ཨ་རིའི་དམག་ཨབ་གྷན་ནས་ཕྱིར་འཐེན་བྱ་རྒྱུ་ཡིན།

ཁ་སང་ཨ་རིའི་སྲིད་འཛིན་ཨོ་བྷ་མ་ཨབ་གྷན་ནང་སྐོར་སྐྱོད་དང་འབྲེལ་ཏེ་ད་ལོའི་ལོ་ལོ་མཇུག་ཏུ་ཨ་རིའི་དམག་མི་མང་ཆེ་བ་ཨབ་གྷན་ནས་ཕྱིར་ལེན་བྱ་རྒྱུ་ཡིན་སྐོར་བརྗོད་འདུག

ཁ་སང་ཨ་རིའི་སྲིད་འཛིན་ཨོ་བྷ་མ་གློ་བུར་དུ་ཨབ་གྷན་ནང་གི་ཨ་རིའི་གནམ་དམག་ས་ཚིགས་བྷ་གྷམ་ (Bagram)དུ་ཆུ་ཚོད་ ༤ རིང་སྐོར་སྐྱོད་དང་འབྲེལ། ད་ལོའི་ལོ་མཇུག་ཏུ་ཨབ་གྷན་ནང་གི་ཨ་རིའི་དམག་མི་མང་ཆེ་བ་ཕྱིར་འཐེན་བྱ་རྒྱུ་ཡིན་སྐོར་བརྗོད་འདུག ཐེངས་འདིའི་སྐོར་སྐྱོད་སྐབས་ཨོ་བྷ་མས་ཨབ་གྷན་གྱི་སྲིད་འཛིན་ཨ་མེ་ཌི་ཁར་ཛེ་ (Hamid Karzai) མཆོག་དམག་སྒར་དུ་གདན་ཞུ་བྱས་ཡོད་ཀྱང་། ཁོང་གིས་དང་ལེན་བྱས་མེད་སྟབས། ཨོ་བྷ་མས་ཨབ་གྷན་གྱི་གནད་ཡོད་མི་སྣ་གཞན་སུ་གང་ལའང་ཐུག་འཕྲད་བྱས་མི་འདུག

འདིའི་ཐད་ཨོ་བྷ་མས། “ ཨ་རིའི་དམག་མིའི་ཨབ་གྷན་བརྟན་བརླིང་སྲུང་སྐྱོབ་ཀྱི་ལས་ཡུན་རྫོགས་ཏེ་ཕྱིར་ལོག་བྱ་འཆར་ཡོད་སྟབས། ཨབ་གྷན་སྲུང་དམག་ཚོས་སོ་སོའི་རྒྱལ་ཁབ་དང་མང་ཚོགས་ཀྱི་བདེ་འཇགས་ལ་སྲུང་སྐྱོབ་བྱ་དགོས།” ཞེས་དང་། ཁོང་གིས་ད་དུང་ཨ་རིས་ཨབ་གྷན་ནང་བློས་གཏོང་དང་ཉམས་མྱོང་མང་པོ་བསགས་ཡོད་སྟབས། མ་འོངས་པར་ཨ་རིའི་ནང་དྲག་སྤྱོད་པས་གཏོར་རྒོལ་མི་འབྱུང་བར་འགན་སྲུང་བྱ་དགོས་སྐོར་སོགས་བརྗོད་འདུག

ཨ་རིའི་དམག་མི་ཨབ་གྷན་ནང་སྡོད་ཆོག་པའི་རྒྱལ་ཁབ་གཉིས་ཀྱི་རྒྱལ་སྲུང་གྲོས་མཐུན་གྱི་དུས་ཡུན་དེ་འདི་ལོའི་ལོ་མཇུག་ཏུ་རྫོགས་བཞིན་ཡོད་སྟབས། ཨ་རིའི་གཞུང་གིས་ཨ་རིའི་དམག་མི་ཨབ་གྷན་ནང་མུ་མཐུད་སྡོད་རྒྱུར་དུས་ཚོད་འཕར་འགྱངས་ཞུས་ཡོད་ཀྱང་། ད་ལྟའི་ཨབ་གྷན་སྲིད་འཛིན་ཨ་མེ་ཌི་ཁར་ཛེ་ཡིས་དང་ལེན་བྱས་མེད་པ་མ་ཟད། ཨ་རིས་ཨབ་གྷན་གྱི་བདག་དབང་ལ་ཐེ་ཇུས་དང་། ཨ་རིའི་དམག་མིས་ཨབ་གྷན་གྱི་ཉེས་མེད་མི་སེར་མང་པོ་བསད་པ་སོགས་ཀྱི་སྐྱོན་འཛུགས་བྱས་སྟབས་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད།

༢༠༠༡ ལོའི་ཟླ་ ༩ པའི་ཚེས་ ༡༡ ཉིན། ཏ་ལི་པན་དྲག་སྤྱོད་ཤོག་ཁག་གིས་ཨ་རིའི་ནང་གི་འཛམ་གླིང་ཚོང་ལས་ལྟེ་གནས་ ( Twin Towers) གཏོར་རྒོལ་བཏང་རྗེས་ཨ་རིའི་གཞུང་གིས་ཨབ་གྷན་ལ་དམག་བརྒྱབ་སྟེ་ཏ་ལི་པན་དྲག་སྤྱོད་ཤོག་ཁག་ཕམ་ཉེས་བཏང་ཡོད་ཅིང་། སྐབས་དེ་ནས་བཟུང་ཨ་རིས་ཨབ་གྷན་ནང་དམག་ཤུགས་ཆེ་རུ་བཏང་སྟེ། ༢༠༠༤ ལོའི་ཨབ་གྷན་རྒྱལ་ཡོངས་སྲིད་འཛིན་འོས་བསྡུ་སྐབས་དྲག་སྤྱོད་པར་ཁ་གཏད་གཅོག་པ་དང་བདེ་འཇགས་འགན་སྲུང་། དཔལ་འབྱོར་དང་ཤེས་ཡོན། འཕྲོད་བསྟེན་སོགས་ལ་རོགས་རམ་ཤུགས་ཆེན་བྱས་ཡོད་འདུག

ཨ་རིས་འདས་པའི་ལོ་ ༡༣ རིང་ཨབ་གྷན་གྱི་བརྟན་བརླིང་སྲུང་སྐྱོབ་ཆེད་དམག་མི་འབུམ་ ༢ ལྷག་བཏང་ཡོད་ཅིང་། དེ་དག་ལས་ ༢༠༠༡ ལོ་ནས་ ༢༠༡༠ ལོའི་བར་ལོ་རེར་ཉུང་མཐར་ཡང་དམག་མི་འབུམ་ ༡ བཏང་ཡོད་ཀྱང་། དེ་རྗེས་རིམ་པས་ཉུང་དུ་བཏང་སྟེ་ད་ཆ་དམག་མི་ ༣༢༠༠༠ ཙམ་ལས་མེད་པ་དང་། ཨབ་གྷན་ནང་གི་ཨ་རིའི་དམག་མི་ ༢༡༨༡ ཙམ་ཞིག་འདས་གྲོངས་སུ་ཕྱིན་ཡོད་འདུག

ཨ་རིས་ཨབ་གྷན་དང་ཨི་རག་གྱི་དམག་འཁྲུག་སྐབས་ཨ་སྒོར་ཁྲག་ཁྲིག་ཆེན་མོ་ ༦།༦༧༨༩ ལྷག་གི་འགྲོ་གྲོན་བཏང་ཡོད་ཅིང་། དེ་དག་ལས་ཨབ་གྷན་གྱི་དམག་འཐབ་དང་བརྟན་བརླིང་སྲུང་སྐྱོབ་ཆེད་ཨ་སྒོར་ཁྲག་ཁྲིག་ཆེན་མོ་ ༤ ཙམ་བཏང་ཡོད་འདུག་ལ། རྒྱལ་ཁབ་འཛུགས་སྐྲུན་དང་དཔལ་འབྱོར་འཕེལ་རྒྱས། ཤེས་ཡོན་གོང་འཕེལ་སོགས་ཀྱི་སྐོར་ལ་ཨ་སྒོར་ཁྲག་ཁྲིག་ཆེན་མོ་ ༣།༦༤༨ ལྷག་བཏང་ཡོད་འདུག

༢༠༡༡ ལོར་ཨ་རིས་ཨི་རག་དང་ཨ་རིའི་བར་གྱི་རྒྱལ་སྲུང་གྲོས་མཐུན་ལ་མིང་རྟགས་བཀོད་ཐུབ་མེད་སྟབས། ཨ་རིའི་དམག་མི་ཨི་རག་ནས་ཕྱིར་ལེན་བྱ་དགོས་བྱུང་ཡོད་ཅིང་། ད་རེས་ཨབ་གྷན་སྲིད་གཞུང་གིས་གྲོས་མཐུན་ལ་ངོས་ལེན་མ་བྱས་ཚེ། ཨ་རིའི་དམག་མི་ ༥༠༠༠ ཙམ་ཞིག་ལས་གཞན་རྣམས་ཕྱིར་ལེན་བྱ་དགོས་ཀྱི་ཡོད་འདུག

རྒྱལ་སྤྱིའི་ཐབས་ཇུས་མཁས་པ་མལ་རེ་གྷོ་ཌི་ལགས་ཀྱིས། “ ༢༠༡༡ ལོར་ཨ་རིའི་དམག་མི་ཨི་རག་ནས་ཕྱིར་ལེན་བྱས་པར་བརྟེན། ཨི་རག་ནང་མི་གསོད་དོན་རྐྱེན་དང་ཡུལ་བདེ་ཞི་འཇགས་མེད་པའི་དཀའ་ངལ་ཆེ་རུ་ཕྱིན་ཡོད་པའི་ཉམས་མྱོང་བླངས་ཏེ། ཐེངས་འདིར་ཨབ་གྷན་གཞུང་གིས་ཨ་རིའི་སྲུང་སྐྱོབ་དམག་མི་ཨབ་གྷན་ནང་མུ་མཐུད་སྡོད་ཆོག་པའི་གན་ཡིག་ལ་མིང་རྟགས་བཀོད་ན་ལེགས།” ཞེས་བརྗོད་འདུག

ཨོ་བྷ་མ་ཨ་རིའི་སྲིད་འཛིན་ལ་བསྐོ་བཞག་བྱས་རྗེས་ད་བར་ཨབ་གྷན་ནང་ཐེངས་བཞི་ཙམ་པྱིན་ཡོད་འདུག

གསར་འགོད་པ། དོན་གྲུབ།