གསུམ།
ཕ་མ་གཉིས་ནི་ང་རང་གྲོང་ཁྱེར་དུ་གནས་སྤོར་བྱེད་རྒྱུའི་ཕྱོགས་སུ་འདོད་པ་གཏན་ནས་མེད་ལ། ང་ཁོ་གཉིས་དང་ཁ་གྱེས་ནས་ཐག་རིང་དུ་ཞིག་ལ་འགྲོ་རྒྱུར་དེ་བས་ཀྱང་འདོད་པ་མེད་ཀྱང་། ཆུང་ཆུང་གི་སྣང་བ་ཟེར་ན་རེད། ཚེ་རིང་དོན་འགྲུབ་ཀྱིས་སྙིང་ཉེ་བའི་སྐད་ཆ་དེ་དག་ལ་ཡིད་ཆེས་པ་ཟེར་ན་འགྲིག ང་རང་གི་ངོ་ཤེས་ཚོས་བཤད་པའི་སྐད་ཆ་ལ་ཉན་ནས་ཟེར་ན་རེད། ང་རང་གསང་སྟབས་ཀྱིས་ཕ་མ་གཉིས་ལ་མ་བཤད་པར། ཚེ་རིང་དོན་འགྲུབ་ཀྱི་རྗེས་སུ་དེད་ནས་རྫོང་མཁར་དུ་འགྲོ་བའི་ལོ་དེར་ང་རང་མོ་ལོ་བཅོ་ལྔ་ཏག་ཏག་ཡིན། བསམ་བློ་ཞིབ་མོ་ཞིག་གང་ལ་གཏོང་ཤེས། རང་ལ་བྱམས་ཤིང་དུངས་པའི་ངང་ཚུལ་གྱིས་ཚུར་ལག་པ་བསྲིངས་པའི་ཚེ་རིང་དོན་འགྲུབ་ལས་བསམ་རྒྱུ་མེད་པར་ཆགས། ཁོ་བོས་བཤད་པའི་སྐད་ཆ་ནི་དངོས་ནས་ང་རང་གོ་ན་དགའ་བ་རྐྱང་རྐྱང་ཡིན་ལ། སྔོན་ཆད་རྩྭ་ཐང་་གི་ཕོ་གསར་ང་དང་ལྷན་དུ་ཉལ་བོ་བསྟེན་མཁན་སུས་ཀྱང་བཤད་མ་མྱོང་རྐྱང་རྐྱང་ཡིན།
ངེད་གཉིས་རྫོང་མཁར་དུ་གནས་སྤོར་བྱས་དེ་ཟླ་ངོ་ཁ་ཤས་རིང་ལ་ང་དངོས་ནས་སྐྱིད་པོ་བྱུང་། ཁོ་རང་གིས་ཟླ་ངོ་རེ་ལ་ངའི་ཕ་མ་གཉིས་ལ་སྒོར་རྡོག་ཁ་ཤས་རེ་མི་ལག་བརྒྱུད་དེ་སྐུར་བ་ངས་མཐོང་ཐེངས་རེར། དེ་བས་ཀྱང་རང་ཁོ་རང་ལ་སྙིང་ནས་བརྩེ་བ་ཟབ་པའི་ཚེ་གྲོགས་ཤིག་དུ་གྱུར་སོང་། ཁོ་རང་ལ་རྫོང་མཁར་དུ་ཆང་ཁང་ཆུང་ཆུང་ཞིག་འདུག་ལ། ཁོ་བོས་ང་རང་དེ་རུ་འགྲོ་མི་དགོས། ནང་དུ་བསྡོད། ངས་མི་རིང་བ་ཁྱེད་རང་ལ་སློབ་ཁྲིད་བྱེད་མཁན་གྱི་དགེ་རྒན་ཞིག་བཙལ། རྫོང་མཁར་ནས་མི་ཚེ་བསྐྱལ་བ་ཡིན་ན། ཡི་གེ་མགོ་སྔ་ཞིག་མ་ཤེས་ཐབས་མེད་ཡིན་པ་རེད་ཅེས་བཤད།
ཉིན་ཞིག་ཁོ་རང་གིས་ཕོ་གསར་ཞིག་ཁྲིད་ནས་སླེབས་སོང་། མི་དེས་མིང་ལ་འབྲུག་འབུམ་རྒྱལ་ཟེར། ཁོ་རང་ནི་རྫོང་མཁར་འདིའི་ནང་གི་སློབ་ཆུང་ཞིག་གི་དགེ་རྒན་དང་། ཁོ་རང་གཟའ་འཁོར་རེ་ལ་ཉིན་གཉིས་ལ་ཁྱེད་རང་ལ་སློབ་ཁྲིད་བྱེད་དུ་ཡོང་གི་རེད། ད་ནས་བཟུང་། འབྲུག་འབུམ་རྒྱལ་ཁྱེད་རང་གི་དགེ་རྒན་རེད་ཟེར་ནས་ཁོ་རང་གི་ཁྲིད་ཡོང་བའི་ཕོ་གསར་དེ་ང་རང་ལ་ངོ་སྤྲོད་བྱས་སོང་། ངས་ཀྱང་རང་ཉིད་ཆུང་དུས་ནས་བཟུང་ཡིག་རྨོངས་དུ་གྱུར་ནས་དེ་རིང་གཞི་ནས་ཡིག་རྨོངས་ཀྱི་དཀའ་ངལ་ལས་གྲོལ་བའི་ལམ་སྣེ་ཟིན་པ་རེད་འང་སྙམ་ནས་དངོས་ནས་སེམས་གཏིང་ནས་དགའ་བོ་བྱུང་། གཟའ་སྤེན་པའི་ཕྱི་དྲོ་དང་། གཟའ་ཉི་མའི་ཉིན་བཅས་ལ་ང་རང་ལ་འབྲུག་འབུམ་རྒྱལ་གྱིས་བོད་ཡིག་འབྲི་ཀློག་འགོ་བཙུགས་པ་ལྟར། ངས་ཀྱང་ཤུ་རེ་བྱས་དེ་སྤྱངས་པ་ཡིན། སྐབས་དེ་འདྲ་ཞིག་ལ་ང་རང་ལ་བུད་མེད་སྤྱི་ལ་བྱུང་བའི་གནས་ཚུལ་གཅིག་བྱུང་བ་རེད། དེ་ནི་བཟའ་ཚང་ཞིག་ལ་མཚོན་ན་དགའ་འོས་པའི་དོན་དག་ཞིག་ཡིན་ལ། ཚེ་རིང་དོན་འགྲུབ་ཀྱིས་ཀྱང་གཏམ་བཟང་དེ་གོ་ནས་དེ་བས་འཛུམ་མདངས་དང་བཅས། ད་ནི་དངོས་ནས་བཟང་གི བྱིས་པ་དེ་སྐྱེ་རག་བར་དུ་ཁྱེད་རང་གིས་བོད་ཡིག་གི་འབྲི་ཀློག་ཡང་ཤེས་ཐུབ་ཁོ་ཐག་རེད། བྱིས་པ་སྐྱེ་རྗེས་སུ། གཞི་ནས་འུ་གཉིས་ཀྱིས་བྱིས་པ་ཁྲིད་དེ་ཁྱེད་རང་གི་ཕ་མ་གཉིས་ལ་ལྟ་སྐོར་ཞིག་བྱེད་དུ་འགྲོ དེ་དུས་ཁོ་གཉིས་ཀྱིས་ཀྱང་འུ་གཉིས་ལ་འཁོན་འཛིན་བྱེད་མི་སྲིད་ཟེར།
ངས་ཀྱང་དེ་ནས་བཟུང་། ཧུར་ཐག་གིས་དགེ་རྒན་འབྲུག་འབུམ་རྒྱལ་གྱི་ས་ནས་བོད་ཡིག་གི་འབྲི་ཀློག་སྤྱངས་པ་དང་ཞོར་དུ་རྒྱ་ཡིག་ཡང་སྤྱངས། མ་བསམ་ས་ནས་ང་རང་གིས་འབྲི་ཀློག་གི་ཤེས་ཚད་དངོས་ནས་མགྱོགས་པོ་བྱུང་བ་མ་ཟད། ཟླ་བ་ཁ་ཤས་ཀྱི་རྗེས་སུ་ངས་བོད་ཡིག་གི་དེབ་རེ་ཟུང་ག་ལེར་ཀློག་ཐུབ་པ་བྱུང་། རྒྱ་ཡིག་ཡང་ཡར་རྒྱས་གང་ཙམ་ཞིག་འགྲོ་བཞིན་འདུག་པའི་ངང་ཚུལ་བཅས་ཚེ་རིང་དོན་འགྲུབ་ཀྱིས་མཐོང་ཐེངས་རེར་ཁོ་རང་ཡང་དངོས་ནས་སེམས་གཏིང་ནས་དགའ་བཞིན་འདུག་པ་དེ་དག་ནི་དངོས་ནས་བཤད་མི་ཤེས་པའི་ཚོར་བ་ཞིག་དང་། ནམ་ཡང་རྗེས་དྲན་བྱེད་ཆོག་པའི་གཏམ་རྒྱུད་ཅིག་ཡིན།
སྐབས་དེ་དུས་ཀྱི་སྣང་བ་དེ་ནི་དངོས་ནས་རང་གི་ཕ་མ་གཉིས་ལ་ཁྲེལ་མེད་བྱས་པ་ལས། འཇིག་རྟེན་གནམ་འོག་ན་རྒྱུ་འབྲས་ཟེར་བ་ཞིག་དང་། རང་གི་ཕ་མས་ཁ་ལ་ཉན་པ་དེ་ལས་གལ་ཆེ་བ་ཞིག་ཡོད་པ་དངོས་ནས་ཚོར་གྱི་མེད་ལ། དེ་ཡི་སྐོར་ལ་བསམ་བློ་ཡང་གཏན་ནས་གཏོང་ཐུབ་ཀྱི་མེད། ལྷག་པར་དུ་རྒྱུ་འབྲས་ཟེར་བ་ཞིག་མིག་གི་རིག་ས་དང་རྣ་བའི་གོ་ས་ནས་མཐོང་རྒྱུ་དང་ཐོས་རྒྱུ་ཡོད་པ་ཞིག་ལ་གཏན་ནས་བསམ་ཐུབ་ཀྱི་མེད། གང་ལྟར། ང་རང་གིས་ཤེས་ཚད་ནི་ཉིན་ལས་ཡར་རྒྱས་འགྲོ་བཞིན་ཡོད་ལ། དགེ་རྒན་འབྲུག་འབུལ་རྒྱལ་གྱི་ང་ལ་བཅིངས་པའི་དགེ་སློབ་ཀྱི་བརྩེ་བ་ཡང་ཟབ་དུ་འགྲོ་བཞིན་ཡོད། ཚེ་རིང་དོན་འགྲུབ་ཀྱི་ཆང་ཁང་ཆུང་ཆུང་ནང་གི་ཚོང་དེ་ཡང་དངོས་ནས་ཡར་རྒྱས་འགྲོ་བཞིན་སྒང་ཞིག་ཆགས་པ་རེད། ཁོ་རང་ནང་དུ་འཕྱི་བོ་སླེབས་པ་དང་། ཞོགས་པ་སྔ་བོ་ནས་བུད་འགྲོ་བ་ཡིན། མཚམས་ལན་རེར་ངེད་གཉིས་ལ་ཁ་བརྡ་ལྷོད་ལྷོད་ཅིག་བྱེད་ཁོམ་མེད་པ་ཆགས་པ་རེད།
མུ་འགོད།
ཁྱེད་ཅག་ཕེབས་པ་དགའ་ནས་ཡོད།
བཀླགས་ཡོད།
བཀླགས་ཡོད། གནས་སྐབས་རིང་ཅི་ཞིག་བཤད་ཚོད་མ་ཐུག་ཐལ། ངའི་ཟིན་བྲིས་ནང་ན་དཔར་ཁ་ཤས་ཡོད་པ་དང་ཁོམ་པ་ཡོད་ན་བལྟ་རོགས་གནང་།
ལྷུག་རྩོམ་ཤིན་ཏུ་སྙན། ཚིགས་བཅད་དེ་ཚོ་དབྱུག་ལ་ཞོགས།
དྲ་གྲོགས་ལགས་བརྩེ་བ་ནི་འཇིག་རྟེན་ལ་བསྙོམ་དུ་མེད་པ་ཞིག་ཡིན་པ་མ་ཟད།
ཆེས་ཟབ་པའི་ཚོར་བ་དང་ཧ་ཅང་བདེ་བ་ལ་བརྩེ་བའི་ཕལ་ཆེར་མ་ཟིན་པ་མེད་ལ།
བརྩེ་བ་ནི་ཡང་རྩེ་ཡང་ལ།