དེང་སང་ང་ཚོ་བོད་རིགས་ཀྱི་གཏོགས་ཚད་གང་ན་སུ་ཡོད་པ་དེ་དག་གིས་རང་རང་གི་གང་ནས་ཅི་འཇོན་གྱིས་རང་རང་གནས་ཡུལ་ནས་སྐྱེ་རྒུ་མདོའི་ས་ཡོམ་གྱི་ཁྲོད་དུ་ལུས་པའི་མི་དག་ལ་རོགས་སྐྱོར་གྱི་ཞལ་འདེབས་བསྡུ་བཞིན་པའི་བྲེལ་བ་ཤུགས་ཆེན་པོ་ཞིག་ཡོང་གི་ཡོད་པ་རེད།
དེ་དང་གཅིག་མཚུངས་ཀྱིས་བོད་ནང་གི་གཞིས་ལུས་བོད་མི་དག་གིས་ད་ལྟའི་བར་དུ་རྒྱ་ནག་གི་ཁ་ལས་ལག་ལེན་མེད་པའི་གཏམ་སྙན་དེ་དག་ལོ་ངོ་བཅུ་ཕྲག་འགའ་ལ་གཤིབ་པའི་ཉམ་མྱོང་ལས་ཤེས་སྟབས། དགོན་པ་ཁག་དང་གཞིས་གྲོང་། སློབ་གྲྭ་དང་ཡུལ་སྡེ་ཁག་མི་ཉུང་བ་ཞིག་ནས་ས་གནས་ས་ཐོག་གི་མི་དངོས་སུ་ས་གནས་དེར་བསྐྱོད་པའི་གོ་སྐབས་ངེས་སུ་བྱུང་ཟིན་པ་རེ་ཟུང་ཞིག་ཡང་བྱུང་ཡོད་ཚོད་ཡིན་ན་ཡང་། རྗེས་སུ་རྒྱ་ནག་སྲིད་གཞུང་གིས་དེ་དག་གི་གནས་ཚུལ་དག་མཐོང་ནས་སེམས་གཏིང་ནས་ཚུགས་པ་ཟ་བ་དང་ཁོང་ཁྲོ་བླངས་ཀྱང་། ཁ་གཞན་ལ་གཡར་ནས་ད་ལྟའི་འཆར་བོད་མི་དང་ས་གནས་གཞན་གང་ནས་སླེབས་པའི་སུ་ཡིན་ཞིག་ལག་ཁྱེར་སོགས་མེད་པར་ས་ཡོམ་གོད་ཆག་ཡོད་སར་གཏོང་གི་མེད་པ་རེད།
གནས་ཚུལ་དེ་དག་གི་རྐྱེན་པའི་བོད་མི་མི་ཉུང་བ་ཞིག་གིས་ཞལ་འདེབས་གང་བསྡུས་ཟིན་པ་དང་བསྡུ་བཞིན་པ་དེ་དག་ཡང་རྒྱ་ནག་སྲིད་གཞུང་གི་སྒྲིག་འཛུགས་གང་རུང་ཞིག་མ་བརྒྱུད་པར་ས་གནས་ས་ཐོག་གི་གནོད་འཚེ་ཐེབས་ཡུལ་གྱི་མི་མང་དཀའ་སྡུག་ཆེ་བ་དག་གི་ད་ལྟའི་འཚོ་གནས་ཀྱི་གནས་བབ་ཀྱི་དགོས་འཁོ་ཆེ་སར་དུས་ཐོག་དུ་འབྱོར་བཞིན་མེད་པ་དང་། རྒྱ་ནག་སྲིད་གཞུང་གིས་གསལ་བསྒྲགས་ཀྱིས་བོད་མི་དག་ལ་ཁང་བ་གསར་བ་དང་། མཛེས་ལྗོངས་གསར་བ། དྭ་ཕྲུག་ཚོར་མ་འོངས་མདུན་ལམ་གསར་བ་སོགས་གནང་ཚུལ་ས་བསྒྲགས་གནམ་བསྒྲགས་བྱེད་ཀྱིན་ཡོད་པའི་གསར་འགྱུར་ཁག་ནི་ཕྱི་རྒྱལ་གྱི་འབྲེལ་ལམ་ཁག་ལ་ཡང་བཏང་ཡོད་པ་རེད།
ད་ནི་ངེད་ཅག་བོད་མི་ཕྱི་བསྡོད་པ་དང་བོད་ནང་གི་ཤེས་ཡོན་ཅན་གྱི་མི་སྣ་དག་གིས་གོ་སྐབས་འདི་དམ་འཛིན་གྱིས་རྒྱ་ནག་སྲིད་གཞུང་གིས་ད་ལྟའི་འཆར་ཐད་གཏོང་གནང་བའི་གསར་འགྱུར་བརྙན་བསྡུས་ཁག་དང་། གསར་འགྱུར་དང་ཚགས་ཤོག་ཁག་གཉར་ཚགས་བྱེད་རྒྱུ་དང་། ལོ་དང་ཟླ་བ་སྒུག་ནས་རྒྱའི་སྲིད་གཞུང་གི་ལས་ཀའི་བྱེད་ཕྱོགས་ཐད་དུ་སྔ་འདེད་ཚ་འདེད་གཏོང་རྒྱུར་དེར་བོད་ཕྱི་ནང་གཉིས་ཀྱིས་ལྡོག་རྩ་གཅིག་སྒྲིལ་བྱེད་ཐུབ་དགོས་ཀྱི་ཡོད་པ་རེད།
བོད་ནང་ནས་རྒྱ་ནག་གི་རྩ་ཁྲིམས་དང་ཁོང་ཚོས་གང་བཤད་པ་དེར་གཞིར་བཟུང་ནས་རྩོམ་ཡིག་སྤེལ་བ་དང་རྒྱ་ནག་མི་དམངས་ལ་ཡང་ངེས་སུ་གང་ཐུབ་ཐུབ་ཞིག་ཤེས་སུ་འཇུག་རྒྱུར་འབད་བརྩོན་བྱེད་པ་དང་། བྱེས་སུ་བསྡོད་མཁན་དག་གིས་བོད་ནང་དུ་རྒྱ་ནག་སྲིད་གཞུང་གིས་རོགས་རམ་དེ་འདྲ་ཞིག་གནང་རྒྱུར་ཁས་ལེན་བྱེད་བཞིན་པ་དེར་བསྔགས་བརྗོད་ཀྱི་འཕྲིན་ཡིག་དང་གནས་ཚུལ་སོགས་ཡིག་རིགས་གང་མང་ཞིག་གི་སྟེང་ནས་སྲིད་གཞུང་གི་མིང་ཐོག་ལ་གང་ས་ནས་གཏོང་ཐུབ་དགོས་ཀྱི་འདུག
ད་ནི་ང་ཚོས་རང་གི་རང་སྐྱོབས་ཐབས་ཀྱི་ཐབས་ལམ་འདི་ཁོང་ཚོས་ས་ནས་སྤྱོང་དགོས་ཀྱི་འདུག ལྷག་པར་དུ་ང་ཚོས་རང་གི་རྔུལ་ཁྲག་ལས་གྲུབ་པའི་དངུལ་སྒོར་དེ་དག་རྒྱ་ནག་སྲིད་གཞུང་གི་ལྐོག་ངན་ཟ་བར་གོམ་ཟིན་པའི་རྒྱུགས་ཁྱི་དེ་དག་གི་སྒོ་འགྲམ་དུ་གཏན་ནས་བསྐྱེལ་དགོས་དོན་མེད་ལ། དེ་དག་གི་སྲིད་གཞུང་གི་སྒོ་འགྲམ་དུ་བསྐྱལ་དགོས་དོན་དེ་བས་མེད། ཁོང་ཚོས་ངེད་ཚང་གི་སྤུན་ཟླ་དག་ལ་ག་རེ་ཁས་བླངས་པ་དེར་ངེད་ཅག་གིས་རྒྱང་ནས་བལྟ་བ་དང་ཉན་ནས། ང་ཚོའི་རང་རང་གི་ཕྱོགས་ནས་བསྡུ་བཞིན་པའི་ཞལ་འདེབས་དེ་དག་སྤྱང་ཀའི་སྒོ་འགྲམ་དུ་ལུག་ཤ་ཚོན་པོ་དེ་དག་ཁུར་དེ་འགྲོ་རྒྱུའི་ཐབས་ལམ་དེ་ཕྱིར་འཐེན་བྱེད་དགོས་ཀྱི་འདུག
ངས་ཀྱང་འདི་ནས་རང་གི་སྤུན་ཟླ་དག་ལ་ཞལ་འདེབས་ཀྱི་སྐོར་ལ་སྐད་ཆ་ཡང་བཤད་ཟིན་པ་ཡིན། ངེད་ཅག་གིས་ཀྱང་རང་རང་གི་སེམས་ནས་ག་ཚོད་ཡོང་མིན་ལ་མ་བལྟས་པར་བོད་མི་ག་ཚོད་ཡོད་པ་ཚང་མ་འཛོམ་ནས་ཞལ་འདེབས་ཤིག་བསྡུས་པ་ཡིན་ན་ཞེས་ཁོང་ཚོར་ཞུས་པ་ཡིན་ལ། ཁོང་ཚོས་ཀྱང་དེ་ལྟར་བསམ་བཞིན་པའི་སྒང་རེད་ལ། དེ་ལ་ཚང་མས་མོས་མཐུན་བྱེད་ཀྱི་འདུག ཡིན་ཡང་། གཟབ་ནན་གྱིས་བསམ་བློ་ཞིབ་མོ་ཞིག་བཏང་བ་དང་། རྒྱའི་སྲིད་གཞུང་གིས་ད་ལྟ་བོད་ནང་གི་བོད་མི་གཏན་བསྡོད་བྱེད་མཁན་དག་ས་གནས་དེར་བསྐྱོད་ཆོག་པའི་ཐོབ་ཐང་ཙམ་ཡང་སྤྲོད་ཀྱི་མེད་པ་དེར་བལྟས་དུས་སུ། ངས་གཞི་ནས་ང་ཚོའི་འདི་ནས་ཞལ་འདེབས་ཤིག་བསྡུས་ཀྱང་། དེ་ཡང་རྒྱའི་སྲིད་གཞུང་གི་སྒོ་འགྲམ་ཁོ་ན་བརྒྱུད་དགོས་པ་ལས་ཐབས་མེད་པ་མཐོང་དུས། ཞལ་འདེབས་བསྡུ་བའི་སྐོར་གྱི་བསམ་བློ་དེར་འགྱུར་བ་བཏང་བ་ཡིན། འོན་ཀྱང་། སྒེར་སོ་སོ་ནས་རྡ་སར་ཡོད་པའི་༤།༡༤ཡུལ་ཤུལ་ས་འགུལ་རོགས་སྐྱོབས་ཚོགས་ཆུང་ལ་ཕུལ་འདོད་ཡོད་ན། དེ་ནི་ཁོང་ཚོས་འདོད་པ་ཡིན་ཡང་། ཚོགས་པ་འདིས་ཀྱང་རྒྱ་ནག་གི་སྲིད་གཞུང་གི་ལས་ཁུངས་གང་རུང་ཞིག་མ་བརྒྱུད་པར་ཐད་ཀར་ས་གནས་ས་ཐོག་དུ་བསྐྱེལ་ཐུབ་རྒྱུའི་གདེངས་ཚོད་ཅིག་གཏན་ནས་མེད་པ་ཞིག་མཐོང་སོང་།
ད་ནི་ཡུལ་ཤུལ་གྱི་མི་དམངས་ལགས། ངེད་ཅག་གི་སྟོན་པ་ཐུབ་པའི་དབང་བོ་མཆོག་གིས། བདག་ཉིད་བདག་གི་མགོན་ཡིན་ནོ་གསུངས་པ་དེར་བསམ་བློ་རེ་བཏང་ནས། ཡར་ལ་ལོངས་ཤིག མི་ནི་སྐྱེ་བ་ནས་ཤི་རྒྱུའི་ཕྱོགས་སུ་གོམ་པ་བརྒྱབས་ཟིན་པ་ཡིན། རེད་དེ། ད་རེབས་ཀྱི་འདི་ནི་ཤི་སྟངས་གློ་བུར་བ་དང་ཆག་སྒོ་ཞེས་པ་དེ་ཡིན་དུས། དེ་དག་གི་ཆེད་དུ་གང་ཐུབ་ཐུབ་ཀྱི་མ་ཎི་རེ་འདོན་ངེས་ཡིན། མ་ཎི་གང་བཏོན་པ་དེ་ཡི་དགེ་རྩ་འདི་ཕྱིའི་གཉིས་ལ་ཕན་པར་ཤོག
དགེ་བ་འདི་ཡི་མྱུར་དུ་བདག། སྤྱན་རས་གཟིགས་དབང་འགྲུབ་གྱུར་ནས།།
འགྲོ་བ་གཅིག་ཀྱང་མ་ལུས་པ།། ཁྱེད་ཀྱི་ས་ལ་འགོད་པར་ཤོག།
དགེ་བཤེས་བསྟན་པ་བཀྲ་ཤིས་ལགས། ཉིད་ནས་འདི་ནས་སྐྱོ་མགུར་ཞིག་གསུངས་པ་དེར་བཀླགས་ཟིན་པ་ཡིན།
༤༽སུ་ཞིག་གི་རྨི་ལམ་ལ་ཤར་མེད།།
ཁ་སང་གི་མཛེས་སྡུག་གི་སྐྱེ་རྒུ།།
དེ་རིང་གི་ཐལ་རྡུལ་གྱི་ཕུང་པོ།།
སུ་ཞིག་གི་རྨི་ལམ་ལ་ཤར་མེད།།
རང་བྱུང་གི་གནོད་འཚེ་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་སྤྲོ་སྤྱིད་ཀྱི་ཡུལ་མི།།
དེ་རིང་གི་ཤི་གསོན་གྱི་མྱ་ངན།།
སུ་ཞིག་གི་བསམ་ཡུལ་ལ་བྱུང་མེད།།
མི་རྟག་པའི་ཆོས་ཉིད་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་ནང་མི་ཡི་བདེ་སྐྱིད།།
དེ་རིང་གི་མུན་ནག་གི་རླུང་འཚུབ།
སུ་ཞིག་གིས་སྔོན་དཔག་ཙམ་བྱས་མེད།།
འཇིག་རྟེན་གྱི་ཆོས་ཉིད་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་གཅེས་ཕྲུག་གི་བུ་ཆུང་།།
དེ་རིང་གི་དྭ་ཕྲུག་གི་སྡུག་བསྔལ།།
སུ་ཞིག་གི་ལུང་བསྟན་ལ་བབ་མེད།།
གློ་བུར་གྱི་རྐྱེན་ངན་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་བྱམས་ལྡན་གྱི་ཕ་མ།
དེ་རིང་གི་མྱ་ངན་གྱི་མིག་ཆུ།
སུ་ཞིག་གི་རྣམ་རྟོག་ལ་བྱུང་མེད།།
ལྡོག་མེད་ཀྱི་གོད་ཆག་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་འཇོ་སྒེག་གི་ན་ཆུང་།།
དེ་རིང་དུར་ཁྲོད་ཀྱི་ཕུང་པོ།།
སུ་ཞིག་གི་རྨི་ལམ་ལ་ཤར་མེད།།
སྐྱེ་འཆི་ལ་ངེས་མེད་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་སྟག་ཤར་གྱི་ལང་ཚོ།།
དེ་རིང་གི་ཕུང་སྲེག་གི་མེ་ལྕེ།།
སུ་ཞིག་གི་རྟོག་ཡུལ་ལ་བྱུང་མེད།།
སྔོན་བསགས་ཀྱི་ལས་འབྲས་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་ལྷིང་འཇགས་ཀྱི་དགོན་པ།།
དེ་རིང་གི་གྱང་རོ་ཡི་ལྷ་རྟེན།།
སུ་ཞིག་གི་མོ་རྩིས་ལ་བབ་མེད།།
ཆགས་འཇིག་གི་གནས་སྟངས་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་དྲོད་སྐྱིད་ཀྱི་མལ་གདན།།
དེ་རིང་གི་གྲང་རླུང་གི་གཅར་རྡུང་།།
སུ་ཞིག་གི་བསམ་བློ་ལ་འཁོར་མེད།།
སྐྱིད་སྡུག་གི་འགྲོ་འོང་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ སང་གི་ལུས་སེམས་ཀྱི་སྤྲོ་སྣང་།།
དེ་རིང་གི་ལུས་སེམས་ཀྱི་རྨ་ཁ།།
སུ་ཞིག་གིས་རྗེས་དཔྱོད་ཙམ་བྱུང་མེད།།
འཇིག་རྟེན་གྱི་ཆག་སྒོ་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་འབྱོར་ལྡན་གྱི་ཁྱིམ་བདག།
དེ་རིང་གི་རོགས་སྐྱོབ་ཀྱི་འཚོ་བ།།
སུ་ཞིག་གི་བསམ་ཡུལ་ལ་བྱུང་མེད།།
རྟེན་འབྱུང་གི་རྣམ་གཞག་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་སློབ་གྲྭ་ཡི་དཔེ་དེབ།
དེ་རིང་གི་བདག་མེད་ཀྱི་ཤོག་སྙིགས།།
སུ་ཞིག་གི་བློ་ཡུལ་ལ་ཤར་མེད།།
གློ་བུར་བའི་གོད་ཆག་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་དགེ་རྒན་གྱི་སློབ་ཁྲིད།།
དེ་རིང་གི་སློབ་མཚམས་ཀྱི་མྱ་ངན།།
སུ་ཞིག་གི་སྣང་བ་ལ་བྱུང་མེད།།
ངེས་མེད་ཀྱི་སྣང་ཚུལ་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་མཛའ་བརྩེ་ཡི་སྙིང་གཏམ།།
དེ་རིང་གི་སྡུག་བསྔལ་གྱི་ན་ཟུག
སུ་ཞིག་གི་རྨི་ལམ་ལ་ཤར་མེད།།
མི་རྟག་པའི་གནས་ལུགས་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་དགའ་སྐྱིད་ཀྱི་གླུ་དབྱངས།།
དེ་རིང་གི་མྱ་ངན་གྱི་སྨེ་ངག།
སུ་ཞིག་གི་རྨི་ལམ་ལ་ཤར་མེད།།
མི་ཚེ་ཡི་བདེ་སྡུག་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཁ་སང་གི་རྒྱུས་མེད་ཀྱི་མི་སྣ།།
དེ་རིང་གི་ཁྱིམ་གཅིག་གི་འཚོ་བ།།
སུ་ཞིག་གི་རྨི་ལམ་ལ་ཤར་མེད།།
གྱེས་མཇལ་གྱི་ངང་ཚུལ་འདི་ཡ་མཚན།།
ཨོྃ་མ་ཎི་པདྨེ་ཧཱུྃ
ཚུལ་འདི་འདྲ་གློ་བུར་མཐོང་དུས།།
སེམས་སྐྱོ་བའི་མིག་ཆུ་འཆོར་ཡང།།
བདེན་བཞི་ཡི་འཇུག་ལྡོག་བསམ་ན།།
སྔོན་བསགས་ཀྱི་ལས་ལས་མ་འདས།།
ཨོྃ་མ་ཎི་པདྨེ་ཧཱུྃ
འགྲོ་བ་སུ་ཞིག་ཡིན་ཡང་མི་འདོད་སྡུག་བསྔལ་མགོ་ཐོག་ལ་སླེབས་པའི་སྐབས་དཔའ་ཞུམ་དང་ཡིད་ཆད་ངང་མི་སྡོད་པར་
བསླུ་མེད་ལས་འབྲས་ཆོས་ཉིད་ལ་བསམ་བཞིན།།
རྐྱེན་ངན་གྲོགས་སུ་འཁྱེར་བའི་བློ་སྟོབས་ཤིག་ཅི་ནས་ཀྱང་སྐྱེ་ཐུབ་ལ་འབད་རྒྱུ་ནི་ཧ་ཅང་གལ་ཞིང་དེ་
སེམས་ཀྱི་རྨ་ཁ་གསོ་བའི་སྨན་མཆོག་ཡིན་ཏེ། དེ་ཡང་ཇི་སྐད་དུ། སྣོད་བཅུད་སྡིག་པའི་འབྲས་བུས་ཡོངས་གང་སྟེ།།མི་འདོད་སྡུག་བསྔལ་ཆར་ལྟར་བབ་གྱུར་ཀྱང།།ལས་ངན་འབྲས་བུ་ཟད་པའི་རྒྱུར་མཐོང་ནས།།རྐྱེན་ངན་ལམ་དུ་ལོངས་པར་བྱིན་གྱིས་རློབས།།ཞེས་སོ།
ཅོ་རི་ཉི་མ་ལགས། ཉིད་ནས་འདི་ལ་ཤེར་བརྟན་གྱི་གླུ་དབྱངས་ཤིག་གི་དྲ་འབྲེལ་བཞག་པ་བཀའ་དྲིན་ཆེ། ཡིན་ཡང་། དྲ་ཐོག་གི་བོད་གླུ་མི་ཉུང་བ་ཞིག་བདག་གིས་དུས་ཐོག་ནས་ཤོར་གྱི་འཇུག་གི་མེད་ལགས། ཉིད་རང་ག་དུས་ཡིན་ཡང་འདི་རུ་ཡོང་བ་དེར་དགའ་ཡོད།
http://www.youtube.com/watch?v=B2Hh-_t-_ug&feature=related