རྒྱ་གར་སྲིད་བློན་སཱ་ཆེན་དམག་སྒར་དུ་སྐྱོད་འཆར།

ཉིན་འགའི་རྗེས་རྒྱ་གར་སྲིད་བློན་ལ་དྭགས་དང་ཀར་གྷེལ་དུ་གཟིགས་སྐོར་གྱི་ཞོར་དུ་རྒྱ་གར་དང་པ་ཀི་སི་ཐན་བར་རྩོད་རྙོག་ཡོད་པའི་སཱ་ཆེན་དམག་སྒར་དའང་སྐོར་སྐྱོད་གནང་འཆར་ཡོད་འདུག

ཁ་སང་རྒྱ་གར་གྱི་གསར་འགྱུར་བརྒྱུད་ལམ་ཁག་ཅིག་ནང་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༡༢ ཉིན་རྒྱ་གར་གྱི་སྲིད་བློན་མུ་དྷི་རྒྱ་གར་བྱང་ཕྱོགས་ཇ་མུ་ཀ་ཤི་མུར་མངའ་སྡེའི་ལ་དྭགས་རྫོང་དང་ཀར་གྷེལ་རྫོང (Kargil) གཉིས་ནང་གཟིགས་སྐོར་གནང་སྟེ། ཆུ་གློག་ས་ཚིགས་གཉིས་ཀྱི་རྨང་རྡོ་གསར་རྒྱག་གི་ལས་གཞི་དབུ་འབྱེད་དང་མི་མང་ལ་གཏམ་བཤད་སྤེལ་རྒྱུ་ཡིན་པ་མ་ཟད། རྒྱ་མཚོ་ངོས་ནས་མཐོ་ཚད་ཧྥེ་ཊི་ ༡༧༠༠༠ ནས་ ༢༣༠༠༠ ལྷག་ཡོད་པའི་རྒྱ་གར་དང་པ་ཀི་སི་ཐན་བར་རྩོད་རྙོག་ཆེ་བའི་ས་མཚམས་རྒྱ་གར་སཱ་ཆན་འཁྱགས་རོམ་ (Siachen Glacier) དམག་སྒར་ལ་གཟིགས་སྐོར་གནང་འཆར་ཡོད་འདུག

གཟིགས་སྐོར་འདིའི་ཐད་རྒྱ་གར་གྱི་འབྲེལ་ཡོད་དམག་སྡེ་ལས་ཁུངས་ཀྱིས་གསར་འགོད་པར། ཟླ་འདིའི་གཟའ་འཁོར་གཉིས་པའི་ནང་ཉེ་ལམ་གསར་དུ་བསྐ་བཞག་བྱས་པའི་དམག་སྤྱི་ཆེན་མོ་སྐུ་ཞབས་ཌིར་སྤིར་སིན་ (Gen Dalbir Singh Suhag)ལགས་སཱ་ཆན་དམག་སྒར་དུ་གཟིགས་སྐོར་དུ་ཕེབས་འཆར་ཡོད་ཀྱང་། སྲིད་བློན་མུ་དྷི་ཕེབས་ཀྱི་ཡོད་སྟབས་དམག་སྤྱིའི་གཟིགས་སྐོར་ཕྱིར་འཐེན་བྱས་ཡོད་ཚུལ་བརྗོད་འདུག

རྒྱ་གར་གྱི་སྲིད་དོན་དབྱེ་ཞིབ་པ་ཚོས། བྷེ་ཇེ་པེ་གཞུང་འཛིན་ཚོགས་པ་ (NDA) ལ་ཐོན་ལ་ཉེ་བའི་མངའ་སྡེའི་གྲོས་ཚོགས་ཀྱི་འོས་བསྡུ་ཐོབ་ཆེད་དང་། ཇ་མུ་མངའ་སྡེ་འདི་རྒྱ་གར་གྱི་བདེ་འཇགས་དང་དམག་དོན་ཐབས་ཇུས་ཐོག་ཧ་ཅང་གལ་ཆེན་ཡིན་སྟབས། ཐེངས་འདིར་སྲིད་བློན་གྱིས་གནད་འགག་དེར་དམིགས་པ་ཞིག་ཡིན་སྐོར་ཡང་རྗོད་བཞིན་ཡོད་འདུག

༡༩༨༤ ལོར་སཱ་ཆན་དུ་རྒྱ་གར་དང་པ་ཀི་སི་ཐན་བར་དམག་འཁྲུག་བརྒྱབ་སྟེ་དམག་མི་སྟོང་ཕྲག་ལྷག་བསད་པར་བརྟེན། པ་ཀི་སི་ཐན་གྱིས་རྒྱ་གར་ལ་གྲོས་མགོ་བཏོན་ནས་དམག་མཚམས་བཞག་ཡོད། ལོ་འགའི་རྗེས་པ་ཀི་སི་ཐན་གྱིས་སཱ་ཆེན་དུ་ཡོད་པའི་རྒྱ་གར་དམག་དཔུང་ཕྱིར་འཐེན་བྱེད་དགོས་ཚུལ་བརྗོད་ཡོད་ཀྱང་། རྒྱ་གར་གྱིས་ས་གནས་དེ་དམག་དོན་ཐོག་གནད་འགག་ཆགས་ཡོད་སྟབས་ཁས་ལེན་བྱས་མེད་པ་དང་། ༢༠༠༥ ལོར་རྒྱ་གར་སྲིད་བློན་མན་མོ་ཧན་སིན་གིས་སཱ་ཆན་དམག་སྒེར་དུ་གཟིགས་སྐོར་ཐོག་མ་གནང་ཡོད་འདུག

སཱ་ཆན་དམག་སྒེར་འདི་ནི་འཛམ་གླིང་ཐོག་གི་ས་བབ་ཆེས་མཐོ་བའི་དམག་སྒར་དེ་ཆགས་ཡོད་པ་མ་ཟད། རྒྱ་གར་གཞུང་གིས་ཤར་བྱང་མཐའ་མཚམས་སུ་དམག་དོན་འགྲོ་གྲོན་གཏོང་ཡུལ་ཤུགས་ཆེ་ཤོས་དེ་ཡང་ཆགས་ཡོད་འདུག

གསར་འགོད་པ། ལྷ་སྐྱབས་རྒྱལ།