སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཅུ་དྲུག

ཡ་ཨ་རོགས་ལས་ངན་པོ། སྡུག་བསྔལ་ཞིག་གི་ནང་དུ་ལྷུང་ནས་བསྡད་ཡོད་ནི་མིན་ན། དེ་འདྲ་ཡིན་ན་ནི་ང་རང་ལ་ཤོད་དང་། རྒན་པོ་ང་ཉམ་མྱོང་ཆེ་ནི་རེད། སྟོད་ཉི་མ་ལྷ་ས་ནས་སྨད་རྒྱ་ནག དེ་ནས་འཕགས་ཡུལ་རྒྱ་གར་དུ་སླེབས་རེག་བར་དུ་སྐྱིད་སྡུག་གཉིས་ཀ་རིག་མྱོང་ལ། རོགས་བཟང་ངན་གཉིས་ཀ་འགྲོག་པའི་ཁ་གྲངས་བཤད་ན་ཁྱེད་རང་ཡིད་ཆེས་རྒྱུ་ཡང་དཀའ་མོ་ཡིན་ཟེར་ནས་བཤད།

སྐབས་དེར་བློ་བཟང་ཡང་། རོགས་བཟང་ངན་གཉིས་ཀ་འགྲོག་ནས་ཟེར་བ་དེས་གང་ཞིག་ནས་འདྲུད་དེ་འོང་བ་ལྟར། རེད་ལགས། སངས་རྡོར། ཁ་སང་དེ་རིང་མི་དགོས་ས་ཞིག་ནས་བུད་མེད་ཅིག་གི་ཆེད་དུ་བསམ་བློ་འདྲ་བཏང་ནས་འཐོམ་བསྡད་ཡོད། ཉེ་སྔོན་ངེད་གཉིས་ལྷན་གཅིག་དུ་ཟ་ཁང་འདིར་ལས་ཀ་བྱས་པ་ཡིན་མོད། སྤྱིན་བདག་སྔོན་མ་དེས་ཟ་ཁང་བཙོང་རྒྱུའི་སྐད་ཆ་གོ་ནས་མོ་རང་ལས་ཀ་ནས་འབུད་སོང་བ་རེད། ངེད་གཉིས་འགྲོག་ཡུན་ཧ་ཅང་ཐུང་ན་ཡང་། དངོས་ནས་ཕན་ཚུན་ལ་བྱམས་པོ་དང་འདྲིས་པོ་ཞིག་ཆགས་སོང་ཞེས་བཤད།

སངས་རྡོར་སྐད་ཤུགས་ཆེན་པོས་དགོད་ཞོར་དུ། བན་ལོག་མི་ཟེར་ན་ཅི་ཟེར། བུད་མེད་དེ་འདྲ་ཞིག་གི་ཆེད་དུ་སེམས་འཁྲལ་བྱེད་དགོས་ན། ང་ནི་སེམས་འཁྲལ་བྱས་དེ་སྨྱོས་ཚར་བ་ཡོད། རེད་རེད། མི་འདྲ་ནི་མ་རེད། ཀུ་རེ་ཡིན། བུད་མེད་གང་འདྲ་ཞིག་རེད་དམ། གང་ནས་རེད། ཁྱེད་གཉིས་ལ་དེ་འདྲའི་བློས་མི་གཏོང་བའི་སྐད་ཆ་གང་ཞིག་ལྷག་པ་རེད་ཅེས་དྲིས།

བློ་བཟང་གིས་མགོ་བོ་ཕུར་ཕུར་ཞིག་བྱེད་ཞོར་དུ། མོ་རང་ནི་བྱིས་པ་གཉིས་ཀྱི་ཨ་མ་ཡིན་ལ། བོད་ནས་འབྱོར་བའི་ལྷ་སའི་ཁུལ་གྱི་བུད་མེད་ཅིག་ཡིན། རྒྱ་གར་དུ་འབྱོར་ནས་མི་ལོ་བཅུ་ལྷག་ཕྱིན་འདུག དེང་ཐོག་ངེད་གཉིས་ལ་སྤྱིར་བཏང་གི་སྐད་ཆ་ཞིག་ལས་གང་ཡང་མེད་ཀྱང་། ཕྱིས་སུ་ཕན་ཚུན་སེམས་ཐག་ཉེ་རུ་ཕྱིན་ནས་གང་ནས་མགོ་བཙུགས་པ་མ་ཤེས་པར་ངས་ཁོ་མོ་ལ་འོ་ཞིག་ཀྱང་བསྐྱལ་བ་ཡིན། དེ་ནས་བཟུང་དེ་ཕན་ཚུན་ལ་འཐམ་ནས་འོ་བྱེད་རྒྱུ་དེ་ནི་རྒྱུན་ལྡན་ལྟ་བུ་ཞིག་དུ་གྱུར་ནས་ངས་མོ་རང་ལ་ལུས་འབྲེལ་ཀྱང་འཛུགས་རྩིས་བྱས་པ་ཡིན། རེད་དེ། གནས་སྐབས་རིང་མོ་རང་གི་རེ་འདོད་ལྟར། ལུས་འབྲེལ་གཏན་ནས་བཞག་མེད། མོ་རང་ལས་ཀ་ནས་བུད་རྗེས་སུ། ཡང་ཡང་ང་དང་ཐུག་འཕྲད་བྱེད་ཀྱི་ཡོད་ཟེར་ཞོར་དུ་སངས་རྡོར་གྱི་གདོང་ལ་བལྟས།

སངས་རྡོར་གྱིས་ཐ་མག་རྐང་གཅིག་ཁ་ནང་དུ་འཇོག་ཞོར་དུ། ཡ་དེ་ནས་ཟེར་དུས། བློ་བཟང་གིས། ཉིན་ཞིག་མོ་རང་གིས་ང་རང་ལ་ལྷམ་མགོ་བཟང་བོ་ཞིག་མེད་པ་ཡང་ཤེས་ནས་ཨུ་ཚུགས་བརྒྱབ་དེ་ལྷམ་མགོ་གསར་བ་འདི་ཉོ་བྱེད་ཀྱི་དངུལ་ཡང་མོ་རང་གིས་ང་རང་ལ་ལག་རྟགས་སུ་སྤྲད་དེ་ང་རང་གི་ཉོས་པ་ཡིན་ཟེར་ཞོར་དུ་གོན་ཡོད་པའི་ལྷམ་མགོ་གསར་བ་དེ་གྲོགས་པོ་སངས་རྡོར་ལ་བསྟན།

སངས་རྡོར་གྱིས་དགོད་ཙམ་བྱས་དེ་ཁ་རོག་གེར་བསྡད་དུས། བློ་བཟང་གིས་དེ་ནས་མི་རིང་བའི་ཉིན་ཞིག་ལ་ང་རང་ལ་འཁྲིས་ཀྱི་ཚོང་ཁང་ནང་དུ་ཁ་པར་ཞིག་འབྱོར་ནས་མོ་རང་ལ་དོན་དག་གལ་ཆེན་ཞིག་ཡོད་རབས་ཟེར་ནས་ང་བོས་པ་ལྟར། ང་རང་ཡང་འབོད་སའི་ས་ཆ་དེར་སོང་དུས། མོ་རང་གིས་སྔ་ས་ནས་སྒུག་ནས་འདུག ཁོ་མོས་ང་རང་ལ་རེ་བ་ཞིག་ཞུ་བཞིན་འདུག དེ་ནི་འདི་འདྲ་ཞིག་རེད་ཅེས་བཤད་རྩིས་བྱེད་བཞིན་པའི་སྐབས་དེར། ཟ་ཁང་དུ་སྐུ་མགྲོན་རེ་གཉིས་ཤིག་འབྱོར།

བློ་བཟང་གིས་ཁྱེད་རང་ལ་དུས་ཚོད་ཡོད་དམ་ཟེར་ནས་ཡར་བླངས་ཞོར་དུ་སངས་རྡོར་ལ་དྲིས། ཡོད་ཡོད། ང་ནི་ནམ་རྒྱུན་དུ་དུས་ཚོད་ཡོད་ཡོད་པ་རེད། སོང་ནས་ཟ་མ་ཟོས་རྗེས་སུ་ཕྱིར་ཤོག ངས་སྒུག་ནས་འདུག

སྐུ་མགྲོན་གཉིས་ཀྱིས་རང་རང་་གི་འདོད་མོས་ཡོད་པའི་ཁ་ལག་ཟོས་ཚར་རྗེས་སུ་བུད་སོང་། བློ་བཟང་གིས་མུ་མཐུད་དུ། སྔོན་ཆད་ཡིན་ན། ཨོ་རེད། མོ་རང་གི་མིང་ལ་ཉི་མ་ལྷ་སྒྲོན་ཟེར་གྱི་ཡོད་པ་རེད། འདུག་ས་ཡང་མེག་ལོར་རང་དུ་ཡོད་པ་རེད། ཁོ་མོ་ལ་རེ་བ་ཞིག་ཡོད་པ་དེ་ནི་ང་རང་ཁོ་མོ་དང་འགྲོག་ནས་བོད་ཡུལ་དུ་མོ་རང་གི་ཕ་ཡུལ་ལྷ་ས་རུ་འགྲོ་རྒྱུ་དེ་རེད་ལ། ལྷ་སར་འབྱོར་ན་ངེད་གཉིས་ལྷན་དུ་མི་ཚེ་བསྐྱེལ་འདོད་ཡོད་པ་དེ་རེད་འདུག་པ་མ་ཟད། འགྲོ་སོང་ཡང་ཚང་མ་མོ་རང་གི་གྲྭ་སྒྲིག་ཡོད་རབས་སོགས་བཤད་སོང་། ཨོ་་་ ང་འདི། ཇ་བཀང་འཐུང་ཟེར་རྒྱུ་ཡང་བརྗེད་འདུག ཇ་ཞིག་འཐུང་ཟེར་ནས་སངས་རྡོར་ལ་བཤད།

སངས་རྡོར་གྱིས་མིན་མིན། དེ་ལས་རྒན་པོ་རྟགས་ཅན་གྱི་སྤི་རག་དམ་པུ་གཅིག་འཁྱེར་ཤོག་དང་འུ་གཉིས་ཀྱི་འཐུང་ཟེར་དུས། བློ་བཟང་གིས་ཁྱེད་རང་གི་ཤེས་ཀྱི་ཡོད་མོད། ངས་སྤི་རག་འཐུང་གི་མེད་པ། ཡ་ཡ་འཐུང་། ཤེལ་ཕོར་ནང་དུ་བླུགས་དེ་སངས་རྡོར་ལ་སྤྲད། བློ་བཟང་ནི་དངོས་ནས་ཁོ་རང་གི་སྐད་ཆ་དེ་དག་སངས་རྡོར་ལ་མགྱོགས་པོ་བཤད་མ་ཚར་བའི་དཀའ་ངལ་ལྟ་བུ་ཞིག་བྱུང་བཞིན་ཡོད་ན་ཡང་། སངས་རྡོར་ནི་དངོས་ནས་ལྷོད་ལྷོད་ཅིག་དང་བཅས།

ཡ་ཡ། ད་ངས་ཤེས་སོང་། བུད་མེད་དེ་འདྲ་ཞིག་ལ་དངོས་ནས་སེམས་འཁོར་རན་ཡོད་ནི་མ་རེད། དེ་ལས་ཟེར་ནས་སྐད་ཆ་ཞིག་བཤད་རྩིས་བྱས་དུས། བློ་བཟང་གིས་སངས་རྡོར་གྱི་ཁ་འཕྲོག་ནས། དེ་འདྲ་མ་རེད། དེ་འདྲ་མ་རེད། བུད་མེད་དེ་འདྲ་ཞིག་ལ་ཟེར་ནས་དམའ་འབེབས་མ་བྱེད། བྱིས་པའི་ཨ་མ་ཡིན་པ་དེ་ཙམ་གྱིས་བརྩེ་དུང་མེད་མཁན་ཞིག་ཡིན་པ་གཏན་ནས་བཤད་ཐུབ་ཀྱི་མེད། དངོས་ནས་བརྩེ་དུང་ཡོད་མཁན་དང་ཉམ་མྱོང་གང་ཅིའི་ཐད་ཀྱི་ཕྱུག་པོ་ནི་བུད་མེད་དེའི་རིགས་ཆགས་ཡོད་པ་རེད། ངས་དེའི་ཆེད་དུ་སེམས་འཁྲལ་བྱེད་ཀྱི་མེད་པ་ཁྱེད་རང་གི་ཤེས་གསལ་རེད། ངས་སེམས་འཁྲལ་བྱེད་བཞིན་པ་དེ་ནི་ང་རང་ལྟ་བུའི་མི་ངན་ཞིག་ལ་སེམས་ཆགས་ནས་བཟའ་ཚང་དེའི་དྲོད་ཁོལ་བོར་བ་དེ་ལ་བསམ་བློ་བཏང་དུས་སེམས་པ་དངོས་ནས་སྐྱིད་པོ་མི་འདུག་ཟེར་ནས་བཤད།

སྐབས་དེར་གྲོགས་པོ་སངས་རྡོར་ཡང་དངོས་ནས་འཐོམ་སོང་བ་འདྲ། རེ་ཞིག་རིང་ཁ་རོག་གེར་བསྡད། དེ་ནས་ཡ་ཡ ཁྱེད་རང་ད་ལྟ་ཡང་གྲྭ་བ་ནི་ཡིན་རྒྱུ་མ་རེད། ཡིན་ན་ནི་གནས་ཚུལ་ལོག་ག་ཞིག་རེད། མིན་ན་ཨ་རོགས་ཟེར་ནས་ནན་འདྲི་ཞིག་བྱས་དུས། བློ་བཟང་གིས་གང་ང་གང་། གྲྭ་བ་འདུག་ས་གྲྭ་ས་མིན་ན། ཟ་ཁང་འདི་འདྲ་ཞིག་གི་ལས་གཡོག་བྱས་དེ་གང་ནས་འདུག་ཟེར་ནས་ལན་བཏབ།

ངས་ཁྱེད་རང་ལ་སྤི་རག་འཐུང་ཟེར་ནས་ཨུ་ཚུགས་མི་བྱེད། ཐ་མག་རྐང་གཅིག་འཐེན་དང་། དངོས་ནས་སེམས་པ་མི་སྐྱིད་དུས་ཀུ་ཡངས་ཆགས་ངེས་ཡིན་ཟེར་ནས་བློ་བཟང་ལ་ཐ་མག་རྐང་གཅིག་སྤྲད།

གློ་བུར་གྱི་བྱེད་སྟངས་དེས་བློ་བཟང་གི་སེམས་ནང་དུ་ཚ་ཤད་ཅིག་རྒྱག་ཞོར་དུ། མི་འཐེན་མི་འཐེན། དེ་ནི་ལོབ་སོང་བ་ཡིན་ན་ཆོད་རབས་མི་འདུག ང་རང་ལྟ་བུ་་ཞིག་ལ་ཐ་མག་འཐེན་རྒྱུ་དེ་ནི་མི་འཛའ་བ་ཞིག་རེད་ཅེས་བཤད།

སངས་རྡོར་དོགས་པ་ཞིག་སྐྱེ་ཞོར་དུ། དངོས་ནས་ད་དུང་ཡང་མཇེ་མགོ་འཛུགས་ས་ཞིག་མ་རེག་པར་ལུས་བསྡད་ཡོད་ནི་མིན་ན། དེ་ཡིན་ན་ནི། ངས་ཁྱེད་རང་ལ་འཐེན་ཟེར་ནས་ཨུ་ཚུགས་མི་བྱེད། དེ་འདྲ་མིན་ན་གཅིག་འཐེན་པ་ཙམ་གྱིས་ངན་ལངས་དུ་འགྲོ་མི་སྲིད་ཅེས་སླར་ཡང་ལག་པ་བློ་བཟང་གི་ཕྱོགས་སུ་བསྲིངས་དེ་འོང་དུས།

བློ་བཟང་གིས་ཀྱང་། རང་ཉིད་གྲྭ་བ་མིན་ཟེར་བའི་བདེན་དབུང་གི་ཆེད་དུ་ཟེར་ན་ཆོག གྲོགས་པོ་སངས་རྡོར་གྱི་ངོ་མ་ཆོག་པ་ཟེར་ན་འགྲིག ངོ་ཚའི་དབང་གིས་ཟེར་ན་འགྲིག གྲོགས་པོ་སངས་རྡོར་གྱི་ལག་གི་ཐ་མག་རྐང་གཅིག་དེ་ཚུར་བླངས་དེ་མེ་རུ་བསྒོས། དུ་བ་ངོ་ལྷོག་ལྷོག བློ་ལུད་རྒྱག་ཞོར་དུ་མཇེ་མགོ་འཛུགས་ས་མ་རྙེད་གོང་དུ་ཐ་ནག་འཛུགས་ས་རེག་སོང་བ་དེ་ཡང་བློ་བཟང་གི་གྲྭ་སྡོམ་གྱི་ཡལ་ག་གང་ཞིག་ལ་རྨ་ཁ་བཟོས་པ་རེད།

སངས་རྡོར་གྱིས་བློ་བཟང་གི་ཚུགས་ཀ་དེ་མཐོང་ནས་དགོད་ཞོར་དུ། གྲྭ་ལོག་འདི་ཚོས་ཐ་མག་ཡང་འཐེན་མི་ཤེས། ཡ་ཡ་། ཐེངས་རྗེས་མ་ཞིག་ལ་ང་རང་ཁོམ་དུས་ཤིག་ལ་ངས་ཁྱེད་རང་ལ་སྤི་རག་གི་སྤྱིན་བདག་བྱེད། དེ་དུས་མཉམ་དུ་དངོས་ནས་སྐྱིད་པོ་ཞིག་བྱེད་ཆོག་ཟེར་ནས་ཡར་བླངས་ཞོར་དུ། འདི་ཟེར་ནས་ཐ་མག་སྒམ་ཆུང་བཀང་གི་ནང་ནས་རྐང་གཉིས་མ་གཏོགས་བླངས་མེད་པ་དེ་བློ་བཟང་ལ་སྤྲད།