དེ་རིང་ཕྱི་དྲོར་བོད་ཀྱི་དགུ་བཅུ་གསུམ་ལས་འགུལ་ཚོགས་པས། རྒྱ་གཞུང་ལ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིའི་ཁོངས་སུ་བསྐྱར་འཛུལ་བྱེད་པའི་འོས་བབ་མེད་པ་དང༌། རྒྱབ་ཤ་དཀར་པོ་ཞེས་པར་ལན་འདེབས་ཀྱི་གསར་འགོད་གསལ་བསྒྲགས་ཤིག་སྤེལ་སོང༌།
དེ་རིང་ཉིན་རྒྱབ་ཆུ་ཚོད་ ༣ པའི་ཐོག བོད་ཀྱི་དགུ་བཅུ་གསུམ་ལས་འགུལ་ཚོགས་པའི་འགྲེམས་སྟོན་ཁང་དུ་ཚོགས་གཙོ་པ་སངས་ཚེ་རིང་ལགས་དང༌། ཚོགས་གཞོན་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས། དྲུང་ཆེ་རྨེའུ་དཀོན་རྒྱམ་ལགས་བཅས་ལྷན་འཛོམས་ཐོག རྒྱ་གཞུང་ལ་བསྐྱར་དུ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིའི་ཁུངས་སུ་འཛུལ་ཞུགས་བྱེད་པའི་འོས་བབ་མེད་པའི་ཐད། ཚོགས་པའི་ངོས་ནས་ཉིན་གྲངས་ ༣ རིང་དྷ་ས་ཁུལ་ནས་བསྡུ་རུབ་བྱས་པའི་མཚན་རྟགས་ ༢༠༣༣ དེ་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་གཙོ་དང་ཚོགས་མི་ཡོངས་ཀྱི་མཚན་ཐོག་ཏུ་འབུལ་རྒྱུ་ཡིན་པ་དང༌། ཟླ་སྔོན་མའི་ཕྱི་ཚེས་ ༢༢ ཉིན་རྒྱ་ནག་གཞུང་གིས་༼ བོད་ལྗོངས་ཀྱི་འཕེལ་རྒྱས་དང་ཡར་ཐོན་བྱུང་བ ༽ཞེས་པའི་རྒྱབ་ཤ་དཀར་པོའི་དེབ་ཕྲེང་བཅུ་པ་འགྲེམས་སྤེལ་འུར་སྒྲོག་བྱས་པར་ལན་འདེབས་ཀྱི་གསར་འགོད་ལྷན་ཚོགས་ཤིག་བསྐྱངས་སོང༌།
ཚོགས་གཙོ་པ་སངས་ཚེ་རིང་ལགས་ཀྱིས་༼བོད་ལྗོངས་ཀྱི་འཕེལ་རྒྱས་དང་ཡར་ཐོན་ བྱུང་བ༽ཞེས་པར་ལན་འདེབས་ཀྱི་བསྒྲགས་གཏམ་སྒྲོགས་སྦྱང་གནང་བའི་ནང༌། “རྒྱ་ནག་གཞུང་གིས་བཤད་པ་ལྟར་བོད་ནང་གི་བོད་མི་ཚོའི་ཆབ་སྲིད་གནས་སྟངས་ཐོག་འདྲ་མཉམ་དང་དྲང་བདེན་ཞིག་ཡོད་ན། ཕྱི་ལོ་ ༢༠༠༩ ལོ་ནས་དེ་རིང་གི་བར་བོད་མི་ ༡༢༡ ཙམ་གྱི་རང་ལུས་མེར་བསྲེགས་དོན་རྐྱེན་དེ་ལྷག་དགོས་དོན་མེད་ལ། ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མས་དབུས་བོད་མི་ཆབ་སྲིད་བཙོན་པ་ཆིག་སྟོང་ཡས་མས་ཤིག་གི་ཆབ་སྲིད་དབང་ཆ་དང༌། ཐོབ་དགོས་པའི་འགྲོ་བ་མིའི་རང་དབང་གི་གོ་སྐབས་ཡོངས་སུ་བཙན་འཕྲོག་བྱས་ཏེ། རྒྱ་ནག་གི་གདུག་རྩུབ་ཤིན་ཏུ་ཆེ་བའི་བཙོན་ཁང་ནང་བཅུག་དགོས་པའི་རྒྱུ་མཚན་མེད། དེར་བརྟེན་རྒྱ་ནག་ནང་གི་འགྲོ་བ་མིའི་ཐོབ་ཐང་དང༌། ལྷག་པར་དུ་གྲངས་ཉུང་མི་རིགས་ཁག་གི་སྟེང་སྤེལ་བའི་ཆབ་སྲིད་ཀྱི་ལངས་ཕྱོགས་ནི་དྲང་བཞག་དང་འདྲ་མཉམ་ཏིལ་འབྲུ་ཙམ་མེད་པར་ཆེས་གདུག་རྩུབ་དང་དྲག་གནོན་ཁོ་ནའི་འོག་ཏུ་འགྲོ་འདུག་བྱེད་དགོས་པའི་ཆབ་སྲིད་ཀྱི་གནས་བབས་ཤིག་བསྐྲུན་ཡོད” ཅེས་བཀོད་འདུག
བསྒྲགས་གཏམ་ནང་མུ་མཐུད་དུ། “ང་ཚོས་ཐག་རིང་པོ་ཞིག་ནས་བརྗོད་མི་དགོས་པར་རྒྱབ་ཤ་དཀར་པོའི་དེབ་འདི་ཉིད་དྲིལ་བསྒྲགས་བྱས་པའི་ཉིན་བཞི་ཡི་རྗེས་ཏེ། ཕྱི་ཟླ་བ་ ༡༠ ཚེས་ ༢༦ ཉིན་ལྷ་སར་ཚོགས་པའི་ལྗོངས་ཡོངས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་ལས་དོན་གྱི་བརྙན་ལམ་ཚོགས་འདུ་ཞེས་པའི་སྟེང༌། བོད་རང་སྐྱོང་ལྗོངས་ཏང་ཨུད་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཏེང་ཞའོ་ཀང་གིས་“ལྗོངས་ནང་ཁུལ་གྱི་མི་སྣ་རྒྱལ་མཚམས་སྒྲོལ་ནས་དུས་འཁོར་དབང་ཆེན་ནང་ཞུགས་རྒྱུ་གཏན་འགོག་བྱེད་པའི་ལས་དོན་ཡག་པོ་བསྒྲུབ་དགོས་”ཞེས་བཀའ་བཏང་ཡོད་པ་ལས་ཀྱང༌། གུང་ཁྲན་ཏང་གིས་བོད་ལ་ཆོས་དད་རང་མོས་ཅི་ཙམ་ཞིག་སྤྲོད་ཀྱི་ཡོད་པ་ར་སྤྲོད་གསལ་པོ་ཡིན། གཞན་ཡང་ཟླ་འདིའི་ཚེས་ ༡ ཉིན་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཁྲཱིན་ཆོན་གོ་ཡིས་“རང་ལྗོངས་ཀྱི་སྤྱི་ལེ་གྲུ་བཞི་མ་ཁྲི་ཚོ་ ༡༢༠ ཡོད་པའི་ཡངས་བའི་ས་གཞིའི་ཐོག་ཏང་གི་གསུང་སྒྲ་ཐོས་ཐུབ་པ་དང་གཟུགས་བརྙན་མཐོང་ཐུབ་པ་བཟོ་རྒྱུ་དང༌། དགྲ་འཛིན་སྟོབས་ཤུགས་དང་ཏཱ་ལའི་སྐྱེས་འཕྲེང་བཅུ་བཞི་པའི་སྐད་སྒྲ་ཐོས་མི་ཐུབ་པ་དང་གཟུགས་བརྙན་མཐོང་མི་ཐུབ་པ་བཟོ་དགོས་”ཞེས་པའི་བརྗོད་བབ་འདི་ཁོ་ནས་ཀྱང་ད་ལྟའི་བོད་ནང་ཆོས་དད་རང་མོས་དང༌། འགྲོ་འདུག་རང་དབང་སོགས་མདོར་ན་འགྲོ་བ་མིའི་ཐོབ་ཐང་ཅི་ཙམ་ཞིག་ཡོད་པ་ལོང་བས་ཀྱང་མཐོང་ཚོད་དང་འོན་པས་ཀྱང་གོ་ཚོད་ཡིན།” ཞེས་བཀོད་དེ། འཛམ་གླིང་ཐོག་གི་དྲང་བདེན་ལ་དགའ་ཞིང་འགྲོ་བ་མིའི་ཐོབ་ཐང་ལ་བརྩི་མཐོང་ཆེ་བའི་རྒྱལ་ཁབ་དང་ཚོགས་སྡེ་ཁག དེ་བཞིན་མི་སྒེར་བཅས་ཀྱིས། རྒྱ་ནག་གཞུང་གི་དྲང་བདེན་གྱིས་ཕོངས་ཤིང་གཏིང་བརྣགས་པའི་སྲིད་ཇུས་ཀྱི་གདོང་རིས་ངོ་མ་དེ་གསལ་རྟོགས་གནང་དགོས་པའི་འབོད་སྐུལ་ཞུས་འདུག
དེ་རྗེས་ཚོགས་གཞོན་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་ཀྱིས། ཟླ་འདིའི་ཕྱི་ཚེས་ ༡༢ ཉིན་རྒྱ་ནག་བསྐྱར་དུ་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བརྒྱད་པའི་ཚོགས་མིའི་ཁུངས་སུ་འཛུལ་ཞུགས་བྱ་འཆར་ཡོད་པ་དེ་ནི་འོས་བབ་མེད་པ་ཞིག་ཡིན་པ་དང༌། དགུ་བཅུ་གསུམ་གྱིས་ཟླ་འདིའི་ཚེས་ ༣ ནས་ཉིན་གསུམ་རིང་མེག་གྷན་དང་ཤེས་རབ་དགའ་ཚལ་སློབ་གླིང༌། སཱ་ར་མཐོ་སློབ་བཅས་སུ་མཚན་རྟགས་བསྡུ་རུབ་ཀྱི་ལས་འགུལ་སྤེལ་ཏེ་ཁྱོན་མཚན་རྟགས་ ༢༠༣༣ བསྡུ་རུབ་བྱས་ཡོད་པ་སང་ཉིན་གློག་འཕྲིན་བརྒྱུད་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྐབས་བདུན་པའི་ཚོགས་གཙོ་རེ་མཱི་གྷ་སེ་ཨེག་ཁཱེ་ལི་སི་ཧན་ཛལ་(RemigiuszAchilles Henczel) མཆོག་གི་མཚན་ཐོག་ཏུ་འབུལ་རྒྱུ་ཡིན་པ་དང༌། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱལ་ཁབ་ ༡༩༢ ཀྱི་ཚོགས་མིའི་མཚན་ཐོག་ཏུ་ངོ་བཤུས་འབུལ་རྒྱུ་ཡིན་པ། འགྲོ་བ་མིའི་ཐོབ་ཐང་ཐོག་ཐུགས་འཁུར་དང་འགན་འཁུར་མཁན་གྱི་རྒྱལ་ཁབ་ཁག་དང༌། དབུ་འཁྲིད་རྣམ་པ། ལྷག་པར་དུ་ལྷན་ཚོགས་དེའི་ཚོགས་མི་རྣམ་པས། རྒྱ་ནག་གཞུང་ཚོགས་མིའི་ཁོངས་སུ་འཛུལ་ཞུགས་ལ་མཐའ་གཅིག་ཏུ་དགག་བྱ་གནང་དགོས་པའི་འབོད་སྐུལ་གནང་སོང༌།
གསར་འགོད་པ། པདྨ་མཚོ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཧ་ཧ་དུས་བབས་ལགས་ངས་མཆན། འགོད་མདུན་ཡོད་ཚེ་ཡང་བསྐྱར་་་་་་་
ངས་ཚོགས་མི་གསར་པ་རྣམས་སུ་འཚམ་འདྲི་ཞུ་རྒྱུ་ཡིན།
ལྷན་རྒྱས་ལས་དོན་སྤེལ་སྙིང་དེ་དོན་ལྡན་དང་ ཕན་འབྲས་གསོན་རེ་ཡོད་པ་མ་ཟད་ད་རེ་འོས་མི་རྣམས་པ་ཤེས་འཇོན་གཉིས་ལྡན་རེད་ཤག་ངོས་རང་ཧ་ཅང་དགའ་པོ་བྱུང་ ལྷག་བསམ་གྱིས་ནུས་ཤུགས་ཡོད་ཀྱང་འདབ་ཤོག་གཉིས་ལྡན་གྱི་ནུས་པ་མེད་ཚེ་དེང་སྐབས་ཁག་པོ་ཡོད་པ་གཟིགས་མོ་བ་ཚོས་སྤྱན་ལམ་དུ་མངའ་བ་ནི་བརྗོད་མ་དགོས་ཤིང་། ད་ནི་སེམས་ཤུགས་ཆིག་སྒྲིལ། ནུས་པ་ཆིག་སྒྲིལ། ལྷག་བསམ་ཆིག་སྒྲིལ། རང་དོན་དོར་སྒྲིལ། བོད་དོན་གཙོ་སྒྲིལ། <འདི་ནང་རང་དང་མི་རིགས་རིག་གཞུང་ལ་རྒྱ་སོགས་ཚུད་ཡོད་པ> བོདརིགས་ཆིག་་སྒྲིལ། བོད་ཀྱི་དཔའ་མཛངས་ལ་བརྒྱབ་སྐྱོར་ཆིག་སྒྲིལ། བོད་རིགས་ཞན་ཆར་གོང་མཐོ་ཆིག་སྒྲིལ། སོགས་རེ་འབོད་ཞུ་བ་ཁ་ནས་ཐལ་སོང་། ཚོགས་མི་རྣམས་པ་གེགས་དབང་བར་ཆད་མེད་ཅིང་བསམ་དོན་ལྷུན་སྒྲུབ་ཡོངས་བའི་བཀྲིས་སྨོན་རྒྱན་ཞུ་རྒྱུ་བཅས
དགུ་བཅུ་གསུམ་ལས་འགུལ་ཚོགས་པས་འདི་འདྲའི་ཁ་ཚ་དགོས་གཏུགས་ཀྱི་ལས་འགུལ་སྤེལ་པར་བསྔགས་བརྗོད་ཞུ་བཞིན་ཡོད། འོན་ཀྱང་ཉིན་གསུམ་རིང་ལ་མཚན་རྟགས་༢༠༣༣་ལས་བསྡུས་མ་ཐུབ་པ་འདིས་ལས་འགུལ་རྒྱ་ཆེན་པོ་མ་སྤེལ་བའམ་སྤེལ་མ་ཐུབ་པ་དང་། ཡང་ན་ཚོགས་སྡེ་གཞན་ལ་མཉམ་རུབ་མ་བྱས་པ་མཚོན་གྱི་ཡོད། སྤྱིར་ལས་འགུལ་མ་སྤེལ་བ་ལས་སྤེལ་རྒྱུ་གལ་ཆེན་ཡིན་ལ་སྤེལ་ན་དོན་སྙིང་ནུས་ཕན་ལྡན་པ་ཞིག་སྤེལ་རྒྱུ་ནི་དེ་བས་ཀྱང་གལ་ཆེན་ཡིན་པར་བསམ། དེར་བརྟེན་ཚོགས་པ་སུ་འདྲ་ཞིག་གི་ལས་འགུལ་སྤེལ་རུང་གཅིག་གིས་གཅིག་ལ་ཕྲག་དོག་དང་མིང་སྐམ་པོ་ཙམ་གཙོ་གཉེར་མི་བྱ་པར་ཕན་འབྲས་ལ་བསམ་གཞིག་བྱ་རྒྱུ་ཧ་ཅང་གལ།
ཧ་ཅང་བཟང་གི ཚོགས་པ་སོ་སོས་རང་རང་ཐད་ནས་གོ་སྐབས་དམ་འཛིན་གྱིས་ལས་འགུལ་སྤེལ་བ་ནི། རང་མི་རིགས་ཀྱི་ལས་དབང་ལ་འགན་འཁུར་བའི་མཛད་སྤྱོད་ཅིག་རེད།