སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} དོན་གཅིག

ས་རུབ་ནས་ཡུན་རིང་མ་སོང་བའི་སྐབས་ཤིག་ལ་ཁོང་ཚོ་དུང་རི་འགག་སྒོ་དང་ཐག་མི་རིང་ས་ཞིག་དུ་སླེབས་དུས། བློ་བཟང་གིས་ང་ཚོ་ཡིན་གཅིག་མིན་གཅིག་འགག་སྒོ་དེ་མ་བརྒྱུད་པར་ཐབས་གཞན་ཞིག་འཚོལ་དགོས་པ་ཡིན་དུས། དོ་ནུབ་གཙང་བོ་འདི་བརྒལ་ནས་འགྲོ་ཐུབ་མིན་ལ་ཚོད་ལྟ་ཞིག་བྱེད་དགོས་ཀྱི་ཡོད་པ་དང་། གལ་ཏེ། གཙང་བོ་འདི་ལ་གཏན་ནས་བརྒལ་ཐུབ་མེད་སོང་བ་ཡིན་ན། འགག་སྒོ་ཡོད་ས་དེ་ཡི་གོང་ནས་བུད་དེ་གཙང་བོ་འདི་བརྒལ་སའི་ལམ་ཁ་འདྲ་ཡོད་མེད་ཐད་དུ་རྒྱུས་ལོན་བྱེད་དགོས་ཀྱི་འདུག་ཞེས་བཤད་དེ་ཁོང་ཚོ་ཚང་མ་གཙང་བོ་དེ་ཡི་འགྲམ་དུ་སོང་ནས་བརྟག་དབྱད་བྱས་དུས། སྟོན་ཁའི་གཙང་བོ་ནི་དངོས་ནས་བརྒལ་ཐུབ་མེད་པ་གཞི་ནས་རྟོགས་དེ། མཚན་མོ་དེར་ཁོང་ཚོ་དུང་རི་འགག་སྒོ་ཡོད་སའི་ལག་པ་གཡས་ཕྱོགས་ཀྱི་རི་ངོས་དེ་ལ་འཛེགས་ནས་མཚན་མོ་ཆུ་ཚོད་གསུམ་པ་བར་དུ་ཕྱིན་ཡང་། རི་ངོས་དེ་ནི་ཆར་བ་འབབ་ཤུལ་ཞིག་དུ་འཁེལ་ཡོད་སྟབས། འདམ་རྫུབ་ཆེ་བའི་ཁར་རི་ངོས་གཅིག་བརྒལ་བ་ཡིན་ན་རི་ངོས་གཞན་ཞིག་དེ་ལྟར་འདམ་རྫུབ་ཀྱི་འཁང་ཡོད་སྟབས། ཁོང་ཚོ་ཚང་མ་ཨ་ཐང་ཆད་ཡོད་པའི་སྐབས་དེར། བློ་བཟང་གིས། དོ་ནུབ་ང་ཚོ་འདི་ནས་ངལ་གསོ་མི་བྱེད་ཐབས་མེད་རེད། སང་ཞོགས་སྔ་བོ་ནས་ཡར་བླངས་དེ་འགྲོ་ཞེས་བཤད།

དེ་དུས་ཤེས་རབ་རྒྱ་མཚོས། བློ་བཟང་། ལྟོས་དང་། ང་ཚོས་ད་དུང་དུང་རི་འགག་སྒོའི་གློག་འོད་ཀྱང་ཁྲ་ལྷམ་མེར་མཐོང་གི་འདུག འདི་ནས་ངལ་གསོས་པ་ཡིན་ན་ཉེན་ཁ་ཆེན་པོ་ཡོད་ས་རེད། དེ་ལས་ག་ལེར་འགྲོ་ཐབས་ཤིག་བྱས་པ་ཡིན་ན་ག་འདྲ་འདུག་ཞེས་བཤད་དུས་སུ། བློ་བཟང་གིས། ད་ནི་ཚང་མ་ཐང་ཆད་པའི་སྒང་ལ་ལམ་ཁ་ཡང་ཡག་པོ་མཐོང་གི་མི་འདུག འདི་ནས་འདུག ཆར་བ་ཡང་འབབ་བཞིན་འདུག འགྱིག་ཤོག་ཆེན་པོ་དེ་ཕྱིར་བཏོན་ནས་ཚང་མ་དེ་ཡི་ནང་དུ་རུབ་རུབ་བྱས་དེ་ངལ་གསོ་བྱེད། ཅ་ལག་ཚང་མ་འགྱིག་ཤོག་ནང་དུ་བླུགས་དེ་ངལ་གསོ་ཞིག་བྱེད་ཐབས་བྱེད། ཞོགས་པ་ནམ་མ་གསལ་གོང་དུ་ལམ་དུ་ཆས་པ་ཡིན་ན། འདི་ནས་དུང་རི་འགག་སྒོ་ཅུང་ཐག་རིང་བོ་རེད། ང་ཚོ་ལས་སླ་བོ་མཐོང་མི་ཡོང་ཞེས་བཤད་དུས། ཚང་མས་བློ་བཟང་གི་བཤད་པ་ལྟར། འདམ་རྫུབ་དང་ཆར་ཆུའི་ཁྲོད་ནས་འགྱིག་ཤོག་ཆེན་པོ་དེ་ཡི་ནང་དུ་ཚང་མ་འཛུལ་ནས་ཅ་ལག་ཚང་མ་ཟུར་དུ་བཞག་ནས་ངལ་གསོ་བྱས་པ་རེད།

ཞོགས་པ་སྔ་བོ་ཡར་བླངས་དུས། མཚན་མོ་དེར་ཆར་བ་ལྷོད་ལྷོད་ཅིག་བར་མཚམས་མེད་པར་འབབ་ནས་འགྱིག་ཤོག་གི་མགོ་སྔ་གཉིས་ནས་ནང་དུ་ཆུ་སླེབས་ནས་གོན་པ་དང་ཅ་ལག་ཚང་མ་རློན་པ་བཟོས་སྟབས། ཁོང་ཚོ་སྔ་བོ་ནས་ཡར་མི་བླངས་ཐབས་མེད་ཆགས་ཡོད་པ་མ་ཟད། གཉིད་དེ་ཡང་ཡག་པོ་ཞིག་གཏན་ནས་ཁུགས་མེད་པ་རེད།

ཆར་ཆུ་དང་འདམ་རྫུབ་ཁྲོད་ནས་ཅ་ལག་ཚང་མ་བསྡུ་གསོག་བརྒྱབ་དེ་ཁོང་ཚོ་ག་ལེར་རི་ངོས་དེ་ནས་བརྒྱུད་དེ་རི་མགོ་ཞིག་དུ་འབྱོར་དུས་སུ། ཉི་མ་ཡང་ཤར་ནས་སོས་དལ་བག་ཡོད་ཀྱི་རྣམ་པ་ཞིག་གིས་ཁོང་ཚོ་ཚང་མ་རི་མགོ་ཞིག་ནས་ངལ་གསོ་ཞོར་དུ་ཅ་ལག་ཚང་མ་ཕྱི་རུ་བཏོན་ནས་ངལ་གསོ་བྱེད་བཞིན་པའི་སྐབས་ཤིག་ལ། ལུག་རྫི་ཞིག་ཁོང་ཚོ་ཡོད་སར་སྙེགས་ནས་འོང་བ་དེ་མཐོང་ནས་བློ་བཟང་གིས། ང་ཚོ་གང་དུ་འགྲོ་བཞིན་ཡོད་ཅེས་དྲིས་པ་ཡིན་ན། ང་ཚོ་སྟོད་གངས་རིའི་ཕྱོགས་སུ་མཇལ་སྒོར་དུ་འགྲོ་མཁན་ཡིན་ན་ཡང་། ལམ་ཁ་ནས་མགོ་སྐོར་ནས་བསྡད་ཡོད་ཅེས་ལན་འདེབས་དགོས་པ་སོགས་ཚང་མ་གྲོས་ཁ་གཅིག་ལ་བཞག

ལུག་རྫི་དེ་ནི་ཁོང་ཚོས་སར་འབྱོར་ནས་རྒྱུ་མཚན་དྲིས་པ་དེར་ཁོང་ཚོས་ཀྱང་། ལན་དེ་ལྟར་དུ་བཏབ་པ་དང་། ཁོང་ཚོས་ལུག་རྫི་དེ་ལ་ཐ་མག་དང་ཀ་ར་སོགས་སྤྲད་སྟབས། ལུག་རྫི་དེ་ཡིས་ཁོང་ཚོ་དང་ཐག་མི་རིང་བའི་ས་དེ་རུ་ཁོ་རང་གི་རི་སྡེ་ཡོད་པ་དང་། རི་སྡེ་དེ་ནས་ཁ་གཏད་དུ་སོང་བ་ཡིན་ན། གཙང་བོ་དེ་བརྒལ་བའི་ཤིང་ཟམ་ཞིག་ཡོད་ན་ཡང་། དེང་སང་གཙང་བོ་ཆེ་རུ་སོང་ཡོད་སྟབས། ཤིང་ཟམ་དེ་ལས་འགྲོ་བ་ལ་ཅུང་ཙམ་ཉེན་ཁ་ཡོད་རབས་སོགས་ཞིབ་དུ་ཤེས་པ་དེ་ཡིས་ཁོང་ཚོས་སེམས་པ་ཅུང་ལྷོད་དུ་འབབ་པ་རེད།