དགོས་སར་ཆད། མི་དགོས་སར་ལྷག

དགེ་བཤེས་བློ་ལྡན།

སྤྱིར་འཛམ་གླིང་འདིའི་ནང་ཆོས་ལུགས་དང་ལྟ་གྲུབ་མི་འདྲ་བ་ཇི་སྙེད་ཅིག་ཡོད་རུང་མི་རྣམས་ཆོས་ལུགས་དེ་དང་ལྟ་གྲུབ་དེ་ལ་དོ་སྣང་དང་དད་པ་སོགས་བྱེད་དང་མི་བྱེད་ནི་སོ་སོའི་རང་དབང་ལས་བཙན་བཀའ་གཏོང་མཁན་མེད་ལ། ཅི་སྟེ་བཙན་དབང་གིས་བསྐུལ་ན་འགྲོ་བ་མིའི་རིགས་ཀྱི་ཀུན་སྤྱོད་ལས་འདས་ཤིང་རང་དབང་གི་ཐོབ་ཐང་བཙན་འཕྲོག་བྱས་པ་ཞིག་ཏུ་བརྩིས་པ་ལས་དྲང་བདེན་གྱི་ཀུན་སྤྱོད་རང་བཞིན་ལྡན་པ་ཞིག་ཏུ་ག་ལ་བགྲངས།

འོན་ཀྱང་འཚམས་རེར་ང་ཚོས་ལས་དོན་དངོས་ཐོག་འབབ་སྐབས་རྒྱུ་མཚན་དང་མི་ལྡན་པ་དང་དུས་རབས་ཀྱི་རྗེས་སུ་གོམ་པ་རྒྱག་མ་ཐུབ་པ་ཡང་ན་ཆེས་ཡིད་སྐྱོ་བ་ཞིག་ལ་༧གོང་ས་མཆོག་གི་བཀའ་དགོངས་ལ་རྟོག་དཔྱོད་ཀྱི་རྩལ་རྫོགས་མ་ཐུབ་པའི་འཐུས་ཤོར་གྱི་རྣམ་པ་དུ་མ་ཞིག་མངོན་རྒྱུ་ཡོད། དཔེར་ན། སློབ་གྲྭ་ཁག་གི་ཆོས་དགེའམ་ལྟ་གྲུབ་སློབ་དགེར་བཙན་དབང་གིས་སྔ་དགོང་ཞལ་འདོན་འཚོགས་སྐབས་འགྲོ་དགོས་པའི་སྒྲིག་གཞི་བཟོས་པ་ལྟ་བུ་དེ་རེད།

རང་ཉིད་སིམ་ལ་གཏན་སློབ་ཏུ་གཞི་རིམ་ནས་འགྲིམ་སྐབས་བཙན་བཀའི་སྒྲིག་གཞི་འདི་ལྟར་ཆོས་དགེའམ་ལྟ་གྲུབ་སློབ་དགེ་ལ་བཀོལ་སྤྱོད་བྱས་པ་ཞིག་ཚད་མས་འཇལ་མྱོང་མེད། ལར་ནས་ལྟ་གྲུབ་རིས་མེད་སློབ་གྲྭའི་ཁོར་ཡུག་ཅིག་དང་དེ་ཡང་ཆོས་བྱེད་པའི་གནས་སྐབས་ཤིག་ཏུ་སྐོར་སྲུང་བ་ལྟ་བུ་འགན་བདག་དང་ཆོས་དགེ་བཅས་ཀྱིས་བསྐོར་ནས་མི་ངོ་རེ་རེའི་ཁ་ནས་ཞལ་འདོན་སྐྱོར་མིན་རྟག་ཏུ་བལྟ་སྲུང་བྱས་དང་བྱེད་མུས་ཀྱི་ལམ་སྲོལ་འདི་དུས་སྐབས་དང་འཚམ་པ་ཞིག་ཏུ་གཏན་ནས་མ་མཐོང་།

ལམ་སྲོལ་འདི་ལ་གཟུ་བོས་བལྟས་ན་དམར་པོ་གུང་ཁྲན་སྲིད་གཞུང་གིས་རྒྱལ་གཅེས་ཆོས་གཅེས་ཟེར་བའི་བཙན་སྒྲིག་བཀོལ་སྤྱོད་སྐབས་མི་ངོ་རེ་རེའི་ཁ་ནས་བཙན་བཀའ་བཅད་པའི་བརྗོད་པ་དེ་འདོན་མིན་རྟོག་ཞིབ་བྱས་པ་དང་ཅིའི་ཕྱིར་མི་མཚུངས། ང་ཚོས་རིས་མེད་སློབ་གྲྭའི་ཁོར་ཡུག་ཅིག་ཏུ་ཆོས་བྱེད་པའི་སྐབས་བལྟ་སྲུང་ནན་པོ་འདི་ལྟ་བུའི་བྱེད་སྟངས་དེ་ནི་གོ་ལ་འདིའི་སྟེང་གི་ཆོས་བྱེད་པ་ཡེ་ཤུ་དང་ཁ་ཆེ། ཧིན་རྡུ་སོགས་ནམ་མཁའི་སྐར་ཚོགས་ལྟར་ཡོད་པ་དེ་དག་གི་ཆོས་བྱེད་ལུགས་དང་ཡང་ཡོངས་སུ་འགལ་ཟླར་མངོན།

ང་ཚོ་ནི་སྤྱིར་ནང་པ་དང་ཡང་སྒོས་བོད་རིགས་ནང་པའི་སྤྱི་ཚོགས་ཤིག་གི་ཆོས་བྱེད་སྟངས་དེ་དམིགས་བསལ་ཁྱད་དུ་འཕགས་པ་ཞིག་དགོས་པ་མ་ཡིན་ནམ། ལམ་སྲོལ་ངན་པ་འདི་ལྟ་བུ་ནི་སྔར་སློབ་གྲྭ་ཁག་ཏུ་མེད་ཀྱང་བར་ལམ་ཞིག་ནས་བཙན་སྒྲིག་འདི་སུ་ཡིས་བཀས་བཅད་ཅིང་དམིགས་ཡུལ་དང་དགོས་པ་གང་ལ་དམིགས་པའང་ཆ་མ་རྟོགས། གང་ལྟར་༧གོང་ས་མཆོག་གིས་མང་ཚོགས་དང་ཤེས་རིག་ཚོགས་ཆེན་སྐབས་སོ་སོ་དང་སློབ་གྲྭ་ཁག་ཏུ་དུས་ནས་དུས་སུ་ཡང་ནས་ཡང་དུ་སློབ་གྲྭའི་ཆོས་དགེའམ་ལྟ་གྲུབ་སློབ་དགེ་བཙུགས་པའི་ཐོག་མའི་དགོངས་གཞི་དང་རེ་འདུན་བཅས་ཀྱི་བཀའ་སློབ་གང་གནང་བ་དེ་དག་གཏན་ནས་མ་རྟོགས་པའམ་རྟོགས་ཀྱང་བཤད་ཡམ་དུ་བརྩིས་པ་གང་ལྟར་གནད་དོན་འདི་ནི་ཏན་ཏན་དགོས་སར་ཆད། མི་དགོས་སར་ལྷག་པ་ལྟ་བུ་འགྱུར་བར་མཐོང་།  

དགོས་སར་ཆད་པ་ནི་དུས་རབས་ཉི་ཤུ་རྩ་གཅིག་པའི་ནང་པའི་སློབ་གྲྭ་ཞིག་གི་ཞལ་འདོན་ཚོགས་པའི་ཁོར་ཡུག་དེ་ཕྱི་ནས་སྒྲིག་འཛུགས་ཀྱིས་བདམས་པའི་རྣམ་པ་ཞིག་མ་ཡིན་པར་སློབ་མ་ཚོའི་སེམས་ནང་རང་བཞིན་གྱིས་དང་སྣང་དང་རང་དབང་གི་སེམས་པའི་སྒོ་ནས་ཞལ་འདོན་སྐྱོར་བའི་གོམས་གཤིས་ཤིག་ངེས་པར་སྐྲུན་དགོས་པ་དང་། ལྷག་པར་ཞལ་ནས་འདོན་པའི་ཚིག་བཟང་པོ་དག་གི་དོན་རྣམས་ཡིད་ལ་ཤར་སྒོམ་དང་འདྲེས་ནས་འདོན་པའི་གོམས་གཤིས་འཇགས་པའི་ཁོར་ཡུག་ཁྱད་པར་བ་སྟེ་ཕྱི་སྐལ་ལྡན་དང་བ་འདྲེན་པའི་མིག་རྒྱན་ཞིག་ཏུ་བཟོ་དགོས་པའི་བཀའ་ཡིས་བཅད་ན་ཕྲན་བུའི་བཟང་ཕྱོགས་ཤིག་ཏུ་མཐོང་ཞིང་། ༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་ཚོ་དུས་རབས་ཉི་ཤུ་རྩ་གཅིག་གི་ནང་པ་བྱ་དགོས་པར་གསུངས་པའི་གནད་དོན་དེར་ཕྲན་བུའི་དགོངས་བཞེས་ཀྱིས་བསྒྱུར་བཅོས་དང་ཡར་རྒྱས་ཀྱི་མདུན་སྐྱོད་བྱ་དགོས་ཀྱང་དེ་ནི་ད་བར་དགོས་སར་ཆད་པ་དེ་ཡིན།

ཡང་དུས་རབས་ཉེར་གཅིག་པའི་བོད་རིགས་ནང་པའི་སོན་རྩ་གསོ་སྐྱོང་བྱེད་སའི་ཁོར་ཡུག་ཅིག་གིས་སྤྱིར་འཛམ་གླིང་ནང་གི་ཆོས་བྱེད་པ་གཞན་སུ་གཅིག་དང་མི་མཐུན་པ་ལྟ་ཅི། སྐོར་སྲུང་བའི་འཇིགས་སྣང་གི་འོག་ཏུ་ཆོས་བྱེད་ལུགས་དེ་ལྟ་བུ་ནི་དུས་རབས་དང་གོམ་པ་འདེགས་འཇོག་མ་ཐུབ་པ་མ་ཚད་ཤིན་ཏུ་རྗེས་ལུས་ཀྱི་རྣམ་པ་གསལ་པོ་ཞིག་ཡིན་པས་ཆོས་དགེའམ་ལྟ་གྲུབ་སློབ་དགེ་ལ་རྟག་ཏུ་ཞལ་འདོན་སྐབས་སྐོར་སྲུང་བ་བསྲུང་བྱའི་ལས་དོན་གཉེར་དུ་གཏོང་བ་ལྟ་བུའི་བཙན་བཀའི་ཕྱག་རྒྱ་ཆེན་པོ་དེ་དུས་རབས་དང་གོལ་བས་མི་དགོས་སར་ལྷག་པ་དེ་ཡིན།

དེས་ན་ལྟ་གྲུབ་སློབ་དགེ་རྣམ་པར་བཀོལ་བའི་བཙན་བཀའི་ལས་དོན་དེ་ཡོངས་སུ་བསྐྱུར་ཏེ་བདུན་རེའི་ནང་སློབ་མ་ཚོས་ངག་ནས་གསུང་བའི་ཚིག་བཟང་པོ་དག་གི་དོན་རྣམས་འགྲེལ་བརྗོད་དང་འབྲེལ་སྒོམ་རྒྱག་སྟངས་ཀྱི་གོམས་གཤིས་བཟང་པོ་སློབ་མ་ཚོར་འཇགས་ཐུབ་པའི་ལས་དོན་བཀོལ་ཐུབ་ན། ད་གཟོད་༧གོང་ས་མཆོག་གིས་སློབ་གྲྭ་ཁག་ཏུ་ལྟ་གྲུབ་སློབ་དགེའམ་ཆོས་དགེ་བསྐོ་འཇོག་བྱས་པའི་ཐོག་མའི་དགོངས་གཞི་དེ་སྒྲུབ་ཅིང་། ལྷག་པར་གཞོན་སྐྱེས་ཚོ་དུས་རབས་ཉེར་གཅིག་པའི་བོད་རིགས་པའི་ནང་པའི་མཚན་ཉིད་རྫོགས་ཐུབ་པ་ལྟ་ཅི་ཆོས་ལ་རྒྱུ་མཚན་ཤེས་པའི་དད་སྣང་དང་རྒས་ཤིང་འཁོགས་པའི་སྐབས་སུའང་ཆོས་ཀྱི་སྣང་བ་མ་ནུབ་པར་ཡོང་ངེས། དེ་ནི་མི་རབས་གསར་བ་ཚོར་སྒྲུབ་པའི་ཞབས་འདེགས་བླ་ན་མེད་པ་ཞིག་ཡིན་ན་ད་ལྟའི་སློབ་གྲྭ་ཁག་གི་སྔ་དགོང་ཞལ་འདོན་སྐབས་སུ་ཆོས་དགེ་རྟག་ཏུ་བསྲུང་བྱར་བཀོལ་བའི་བཙན་བཀས་བཅད་པའི་མུས་ལོང་གི་ལམ་ལུགས་དེ་བསྐྱུར་ཏེ། དུས་རབས་ཉེར་གཅིག་པའི་ནང་པའི་སློབ་གྲྭ་ཞིག་གི་ཞལ་འདོན་འཚོགས་སྟངས་ཤིག་ཏུ་ངེས་པར་བསྒྱུར་བཅོས་གཏོང་དགོས་པར་སེམས་སོ།། །།