རྒྱ་གར་དང་ཨ་རིའི་ཐབས་ཇུས་གྲོས་མོལ་ཐེངས་ལྔ་པ་ལྡི་ལིར་ཚོགས་སྐབས་རྒྱ་གར་ཕྱི་སྲིད་བློན་ཆེན་གྱིས་གལ་ཏེ་ཨ་རིས་རྒྱ་གར་གྱི་མགོ་ཁྲིད་ཚོའི་ཁ་པར་དང་དྲ་རྒྱའི་ནང་ལྐོག་འཛུལ་བྱས་ཚེ་རྒྱ་གར་གཞུང་གིས་བཟོད་སྒོམ་བྱ་རྒྱུ་མིན་ཟེར།
ཟླ་འདིའི་ཚེས་ ༣༠ ནས་བཟུང་ཉིན་གསུམ་རིང་ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་ཡིས་སྣེ་འཁྲིད་པའི་ཨ་རིའི་ཚོང་དོན་དྲུང་ཆེ་ཧྥན་ནཱི་ (Penny Pritzker) དང་། ནང་སྲིད་དང་གློག་ཤུགས་བཀོལ་གཏོང་དྲུང་འཕར་རྣམ་གཉིས། ཁོར་ཡུག་གནད་དོན་ཆེད་མཁས་པ་བཅས་ཀྱི་སྐུ་ཚབ་ཚོགས་ཆུང་ཞིག་རྒྱ་གར་ནང་སྐོར་སྐྱོད་བྱེད་བཞིན་ཡོད་ཅིང་། ཨ་རི་དང་རྒྱ་གར་བར་གྱི་ཐབས་ཇུས་གྲོས་མོལ་ཐེངས་ལྔ་པ་ (The fifth India-US Strategic Dialogue) ཞེས་པར་མཉམ་ཞུགས་བྱས་ཏེ། ཨ་རྒྱའི་བར་གྱི་རྒྱལ་སྲུང་དང་རྡུལ་ཕྲན་གློག་ཤུགས་རྒྱུད་གཏོང་། རྒྱལ་ཁབ་ཕན་ཚུན་བར་མ་འཇོག་བྱེད་སྟངས། འཇིགས་སྐུལ་རིང་ལུགས་པར་ཁ་གཏད་གཅོག་ཐབས། པ་ལི་སི་ཐན་དང་ཨི་ཛི་རལ། ཨབ་གྷན་གཙོས་རྒྱལ་སྤྱི་དང་རྒྱལ་ནང་གི་དཀའ་རྙོག རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་ཨ་རིར་སྐོར་སྐྱོད་གཙོས་རྒྱ་གར་གཞུང་གིས་རྒྱལ་སྤྱིའི་ཚོང་དོན་ལྷན་ཚོགས་ཀྱི་གྲོས་མཐུན་ལ་བཀག་རྒྱ་བྱེད་དོན་སོགས་ཀྱི་སྐོར་ལ་གྲོས་མོལ་བྱས་ཡོད་འདུག
འདིའི་ཐད་རྒྱ་གར་གྱི་ཕྱི་སྲིད་བློན་ཆེན་ལྕམ་སུ་ཞི་མཱ་ལགས་ཀྱིས། ” རྒྱ་གར་གྱིས་ཨ་རི་མཐུན་གྲོགས་རྒྱལ་ཁབ་ཅིག་ལ་ངོས་འཛིན་བྱེད་བཞིན་ཡོད་ཀྱང་། གལ་ཏེ་ཨ་རིས་རྒྱ་གར་གཞུང་གི་མགོ་ཁྲིད་ཚོའི་དྲ་རྒྱ་དང་ཁ་པར་སོགས་ཀྱི་ནང་ལྐོག་འཛུལ་བྱས་ཚེ་རྒྱ་གར་གཞུང་གིས་བཟོད་སྒོམ་བྱ་རྒྱུ་མིན།”ཞེས་བརྗོད་ཡོད་འདུག
ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་ཡིས། “ང་ཚོས་ཨ་རྒྱའི་བར་གྱི་འབྲེལ་ལམ་ལ་མཐོང་ཆེན་བྱེད་བཞིན་ཡོད་པ་མ་ཟད། རྒྱལ་ཁབ་གཉིས་ནང་འཕྲད་བཞིན་ཡོད་པའི་འཇིགས་སྐུལ་རིང་ལུགས་པའི་གནད་དོན་སྦ་གསང་མེད་པར་ཕན་ཚུན་གོ་བསྡུར་དང་འབྲེལ་དཀའ་རྙོག་དེ་དག་སེལ་ཐབས་དང་། ང་ཚོའི་མཉམ་རྒྱལ་འབྲེལ་ལམ་ལ་དོ་ཕོག་གཏོང་མཁན་ཚོར་ཁ་གཏད་གཅག་སྟེ། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་སུ་གཏོང་ཐབས་བྱ་རྒྱུ་དང་། རྒྱ་གར་ཕྱི་སྲིད་བློན་ཆེན་གྱིས་གང་བརྗོད་པ་དག་ལ་གུས་བརྩི་བྱེད་བཞིན་ཡོད།”ཅེས་སོགས་བརྗོད་འདུག
ཨ་རིའི་ཕྱི་སྲིད་དྲུང་ཆེ་དང་རྒྱ་གར་གྱི་ཕྱི་སྲིད་བློན་ཆེན་རྣམ་གཉིས་ཀྱི་ཐུན་མོང་བསྒྲགས་གཏམ་ནང་། ”ང་ཚོས་ད་ལྟའི་རྒྱ་གར་གཞུང་དང་ཨ་རིའི་འབྲེལ་ལམ་ལ་ནུས་པ་དང་གོ་སྐབས་གསར་པ་ཞིག་ཡོད་པར་ངོས་འཛིན་དང་། ཟླ་རྗེས་མར་ཨ་རིར་སྲིད་འཛིན་ཨོ་བྷ་མ་དང་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་མཆོག་ཐུག་འཕྲད་གནང་རྒྱུ་ཡིན་སྟབས། རྒྱལ་ཁབ་གཉིས་ཀྱི་འབྲེལ་ལམ་ལ་སྔར་མེད་འགྱུར་ལྡོག་ཅིག་འགྲོ་རྒྱུ་ཡིན་པར་ངོས་འཛིན་ཞུ་བཞིན་ཡོད།”ཅེས་བརྗོད་འདུག
རྒྱ་གར་དང་ཨ་རིའི་ཐབས་ཇུས་གྲོས་མོལ་ (India-US Strategic Dialogue) ཞེས་པ་འདི། ༢༠༠༩ ལོའི་ཟླ་ ༧ ནང་རྒྱ་གར་དང་ཨ་རི་ཐུན་མོང་ཐོག གློག་ཤུགས་དང་གཤམ་གཤིས་འགྱུར་ལྡོག ཤེས་ཡོན་དང་འཕེལ་རྒྱས། དཔལ་འབྱོར་དང་ཚོང་ལས། ཚན་རིག་དང་འཕྲུལ་རིག། འཕྲོད་བསྟེན་དང་གསར་གཏོད་བཅས་དོན་ཚན་ལྔའི་ཐོག་མཉམ་ལས་བྱེད་ཕྱོགས་གཞི་ལ་བཅོལ་ཏེ་གསར་འཛུགས་བྱས་རྗེས། ༢༠༡༠ ལོར་ཨ་རིའི་རྒྱལ་ས་ཝ་ཤིན་ཌོན་དུ་གྲོས་མོལ་ཐེངས་དང་པོ་དང་། གཉིས་པ། ༢༠༡༡ ལོའི་ཟླ་ ༧ པར་རྒྱ་གར་རྒྱལ་ས་ལྡི་ལི། གསུམ་པ། ༢༠༡༢ ལོའི་ཟླ་ ༦ པར་ཝ་ཤིན་ཌོན། བཞི་པ། ༢༠༡༣ ལོའི་ཟླ་ ༦ པར་ལྡི་ལི། ལྔ་པ། ༢༠༡༤ ལོའི་ཟླ་ ༧ ཚེས་ ༣༠ ཉིན་རྒྱ་གར་རྒྱལ་ས་ལྡི་ལི་བཅས་ནང་སྐོང་ཚོགས་བྱས་ཡོད་འདུག
༢༠༡༣ ལོའི་ཟླ་ ༡༢ པའི་ནང་ཨ་རིའི་ནེའུ་ཡོག་གྲོང་ཁྱེར་ཉེན་རྟོག་པས་ནེའུ་ཡོག་ཏུ་ཡོད་པའི་རྒྱ་གར་གཞུང་ཚབ་ཡན་ལག་ཁང་གི་སྐུ་ཚབ་གཞོན་པ་ཞིག་བཀག་ཉར་འདྲི་གཅོད་བྱས་སྟབས། རྒྱ་གར་གཞུང་གིས་ལྡི་ལིའི་ཨ་རིའི་གཞུང་ལས་ཁུངས་ལ་རྣམ་འགྱུར་མི་ལེགས་པ་བསྟན་པ་སོགས་ལ་བརྟེན་ཏེ་སྐབས་ཤིག་རིང་རྒྱལ་ཁབ་གཉིས་བར་གྱི་འབྲེལ་བར་དོ་ཕོག་ཕྱིན་ཡོད་ཀྱང་། ནཱ་རེན་ཌ་མུ་དྷེ་ལ་རྒྱ་གར་སྲིད་བློན་རྒྱལ་ཁ་ཐོབ་པ་མ་ཐག ཨ་རིའི་སྲིད་འཛིན་ཨོ་བྷ་མས་དེ་སྔོན་ནཱ་རེན་མུ་དྷེས་རྒྱ་གར་གྷུ་ཅུ་ར་ཌེའི་མངའ་སྡེའི་སྤྱི་ཁྱབ་ཡིན་སྐབས་ཁ་ཆེ་མང་པོ་བསད་པའི་ཉེས་མིང་འོག་ཨ་རིར་འགྲོ་སྐྱོད་ཐོངས་མཆན་སྤྲོད་རྒྱུ་མིན་པའི་ཁྲིམས་ཡིག་རྩིས་མེད་བཏང་སྟེ། ནཱ་རེན་ཌ་མུ་དྷེ་མཆོག་རྒྱ་གར་གྱི་སྲིད་བློན་རྒྱལ་ཁ་ཐོབ་པར་འཚམས་འདྲི་ཞུས་ཡོད་པ་མ་ཟད། ཁོང་ཟླ་རྗེས་མའི་ནང་ཨ་རིར་མགྲོན་འབོད་གནང་བ་སོགས་བཟང་ཕྱོགས་ཀྱི་འབྲེལ་ལམ་བསྐྱར་འཛུགས་བྱས་ཡོད།
ཟླ་སྔོན་མའི་ཚེས་ ༢༧ ཉིན་རྒྱ་གར་གཞུང་གིས་རྒྱལ་སྤྱིའི་ཚོང་དོན་ལྷན་ཚོགས་ཀྱིས་ཐག་གཅོད་བྱུང་བའི་ཚོང་ལས་ཐོག་མཐུན་རྐྱེན་སྐྲུན་ཕྱོགས་ཀྱི་གྲོས་མཐུན་ ( Trade facilitation Agreement) ཞེས་པར་མིང་རྟགས་མ་བཀོད་པར། ཨ་རི་གཙོས་རྒྱལ་སྤྱིའི་རྒྱལ་ཁབ་ཁག་གིས་སྐྱོན་བརྗོད་བྱས་ཡོད་སྟབས། ཨ་རྒྱའི་བར་གྱི་འབྲེལ་ལམ་ལ་ཤུགས་རྐྱེན་ཐེབས་ཡོད་ཀྱང་། ཟླ་སྔོན་མའི་ཚེས་ ༢༨ ཉིན་ཨ་རིའི་ཕྱི་སྲིད་དྲུང་ཆེ་ཇོན་ཀེ་རེ་རྒྱལ་ས་ཝ་ཤིན་ཌོན་དུ་རྟེན་གཞི་བྱས་ པའི་ཨ་རིའི་ཤེས་ཡོན་འཕེལ་རྒྱས་བསྟི་གནས་ཁང་ (Centre for American Progress) གིས་གོ་སྒྲིག་བྱས་པའི་ཨ་རྒྱའི་འབྲེལ་ལམ་སྐོར་གྱི་བགྲོ་གླེང་ཞིག་ཐོག་བསྐྱོད་དེ། ཨ་རྒྱ་བར་གྱི་འབྲེལ་ལམ་ནི་དུས་རབས་ཉེར་གཅིག་ནང་གལ་འགངས་ཆེ་ཤོས་ཆགས་ཡོད་སྐོར་བརྗོད་པ་མ་ཟད། ཚེས་ ༣༠ ནས་ཉིན་གསུམ་རིང་རྒྱ་གར་ནང་སྐོར་སྐྱོད་དང་འབྲེལ་རྒྱལ་ཁབ་གཉིས་ཀྱི་འབྲེལ་ལམ་བསྐྱར་གསོ་ཡོང་ཐབས་བྱས་ཡོད།
གསར་འགོད་པ། དོན་གྲུབ།
