བཅོ་ལྔ།
བདེ་སྐྱིད་འཚོས། ཁྱེད་རང་གཟའ་འཁོར་སྔོན་མའི་ནང་དུ་གྲོགས་པོ་དེ་ཡིས་སྐད་བཏང་ནས་སོང་དུས། དོན་དག་ག་རེ་བྱུང་འདུག
ངས་ཁོ་མོ་ལ་བཟང་བོ་སྐྱབས་ཀྱི་གྲོགས་པོ་ཞིག་གི་དོན་རྐྱེན་སྐོར་བྱུང་རིམ་དག་ཞིབ་དུ་བཤད་པ་དང་། སླར་ཡང་ངས་ཁོ་མོས་བཤད་འཕྲོར་ཉན་པ་ཡིན།
བདེ་སྐྱིད་འཚོས། ཨོ་རེད། གཟའ་འཁོར་སྔོན་མ་དེ་འུ་གཉིས་ཀྱི་བཤད་མཚམས་རེད། དེ་ནས་ཚེ་རིང་དོན་འགྲུབ་སྨན་ཁང་དུ་ཡུན་རིང་མ་བསྡད་པར་ནང་དུ་གནས་སྤོས་པ་དང་། ང་རང་ཡང་འཚོ་བའི་ཆེད་དུ་ཆང་ཁང་དུ་ལྟ་རྟོགས་མང་ཙམ་བྱེད་དུ་མི་འགྲོ་ཐབས་མེད་བྱུང་། རྒྱུ་མཚན་ནི་འགན་འཛིན་ཁོ་རང་ལ་སྒེར་གྱི་ལས་དོན་གལ་ཆེན་ཞིག་ཐོན་ནས་དགོངས་པ་ཞུས་སོང་། དེ་ནས་མི་གསར་བ་ཞིག་གློ་བར་དུ་མི་རེག་པ་དང་། ང་རང་ཡང་དེ་ནས་གསར་བ་ཡིན་དུས། གང་ལྟར། ངས་གནས་སྐབས་རིང་ཆང་ཁང་ལ་དོ་དམ་མི་བྱེད་ཀ་མེད་རེད།
དགོང་མོ་མཚམས་རེར་འཕྱི་བོ་ཆགས་ནས་ནང་དུ་འགྲོ་དགོས་པ་དང་། སྔ་མོ་སྔ་ཙམ་བླངས་དཀའ་བ་མ་ཟད། ཡར་བླངས་རྗེས་སུ་བརྩེ་བའི་ཁྱོ་ག་ཚེ་རིང་དོན་འགྲུབ་དང་ཁོང་གི་ཕ་མ་གཉིས་ལ་ཞབས་ཞུ་ཞིག་ཀྱང་བྱེད་ཁོམ་མེད་པའི་གནས་སུ་ལྷུང་། དེ་དུས་ཡུན་རིང་ཞིག་འགྲོ་མ་སོང་། གཞི་ནས་ཚེ་རིང་དོན་འགྲུབ་ཀྱི་ཕ་མ་གཉིས་ཀྱིས། ང་ལ་བདེ་སྐྱིད་འཚོ། ད་འདི་འདྲ་ཞིག་བྱས་ནས་འུ་གཉིས་འདི་ནས་བསྡད་ཀྱང་ཁྱེད་རང་ལ་རོགས་བྱེད་ཐུབ་ཀྱི་མི་འདུག་ལ། ཁྱེད་ཀྱིས་ཀྱང་ཚེ་རིང་དོན་འགྲུབ་ལ་ལྟ་སྐྱོང་བྱེད་ཐུབ་ཀྱི་མི་འདུག ངེད་གཉིས་ལ་རང་གི་སྡེ་བའི་ནང་ཡག་པོ་འདུག དེ་ནས་ཁོ་རང་ལ་ཡང་ཁོད་ཡངས་པ་དང་། སེམས་པ་ཡང་དུ་འགྲོ་སྲིད་པ་རེད། ཁྱེད་རང་གིས་གནས་སྐབས་རིང་ལ་འདི་ནས་ཆང་ཁང་གི་ལས་འཁུར་བྱེད་བཞིན་ཡོད།
བཤད་ནས་མཚམས་དེར་སླེབས་དུས། ངས་ཀྱང་ཁོའི་ཕ་མ་གཉིས་ཀྱི་ཅི་གསུངས་བཞིན་བྱེད་པ་ལས་ཁྱེད་གཉིས་ནང་དུ་བསྡོད་དང་། ངས་ཀྱང་ལས་ཀ་སྐྱུར་ནས་ནང་དུ་འཁོར་ཟེར་ནས་བཤད་ཐུབ་ཀྱང་མེད་པ་ལྟ་བུ་ཞིག་ཆགས་ཡོད། རྒྱུ་མཚན་ནི་ང་ཚོའི་འཚོ་བའི་བརྟེན་ས་ནི་ཆང་ཁང་དེ་ཆགས་ཡོད། དེ་ཡག་པོ་ཞིག་མ་བྱུང་བ་ཡིན་དུས། ངས་རང་གི་བུ་ཀུན་ཐར་སྐྱབས་དང་རང་གི་ཁྱོ་ག་ཚེ་རིང་དོན་འགྲུབ། ང་ཚོས་ཁ་གསོ་ཐབས་གཞན་ཞིག་ཇི་ལྟར་བཙལ།
ཁོའི་ཕ་མ་གཉིས་དང་རང་གི་བརྩེ་བའི་ཁྱོ་ག་ཚེ་རིང་དོན་འགྲུབ་བཅས་རླངས་འཁོར་ཆུང་ཆུང་ཞིག་གི་ནང་དུ་བཏང་བ་ཡིན། ནང་ལ་རླངས་འཁོར་ཞིག་ཡོད་ཀྱང་། ངས་སྐབས་དེ་དུས་རླངས་འཁོར་གཏོང་མི་ཤེས་ཤིང་། གཏོང་མཁན་གྱི་ཁྱོ་ག་ཚེ་རིང་དོན་འགྲུབ་ནི་ཚད་དེ་ལ་ལྷུང་ཡོད་པ་རེད། ངས་ཁོང་ཕ་མ་གཉིས་ལ་ང་རང་མི་འགོར་བར་ཁྱེད་ཅག་ལ་སྐོར་ར་རྒྱགས་དུ་ཡོང་ཁོ་ཐག་ཡིན། དངོས་ནས་ཕྱོགས་གཅིག་ནས་སྡེ་བའི་ནང་དུ་སོང་ན་བཟང་གི དེ་རུ་ངའི་ཕ་མ་གཉིས་ཀྱི་གམ་དུ་བུ་ཀུན་ཐར་སྐྱབས་ཀྱང་ཡོད་པ་ཡིན་དུས། ཁོ་རང་གིས་བུ་ཀུན་ཐར་སྐྱབས་མཐོང་ན་ཇེ་དགའ་འགྲོ་ན་ཡང་ཐང་།
ཁོང་ཚོ་སོང་ནས་ཉིན་བཅུ་གྲངས་བཅུ་ཙམ་ཞིག་འདས་པ་རེད། ང་རང་ཚེ་རིང་དོན་འགྲུབ་དང་གཅེས་པའི་བུ་ཆུང་ལ་སྐོར་ཞིག་རྒྱགས་དུ་མི་འགྲོ་ག་མེད་ཆགས་ཡོད། གནས་སྐབས་རིང་ཆང་ཁང་ནང་དུ་ལྟ་རྟོགས་བྱེད་ཉན་ཞིག་བློས་འཁེལ་ཆོག་པ་ཞིག་རྙེད་ཀྱི་མི་འདུག གཅིག་ཡོད་པ་དེ་ནི་དགེ་རྒན་འབྲུག་འབུམ་རྒྱལ་རེད། ཁོ་རང་ཡང་དགོང་མོ་མ་གཏོགས་སློབ་ཚན་ཁྲིད་དུ་འགྲོ་དགོས་པ་རེད། ངས་ཁོང་ལ་རེ་སྐུལ་བྱེད་མ་ཐུབ་པར་ཡོད་དུས། ཁོ་རང་ཕལ་ཆེར་ཕྱི་དྲོ་རྟག་པར་ངེད་ཚང་གི་ཆང་ཁང་དུ་ཡོང་གི་ཡོད། ཕྱི་དྲོ་ཞིག་ལ་ཁོས་ང་ལ་ཁྱེད་རང་ཁྱོ་ག་དང་བུ་གཉིས་ལ་སྐོར་ཞིག་རྒྱགས་དུ་འགྲོ་མི་དགོས་སམ་ཟེར།
ང་འགྲོ་ལོས་དགོས། ཡིན་ཡང་། འདི་ལ་ལྟ་མཁན་ཞིག་མི་རེག་གི
ངས་བལྟས་ཆོག་ན་ངས་ལྟ་ཆོག
ཡིན་དང་ཡིན། ཁྱེད་རང་ལོས་ཆོག རེད་དེ་ཁྱེད་ཀྱི་སློབ་ཚན་ཁྲིད་རྒྱུའི་ཕྱོགས་ནས།
ནངས་ཉིན་ནས་བྱིས་པ་ཚོ་གུང་གསེང་ཞིག་ལ་འཁེལ་གྱི་ཡོད།
མུ་འགོད།
