དེ་རིང་སྔ་དྲོར་རྒྱ་ནག་ཀོང་ཞི་ཞིང་ཆེན་ལིན་སན་རྫོང་ཁོངས་ཀྱི་སློབ་ཆུང་སློབ་མ་ ༤ ལ་གྲི་ཡིས་བརྒྱབ་སྟེ་དམར་གསོད་བཏང་ཡོད་འདུག
དེ་རིང་སྔ་དྲོ་པེ་ཅིན་གྱི་ཆུ་ཚོད་་ ༦།༢༠ ཙམ་ལ། རྒྱ་ནག་ཀོང་ཞི་ཞིང་ཆེན་ལིན་སན་རྫོང་ཕེན་སན་གྲོང་བརྡལ་གྱི་ཀོ་ཕོ་སློབ་ཆུང་གི་སློབ་མ་ ༤ སློབ་གྲྭར་འགྲོ་བའི་ལམ་བར་དུ། རྐང་གསུམ་འཁོར་ལོ་གཏོང་མཁན་གྱི་སྐྱེས་པ་ཞིག་གིས་གང་བྱུང་གྲི་ཡིས་བརྒྱབ་སྟེ་ཚང་མ་དམར་གསོད་བཏང་ཡོད་འདུག
ས་གནས་ཉེན་རྟོག་ཕྱོགས་ནས་བརྗོད་པ་ལྟར་ན། དམར་གསོད་དོན་རྐྱེན་བྱུང་མ་ཐག་ཉེན་རྟོག་པས་ལག་དམར་རྗེས་འདེད་བཏང་སྟེ་རྩད་གཅོད་བྱེད་བཞིན་ཡོད་ལུགས་དང་། ལག་དམར་དེ་ཕེན་སན་གྲོང་བརྡལ་ནས་ཡིན་ཞིང་། ད་ལྟ་ལོ་ན་ ༥༦ ཙམ་ཡིན་སྐོར་བརྗོད་འདུག
གཞན་ཡང་། ཟླ་འདིའི་ཕྱི་ཚེས་ ༡ ཉིན་ཧུའུ་པེ་ཞིང་ཆེན་ཧྲི་ཡན་གྲོང་ཁྱེར་ཡེན་ཞི་རྫོང་ཏུང་ཧྥང་སློབ་ཆུང་གི་སློབ་མ་ ༩ ལ་སྐྱེས་པ་ཞིག་གིས་གྲི་ཡིས་བརྒྱབ་སྟེ། ཉུང་མཐར་སློབ་ཕྲུག་ ༤ དམར་གསོད་དང་། གཞན་རྣམས་ལ་རྨས་སྐྱོན་ཚབས་ཆེན་བཟོས་རྗེས། ལག་དམར་ཁོ་རང་ཡང་ཉེ་འགྲམ་གྱི་ཁང་རྩེག་ཅིག་གི་ཐོག་ནས་མཆོངས་ཏེ་རང་ཤི་བརྒྱབ་ཡོད་འདུག
རྒྱ་ནག་ནང་སློབ་མ་དམར་གསོད་ཀྱི་དོན་རྐྱེན་རིམ་པར་བྱུང་བཞིན་ཡོད་པ་ལྟར། འདི་ལོའི་ཕྱི་ཟླ་ ༥ ནང་ཧུའུ་པེ་ཞིང་ཆེན་མཱ་ཁྲིན་གྲོང་ཁྱེར་གྱི་སློབ་ཆུང་ནང་། གློ་བུར་དུ་ཕྱི་ནས་སྐྱེས་པ་ཞིག་ཡོང་སྟེ་སློབ་མ་ ༨ ལ་གྲིས་བརྒྱབ་ནས་རྨས་སྐྱོན་བཟོས་ཡོད་པ་དང་། ཡང་ཕྱི་ཟླ་ ༤ པའི་ནང་དུ། སན་ཞི་ཞིང་ཆེན་ཨན་ཁཱང་གྲོང་ཁྱེར་གྱི་དམའ་འབྲིང་སློབ་མ་འགའ་སློབ་གྲྭ་ནས་ཁྱིམ་དུ་ལོག་པའི་ལམ་བར་དུ། མི་བཅུ་གྲངས་ཤིག་གིས་གྲི་སོགས་ཀྱིས་བརྒྱབ་ཏེ་རྨས་སྐྱོན་བཟོས་པ་མ་ཟད། སློབ་མ་ཞིག་ལ་རྨས་སྐྱོན་ཚབས་ཆེན་བཟོས་ཏེ་འདས་གྲོངས་སུ་གྱུར་ཡོད་འདུག ཕྱི་ལོ་ ༢༠༡༠ ནས་ད་ལྟའི་བར་རྒྱ་ནག་ནང་ཁྱོན་སློབ་མ་ ༤༠ ལྷག་ལ་དམར་གསོད་ཁྲོད་རྨས་སྐྱོན་བཟོས་ཡོད་པ་མ་ཟད། སློབ་ཕྲུག་ ༡༠ ཙམ་གྱིས་ཚེ་སྲོག་ཤོར་ཡོད་འདུག
གསར་འགོད་པ། པདྨ་མཚོ།
