དྭཊ་པོ་བཀའ་བརྒྱུད་ནང་གཞན་སྟོང་འདོད་མཁན་མང་པོ་བྱུང་།

རྒྱལ་བ་ཇོ་ནང་བའི་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་ཐེངས་བཅུ་གཉིས་པ་དེ་ཟླ་སྔོན་མའི་ཚེས་ ༢༨ ནས་གནས་མཆོག་རྡོ་རྗེ་གདན་དུ་དབུ་འཛུགས་གནང་ཡོད་འདུག

གནས་མཆོག་རྡོ་རྗེ་གདན་དུ་ཟླ་སྔོན་མའི་ཕྱི་ཚེས་ ༢༨ ཉིན་ནས་དབུ་འཛུགས་ཀྱིས་ཉིན་བདུན་རིང་གི་དཔལ་རྒྱལ་བ་ཇོ་ནང་བའི་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་ཐེངས་བཅུ་གཉིས་པ་འཚོགས་བཞིན་ཡོད་པ་དང་། དེར་ཆོས་ལུགས་རིས་མེད་ཀྱི་བླ་སྤྲུལ་མཁན་གསུམ་ཁྱོན་ ༥༠༠ ནས་ ༢༠༠༠ ལྷག་ཞུགས་ཡོད་འདུག ཉིན་ལྔ་བའི་སྨོན་ལམ་གྱི་ཚོགས་མགོན་དུ་དཔལ་རྒྱལ་བ་ཀརྨ་པ་མཆོག་ཆིབས་སྒྱུར་བསྐྱངས་ཏེ། རིས་མེད་ཆོས་བརྒྱུད་ཁག་གི་བླ་མ་གོང་མ་རྣམས་ཀྱི་དམ་ཚིག་གཅིག་འབྲེལ་དང་ཇོ་ནང་དགོན་སྡེ་ཁག་གི་སློབ་གཉེར་གནང་ཕྱོགས་བཅས་ཀྱི་ཐོག་བཀའ་སློབ་གནང་ཡོད་འདུག

ཚངས་དབྱངས་རྒྱ་མཚོ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཐེངས་འདིར་རྒྱལ་བ་ཀརྨ་པ་མཆོག་གིས། “སྤྱིར་རང་རེ་བོད་གངས་ཅན་ལྗོངས་ལ་བླ་མའི་མཚན་མི་འདྲ་བ་དང་། དགོན་པའི་ཆགས་རབས་མི་འདྲ་བའི་ཐོག་ནས་ཆོས་བརྒྱུད་ཀྱི་མིང་མི་འདྲ་བ་བྱུང་བ་རེད་མ་གཏོགས། དོན་ལ་རྒྱ་གར་འཕགས་ཕའི་ཡུལ་ནས་སངས་རྒྱས་ཀྱི་བསྟན་པ་གཅིག་མར་བརྒྱུད་ཡོད་པ་ལས། བསྟན་པ་ཁ་ཁ་སོ་སོ་ཞིག་ཡོད་པ་མ་རེད། སངས་རྒྱས་ཀྱི་བསྟན་པ་ཡིན་པ་གཅིག་པ་རེད། བསྟན་པའི་བདག་པོ་སྟོན་པ་སངས་རྒྱས་བཅོམ་ལྡན་འདས་ལ་སྐྱབས་སུ་འགྲོ་བ་གཅིག་པ་ཆགས་བསྡད་ཡོད་རེད། སྟོན་པ་གཅིག་དང་བསྟན་པ་གཅིག་ཡིན་པའི་གནད་མཁྱེན་པ་བྱས་ཏེ་ཕན་ཚུན་དམ་ཚིག་འོ་ཆུ་གཅིག་འདྲེས་བྱེད་དགོས་པ་དེ་གལ་ཆེན་པོ་ཞེ་དྲག་རེད་དྲན་གྱིན་ཡོད” ཞེས་གསུངས་ཡོད་འདུག  

ཡང་ཁོང་གིས་མུ་མཐུད་དུ་ཇོ་ནང་དང་དྭགས་པོ་བཀའ་བརྒྱུད་གཉིས་བར་གྱི་འབྲེལ་ལམ་སྐོར་གསུངས་དོན། “ལྷག་པར་དུ་རྒྱལ་བ་ཇོ་ནང་པའི་ཆོས་བརྒྱུད་དང་། མཉམ་མེད་དྭགས་པོ་བཀའ་བརྒྱུད་པའི་ཆོས་བརྒྱུད་གཉིས་ལ་མཚོན་པ་ཡིན་ན། ཕན་ཚུན་ལས་དང་སྨོན་ལམ་གྱིས་དམ་ཚིག་གི་འབྲེལ་བ་ཟབ་མོ་ཞེ་དྲག་ཆགས་བསྡད་ཡོད་རེད། དེ་རེ་རེ་བཞིན་དེ་རིང་འདིར་ངས་ཞུ་བའི་གོ་སྐབས་མི་འདུག་སྟེ། རྒྱལ་བ་ཇོ་ནང་པས་བཤད་པའི་གཞན་སྟོང་གི་ལྟ་གྲུབ་དེ་དྭགས་པོ་བཀའ་བརྒྱུད་ཀྱི་ཕྱོགས་ལ་ཡང་རང་གི་དགོངས་པའི་མཐར་ཐུག་ཏུ་བཞེད་པའི་མཁས་གྲུབ་མང་པོ་ཞིག་བྱུང་པ་རེད། ལྷག་པར་དུ་ཀརྨ་ཀམ་ཚང་ནང་ལོགས་ལ་ཡང་ཀུན་མཁྱེན་རང་བྱུང་རྡོ་རྗེ་དང་། རྒྱལ་བའི་དབང་པོ་ཆོས་གྲགས་རྒྱ་མཚོ། དེ་བཞིན་སི་ཏུ་པཎ་ཆེན་ཆོས་ཀྱི་འབྱུང་གནས་དང་། འཇམ་མགོན་བློ་གྲོས་མཐའ་ཡས་ལ་སོགས་པ་ཚད་མར་གྱུར་པའི་མཁས་གྲུབ་མང་པོ་ཞིག་གིས་རང་གི་ལྟ་བའི་མཐར་ཐུག་དེ། གཞན་སྟོང་དབུ་མ་ཆེན་པོར་བཞེད་ནས་འཇིགས་མེད་སེང་གེའི་སྒྲ་ཆེན་པོ་བསྒྲགས་པ་ཡོངས་སུ་གྲགས་བསྡད་པ་དེ་འདྲ་རེད། དེ་བཞིན་ཇོ་ནང་གི་སྦྱོར་དྲུག་ལ་སོགས་པ་དཔལ་དུས་ཀྱི་འཁོར་ལོའི་སྦྱོར་དྲུག་མཉམ་ལེན་དེ་ཚོ་དངོས་གནས་གཞན་དང་མ་འདྲ་བའི་མཉམ་ལན་གྱི་རྒྱུན་ཉམས་པ་མེད་པ་དེ་འདྲ་ཅིག་ཡོད་པ་དེ་༸གོང་ས་སྐྱབས་མགོན་ཐམས་ཅད་མཁྱེན་པ་ཆེན་པོ་མཆོག་གིས་ཀྱང་བསྟོད་བསྔགས་ཀྱི་ཡུལ་འདྲ་བོ་ཆགས་བསྡད་ཡོད་རེད། དེ་འདྲ་ཡིན་དུས་ལྟ་བ་རེད། དེ་བཞིན་གསང་སྔགས་ཀྱི་ཉམས་ལེན་རེད། གང་ཅིའི་ཆ་ནས་ཡིན་ནའང་གཞན་དང་མཚུངས་ཟླ་མ་མཆིས་པའི་ཆོས་བརྒྱུད་ཅིག་ཆགས་བསྡད་ཡོད་རེད།” ཞེས་སོགས་བཀའ་སློབ་གནང་ཡོད་འདུག

དཔལ་ཇོ་ནང་བའི་སྨོན་ལམ་ཆེན་མོ་འཛམ་གླིང་ཕན་བདེའི་གྲུ་ཆར་ཞེས་པ་འདི་ནི། བལ་ཡུལ་ཇོ་ནང་དགོན་པའི་འགན་འཛིན་མཆོག་སྤྲུལ་བཀྲ་ཤིས་རྒྱལ་མཚན་མཆོག་གིས་ཕྱི་ལོ་ ༢༠༠༠ ལོར་ཐོག་མར་གསར་འཛུགས་མཛད་ཅིང་། ཐེངས་འདི་སྐབས་བཅུ་གཉིས་པ་ཡིན་འདུག

གསར་འགོད་པ། པདྨ་མཚོ།