དུས་དབང་གོ་སྒྲིག་ཚོགས་ཆུང་གིས་གསལ་བཤད་གནང་བར་ཐེངས་འདིའི་དུས་དབང་གི་མཇུག་ཏུ་ཧིན་སྒོར་ ༦༤༢༦༥༠༦ ཙམ་ལྷག་ཡོད་པ་དང་རྩིས་ཁྲ་རྗེས་སུ་ཁམས་གཙང་བཟོས་ཏེ་གསལ་བསྒྲཊ་སྤེལ་རྒྱུ་ཡིན་ཟེར།
ཕྱི་ཚེས་ ༡༣ ཉིན་ལ་དྭགས་རྒྱལ་ས་སླེའི་ཞི་བའི་ཚལ་གསུང་ཆོས་རྭ་བར་༧གོང་ས་མཆོག་ལ་བརྟན་བཞུགས་བསྟར་འབུལ་དང་འབྲེལ། ལ་དྭགས་དགོན་པའི་དགེ་བཤེས་དཀོན་མཆོག་དར་རྒྱས་ལགས་ཀྱིས་ཐེངས་འདིའི་དུས་འཁོར་དབང་ཆེན་ཐེངས་ ༣༣ པའི་སྟེང་གི་དངུལ་བྱུང་སོང་ལྷག་གསུམ་གྱི་རྩིས་ཁྲ་མང་ཚོགས་ལ་སྙན་སེང་ཞུས་པ་ལྟར་ན། ཕྱི་ཟླ་ ༧ ཚེས་ ༡༢ བར་། བྱུང་གི་ཁོངས་སུ་སྐུ་འགྱེད་དང་མང་ཇ། བརྟེན་བཞུགས་བཅས་ཀྱི་ཆེད་དུ་བྱུང་ཁྱོན་བསྡོམས་ཧིན་སྒོར་ ༡༢༣༢༠༡༣༡༣ ཙམ་དང་། སོང་ཁྱོན་ཧིན་སྒོར་ ༡༡༦༦༧༤༨༧༠ ། ད་ལྟ་ཤུལ་དུ་ལྷག་ཡོད་པ་ཁྱོན་ཧིན་སྒོར་ ༦༤༢༦༥༠༦ ཆགས་ཡོད་འདུག
དེ་དག་ཁྲོད་དགེ་འདུན་པར་སྐུ་འགྱེད་ཆེད་ཧིན་སྒོར་ ༡༢༣༩༢༣༧༢ ཙམ་བྱུང་ཡོད་པ་ལས་ཕར་འགྲོ་སོང་བཏང་བ་ཧིན་སྒོར་ ༡༢༣༩༢༣༧༢ ཆགས་ཡོད་འདུག
བརྟེན་བཞུགས་ཆེད་ཧིན་སྒོར་ ༣༥༦༩༥༥༣ ཙམ་བྱུང་ཡོད་པ་ལས་ཕར་འགྲོ་སོང་བཏང་བ་ཧིན་སྒོར་ ༣༥༦༩༥༥༣ ཆགས་ཡོད་འདུག
ད་ལྟ་ལྷག་བསྡད་པ་ཧིན་སྒོར་ ༦༤༢༦༥༠༦ ཙམ་ཡོད་པ་དང་། ད་དུང་འགྲོ་སོང་ཙག་ཙིག་མང་པོ་ཞིག་སོང་གི་ཁོངས་སུ་ཚུད་མེད་ཅིང་། རྗེས་ལ་རྩིས་ཁྲ་ཁམས་གཙང་བཟོས་ཏེ་དགའ་ལྡན་ཕོ་བྲང་ལ་འབུལ་འཆར་ཡོད་འདུག
བྱུང་སོང་རྩིས་ཁྲ་སྙན་སྒྲོན་ཞུས་ཚར་རྗེས་༧གོང་ས་མཆོག་གིས་བཀའ་གནང་དོན། འདི་གའི་ནང་པའི་ཆོས་ཚོགས་ཀྱི་གཙོ་འཛིན་དང་དགོན་པའི་ཚོགས་པའི་གཙོ་འཛིན་ཁྱེད་རང་གཉིས་ཀྱི་ངོས་ནས་དགའ་བསུ་དང་གསུང་བཤད་གནང་བར་ཐུགས་རྗེ་ཆེ་ཞུ་རྒྱུ་ཡིན། དངུལ་གྱི་འགྲོ་གྲོན་སྐོར་གྱི་རྩིས་ཁྲ་ཧ་ཅང་ཁ་གསལ་གསུངས་པར་དགའ་པོ་བྱུང་། ཐུགས་རྗེ་ཆེ། ངོས་ཀྱིས་འབུལ་བ་རྩ་བ་ནས་ལེན་གྱི་མེད། འབུལ་བ་བླངས་ན་ཆོས་བཙོང་པ་དང་གཅིག་པ་རེད། སྔར་བོད་ཀྱི་རྫོགས་ཆེན་སྣ་ཚོགས་ རང་གྲོལ་གྱི་རྣམ་ཐར་ནང་ཁོང་གི་དམ་བཅའ་གཅིག་ལ་ཆོས་བཤད་ནས་འབུལ་བ་ལེན་གྱི་ མིན་ཞེས་དམ་བཅའ་བཞག་ཡོད། ངོས་རང་དེར་ཧ་ཅང་གི་ཡིད་འཕྲོག་སོང་། དངོས་གནས་དྲང་གནས་ཆོས་བཤད་ནས་འབུལ་བར་ཨང་ཉན་བརྒྱབ་ན། བོད་ཀྱི་བླ་མ་ཞིག་གིས་གསུངས་ཡོད། །དབང་བསྐུར་ཆོས་བཤད་བྱེད་དུས། །རྣམ་དཔྱོད་འདྲ་ཞིང་འདུག་སྟེ། །འབུལ་བ་ཨང་ཉན་བྱེད་དུས། །སེམས་པ་གཏིང་ནས་སྐྱོ་བྱུང་། ཞེས་པ་འདི་ཆགས་ན་རྩ་བ་ནས་ཡག་པོ་མེད། དེར་བརྟེན་ངོས་ནས་འབུལ་བ་ལེན་གྱི་མེད། ཚང་མ་རང་ལོག་ཕུལ་གྱི་ཡོད། ཅེས་གསུངས་འདུག
མཇུག་ཏུ་ཇོ་ནང་གི་སྐོར་ལ་གསུངས་དོན། ད་ལྟ་ཇོ་ནང་མཁན་པོ་ཁྱེད་རང་ཚོས་མཎྜལ་ཧ་ཅང་ཆེན་པོ་བཟོས་འདུག ངོས་ཀྱིས་ད་གིན་ཞུས་པ་བཞིན་ཁྱེད་རང་ཚོ་སིམ་ལའི་དགོན་པར་དྲན་རྟེན་ཆེད་སྒྲིག་ འཇོག་བྱོས། དྲན་རྟེན་བྱེད་སྐབས་ག་རེ་དྲན་དགོས་རེད་ཅེ་ན། དཔལ་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་གི་ལག་ལེན་དམར་ཁྲིད་རྒྱུན་མ་ཆད་ པ་ཞིག་ཁྱེད་རང་ཚོ་ཇོ་ནང་པ་ཚོར་ཡོད། རང་སྟོང་དང་གཞན་སྟོང་། དོན་དམ་བདེན་པ། རྟག་པ་རང་དབང་པ་སོགས་ལ་ང་ཚོ་རྩོད་པ་ཡོད་པ་རེད། གང་ལྟར་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་སྐོར་བོད་གངས་ཅན་གྱི་ལྗོངས་ལ་སངས་རྒྱས་ཀྱི་བསྟན་པའི་ནང་ནས་སྦྱོར་བ་ཡན་ལག་དྲུག་གི་ལག་ལེན་རྒྱུན་མ་ཆད་པར་ ཡོད་པ་དེ་ཇོ་ནང་པ་རེད། བོད་ནང་དུ་ཆ་བཞག་ན། ཛམ་ཐང་ཁུལ་དུ་ཧ་ཅང་དར་སོ་ཆེན་པོ་ཡོད་པ་ཡག་པོ་འདུག གཞན་ཞུ་རྒྱུ་གང་ཡང་མི་འདུག ཁྱེད་རང་ཚོ་ཆང་མས་བློ་ཆོས་སུ་སོང་བ་དང་། བློ་དུལ་བའི་ཁས་ལེན་དམ་བཅའ་གནང་སོང་ལ། ཧུར་ཐག་གནང་ཤོག ངོས་ལ་ཆ་བཞག་ན་ལོ་ ༧༩ བསླེབས་ཡོད། ད་བར་ཧུར་ཐག་བྱས་པ་ཡིན། ད་དུང་ཡིན་ནའང་སྟོན་པ་བཀའ་དྲིན་ཅན་གྱི་རྗེས་འབྲང་དགེ་སློང་ཞིག་གིས་སྟོན་ པའི་ཞབས་འདེགས་བསྒྲུབ་མ་ཐུབ་ནའང་ཞབས་མ་འདྲེན་པ་ཞིག་བྱེད་དགོས་བསམ་པ་རྟག་ཏུ་དྲན་བཞིན་ཡོད། ཁྱེད་རང་ཚོས་ཀྱང་ཧུར་ཐག་བྱོས། ཞེས་སོགས་གསུངས་འདུག
ད་རེས་དུས་འཁོར་དབང་ཆེན་གོ་སྒྲིག་གནང་མཁན་དང་བསྟན་པའི་སྦྱིན་བདག་གནང་མཁན་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་དང་ཐུགས་རྗེ་ཆེ་ཞུ་རྒྱུ་ཡིན། ཡུལ་དུས་དང་ས་ཆའི་མཐུན་རྐྱེན་ཧ་ཅང་སྐྱོ་བོ་ཡིན་ནའང་གང་ཐུབ་ཅི་ཐུབ་གནང་བ་དང་། ལྷག་དོན་དུ་རྩིས་ཁྲ་གཙང་མ་བཟོས་གནང་བར་ཐུགས་རྗེ་ཆེ། གོ་སྒྲིག་ཞུ་ཕྱོགས་དང་ཆོས་ཞུ་བ་ཚོར་ཞབས་ཞུའི་ཐད་ནས་མང་ཚོགས་ལ་དེ་ཙམ་འདོད་པ་ཁེངས་པ་ཞིག་བྱུང་མེད་ནའང་དེ་ནི་ཕྱོགས་གཉིས་ཀར་ཐུགས་ཁག་མེད་པ་ཞིག་རེད་འདུག