བློ་བཟང་ཞོགས་པ་སྔ་བོ་ནས་ཡར་བླངས་དེ་ལོ་མང་རིང་དུ་གསེར་ཞལ་མཇལ་མ་ཐུབ་པའི་ཇོ་བོ་རིན་པོ་ཆེ་ལ་མཇལ་དུ་སོང་། ཇོ་ཁང་ནང་དུ་སྔོན་ཆད་དང་མི་འདྲ་བར་མཇལ་བ་ཚོར་ལྟ་རྟོགས་བྱེད་མཁན་ནི་དགེ་མདུན་པ་དག་མ་ཡིན་པར། དམག་མི་དག་ཆགས་ཡོད་པ་དེ་མཐོང་དུས་སུ་དངོས་ནས་དྲང་གནས་ཀྱི་སེམས་ཁོང་རུས་པའི་གཏིང་ནས་སྐྱོ་སྣང་ཟད་དུ་མེད་པ་ཞིག་སྐྱེ་ཞོར་དུ་མཇལ་བ་ཚོས་གྲལ་ནས་ཇོ་མདུན་དུ་ཕྱིན།
མཇལ་བ་ཚོ་ཇོ་མདུན་དུ་སླེབས་དུས་སུ། རང་རང་གི་སེམས་ཁོང་རུས་པའི་གཏིང་གི་སྨོན་ལམ་ཤུགས་དྲགས་ཀྱིས་གྱེར་པའི་སྒྲ་དབྱངས་དེས། བློ་བཟང་གི་སེམས་ཁོང་དུ། རྒྱང་རིང་རྒྱ་གར་དུ་བཞུགས་པའི་བོད་མི་རིགས་ཀྱི་༧རྩ་བའི་བླ་མ་དྲན་དུ་བཅུགས། ཁོས་ཀྱང་ལག་ཟུང་ཐལ་མོ་སྤྱར་ནས། ཇོ་མདུན་ནས་སྨོན་ལམ་ཤུགས་དྲགས་དུ་བཏབ་པ་དང་ཚད་མེད་ཡོན་ཏན་མ་ཚར་གཅིག་བཏོན།
ཇོ་ཁང་གི་མཐའ་སྐོར་དུ། སྔོན་ཆད་བོད་མིའི་གཉེར་བའི་ཚོང་ཁང་དང་ཟ་ཁང་མང་ན་ཡང་། དེ་ནི་འགྱུར་བ་ཐེབས་ནས་རྒྱ་རིགས་ཀྱི་འཁང་ནས་བསྡད་ཡོད་པ་མ་ཟད། ཚོར་གཉེར་བ་དེ་དག་གིས་བོད་མི་ཚོས་སྟེང་ལ་རྣམ་འགྱུར་མི་ལེགས་པ་སོགས་སྟོན་པ་མཐོང་ཐེངས་རེར། རང་ཡུལ་དུ་རང་མི་སྐྱབས་བཅོལ་བ་ལྟ་བུ་ཞིག་ཆགས་པའི་ཚོར་བ་བསྟུད་མར་སྐྱེ་སུ་བཅུགས།
ཉིན་དེར་ཁོ་རང་ཕོ་ཏྰ་ལའི་མདུན་ཐང་དུ་བསྐྱོད་སྐབས་སུ། བོད་ཀྱི་ཕོ་གསར་ལྷམ་མགོ་ཞུ་མཁན་ཞིག་དང་འཕྲད་ནས་ཁོས་དེ་ལ་ཁ་བརྡ་བྱས་དུས། ལྷམ་མགོ་ཞུ་མཁན་གྱི་ཕོ་གསར་་དེས་ཁོ་རང་ནི་སྔོན་ཆད་རྐང་འཁོར་གླ་བྱེད་གཏོང་མཁན་ཞིག་ཡིན་ན་ཡང་། ལས་ཀ་དེ་ཡི་ཁུངས་མ་ཆོད་སྟབས། ལྷམ་མགོ་མི་ཞུ་ཐབས་མེད་བྱུང་བའི་སྐོར་སོགས་གསུངས་པ་དེས། ཁོ་རང་གིས་རྒྱ་ནག་བོད་མི་དག་རང་ས་ལས་མེད་དུ་གཏོང་བཞིན་པའི་ཐབས་ཤེས་དེ་ལ་ཁོང་ཁྲོ་ཚད་མེད་སྐྱེ་ན་ཡང་། ལྷམ་མགོ་ཞུ་མཁན་གྱི་ཕོ་གསར་དེ་ལ་ཁྱེད་རང་གིས་རང་ས་ནས་ལས་ཀ་འདི་འདྲ་ཞིག་བྱེད་འཕོད་པ་དེ་ཡང་ཡག་པོ་རེད་ཅེས་ངོ་བསྟོད་ཅིག་ལས་གཞན་གང་ཡང་བཤད་རྒྱུ་མེད་པར་རང་གི་ལྷམ་མགོ་གཙང་མ་ཡིན་ཡང་རྒྱ་སྒོར་གཅིག་སྤྲད་དེ་གཙང་མ་བྱེད་དུ་བཅུགས།
བློ་བཟང་གིས་ཕོ་ཏྰ་ལའི་མདུན་གྱི་རྒྱ་དམར་གྱི་དར་ཆ་རླུང་གིས་ག་ལེར་བསྐྱོད་ཀྱིན་མཐོང་དུས་སུ་དངོས་ནས་སེམས་སྐྱ་མོ་སྡུག་གིས་འཁང་ན་ཡང་། གངས་སེང་དར་ཆ་བསྒྲེང་ཐུབ་པའི་ཉིན་མོ་ཞིག་ཡོང་རྒྱུར་རེ་བཞག་དང་གྱེས་དེ་ཕོ་ཏྰ་ལའི་ཐང་ཆེན་ནས་ཁ་གྱེས།
ཉིན་གསུམ་གྱིས་རྗེས་སུ་ཁོ་རང་རང་གི་ཕ་ཡུལ་ཨ་མདོའི་ཕྱོགས་སུ་འགྲོ་བའི་རླངས་འཁོར་ཞིག་གི་འཛིན་བྱང་ཉོས་དེ། ཅ་ལག་རྣམ་བསྡུ་གསོག་བྱས་དེ་སྒེར་སྤྱོད་རླངས་འཁོར་འབབ་ཚིགས་དེ་ཡི་ཕྱོགས་སུ་ཆས། རྒྱ་རྒན་ཁ་ཆེ་དེས་རླངས་འཁོར་ནང་གི་མི་ཚང་མ་ས་ལ་འབབ་རོགས། དེ་ནས་རང་རང་གི་འཛིན་བྱང་ལག་དུ་སོང་ནས་ཕྱིར་ནང་དུ་བསྐྱོད་རོགས་ཟེར་ནས་རེ་སྐུལ་བྱས་པ་ལྟར། རླངས་འཁོར་ནང་གི་སྐུ་མགྲོན་ཚང་མ་ས་རུ་འབབ་པ་ལྟར། ཁོ་རང་ཡང་ས་ལ་འབབ།
རླངས་འཁོར་དེ་ནི་ལྷ་ས་ནས་གོར་མོ་བར་དུ་འགྲོ་མཁན་ཡིན་ལ། དེ་ཡི་ནང་དུ་བོད་རིགས་ཁོ་དང་ཕ་ཡུལ་མཚོ་ལྷོ་ནས་ཡིན་པའི་ཕ་བུ་གཉིས་ཀྱིས་བྱིས་པ་གཉིས་ཁྲིད་པ་ཞིག་ཡོད་པ་དེར། བློ་བཟང་གིས་བོད་ལྭ་གོན་ཡོད་སྟབས་ཁོ་གཉིས་སར་སོང་དེ་སྐད་ཆ་དྲིས་དེ་ཤེས་པ་རེད། སྐབས་དེ་འདྲ་ཞིག་ལ། སྐབས་དེ་འདྲ་ཞིག་ལ་བུད་མེད་གཟུགས་སྐྱེ་ལུས་གང་ཐད་ནས་ཡིད་སེམས་འཕྲོག་པའི་བུད་མེད་ཅིག་ཁོང་ཚོས་སར་ཡོང་ནས་ཕ་བུ་དེ་གཉིས་ལ་ཁ་བརྡ་བྱོས་དུས། བློ་བཟང་གིས་བུད་མེད་དེར་ཁྱེད་རང་གང་དུ་འགྲོ་མཁན་་ཡིན་་ཟེར་ནས་དྲིས་དུས། བུད་མེད་དེ་དངོས་ནས་ཧང་སངས་སངས་ཀྱི་རྣམ་པ་བཅས། ཁྱེད་རང་བོད་ཡིན་ནམ། ངས་ཁྱེད་རང་རྒྱ་མི་ཞིག་རེད་བསམ་སོང་ཞེས་བཤད།
མི་རེ་རེ་བཞིན་རླངས་འཁོར་ནང་དུ་འཛུལ་ཚར་དུས། རླངས་འཁོར་ཕྱི་ལོག་ནས་འཕྲད་པའི་བོད་ཀྱི་བུད་མེད་མཛེས་མ་དེ་ཡི་ཉལ་ས་དང་བློ་བཟང་གི་ཉལ་སའི་བར་དུ་རྒྱ་མི་ཞིག་ལས་མེད་པ་རེད། རླངས་འཁོར་དེ་ཡི་ནང་དུ་མི་འཁང་ནས་ཡོད་ཀྱང་བོད་པ་ཁོང་ཚོ་མི་དྲུག་ལས་མེད་པ་རེད།
བློ་བཟང་གིས་བུད་མེད་དེར་ལྟ་ཞོར་དུ། ཨ་ཙི་བུད་མེད་འདི་འདྲ་ཞིག་རྨི་ལམ་ནང་དུའང་ཡོང་རྒྱུ་ཁག་པོ་རེད། སྐྲ་གཅིག་བུའི་མཛེས་ཉམས་དེས་ཀྱང་སེམས་པ་ཤོར་ས་ཞིག་འདུག་སྙམ་ཞོར་དུ་རང་གི་ཉལ་ཁྲིའི་སྟེང་དུ་འབུད།
དངོས་ནས་བཤད་ན། བུད་མེད་དེ་ཡི་ཡག་མོ་སྒོ་ནི་བློ་བཟང་གིས་སེམས་པ་འཕྲོག་པ་ལས་ཀྱང་བརྒལ་ཡོད། སྐྲ་ནི་ཕལ་ཆེར་བུས་མོའི་སྟེང་བར་དུ་བཞག་ཡོད་པ་དང་། རྫི་མ་ནི་དངོས་ནས་རི་མོ་སྒྱུ་རྩལ་བ་ཞིག་གིས་པུར་སྨྱུག་གི་རྩེ་ནས་བྲིས་པ་ལྟ་བུ་ཞིག་ཡོད་པ་རེད། གོན་པ་དེ་ཡང་བབ་ཆགས་པོ་ཞིག་གོན་ཡོད་པ་མ་ཟད། འགྲོ་སྟངས་ཀྱང་དངོས་ནས་ཞི་དུལ་གྱི་རྣམ་པའི་ཡོངས་སུ་ཕྱུག་པ་ཞིག་ཡོད་པ་རེད།
བློ་བཟང་གིས་བསམ་བློ་འདྲ་མིན་བཅོ་བརྒྱད་ཅིག་འཁོར་བཞིན་པའི་སྐབས་དེར། ཕྱི་ལོག་ནས་བུད་མེད་དེས་ཁོ་རང་ལ་སྐད་བཏང་།
མུ་འགོད།
