ཟླ་འདིའི་ཚེས་ ༢༦ ཉིན་ཉི་ཧོང་གཞུང་གིས་རྒྱ་ནག་གིས་བཏོན་པའི་མཚོ་གླིང་མཁའ་ཐོག་སྲུང་སྐྱོབ་ཀྱི་དབྱེ་མཚམས་དེར་དང་ལེན་བྱེད་རྒྱུ་མིན་ལུགས་བརྗོད་འདུག
ཁ་སང་སྔ་དྲོར་ཉི་ཧོང་གཞུང་གིས་རྒྱལ་ཁབ་བདེ་འཇགས་སྲུང་སྐྱོབ་ཀྱི་ཚོགས་འདུ་བསྡུས་ཏེ། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་རྒྱལ་སྲུང་ལས་ཁུངས་ཀྱིས་ཞི་བདེ་རྒྱ་མཚོའི་གླིང་ཕྲན་ཁུལ་དུ་མཁའ་ཐོག་སྲུང་སྐྱོབ་ཀྱི་དབྱེ་མཚམས་ཐིག་ཚད་ཅིག་ཕྱིར་བསྒྲགས་བྱས་པ་དེར་དང་ལེན་བྱས་མེད་པ་མ་ཟད། ཉི་ཧོང་མཁའ་འགྲུལ་ལས་ཁུངས་གཙོས་རྒྱལ་ཡོངས་མཁའ་འགྲུལ་ལས་ཁུངས་ཁག་ནས་རྒྱ་གཞུང་ལ་མཁའ་འགྲུལ་ལས་འཆར་སྤྲོད་རྒྱུ་མཚམས་འཇོག་བྱེད་དགོས་པའི་གསལ་བསྒྲགས་སྤེལ་བ་ལྟར། ཉི་ཧོང་རྒྱལ་ཡོངས་མཁའ་འགྲུལ་ལས་ཁུངས་ཁག་གིས་རྒྱལ་ནང་འགྲིམ་འགྲུལ་ལས་ཁུངས་ལ་དེ་རིང་ནས་བཟུང་རྒྱ་གཞུང་ལ་མཁའ་འགྲུལ་ལས་འཆར་སྤྲོད་རྒྱུ་མཚམས་འཇོག་བྱ་རྒྱུ་ཡིན་ཚུལ་བརྗོད་ཡོད་འདུག
ཁ་སང་རྒྱ་ནག་ཕྱི་འབྲེལ་ལས་ཁུངས་ཀྱིས་གསར་འགོད་ལྷན་ཚོགས་ཤིག་བསྡུས་པའི་ཐོག ཉི་ཧོང་གི་གསར་འགོད་པ་ཞིག་གིས་གལ་སྲིད་ཉི་ཧོང་ཕྱོགས་ནས་མཁའ་འགྲུལ་ལས་འཆར་སྤྲོད་རྒྱུ་དང་ལེན་མ་བྱས་ཚེ། རྒྱ་ནག་གཞུང་གིས་དྲག་ཤུགས་ལ་བརྟེན་ཏེ་ཡ་ལན་སློག་རྒྱུ་ཡིན་མིན་དྲིས་པར་རྒྱ་ནག་གི་ཕྱི་སྲིད་མགྲིན་ཚབ་པ་ཆིན་ཀང་གིས། རྒྱ་ནག་ཕྱོགས་ནས་གནས་བབ་ལ་གཞིགས་ཏེ་དྲག་ཤུགས་གྱི་ཐབས་ལམ་ལ་བརྟེན་རྒྱུ་ཡིན་པ་དེ་སྔའི་བརྡ་ཁྱབ་ནང་ཁ་གསལ་བཀོད་ཡོད་ལུགས་དང་། ཕྱི་ཚེས་ ༢༣ ཉིན་གྱི་བསྒྲགས་ཡིག་གཞི་རྩར་བཟུང་སྟེ་ཉི་ཧོང་གིས་ངེས་པར་དུ་མཁའ་འགྲུལ་ལས་འཆར་སྤྲོད་དགོས་སྐོར་བརྗོད་འདུག
ཕྱི་ཚེས་ ༢༦ ཉིན་གསར་འགོད་ལྷན་ཚོགས་ཐོག་ཉི་ཧོང་གི་རྒྱལ་སྲུང་བློན་ཆེན་(Itsunori Onodera)དང་ཕྱི་འབྲེལ་བློན་ཆེན་(Fumio Kishida)གཉིས་ཀྱིས། ཉི་ཧོང་གིས་མཚོ་གླིང་གནད་དོན་ཐོག་དོ་ཁུར་ཡོད་པའི་ཨ་རི་དང་ཀོ་རི་ཡ། ཐའེ་ཝན་སོགས་དང་ཕྱོགས་ཡོངས་ནས་མཉམ་འབྲེལ་བྱས་ཏེ། རྒྱ་ནག་ལ་བྱེད་ཐབས་དེ་རྩིས་མེད་གཏོང་དགོས་པའི་རེ་བ་འདོན་རྒྱུ་ཡིན་ལུགས་བརྗོད་འདུག
