན་པ་དང་སློབ་མ་སྟོང་ཕྲག་མང་པོ་ཡོད། ཁོ་ཚོ་ཁ་ཤས་ཨ་རི་དང་ཡུ་རོབ་ན་ཡོད་པའི་ཕྱི་སྡོད་སློབ་མ་རེད། ད་དུང་། མིང་གྲགས་ཡོད་པའི་རྒྱ་ནག་གི་ཤེས་ཡོན་པའི་སྡེ་ཡིས་མཉམ་འཛོམས་ཀྱིས་ཚོགས་འདུ་བསྐོངས་ཏེ། དབུ་མའི་ལམ་ངོ་སྤྲོད་བྱེད་པའི་སྐབས་སུ་ཁོ་ཚོས་དེ་ལ་སྤྲོ་སྣང་དང་དགའ་བསུ་ཆེན་པོ་བྱེད་ཀྱིན་འདུག གང་ལྟར།  དབུ་མའི་ལམ་ལ་རྒྱབ་སྐྱོར་བྱེད་མཁན་གྱི་རྒྱ་མི་འབོར་ཆེན་ཡོད། ཅེས་གསུངས་བྱུང་།

༧གོང་ས་མཆོག་གིས་སླར་ཡང་གསུངས་དོན།  དེང་གི་རྒྱ་ནག་ལ་འགྱུར་བ་ཆེན་པོ་འགྲོ་བཞིན་ཡོད། རྒྱལ་ཁབ་ཀྱི་ནང་ལོགས་ན་སྐད་ཆ་བདེན་པ་བཤད་ཐུབ་མཁན་ཡང་ཇེ་མང་ནས་ཇེ་མང་དུ་འགྲོ་བཞིན་ཡོད། དེ་བཞིན། རྒྱ་མིའི་ཁྲོད་ན་དབུ་མའི་ལམ་ལ་རྒྱབ་སྐྱོར་བྱེད་མཁན་ཡང་ཇེ་མང་ནས་ཇེ་མང་དུ་འགྲོ་བཞིན་ཡོད། དེར་བརྟེན། རྒྱ་བོད་གཉིས་ཕན་དབུ་མའི་ལམ་གྱི་ཐབས་ལམ་འདི་ལ་གྲུབ་འབྲས་ཐོབ་པར་བརྒྱ་ཆའི་བརྒྱ་ཡིད་ཆེས་བྱེད་བཞིན་ཡོད།  ཅེས་གསུངས།

ངས་བསམ་པར། ༧གོང་ས་མཆོག་གིས་དབུ་མའི་ལམ་དང་འཚེ་མེད་ཞི་བའི་ལངས་ཕྱོགས་འདི་ནི་བོད་མིའི་རྩ་དོན་ལ་དོན་སྙིང་ཆེན་པོ་ཡོད་པ་མ་ཟད།  ང་ཚོ་རྒྱ་མི་ཚོས་རང་དབང་དང་དམངས་གཙོའི་འཐབ་རྩོད་བྱེད་པའི་ཐད་ལ་ཡང་བློ་སྐྱེད་མི་དམན་མཆིས་སོ་སྙམ།།

མ་རྩོམ་གྱི་འབྲེལ་ཐེག   http://www.rfa.org/mandarin/pinglun/huping/hp-05062013132708.html