ཁ་སང་པེ་ཅིན་གྱི་ཨ་རིའི་གཞུང་ཚབ་པ་ཆེན་ཆེན་མོ་གྷ་རི་ལོག་མཆོག་གིས་ཨ་རིའི་གཞུང་ཚབ་ནས་རྩ་དགོངས་ཞུ་རྒྱུ་ཡིན་པའི་གསལ་བསྒྲགས་སྤེལ་འདུག
ཁ་སང་ཕྱི་ཚེས་༢༠ ཉིན། རྒྱ་ནག་པེ་ཅིན་དུ་ཡོད་པའི་ཨ་རིའི་གཞུང་ཚབ་གྷ་རི་ལོག་(Gary Locke ) ལགས་ཀྱིས་ ༢༠༡༤ ལོའི་ལོ་མགོར་ཨ་རིའི་གཞུང་ཚབ་ནས་རྩ་དགོངས་ཞུས་ཏེ། ཕྱིར་ཨ་རིར་ལོག་རྒྱུ་ཡིན་པའི་གསལ་བསྒྲགས་སྤེལ་ཡོད་པ་དང་། གསལ་བསྒྲགས་ནང་པེ་ཅིན་དུ་ཨ་རིའི་གཞུང་ཚབ་བྱེད་རྒྱུའི་གོ་སྐབས་བྱུང་བ་ནི་མི་ཚེའི་གཟི་བརྗིད་ཅིག་ཡིན་པ་དང་། རྒྱ་ནག་ཕྱི་འབྲེལ་ལས་ཁུངས་ཀྱིས་ཨ་རྒྱའི་བར་གྱི་འབྲེལ་ལམ་ཡར་རྒྱས་གཏོང་བར་རྒྱབ་སྐྱོར་གང་ལེགས་གནང་ཡོད་སྐོར་བརྗོད་ཡོད་པ་ལས། རྩ་དགོངས་ཞུ་དགོས་པའི་རྒྱུ་མཚན་གང་ཡིན་གསལ་ཁ་མེད་སྟབས། རྒྱ་ནག་གཙོ་བོར་གྱུར་བའི་རྒྱལ་སྤྱིའི་ཐོག་རྩ་དགོངས་ཞུ་དགོས་པའི་རྒྱུ་མཚན་སྐོར་ལ་གླེང་སློང་སྣ་ཚོགས་བྱེད་བཞིན་འདུག
རྒྱ་ནག་གི་སྤྱི་ཚོགས་དྲ་འབྲེལ་ཁག་ནང་། ཨ་རིའི་གཞུང་ཚབ་ཆེན་མོ་ལས་གནས་ནས་རྩ་དགོངས་ཞུ་དོན། པེ་ཅིན་གྱི་མཁའ་རླུང་གཙང་མ་མེད་པར་བརྟེན་དགོངས་པ་ཞུས་པ་ཡིན་ལུགས་བརྗོད་ཡོད་ཀྱང་། ཁོང་གིས་ཁོ་རང་དགོངས་པ་ཞུ་དགོས་དོན་ནི་བུ་ཕྲུག་ཚོར་སློབ་སྦྱོང་ཡག་པོ་ཞིག་སྤྲོད་ཆེད་ཡིན་ཚུལ་གསལ་བཤད་གནང་འདུག
གྷ་རི་ལོག་ལགས་ ༢༠༡༡ ལོར་པེ་ཅིན་དུ་བསླེབས་པ་ནས་བཟུང་། ཁོང་གིས་རྒྱ་ནག་མི་མང་གི་ཁེ་ཕན་ལ་སྲུང་སྐྱོབ་དང་སྤྱི་ཚོགས་དམའ་རིམ་གྱི་གནད་དོན་མང་པོ་ཞིག་ལ་ཐུགས་ཁུར་གནང་ཡོད་པ་མ་ཟད། རྒྱ་རིགས་དམངས་གཙོ་དོན་གཉེར་བ་ཁྲིན་ཀང་ཁྲུན་དང་ཁྲུང་ཆེན་གྲོང་ཁྱེར་ཉེན་རྟོག་ཁང་གི་མགོ་ཁྲིད་ཝང་ལི་ཅིན་གྱི་གནད་དོན་སོགས་མི་མང་གི་ཁེ་ཕན་སྲུང་སྐྱོབ་ཐད་བྱས་རྗེས་མང་པོ་བཞག་ཡོད་ཅིང་། འདི་ལོའི་ཟླ་ ༦ པའི་ནང་བོད་ཀྱི་རྒྱལ་ས་ལྷ་ས་སོགས་སུའང་གཟིགས་སྐོར་དུ་ཕེབས་ཏེ་གནས་ཚུལ་རྒྱུས་ལོན་གནང་ཡོད།
གྷ་རི་ལོག་ལགས་ནི་ཨ་རིའི་རྒྱ་ནག་གཞུང་ཚབ་པ་རྒྱ་རིགས་ཐོག་མ་དེ་ཡིན་ཞིང། ཁོང་ཨ་རིར་བཞུགས་ཡུན་རིང་ཚོང་དོན་དྲུང་ཆེ་དང་རྒྱལ་ས་ཝ་ཤིན་ཌོན་གྱི་མངའ་སྡེའི་བློ་ཆེན་གནང་མྱོང་ཡོད་འདུག ཕྱིས་སུ་ ༢༠༡༡ ལོར་ལས་བསྒྱུར་གྱིས་རྒྱ་ནག་པེ་ཅིན་དུ་ཨ་རིའི་གཞུང་ཚབ་ཆེན་མོར་བསྐོས་ཡོད་ཅིང་། ཁོང་གི་ཉམས་ཆུང་ཡ་རབས་གྱི་སྤྱོད་ཚུལ་དང་ཚུལ་ལྡན་གྱི་གཤིས་ལུགས་སོགས་ལ་རྒྱ་ནག་མི་མང་ཚོས་བསྔགས་བརྗོད་ཆེན་པོ་བྱེད་ཀྱི་ཡོད་འདུག
